KAGYAT na kikilos ang gobyerno sa matinding epekto ng paparating na dry season o panahon ng tagtuyot.

Tinanong kasi si Presidential Communications Office Undersecretary Claire Castro sa press briefing sa Malakanyang kung paano poprotektahan ng pamahalaan ang agricultural sector laban sa pinsala na dala ng inaasahang panahon ng tagtuyot partikular pa’t ang “danger” level heat index ay nararanasan na sa ilang parte ng bansa.

“As of now, talaga po ay hindi pa po kami nakakapag-usap patungkol diyan, pero kung ito po talaga ay nakikita po, nababanaag po ang matinding epekto, kikilos po talaga agad ang mga ahensiya para po matugunan kung anuman ang magiging problema sa mga susunod na araw itong napakatinding init na nararamdaman natin,” ang sinabi ni Castro.

Nauna rito, pinag-iingat ng Department of Health (DOH) ang publiko laban sa mga sakit na maaaring makuha ngayong nagsisimula ng maramdaman ang mainit na temperatura sa ating bansa.

Ito ay kasunod ng forecast mula sa state weather bureau na ang heat index sa Metro Manila ngayong araw, Marso 3 hanggang bukas, Marso 4 ay aabot sa 46 degrees Celsius.

Gayundin inaasahan ang “danger” heat index sa lalawigan ng Pampanga, Nueva Ecija, Bataan, at Olongapo City.

Ayon kay Health spokesperson ASec. Albert Domingo, ang temperaturang mula 33-41 degrees Celsius ay inuri ng weather bureau bilang “extreme caution” habang 42-51 degrees celsius bilang “danger.”

Ang ganitong mga temperatura aniya ay maaaring humantong sa heat cramps o pamumulikat at heat exhaustion o pagkahapo, na may mga sintomas tulad ng pagkapagod, pagkahilo, sakit ng ulo, pagsusuka, at pagkahilo.

Nagbabala rin ang opisyal na ang matagal na pagkakalantad sa init ay nagpapataas ng posibilidad ng heat stroke na isang seryosong kondisyon na may kaakibat na pagkawala ng malay, pagkalito, o kaya ay seizure/kombulsyon, na maaaring nakamamatay kung hindi ito ginagamot.

Kung sakali mang maramdaman ang nabanggit na mga sintomas, narito ang payo ng DOH para sa paunang lunas.

Samantala, sa isang statement, inihayag ni DOH Secretary Ted Herbosa na maituturing ng mapanganib kapag umabot na sa 42 degree celsius ang healt index kayat nagpaalala ito sa publiko na dalasan ang pag-inom ng malinis na tubig, at umiwas na mabilad sa araw mula alas-10 ng umaga hanggang alas-4 ng hapon. (Daris Jose)

NAKATAKDANG ilunsad ng Bureau of Immigration (BI) ang  Philippines’ Advance Passenger Information System (APIS), isang hakbang  tungo sa modernisasyon  ng border security  at a major step in modernizing border security and streamlining immigration processes,  kasunod sa kautusan ni Pangulong  Ferdinand Marcos Jr na  ayusin ang  national security sa pamagitan ng  digital transformation.

Ang APIS ay kinikilala sa buong mundo na nasasagawa ng advance screening ng mga pasahero bago ang kanilang pagdating.

Ang nasabing sistema ay pinapayagan ang mga awtoridad na ma-identify ang potential security threats at maayos na entry procedures, at pagbabago ng immigration assessments sa bansa.

Sinabi ni BI APIS Operations Center (APOC) Chief and Deputy Spokesperson Melvin Mabulac ang kahalagahan ng APIS  sa pagpapalakas ng border security ng bansa.

“This system will enable us to screen passengers in advance, improving risk assessment and expediting the processing of legitimate travelers,” ayon kay Mabulac.

At bilang bahagi ng kanilang preparasyon, isinasagawa ng pilot testing sa mga major airlines kabilang ang  Philippine Airlines (PAL) at Cebu Pacific, at sa pakikipagtulungan ng kanilang  service providers. Maayos din naisagawa ang connectivity tests sa INTERPOL’s I-24/7 database upang masiguro ang access sa international security watchlist.

Ang BI ay maayos na nakikpag-ugnayan sa mga stakeholders, kabilang ang  INTERPOL, airline representatives, at ang  United Nations Office of Counter-Terrorism (UN OCT), upag masiguro ang  seamless integration sa APIS sa kasalukuyang system.

Ang system ay nakatakdang ilunsad nitong darating na buwan, upang maipakita ang immigration capacities ng  BI.

“This initiative marks a significant milestone in our ongoing efforts to modernize immigration processes,” ayon kay BI Commissioner Joel Anthony Viado. “With APIS, we are not only strengthening security but also ensuring a more efficient and hassle-free experience for travelers.” (Gene Adsuara)

Ito ang sinabi ni Presidential Communications Office Ad Interim Secretary Jay Ruiz hinggil sa memorandum na nag-uutos sa lahat ng presidential appointees sa mga ahensya, tanggapan at burukrasya sa ilalim ng PCO na magsumite ng kanilang ‘unqualified courtesy resignations.’

”Usually ganoon naman talaga considering all presidential appointees here, di ba… para lang kumbaga siyempre free hand sa pagpili ng ating mga kasama… Mahirap din po kasi siyempre dapat pagkakatiwalaan mo kasi kung di mo kasama, di mo naman sila kakilala, of course, as secretary dapat dalhin mo rin ‘yung sarili mong tao,” ang sinabi ni Ruiz sa isang ambush interview, araw ng Lunes.

”Sa akin lang siyempre, walang personalan, marami po kasing tatamaan… maraming posibleng tamaan… siyempre aassess natin kung ano ‘yung ginawa nila, ng bawat opisina, proper evaluation,” aniya pa rin.

Sinabi ni Ruiz na tatagal ng dalawa hanggang tatlong linggo para tapusin ang assessment ng mga departamento sa ilalim ng PCO.

Matatandaang, si Executive Secretary Lucas Bersamin ang nagpalabas ng memorandum, sabay sabing ang hakbang ay naglalayon na pahintulutan at bigyan ang bagong itinalagang PCO secretary ng ‘free hand’ sa pagtupad sa kanyang mga tungkulin at pagpapatupad ng kanyang mga patakaran.

Ayon sa memorandum, ang lahat ng mga apektadong appointees ay dapat na magsumite ng kanilang resignation letter sa PCO secretary hindi lalampas sa Pebrero 28, 2025

Nanumpa naman si Ruiz bilang bagong hepe ng PCO noong nakaraang linggo. Mismong si Pangulong Ferdinand Marcos Jr., ang nangasiwa ng panunumpa sa tungkulin ni Ruiz.

Samantala, pinalitan ni Ruiz si Cesar Chavez, nagbitiw sa tungkulin matapos na aminin na “fallen short of what was expected of him.” (Daris Jose)

UMABOT na sa mahigit 53 milyon ang naimprentang balota para sa May 2025 elections, ayon sa Commission on Elections (Comelec).

Base sa datos, kabuuang 53,894,129 balota na ang naimprenta o 76.58% ng 72 milyong kinakailangan. Ang kabuuang 16,338,956 balota pa ang natitira na kailangang iimprenta.

Una nang sinabi ni Comelec Chairman George Garcia na target na makapag-imprenta ng 1.5 milyong balota  upang makabawi sa pinaikling timeframe para sa produkdyon ng mga opisyal na balota. Nagpahayag din siya ng kumpiyansa na makumpleto ng Comelec ang proseso ng pag-imprenat sa Abril 14,2025.

Gayunpaman, sinabi ni Garcia na ang pag-imprenta ay tumaas sa 1.7 milyong mga balota kada araw at ang Comelec ay nagnanais na makumpleto ang proseso ng pag-imprenta ng balota sa Marso  at verifcation ng balota sa Abril.

Ayon kay Garcia, basta magtuloy-tuloy ang performance ng makina ay maaring sa ikalawang linggo hanggang ikatlong linggo ng Marso maaring matapos ang ballot printing.

Maalala na ipinagpatuloy ng Comelec ang pag-imprenta ng opisyal na balota noong Enero 27, isang linggo matapos itong suspendihin  nang maglabas ng temporary restraining orders ang Korte Suprema laban sa mga diskwalipikasyon ng ilang kandidato. (Gene Adsuara)

NAGPAHAYAG nang pagkabahala si House Assistant Majority Leader Jay Khonghun ng Zambales sa kakulangan o kawalan ng tugon mula sa ilang mga senatorial candidates kaugnay sa lumalaking banta ng Chinese espionage sa Pilipinas.

Reaksyon ito ng mambabatas kasunod nang pagkakaaresto ng pinagsususpetsahang dayuhang espiya na nagsasagawa ng surveillance sa olang kritical na government at military sites.

Ayon kay Khonghun, chairman ng House Special Committee on Bases Conversion, dapat maging top priority ang usapin ng national security lalo na sa mga kakandidatong senador, kasabay na rin ng lumalaking ebidensiya ng intelligence-gathering operations na iniuugnay sa China.

“Napakalaking isyu ng pambansang seguridad, pero bakit tila walang gustong magsalita? Ang Senado ang may tungkulin sa paggawa ng mga batas na magpapalakas sa ating depensa. Dapat marinig natin kung ano ang plano nila para sa ating kaligtasan,” ani Khonghun.

Kamakailan lamang ay binuwag ng otoridad ang umano’y espionage ring na nago-operate sa bansa.

Sa imbestigasyon ng National Bureau of Investigation (NBI) ay nadiskubre ang ginagawang surveillance activities sa ilang matataas na sensitibong lokasyon kabilang na ang Malacañang, Armed Forces of the Philippines (AFP) headquarters, at Philippine National Police (PNP) compound.

Kabilang sa mga naaresto ay dalawang Chinese nationals na nakuhanan ng advanced surveillance equipment na kayang harangan ang mobile communications.

Nitong Enero, isa pang grupo ng Chinese nationals ang nahuling minomonitor ang Philippine Coast Guard at Navy operations sa Palawan.

Nadiskubre ng mga imbestigador ang high-resolution, solar-powered cameras na nakalagay malapit sa maritime security areas.

“Hindi natin pwedeng ipagwalang-bahala ang ganitong mga insidente. Kung patuloy natin itong babalewalain, paano natin maipagtatanggol ang ating bansa?” pahayag ni Khonghun.

(Vina de Guzman)

PINANGUNAHAN nina Mayor John Rey Tiangco at Congressman Toby Tiangco, kasama ang iba pang mga opisyal ng Pamahalaang Lungsod ng Navotas ang pagbabasbas at pagpapasinaya sa Milflores Bombastik Station sa Brgy. Tanza 2, at Taganahan Bombastik Station sa Brgy. Bagumbayan South, bilang karagdagang pasilidad na panlaban sa baha. (Richard Mesa)

SA layunin ng Navotas na palakasin pa ang kanilang panlaban sa baha at community facilities, pinabasbasan at pinasinayaan ng Pamahalaang Lungsod sa pangunguna nina Mayor John Rey Tiangco at Congressman Toby Tiangco ang tatlong bagong pumping stations at school covered court.

Ang Navotas ay mayroon na ngayon kabuuang 87 estratehikong lokasyon na mga pumping station sa buong lungsod na matatagpuan sa Milflores St. sa Brgy. Tanza 2, M. Naval St. sa Brgy. Sipac-Almacen, at Taganahan St. sa Brgy. Bagumbayan South.

Samantala, ang bagong tayong covered court ay matatagpuan naman sa Dagat-dagatan Elementary school.

“We are building not just structures but stronger foundations for a safer and more progressive Navotas. These additional pumping stations will significantly reduce flood risks, safeguarding lives and livelihoods, especially during high tide and typhoon season,” ani Mayor Tiangco.

Binigyang-diin din niya ang kahalagahan ng bagong itinayong school facility.

“Education must continue, rain or shine. This covered court will provide students with protection from extreme heat and heavy rains, allowing them to focus on their school activities without disruption,” dagdag niya.

Binigyang-diin ni Congressman Tiangco, sa kanyang mensahe, ang mahalagang papel ng komunidad sa pagtiyak na mananatiling epektibo ang mga hakbangin sa pagkontrol sa baha ng lungsod

“Our pumping stations are powerful tools against flooding, but their effectiveness depends on all of us. Proper waste disposal and environmental responsibility are key to keeping them functioning optimally. Taking care of Navotas is a shared duty—let’s do our part to keep our city clean, safe, and flood-free,” pahayag naman ni Cong. Tiangco.

Dumalo rin sa naturang aktibidad sina Vice Mayor Tito Sanchez, mga miyembro ng konseho ng lungsod, mga barangay chairperson, at mga kinatawan mula sa Department of Public Works and Highways Malabon-Navotas District. (Richard Mesa)