Nilinaw ng DFA na nananatiling nakatali ang Pilipinas sa One-China Policy kahit pinagaan ang travel ban ng ilang opisyal papuntang Taiwan. Ayon kay Foreign Affairs Secretary Enrique Manalo, layunin ng bagong panuntunan ang pagtataguyod ng trade at investment habang sumusunod sa umiiral na patakaran. Ang bagong circular ay nagtatakda ng limitasyon sa mga opisyal ng gobyerno sa kanilang mga biyahe, maliban na lamang kung may pahintulot mula sa DFA.

Plano ni dating presidential spokesperson Harry Roque na magsampa ng kaso sa European Court of Human Rights laban sa umano’y diskriminasyon sa pagkakakulong ni dating Pangulong Rodrigo Duterte. Giit ni Roque, may tradisyon sa Netherlands na hindi ikinukulong ang mga 80 taong gulang pataas. Naniniwala siyang dapat palayain si Duterte dahil sa age-based discrimination at lalabag ito sa European Convention on Human Rights.

Nasamsam ang P231,200.00 halaga ng shabu mula sa isang 56-anyos na lalaki na nakilalang si alyas ‘Ron’ sa buy bust operation sa Valenzuela City. Ayon sa ulat, nahuli siya ng Station Drug Enforcement Unit sa Brgy. Coloong. Nakumpiska rin ang buy bust money, cellphone, at iba pang gamit. Kakaharapin niya ang kasong paglabag sa R.A. 9165.

Isang call center agent na nagsisilbing courier ng baril sa social media ang inaresto sa Caloocan sa entrapment operation ng pulisya. Nakuha sa kanya ang M1 Garand rifle, anim na magazine, at buy bust money. Mahaharap siya sa kasong paglabag sa R.A. 10591 at Cybercrime Law.

Apat na kawani ang arestado matapos salakayin ng pulisya ang isang kompanyang nagbebenta ng pekeng piyesa ng motorsiklo sa Caloocan. Nakumpiska ang 120 kahon ng imitasyong bearing na tinatayang nagkakahalaga ng P1.5M. Sasampahan ng kasong paglabag sa Intellectual Property Code ang mga nadakip.