MAGKASUNOD na sinilbihan ng Northern Police District (NPD) ng warrant of arrest ang dalawang ginang sa loob ng Correctional Institution for Women sa Mandaluyong City.

Unang nagtungo ang mga tauhan ni NPD Director P/BGen. Josefino Ligan sa selda ng 69-anyos na lola dakong alas-5:45 ng hapon upang isilbi ang warrant of arrest na inilabas noong Oktubre 19, 2021 ni Tanauan City, Batangas Regional Trial Court (RTC) Presiding Judge Nevic Cordillo Adolfo ng Branch 53 para sa kasong paglabag sa na-amiyendahang Migrant Workers and Overseas Filipino Act of 1995.

Nakakulong sa naturang piitan ng mga babae sa F. Martinez Avenue, Mauway, Mandaluyong City ang lolang akusado matapos maaresto dahil naman sa kinakaharap na kasong Syndicated Illegal Recruitment sa ilalim ng R.A.8042.

Dakong alas-6:00 ng gabi nang isilbi naman ng mga operatiba ng NPD sa 42-anyos na ginang ang warrant of arrest na inilabas noong Hunyo 8, 2021 ni Taguig City RTC Presiding Judge Marivic Cudilla Vitor ng Branch 266 dahil sa kasong illegal possession of dangerous drug.

Ang ginang ay nakulong sa naturang pasilidad dahil din sa kinakaharap na kasong paglabag sa R.A. 9165 o ang Comprehensive Dangerous Durg Act of 2002.

Sa dalawang magkasunod na operasyon, sinabi ni BGen. Ligan na gumamit ng body camera at alternatibong recording device sina Lt. Col. Alain Terence Licdan, hepe ng District Special Operations Unit (DSOU), bilang pagsunod sa iniatas na panuntunan ng Korte Suprema. (Richard Mesa)

INARESTO ng mga tauhan ng National Bureau of Investigation (NBI) ang isang dating kandidato sa pagka-alkalde sa Baguio City .

Sinabi ni NBI Director Jaime Santiago sa isang pahayag na ang pag-aresto Kay Mark Andrew Directo ay nag-ugat sa patong patong na reklamong estafa dahil sa falsification ng mga dokumento laban sa kanya.

Ayon sa NBI, sa nasabing reklamo ay inakusahan si Directo nang pagpapanggap umano na nagmamay-ari siya ng ilang condominium buildings at villas sa Clark Freeport Zone at Baguio City na kanyang ibinenta para may magamit na pondo sa kampanya

Pinangakuan umano nito ang mga complainant na bibigyan ng bahagi sa kikitain ng ilang proyekto nito sa Clark Freeport Zone at Baguio City kapalit ng pagpondo sa kanyang mayoralty bid.

Ayon sa NBI, may warrant of arrest na rin laban kay Directo na inisyu ng Baguio City RTC kung saan may nagsampa na rin sa kanya ng kasong estafa.

(Gene Adsuara)

NAGWAKAS na ang sampung taon na pagtatago bago ng 42-anyos na kelot na nahaharap sa kasong panggagahasa matapos matiklo ng pulisya nang bumalik sa kanilang lugar sa Valenzuela City, kamakalawa ng gabi.

Walang inaksayang panahon ang mga tauhan ni Valenzuela Acting Police Chief P/Col. Relly Arnedo nang matanggap ang impormasyon na muling namataan ang puganteng si alyas “Palos” sa kanilang lugar sa Brgy. Malinta kaya’t ikinasa kaagad ang police operation.

Ayon kay Northern Police District (NPD) Director P/BGen. Josefino Ligan, may bitbit na warrant of arrest ang mga operatiba ng Warrant and Subpoena Section at Station Intelligence Section nang isagawa ang pagsalakay sa bahay ng pugante dakong alas-9:30 ng gabi.

Ang warrant of arrest ay inilabas noon pang Disyembre 3, 2015 ni Valenzuela City Regional Trial Court (RTC) Presiding Judge Nancy Rivas-Palmones ng Branch 172 laban kay alyas Palos para sa kasong Rape ng walang inirekmendang piyansa para sa sa kanyang pansamantalang paglaya.

Pansamantalang nakapiit sa Custodial Facility Unit ng Valenzuela Police Station ang akusado habang hinihintay pa ang ilalabas na commitment order ng hukuman para sa paglilipat sa kanya sa Valenzuela City Jail. (Richard Mesa)

NASAMSAM ng mga ahente ng  National Bureau of Investigation (NBI) ang nasa P20 milyong halaga ng illegal na droga sa isinagawang operasyon sa Davao City nitong Linggo ng madaling araw.

Sinabi ng NBI na ang nasabing mga droga ay nasamsam sa isang residential unit sa Emily Homes, Cabantian.

Ikinasa ang operasyon ng mga operatiba ng NBI Southeastern Mindanao Regional Office (NBI SEMRO XI) sa pangunguna ni  Regional Director Arcelito C. Albao sa koordinasyon ng  Philippine Drug Enforcement Agency (PDEA) Region XI.

Gayunman, hindi binanggit ng NBI ang mga pangalan ng mga naaresto sa operasyon.

Nasamsam ang 1.575 kilo ng methamphetamine hydrochloride o shabu na nagkakahalaga ng P17.325 milyon; 4.885 kilo ng kush na nagkakahalaga ng P5.86 milyon; isang hanay ng mga produktong nakabatay sa cannabis; Malaking Punong Bayabas live resin; Sluggers HIT disposables; mga heat sealer at mga tool sa repackaging; at mga delivery boxes mula sa Foodpanda at Maxim na ginamit upang itago ang distribusyon ng droga.

Ayon sa NBI, inilunsad ang operasyon matapos makatanggap ng report na ang isang residential unit ay ginagamit bilang isang hinihinalang repacking at distribution hub para sa illegal na droga. (Gene Adsuara)