MALUGOD na tinanggap ni dating DILG Secretary Benjamin “Benhur” Abalos Jr. ang pagkakatalaga ni Pangulong Ferdinand Marcos Jr. kay Major General Nicolas Torre III bilang bagong hepe ng Philippine National Police, na kanyang inilarawan bilang isang “taong may integridad at aksyon” na may kakayahang pamunuan ang mahigit 230,000 tauhan ng pulisya.

Si Torre, isang miyembro ng PNPA Class of 1993, ay huling naglingkod bilang direktor ng Criminal Investigation and Detection Group (CIDG), kung saan pinangunahan niya ang mga high-profile na operasyon sa ilalim ng pamamahala ni dating DILG Secretary Abalos kabilang ang pagtugis at pag-aresto kay Apollo Quiboloy noong 2024.

Ayon kay Abalos, na nagpatnubay sa mga koordinadong hakbang upang mapanagot si Quiboloy, si Torre ay “kalma sa gitna ng presyon at matibay sa aksyon,” dagdag pa niya na “buo ang kanyang integridad at tapang sa misyon na iyon.”

Binanggit ni Abalos na ang papel ni Torre sa pag-aresto kay Quiboloy ay nagpapakita ng kanyang “di matitinag na pagsunod sa batas, anuman ang pagiging sensitibo o mataas na profile ng kaso.”

Bilang dating chairman ng NAPOLCOM, naalala ni Abalos na si Torre, noong siya ay pinuno ng pulisya sa Lungsod Quezon, ay kinilala bilang isang natatanging hepe dahil sa pagpapasimula ng paggamit ng drone upang mapabuti ang pagtugon at pagmamanman ng pulisya.

“Ang ganitong uri ng pamumuno ang kinakailangan ng PNP sa panahon ngayon,” aniya.

Pinalitan ni Torre si General Rommel Francisco Marbil.

Nagpasalamat din si Abalos kay Marbil sa kanyang serbisyo, lalo na sa pagpapabuti ng internal na reporma at pagbibigay-diin sa community policing.

“Naglingkod si General Marbil nang may dangal at propesyonalismo. Ang kanyang mahinahon at nakatutok na pamumuno ay nakatulong sa pagpapapanatag ng puwersa sa gitna ng mahihirap na panahon,” ani Abalos.

Sa ilalim ng kanyang pamamahala, isinulong ni Marbil ang mga inisyatiba upang gawing moderno ang mga operasyon ng pulisya at palakasin ang tiwala ng publiko, ayon kay Abalos.

“Bilang dating Kalihim ng DILG, ipinagmamalaki kong nakatrabaho ang dalawang lider na may integridad sina General Marbil at General Torre,” ani Abalos. “Ang kanilang pamumuno, propesyonalismo, at dedikasyon sa serbisyo publiko ay ang hinahanap ng PNP at ang nararapat para sa ating bayan.” (PAUL JOHN REYES)

NILINAW ng Departament of Foreign Affairs (DFA) na mayroon lamang na isang aktibong pasaporte si dating Presidential spokesperson Harry Roque.

Sa katunayan, ang pinakabagong pasaporte ni Roque ay ipinalabas noong 2024, at balido hanggang July 2034.

“The DFA can confirm that Mr. Harry Roque holds only one valid regular Philippine passport. All other previously issued under his name have been duly cancelled in accordance with existing rules and regulations,” ang sinabi ng departamento.

Samantala, ang diplomatic passport ni Roque na ipinalabas sa administrasyong Duterte ay napaso na noong Disyembre 2022.

Ang paglilinaw na ito ng DFA ay tugon sa naging kautusan ni Justice Secretary Jesus Crispin Remulla sa kanila na kanselahin ang pasaporte ni dating Malacañang Spokesperson Atty. Harry Roque, kasunod ng paglabas ng warrant of arrest ng korte laban sa kaniya.

Ayon kay Remulla, may dalawa o tatlong pasaporte si Roque.

Bawal aniya ang pagkakaroon ng mahigit sa isang regular Philippine passport.

Maaaring ito aniya ang dahilan kung bakit nagawa ni Roque na makaalis ng bansa.

Pero nasabi rin ng Kalihim na dumaan ng Tawi-Tawi si Roque at gumamit ng speed boat para makapunta ng Malaysia.

Si Roque, tinawag namang fake news ang sinabi ni Remulla.

Ayon dito, isang pasaporte lang ang gamit niya at kasalukuyan itong nasa Dutch authorities dahil sa kaniyang asylum application.

Habang ang kanyang isang pasaporte ay hindi na rin nagagamit dahil puno na ito o wala ng blankong pahina.

Ang kanyang diplomatic passport naman, matagal na aniyang hindi ginagamit dahil wala na siya sa gobyerno.

Ang panawagan ngayon ni Roque: mag-ingat ang publiko sa mga ipinakakalat na hindi totoong balita tungkol sa kaniya na ginagawa aniya ng Marcos government para siraan siya.

Samantala, si Roque ay nahaharap sa qualified at regular human trafficking cases na nakahain sa Angeles City RTC, may kaugnayan sa di umano’y pagkakasangkot nito sa illegal POGO.

(Daris Jose)

BINALAAN ng Presidential Communications Office (PCO) ang publiko laban sa mga scammers na gumagamit ng pekeng Facebook account na nagpapanggap na attached agency nito, ang Radio Television Malacañang (RTVM), para makapag-solicit ng online investments.

“A fake Facebook page posing as the official account of Radio Television Malacañang (RTVM) has been found circulating scam content that falsely links the agency to an online investment scheme,” ayon sa kalatas ng PCO.

“The fraudulent page copied RTVM’s official name and profile picture, mimicking the look of a legitimate government page to deceive users. The posts on the fake page encouraged the public to participate in supposed investment opportunities, which is a common tactic in online fraud,” dagdag na pahayag ng PCO.

Sinabi pa ng PCO na ang lehitimong Facebook page ng RTVM ay mayroong ‘verified blue badge’ na matatagpuan sa lehitimong government pages, habang ang ‘impostor account’ ay hindi verified, mayroong mababang follower at engagement metrics, at naglalaman ng content sa labas ng official scope ng state-run agency.

Sa kabilang dako, pinasinungalingan na ng RTVM ang unverified Facebook account na may misleading contents, nanawagan sa publiko na maging bigilante laban sa ‘fraudulent pages o indibiduwal’ na nagpapanggap na taga-ahensiya.

Tiniyak ng RTVM na “it does not, and will never engage in such malicious acts,” sabay binigyang diin na hindi ito kailanman masasangkot sa “solicit or accept any form of monetary contribution or financial participation from the public.”

“We apologize for any confusion or inconvenience that this may have caused,” ang sinabi ng RTVM sa isang Facebook post. “RTVM urges everyone to be vigilant and critical when consuming online contents, particulary from unverified and unofficial social media accounts.”

Sa kabilang dako, hinikayat naman ng PCO ang publiko na sumunod lamang sa mga verified government pages upang makakuha ng tamang impormasyon.

Hinikayat din ng PCO ang publiko na palaging tingnan ang blue check mark na tanda ng ‘verified page; i-check ang official links, post history, at ang consistent branding; at kagyat at direktang i-report ang kahina-hinalang accounts sa pamamagitan ng Facebook’s platform.

“The PCO is also calling on social media platforms to strengthen their systems for detecting and removing impostor pages, especially those exploiting the names of public institutions,” ayon sa PCO.

“The public is advised to report any misleading or potentially harmful content and remain cautious of unsolicited messages that promise returns or ask for financial contributions,” ang sinabi pa rin nito. (Daris Jose)

TIKLO ang isang lalaki na sangkot umano sa illegal drug trade matapos kumagat sa ikinasang buy bust operation ng pulisya sa Valenzuela City, kamakalawa ng gabi.

          Sa ulat ni P/Capt. Joan Dorado, hepe ng Station Drug Enforcement Unit (SDEU) ng Valenzuela police kay P/Col. Relly Arnedo, OIC Chief ng VCPS, nakatanggap sila ng impormasyon hingil sa umano’y illegal drug activities ni alyas “To”, 36, residente sa lungsod.

          Nang magawang makipagtransaksyon sa suspek ng isa sa mga tauhan ni Capt. Dorado, agad siyang bumuo ng team bago pinangunahan ang ikinasang buy bust operation sa koordinasyon sa PDEA.

          Matapos matanggap ang signal mula sa kanyang kasama na nagpanggap na poseur-buyer na hudyat na  positibo na ang transaksyon, agad lumapit ang back-up na operatiba saka inaresto ang suspek dakong alas-11:35 ng gabi sa Brgy. Karuhatan.

          Nasamsam sa suspek ang nasa 20 grams ng suspected shabu na may estimated street value na P136,000, at buy bust money na binubuo ng isang tunay na P500 bill at 14 pirasong P500 boodle money.

          Ayon kay SDEU investigator P/MSgt. Ana Liza Antonio, kasong paglabag sa Sections 5 at 11, under Article II ng R.A 9165 o ang Comprehensive Dangerous Drugs Act of 2002 ang isasampa nila laban sa suspek sa Valenzuela City Prosecutor’s Office.

Pinuri naman ni P/BGen. Josefino Ligan, District Director ng Northern Police District, ang mga operatiba ng Valenzuela City Police Station para sa kanilang dedikasyon at matagumpay na drug operation. (Richard Mesa)

HINDI nagtagumpay sa kanilang masamang balak ang dalawang holdaper nang manlaban ang bibiktimahin nilang isang Indian national na kahit may tama na ng bala ang biktima sa Malabon City, Miyerkules ng hapon.

Kitang-kita sa kuha ng CCTV ang pagkaripas ng takbo ng dalawang holdaper nang matumba ang kanilang motorsiklo matapos silang paghahampasin ng helmet ng 35-anyos na negosyanteng Bumbay na kanilang binaril at tinangkong holdapin sa loob mismo ng bahay nito sa Brgy. Tugatog, dakong ala-1:19 ng hapon.

Hindi ininda ng biktima ang tama ng bala sa kaliwang braso at mag-isang nagtungo sa Manila Central University (MCU) Hospital upang magpagamot.

Nakita pa sa CCTV nang balikan ng mga suspek ang gamit na motorsiklo subalit, hindi na nila ito mapaandar kaya itinulak na lang hanggang magpasiyang sumakay ng e-trike at iwanan sa hindi kalayuan ang motorsiklo na pag-aari ng asawa ng isa sa dalawang suspek.

Sa isinagawang follow-up operation, nadakip kaagad nina Malabon police chief P/Col. Jay Baybayan ang mga suspek na sina alyas “Aries”, 25, at alyas “Taurus” 32, sa Yanga St. Brgy. Maysilo nang ituro ng driver ng e-trike na sinakyan kung saan nagpahatid ang dalawa.

Sa ginanap na press conference na pinangunahan ni National Capital Region Police Office (NCRPO) Regional Director P/MGen. Anthony Aberin sa headquarters ng Northern Police District (NPD), sinabi niya na hindi nila hahayaan ang mga banyaga o sinumang tao na mabalot ng takot sa sariling tahanan.

Ayon naman kay NPD Director P/BGen. Josefino Ligan, may dati ng kaso ng panghoholdap sa isa ring Bumbay si alyas Aries sa Valenzuela City noong 2022, bukod pa sa mga kinasangkutang pagnanakaw, attempted robbery, serious physical injury, at ilegal gambling.

Nakilala ni alyas Aries ang kasabuwa na si alyas Taurus sa loob ng selda matapos makulong din ang huli sa kaso ring panghoholdap at ilegal gambling. Bigo naman ang pulisya na mabawi ang baril na ginamit ng dalawa.

May hinala rin si BGen. Ligan na may financer sa paggawa ng krimen ang mga suspek dahil mabilis na nakakapaglagak ng piyansa ang mga ito para muling gumawa ng panghoholdap. (Richard Mesa)