NAIS ni Pangulong Ferdinand Marcos Jr. na matiyak ang lahat ng tulong na ipagkakaloob sa mga filipinong apektado ng festival attack sa Vancouver, Canada.

”Opo. Dahil ito po ay kapwa Filipino, minadali po kaagad na matulungan, ibigay po ang lahat ng maaaring maitulong, lahat ng koneksiyon sa mga Filipino na nadamay po dito sa trahedya po sa Vancouver,” ang sinabi ni Presidential Communications Undersecretary at Palace Press Officer Claire Castro sa press briefing sa Malakanyang.

Umabot na kasi sa 11 katao ang namatay, habang marami rin ang nasugatan matapos araruhin ng isang sasakyan ang isang street party na nagdiriwang ng Lapu-Lapu Day.

Sinabi naman ng Department of Migrant Workers na nakahanda ito na magbigay ng tulong at suporta sa mga biktima sa insidente alinsunod sa mandato nito na tiyakin ang kaligtasan at kapakanan ng mga overseas Filipino workers.

Sa kabilang dako, nagpahayag ng simpatiya si Pangulong Marcos sa pamilya ng mga biktima, sabay sabing ang Philippine Consulate General sa Vancouver ay nakikipagtulungan sa Canadian authorities upang matiyak ang masusing imbestigasyon sa insidente.

Nagpahayag naman ng pagkabahala ang Philippine Consulate General ukol sa insidente, sabay sabing ipinagdarasal nito ang komunidad na manatiling matatag at resilient. (Daris Jose)

MATATAG  pa rin ang lamang ni Francisco “Isko Moreno” Domagoso sa karera sa pagka-alkalde ng Maynila, base sa pinakabagong survey ng OCTA Research.

Sa survey na isinagawa noong Abril 20 hanggang 23, nakakuha si Domagoso ng 63% voter preference, malayo sa 18% ni Mayor Honey Lacuna at 16% ni Rep. Sam Versoza.

Ayon sa OCTA, kahit pagsamahin ang boto nina Lacuna at Versoza, hindi pa rin nito matatalo ang suportang tinatamasa ni Isko sa lahat ng anim na distrito ng lungsod.

Bilang bahagi ng kanyang kampanya, nangako si Domagoso na ibabalik ang kalinisan, kaayusan, at disiplina sa Maynila.  (Gene Adsuara)

UMABOT sa mahigit P155K halaga ng shabu ang nasamsam sa dalawang tulak ng droga na naaresto ng pulisya sa magkahiwalay na buy bust operation sa Malabon at Navotas Cities.

          Sa ulat, ikinasa ng mga tauhan ni Malabon police chief P/Col. Jay Baybayan ang buy bust operation, sa koordinasyon sa PDEA kontra kay alyas “Nico”, 20, ng Pampano St., Brgy. Tonsuya, nang magpositibo ang tanggap na impormasyon hinggil sa pagbebenta ng droga ng suspek.

          Nang tanggapin ang marked money mula sa isang pulis na nagpanggap na buyer, kapalit ng isang sachet ng shabu ay agad sinunggaban ang suspek ng mga operatiba ng Station Drug Enforcement Unit (SDEU) dakong ala-1:50 ng madaling araw sa Dulong Roque, Brgy. Tonsuya.

          Nakumpiska ng mga tauhan ni Col. Baybayan sa suspek ang nasa 12.5 grams ng hinihinalang shabu na nagkakahalaga ng P85,000 at buy bust money.

          Sa Navotas, natimbog naman ng mga tauhan ni Navotas police chief P/Col. Mario Cortes ang notoryus drug personality na si alyas “Andeng”, 37, ng Brgy. Tangos South, nang kumagat sa ikinasang buy bust sa Judge Roldan St., Brgy. San Roque dakong alas-7:45 ng gabi.

          Nakuha sa suspek ang humigi’t kumulang 10.3 grams ng umano’y shabu na may katumbas na halagang P70,040 at buy bust money na isang tunay na P500 bill at limang pirasong P1,000 boodle money.

          Mahaharap ang mga suspek sa kasong paglabag sa Sections 5 at 11 under Article II ng R.A 9165 o ang Comprehensive Dangerous Drugs Act of 2002.

Pinuri naman ni P/BGen. Josefino Ligan, District Director ng Northern Police District ang mga operatiba sa kanilang dedikasyon at pagsisikap sa paglaban sa illegal na droga. (Richard Mesa)

NAGSANIB-puwersa ang Pamahalaang Lungsod ng Navotas at Green Antz Builders, Inc. upang palakasin ang mga hakbangin ng lungsod sa pagpapanatili ng plastic waste recovery program.

Pinangunahan nina Mayor John Rey Tiangco at Green Antz Builders General Manager Elinor Quilas ang paglagda sa Memorandum of Agreement (MOA), nitong Lunes.

Sa ilalim ng kasunduan, ang Green Antz ay magbibigay ng kinakailangang makina at teknolohiya, magsasagawa ng mga programa sa pagsasanay para sa wastong paghihiwalay ng basura, epektibong pamamahala sa paggamit ng Material Recovery Facility (MRF) ng Lungsod, at maghakot ng malinis at tuyong basurang plastik mula sa MRF. Magbibigay din ang kumpanya ng insentibo na plano para sa mga kalahok ng programa.

Nagpahayag naman si Mayor Tiangco ng optimismo tungkol sa pakikipagtulungan at sinabi na ito ay nakaayon sa pangako ng lungsod sa pangangalaga sa kapaligiran at pagpapanatili.

“This partnership with Green Antz strengthens our efforts towards a cleaner, greener, and more sustainable Navotas. Through proper waste management and active community participation, we can make a significant impact for future generations,” ani Tiangco.

Nanawagan din siya sa mga Navoteño na aktibong suportahan ang inisyatiba sa pamamagitan ng tamang paghihiwalay at pagtatapon ng basura.

“We urge everyone to cooperate by segregating their waste correctly and, most importantly, refraining from throwing plastic garbage into waterways and other bodies of water. Our small everyday actions can have a huge impact in protecting our environment and our future,” dagdag niya.

Dumalo rin para saksihan ang seremonya ng paglagda si City Environment and Natural Resources Office (CENRO) Chief Ms. Yzabela Bernardina Nazal-Habunal. (Richard Mesa)