“In relation to the prosecution, personally I can’t speak for everyone else, but we have to take it with a grain of salt. Nakita rin po natin kung anong resulta ng survey sa ating senatorial election. Surprised, No. 2 Sen. [Bam] Aquino, and we also have Sen. [Kiko] Pangilinan among others, so iyon, I really take surveys with a pinch of salt right now,” ani 1-RIDER Party-list Rep. Rodge Gutierrez.

Tinukoy ni Gutierrez ang hindi inaasahang kinalabasan ng May 2025 senatorial elections, kung saan nakuha nina dating senador Bam Aquino at Kiko Pangilinan, kapwa mababa sa pre-election surveys, ang pumasok sa may matataas na boto.

Sa Pulse Asia “Pulso ng Bayan” survey, na ginawa noong May 6 hanggang 9 sa may 1,200 registered voters, na 50% ang hindi pabor sa paghahain ng impeachment complaint, 28% ang pabor at 21% naman ang undecided. Ang survey ay may ±2.8 percentage point margin of error.

Hindi naman nito kinuwestiyon ang integridad ng Pulse Asia.

“I won’t say biased. Supposedly there is some statistical reasoning behind it,” pahayag nito.

Sa kabila na lumilitaw sa survey na maraming Pinoy ang kontra impeachment, iginiit ni Gutierrez na nanatili ang tungkulin ng prosecution panel na ipresenta ang mga ebidensiya at patunayan ang kanilang kaso saSenate impeachment court.

Na-impeach si VP Sara Duterte ng kamara noong February 5, 2025, dahil sa mga kaso ng culpable violation of the Constitution, betrayal of public trust, graft and corruption, at iba pang high crimes.

Nag-ugat ang kaso sa alegasyon ng misuse sa P612.5 milyong confidential funds—P500 million sa ilalim ng Office of the Vice President at P112.5 million sa ilalim naman ng Department of Education (DepEd)—habang nanunungkulan si Duterte bilang VP at Education Secretary.

Nakatakdang mag-convene ang senado bilang impeachment court sa June 2, 2025, para simulan ang trial proceedings. Nangangailang ng two-thirds ng boto para ma-convict at matanggal si Duterte mula sa kanyang opisina. (Vina de Guzman)

PINABUBUSISI ni 1-Rider Party List Rep. Ramon Rodrigo Gutierrez ang ipinatupad na No Contact Apprehension Policy (NCAP) dahil sa ilang hindi pa nareresolbang isyu na naging sanhi para magkaroon ng kaguluhan sa mga motorista, partikular ng mga motorcycle riders.

Ang NCAP, ay dinisenyo upang magpatupad ng mga traffic regulations sa pamamagitan ng automated camera systems. Inulan ito ng ilang isyu kabilang na ang hindi malinaw na guidelines sa vehicle ownership transfers, inconsistent enforcement, at reklamo ukol sa hindi malinaw na road signages.

Dahil sa mga hindi pa nareresolbang isyu ay nauwi ito sa kalituhan, unfair penalties, at delays para sa epektibong pagpapatupad ng programa na nakaapekto sa mga riders at iba pang road users.

Sinabi ni Gutierrez na kailangan munang matugunan ang mga naturang isyu bago sana naipatupad ang NCAP.

“The intention behind NCAP is commendable, but the lifting of the TRO does not cure the existing problems. Its current implementation is flawed and unfairly impacts our motorists. We need clear road signages, transparent ownership transfer processes, and a system that respects due process to ensure fairness,” anang mambabatas.

Hinikayat pa nito ang Kamara na imbestigahan ang kahandaan ng MMDA sa pagpapatupad ng NCAP at pagkaka-delay sa implementasyon ng naturang programa.

“Our initial talks with the LTO seem to confirm our concerns that the systems in place are not ready. We cannot allow a system meant to promote road safety to create more problems for our citizens. I am calling for a delay in NCAP’s implementation until the MMDA can demonstrate its readiness and address these critical issues,” pahayag ni Gutierrez. (Vina de Guzman)

PARA mabawasan ang epekto ng patuloy na mainit at tagtuyot, sinimulan ng Pamahalaang Lungsod ng Malabon ang pagpapatakbo ng tatlong high-powered water pressure washers upang linisin at palamigin ang mga kalsada, parke, at iba pang pampublikong lugar.

“Gamit ang mga power washer na ito, sinimulan po natin ang pagbobomba ng tubig sa iba’t ibang bahagi ng lungsod, partikular sa mga daanan at mga parke. Ito ay upang makatulong sa pagbawas sa epekto ng tag-init at masiguro ang kalusugan ng mga residente. Gayundin ay makakapagdilig tayo ng mga halaman at puno na siyang tumutulong sa pagkakaroon ng mas maaliwalas na kapaligiran,” ani Mayor Jeannie.

Ang inisyatibang ito, sa pangunguna ng Malabon Disaster Risk Reduction and Management Office, na inuuna ang mga lugar na may matinding foot traffic tulad ng mga pampublikong pamilihan, bangketa, at mga pangunahing parke. Kasama sa mga target na lokasyon ang Malabon Center Island, Malabon Landmark, Catmon People’s Park, at Hulo Plaza.

“Kasabay ito ng ating patuloy na paglilinis sa mga lugar para naman maiwasan ang pagbabaha kung sakaling dumating panahon ng tag-ulan. Kaya po makasisiguro ang mga Malabueno na tayo ay nakahandang umalalay ano man ang panahon,” dagdag ng mayora.

Isinasagawa ang operasyon kasabay ng mga regular na cleanup drive na isinasagawa ng City Environment and Natural Resources Office (CENRO), na nakatuon sa mga kalsada, parke, at daluyan ng tubig.

Binigyang-diin ni Mayor Jeannie na ang pagsisikap na ito ay bahagi ng isang mas malaking kampanya upang itaguyod ang pampublikong kalusugan at kalinisan sa mga buwan ng tag-init.

“Bukod sa pagpapalamig ng ating mga kalsada, ito rin ay isang hakbang para maiwasan ang pagkalat ng mga sakit na nagmumula sa maruruming kapaligiran,” aniya. (Richard Mesa)

SHOOT sa selda ang 44-anyos na lalaki matapos inguso sa pulisya na may dalang baril habang gumagala at makuhanan pa ng shabu sa Malabon City, kahapon ng madaling araw.

          Sa ulat ni Malabon police chief P/Col. Jay Baybayan, nakatanggap sila ng impormasyon mula sa isang concerned citizen hinggil sa isang lalaki na may dala umanong baril habang gumagala sa Katipunan St. Brgy. Bayan Bayanan.

          Kaagad rumesponde sa lugar ang mga tauhan ng Malabon Police Sub-Station 7 kung saan nakita nila ang suspek na may bitbit na baril kaya maingat nila itong nilapitan bago sinunggaban dakong alas-3:20 ng madaling araw.

          Nakumpika sa suspek na si alyas “Dave”, ng Brgy. Baritan ang isang improvised firearm (pen gun) na kargado ng isang bala at nang kapkapan, ay nakuha pa sa kanya ang isang plastic sachet ng hinihinalang shabu na nagkakahalaga ng P6,800.

          Mahaharap ang suspek sa kasong paglabag sa R.A 10591 (Comprehensive Law on Firearms and Ammunition), in relation to Batas Pambansa Blg. 881 (Omnibus Election Code), at R.A 9165 (Comprehensive Dangerous Drugs Act of 2002).

Pinuri naman ni P/BGen. Josefino Ligan, District Director ng Northern Police District (NPD), ang mabilis na pagtugon at mapagpasyang aksyon ng mga tauhan ng Malabon CPS para sa kaligtasan ng publiko at pag-iwas sa krimen. (Richard Mesa)

IBINALIBAG sa selda ang isang lasing na lalaki matapos maghasik ng takot makaraang magwala at maghamon ng away habang armado ng baril sa Navotas City, kahapon ng madaling araw.

          Ayon kay Navotas police chief P/Col. Mario Cortes, nakatanggap sila ng impormasyon mula sa isang concerned citizen hinggil sa ginagawang panggugulo ng isang lasing na lalaki sa Champaca Street.

Agresibo din nitong hinahamon ng suntukan ang mga bystander habang winawasiwas ang hawak na baril na dahilan upang magdulot ng labis na pangamba sa mga residente sa lugar.

Agad namang rumesponde sa lugar ang mga tauhan ng Navotas Police Sub-Station 2 na nagresulta sa pagkakaaresto sa suspek na si alyas “Jeffrey”. 24, dakong alas-5:20 ng madaling araw.

          Nakuha sa suspek ng mga tauhan ni Col. Cortes ang isang kalibre .38 revolver na kargado ng dalawang bala at nang hanapan siya ng mga dokumento hinggil sa legalidad nito ay wala siyang naipakita.

          Sasampahan ng pulisya ang suspek ng kasong paglabag sa Article 155 (Alarms and Scandals), R.A 10591 (Comprehensive Law on Firearms and Ammunition), at Batas Pambansa Blg. 881 (Omnibus Election Code) sa Navotas City Prosecutor’s Office. (Richard Mesa)

ARESTADO sa bisa ng arrest warrant ang ikatlo sa ap akusado sa pagpatay sa isang pulis noong June 19,2015

Sa rekord ng Manila Police District (MPD), sampung taon nagtago sa batas ang akusado sa aksong pagpatay kay Police Officer 3 Ronald Leonardo .

Si Leonardo ay dating naka-assign bilang operatiba ng follow-up section ng MPD na dating Anti-Crime Unit.

Sa impormasyon, tinatrabaho umano ng operatiba ang grupo ng mga akusado na sangkot sa mga serye noon ng holdapan bukod pa sa pagkakasangkot sa illegal na droga, at nakawan.

Gayunman, natunugan ito ng mga akusado kaya inabangan si Leonardo habang pauwi na sa kanilang bahay.

Siya ay nagtamo ng tama ng bala sa dibdib.

Ayon sa MPD, una nang naaresto noong 2017 ang dalawa s apat na akusado kabilang ang isa na itinurong gunman.

Itinanggi naman ng naarestong akusado ang krimen ngunit itinuro ang master mind na si alyas Michael Flores. (Gene Adsuara)

SINABI ni incoming Manila Mayor Isko Moreno Domagoso ang malaking ‘unpaid debts’ na kanyang dadatnan sa kanyang pag-upo sa Hunyo 30 .

Base sa inisyal na report, ibinulgar at idinetalye ni Domagoso ang umano’y mga hindi pa babayarang commercial o supplier debts na hindi binayaran ng kanyang papalitang administrasyon.

Nagpahayag ng seryosong pag-aalala si Domagoso sa aniya ay matinding pagpapabaya sa paghawak ng mga obligasyong ito.

“Ang tanong, may corruption ba? Hindi ko pa masasagot yan for now kasi ayokong mag-judge ng tao. Ang ginagawa ko lang, nag-a-assess ako base sa facts,” dagdag pa niya.

Sinabi ni Domagoso na malinaw na senyales ng malalang kapabayaan ng mga responsibilidad kung totoo ang mga hindi nababayarang utang na ito.

Nagtungo na rin sa Manila City Hall ang kanyang transition team para mangalap ng mga kakailanganing dokumento para sa maayos na pagsasalin ng liderato.

Sa nasabing report at dokumentong natanggap ng incoming mayor, sinasabing nasa 8-11 bilyong piso ang iiwang unpaid commercial obligation ng outgoing mayor.

Ang mga bayaring ito ay mula sa mga commercial obligation na kinuha ng lungsod sa panahon ng kasalukuyang administrasyon at hindi pa nila binabayaran hanggang sa ngayon kahit mayroong pondo na nakalaan para dito.

Kabilang rito ang janitorial, security at mga sa supplier ng gamot, at cakes kaya naman malaking katanungan ngayon kong saan napunta ang pera ng lungsod.

Gayundin ang office supplies, kontrata sa basura,kuryente at tubig, manpower services at marami pang iba.

” I just found out a few days ago the supplier of cake under their watch was not paid [for] 19 months– 145 million pesos. [Sa guwardiya [ay] 110 million pesos ,[at] gamot is about 1.4 billion pesos. There’s so much negligence”, pahayag ni Domagoso.

Dagdag pa ni Yorme na mayroong mga Certificate of Availability of Funds (CAF) o nakalaang pondo para dito ngunit hindi napunta ang pera sa mga dapat bayaran na obligasyon ng lungsod.

Nangako naman ang incoming mayor na aayusin niya ang mga isyung ito nang may transparency at accountability.(Gene Adsuara)