IPINAKILALA na ng publiko ang partial list ng Manila City Hall Department Heads sa ilalim ng administrasyon ni incoming Manila Mayor Francisco ‘Isko Moreno’ Domagoso.

Una sa listahan si dating Presidential Communication Office Secretary Cesar Chavez sa magiging opisyal ng bagong liderato ni Domagoso kakatawan bilang Chief of Staff (COS).

Si Chavez ay dati na ring COS ni Domagoso noong siya ay nanungkulan bilang alkalde ng lungsod noong 2019.

Magiging Secretary to the Mayor naman ang dating konsehal na si Manuel ‘Letlet’ Zarcal.

Si Atty. Wardee Quintos naman ang itatalaga sa Office of the City Administrator.

Magsisilbi naman bilang bagong Manila Public Information Office (Manila PIO) si E-Jhay Talagtag.

Sa Public Employment Service Office o PESO naman ilalagay si Hiroshi Umeda at Dale Evangelista sa Manila Sports Council.

Magbabalik naman sa Manila Department of Social Welfare si Jay dela Fuente na dati na ring hinawakan ang nasabing departamento sa panahon ng yumaong dating Manila Mayor Alfredo Lim.

Papalitan naman ni Cristal Bagatsing bilang head ng Department of Tourism Culture and Arts of Manila si Charlie Dungo o kilala bilang si ‘Mama Cha’.

Inaasahan na sa susunod na mga araw ay ilalatag na ang buong listahan ng mga department heads sa administrasyong Domagoso. (Gene Adsuara)

Sa pagsasalita sa harap ng Filipino community sa Osaka, Japan, sinabi ni Pangulong Marcos na gagawin lahat ng kanyang administrasyon ang makakaya nito para tiyakin ang “smooth” employment at deployment processes para sa mga OFWs.

“Masigasig din ang ating pakikipag-ugnayan sa iba’t ibang bansang tumatanggap ng ating manggagawa para makabuo ng bilateral labor agreement upang matiyak natin na ligtas at maka-tao ang trabaho at nabibigyan ng pagkakataong umunlad ang ating kababayan,” ang sinabi ni Pangulong Marcos.

Ani Pangulong Marcos, may mas magandang oportunidad ang naghihintay sa mga OFWs na naghahangad na bumalik na ng Pilipinas at manatili para sa kabutihan.

Aniya pa, ipagpapatuloy ng gobyerno ang pagpapatupad ng mga programa, proyekto at serbisyo na naglalayong protektahan at i-promote ang kapakanan ng mga OFWs.

“I recognize the weight of your sacrifice and the strength that it takes to provide for your families from afar. And that is why we will never tire of honoring you and finding ways to improve your lives. You are at the heart of our government’s efforts and you deserve not only our gratitude, but you deserve our full support,” aniya pa rin.

Gayundin, kinilala naman ni Pangulong Marcos ang mahalagang papel ng Filipino-Japanese youth sa pagpapanatili ng “dynamic and enduring ties” ng Pilipinas sa Japan.

Kumpiyansang sinabi ng Punong Ehekutibo na ipagpapatuloy ng dalawang bansa ang pagtataguyod ng “mutually stable, secure and prosperous relationship.”

“Through you, we continue to write new pages in the history of the relations between our two countries. Through you, the spirit of friendship with our Japanese friends continues to thrive,” ang winika ni Pangulong Marcos.

“This is why I hope you will join me and the Philippine nation in helping our community here in Japan to grow even more in love with the Philippines, to learn and embrace fully your Filipino identity, to support our nation’s aspirations for unity, for peace, and for prosperity,” litanya nito.

Si Pangulong Marcos ay nagkaroon ng four-day working visit sa Osaka, Japan kasunod ng imbitasyon ni Japanese Prime Minister Ishiba Shigeru na dumalo siya sa World Expo 2025 at bisitahin ang Philippine Pavilion.

Nagkaroon din ang Pangulo ng serye ng pakikipagpulong sa mga Japanese tourism at business leaders doon. (Daris Jose)

BINALAAN ni Navotas City Representative Toby Tiangco ang publiko sa tumataas na paggamit ng artificial intelligence (AI) sa mga scam at hinimok ang  lahat na manatiling alerto.

“Nakakalungkot dahil habang umaangat ang ating teknolohiya, nagiging high tech na rin ang mga scammers,” ani Tiangco, chairman ng Information and Communication Technology (ICT) ng Kamara.

Binanggit niya ang dumaraming ulat ng AI na ginagamit upang lumikha ng mga pekeng transaction slip, na ipinapadala ng mga scammer para linlangin ang mga individual at may-ari ng negosyo.

“Paalala po sa ating mga kababayan, pati na rin sa mga negosyo, huwag basta-basta maniwala sa ipinapakitang resibo ng transaksyon. Mag-double check, mag-validate, dahil kayang-kaya na ngayong gumawa ng pekeng slip gamit ang AI,” pahayag niya.

Ipinag-alala din niya ang pagtaas ng romance at investment scams na ginawang mas nakakumbinsi sa pamamagitan ng AI-generated videos at images.

“May mga scam ngayon kung saan may ka-video call ka pa. Akala mo totoo ang kausap mo, pero AI-generated na pala ang mukha at boses,” sabi ng kongresista.

“Nakakatakot dahil napakadali nang manlinlang ngayon. Ginagamit pa ang mukha ng mga kilalang tao para manlinlang ng iba. Kaya tandaan natin, kung sobrang ganda ng offer, malamang scam na ‘yan,” dagdag niya.

Binigyaang-diin ni Tiangco ang pangangailangang protektahan ang publiko at bigyang babala sa mga nasa likod ng naturang mapanlinlang gawain.

“Itigil na po ang ganitong mga gawain dahil sa oras na mahuli kayo ng kinauukulan, maaari kayong sampahan ng kasong paglabag sa Cybercrime Prevention Act, pati na ang Anti-Financial Scamming Act na magdudulot ng 12 hanggang 20 taon na pagkakakulong,” babala ng mambabatas. (Richard Mesa)