NAIIBA ang kaso ni dating Pangulong Rodrigo Duterte sa desisyon ng Korte Suprema kaugnay sa second placer .

Ayon kay Comelec Chairman George Garcia, hindi permanenteng nabakante ang posisyon ng dating pangulo bilang nanalong alkalde ng Davao City dahil nagkaroon lamang ng temporary vacancy.

Paliwanag ni Garcia, iba ang kaso ng Mangudadatu vs. COMELEC, na nagbabawal palitan ng second placer ang mga nadiskwalipikang kandidatong nanalo matapos makansela ang kanilang Certificate of Candidacy (COC).

Ayon kay Garcia, kabilang sa mga legal na dahilan para kanselahin ang isang certificate of candidacy (COC) ay ang isyu sa citizenship, residency, edad, hindi rehistradong botante, hindi marunong magbasa o magsulat, at paglabag sa three consecutive terms rule.

Aniya, kapag nakansela ang COC, nagkakaroon ng permanent vacancy kaya’t uupo ang nakatakdang successor.

Ibig sabihin, sa kaso ni Duterte, ang nanalong Bise Alkalde muna ang pansamantalang uupo bilang alkalde ng Davao City habang nakakulong ang dating Pangulo. (Gene Adsuara)

NA-RESCUE ng Manila Police District (MPD) ang isang 14 anyos na babae sa isang entrapment at rescue operation mula sa umano’y kaso ng human trafficking sa isang hotel sa Binondo, Maynila.

Ikinasa ang operasyon ng Women and Children Concern Section (WCCS) ng District Investigation and Detective Management Division (DIDMD) ng MPD sa koordinasyon ng Municipal Social Welfare and Developement (MSWD) Office at Meisic Police Station (PS-11).

Sa ulat, ang biktima na sinamahan ng kanyang magulang sa WCCS ay mula sa Caloocan City upang ireport ang umano’y pangbubugaw ng isang suspek na nakilalang Mary Grace Rivera santos , 18, kapalit ng halaga.

Ayon sa pulisya, ibinibugaw ni Santos ang biktima sa pamamagitan ng mga bookings sa mga kliyente kabilang sa mga Chinese national.

Kasunod ng inisyal na ulat, ang biktima ay dinala sa Philippine General Hospital (PGH) para sa medical at psychological examinations at kalaunan ay inilipat sa kustodiya ng MSWD.

Ikinasa ang entrapment operation nang tawagan ni Santos noong Hunyo 19 ang isang kliyente para sa bookings kinabukasan.

Sa kanyang mensahe, isang Wenlang Xu, 42, Chinese national at residente sa Binondo, Manila ang kliyente at humirit ng dalawang babae.

Nakipag-ugnayan ang mga operatiba sa building administrator ng le Chamber Hotel sa Binondo at pinasok ang room 6006.

Kapwa namang inaresto si Santos at ang Chinese national.

Kasong paglabag sa Anti-Trafficking in Person Act ang kinakaharap ng mga suspek na ngayon ay nasa kustodiya ng pulisya. (Gene Adsuara)

SA ilalim ng liderato at direksyon ni Presidente Bongbong Marcos Jr., siniguro ni Speaker Ferdinand Martin Romualdez sa publiko ang patuloy na paglalaan ng pondo ng kamara sa 20,000 new public school teaching positions sa 2026 national budget at mga susunod pang mga taon.

Sinabi ni Speaker Romualdez na sisiguruhin ng Kongreso na ang pondo para sa mga bagong teaching positions sa education sector sa pangunguna ni Education Sec. Sonny Angara ay mapupunan sa ilalim ng 2025 General Appropriations Act (GAA).

“All 20,000 new teaching items are about changing lives, not just addressing the shortage of teachers in our classrooms. Each position filled means a teacher in front of students who need guidance, and a Filipino family with a new source of income, dignity and hope,” ani Romualdez.

Kinumpirma ng Department of Budget and Management (DBM) na ang pondo ay magmumula sa Built-in Appropriations ng Department of Education (DepEd) sa ilalim ng “New School Personnel Positions” program para sa FY 2025.

Sinabi ng Speaker na bukod sa poprotektahan ng Kamara ang pondo sa pagpapatupad nito ay sisiguruhin ng Kongreso ang patuloy na paglalaan ng badget para dito sa 2026 budget at sa mga susunod pang taon.

Nagpaabot naman ito ng pasasalamat kay Pangulong Marcos sa kanyang commitment para palakasin ang education system at pagkilala sa reporma sa sektor ng edukasyon.

Gayundin, pinapurihan din nito si Angara sa kanyang hands-on approach at malalim na pang-unawa sa systemic challenges sa education sector.

“Secretary Angara brought not only data but vision, backed by years of legislative work on education. Under his leadership, we know these funds will be translated into real results on the ground,” ani Romualdez. (Vina de Guzman)

KINILALA ni Mayor Jeannie Sandoval at ng Schools Division Office – Malabon ang mga mag-aaral mula sa iba’t ibang paaralan sa lungsod na nagdala ng karangalan, kasunod ng kanilang tagumpay sa paglahok sa iba’t ibang patimpalak sa academic, sining at sports competitions ngayong taon.

“Tunay nating ipinagmamalaki ang mga Malabueñong mag-aaral na lumahok at nag-uwi ng tagumpay mula sa iba’t ibang patimpalak sa bansa. Ito ay patunay na ang mga Malabueño ay magagaling sa iba’t ibang larangan, maging sports man yan, journalism, o iba pa. Maraming salamat sa inyong dedikasyon, pagsasakripisyo at pagbibigay ng buong makakaya para sa ating lungsod,” pahayag ni Mayor Jeannie.

Kabilang sa mga awardees na binigyan ng certificates at cash prizes, sina Sophia Rose Garra mula sa De La Salle Araneta University na humakot ng 7 Gold Medals sa iba’t ibang swimming events sa Palarong Pambansa 2025; Chris Ivan Domingo na nag-uwi ng 3 Gold Medals para Palarong Pambansa 2025 running events; ang Tanghalang Bagong Sibol nakakuha ng 3rd place sa National Festival of Talents 2025: Balye sa Kalye; at mga estudyante na nagwagi sa National Press Conference, National Festival of Talents, Nestlé Wellness Campus Program, at Palarong NCR.

Dumalo rin sa seremonya na ginanap sa Malabon Sports Complex si SDO Superintendent Dr. Cecille G. Carandang, SDO officials, coaches at mga guro ng mga atleta.

“Congratulations sa ating mga mag-aaral na nagkamit ng iba’t ibang tagumpay sa mga kompetisyon na hindi lang sa ating lungsod kundi pambuong bansa. Ipinakita ninyo ang inyong puso at tunay na galing. Kayo ang halimbawa at inspirasyon ng mga Malabueño sa patuloy na pag-angat at sa pag-abot ng mga pangarap,” ani City Administrator Dr. Alexander Rosete. (Richard Mesa)

PCO Usec. Claire Castro
PCO PHOTO

IWINAKSI ng Malakanyang ang lumalagong public anxiety sa posibilidad ng isang global war.

Tiniyak ni Palace Press Officer at Presidential Communications Undersecretary Claire Castro sa press briefing sa Malakanyang na ganap na handa ang gobyerno para tumugon sa anumang kaganapan sa gitna ng tumataas na tensyon sa Gitnang Silangan.

Sa katunayan aniya ay inatasan ni Pangulong Ferdinand R. Marcos Jr. ang lahat ng kinauukulang ahensiya na iprayoridad ang proteksyon at kapakanan ng mga overseas Filipinos, lalo na iyong nasa high-risk areas.

“Ang gustong iparating ng Pangulo, handa po tayo sa anumang mangyayari. Lahat po ng kailangan ng taumbayan ay tutugunan po ng pamahalaan,” ang sinabi ni Castro.

“‘Wag po sila mag-alala dahil ang gobyerno ngayon ay nagtatrabaho para sa ating lahat,” aniya pa rin.

Ang pahayag na ito ng Malakanyang ay kasunod ng pagdagsa ng pangamba hinggil sa potensiyal na pag-usbong ng World War III, kapag ang labanan sa pagitan ng Israel at Iran ay patuloy na umigting.

Sinasabing, mas lalo kasing tumaas ang tensyon nang atakihin ng Amerika ang tatlong nuclear sites ng Iran kabilang ang underground uranium enrichment facility sa Fordo, napaulat na sinabi ni US President Donald Trump.

Sa isang post sa social media, sinabi ni Trump na nakumpleto ng Amerika at matagumpay ang kanilang naging pag-atake.

“We have completed our very successful attack on the three Nuclear sites in Iran, including Fordow, Natanz, and Esfahan,” sabi ni Trump.

Sinabi rin ni Trump na binagsakan ng mga bomba ang Fordow na itinuturing na “primary sites”.

Gumamit ang Amerika ng B-2 Spirit stealth bombers.

Ang B-2 ay isa sa most advanced strategic weapons platforms ng US.

“A full payload of BOMBS was dropped on the primary site, Fordow,” sabi ni Trump.

Winika pa rin ni Trump na great American warriors ang mga nambomba sa mga nuclear facilities na ligtas naman aniyang nakauwi.

Sa kabilang dako, nanawagan naman Department of Foreign Affairs (DFA) na maging mahinahon at pairalin ang diplomasiya.

“The Philippines continues to reiterate the need for a peaceful and diplomatic solution to this crisis,” ang sinabi ng departamento.

Inulit naman ni Castro ang mensaheng ito ng DFA, sinabi na suportado ni Pangulong Marcos ang pagsisikap na maiwasan ang giyera at panatilihin ang kapayapaan sa buong rehiyon.

“Ang panawagan din po ng Pangulo ay magkaroon po ng mapayapang pag-uusap at diplomacy para maibsan ang lumalalang gulo,” ayon kay Castro.

“Kailangan din pong manindigan para sa pandaigdigang kapayapaan para maging matatag ang global community,” ang pahayag pa rin ni Castro. (Daris Jose)