IDINEKLARA ni Pangulong Ferdinand R. Marcos Jr. ang buwan ng Setyembr ng bawat taon bilang Social Protection Month.

Layon nito na itaas ang kamalayan ng publiko ukol sa kahalagahan nito.

Sa katunayan, nagpalabas si Pangulong Marcos ng Proclamation 820, nilagdaan ni Executive Secretary Lucas Bersamin noong Marso 6, at isinapubliko, araw ng Martes, inatasan ang Social Development Committee (SDC) – Sub-Committee on Social Protection (SCSP) na pangunahan ang taunang paggunita ng Social Protection Month.

Ipinalabas ang proklamasyon sa layuning itaas ang kamalayan hinggil sa social protection bilang isang “critical development strategy for poverty reduction, equality, and social inclusion, and highlight its importance in ensuring the resilience, health, and, well-being of all Filipinos in today’s evolving social and economical landscape.”

Ang SDC-SCSCP ay may tungkulin na tukuyin ang mga programa, aktibidad at mga proyekto para sa taunang pagdiriwang.

Ang lahat naman ng opisyal ng gobyerno ay inatasan na makiisa at magbigay ng kinakailangang suporta at tulong sa SDC-SCSP.

Ang local government units (LGUs) at pribadong sektor ay hinihikayat naman na makiisa sa pagdiriwang habang inatasan naman ang Presidential Communications Office (PCO) na magpatupad ng epektibong hakbang para ipabatid at hikayatin ang publiko na suportahan ang mga programa, aktibidad at proyekto para sa Social Protection Month celebration. (Daris Jose)

ITO ang reaksyon ni Kabataan Partylist Rep. Raoul Manuel kaugnay sa pagkaka-aresto ni dating Pangulong Rodrigo Duterte ng para sa krimen laban sa sangkatauhan sa pamamagitan ng arrest warrant mula sa International Criminal Court (ICC).

Kinumpirma ng Presidential Communications Office (PCO) na natanggap ng International Criminal Police Organization (Interpol) Manila ang arrest warrant ng ICC ngayong Martes ng umaga.

Dumating si Duterte sa Ninoy Aquino International Airport (NAIA) mula sa kanyang Hong Kong trip, na sinalubong ng pulis at media

Ayon kay Manuel, mabuti pa si Digong na pinagkakaguluhan pa bago makulong na malayo sa sinapit ng mga biktima ng peke umanong niyang war on drugs at madugong war on dissent.

“Hindi rin dapat patagalin pa ni Marcos Jr. ang proseso ng pagpapanagot kay Digong. Naniningil ang taumbayan ng hustisya, at hindi magdadalawang-isip ang mga kabataan na ipaglaban ito,” ani Manuel. (Vina de Guzman)

LUMABAS sa isinagawang nationwide focus group discussions (FGDs) na karamihan sa mga magulang na pinoy at household decision-makers ang pabor sa paglalagay ng front-of-pack warning labels, dahil nakakatulong ito na mas maintindihan ang nutritional information sa isang produkto.

Sa isinagawang FGDs ng ImagineLaw, isang public interest law organization, sa Luzon, Visayas, at Mindanao, nabatid na karamihan sa mga parent-consumers ay nagnanais na mayroong food warning labels bilang pinakamabilis na paraan upang matukoy ang iiwasang pagkain.

“The FGDs show that consumers need accessible and straightforward information when it comes to food,” ayon kay Atty. Sophia San Luis, Executive Director ng ImagineLaw.

Ang mga participants ay pinakitaan ng pre-packaged food products na may back-of-pack nutrition labeling, at yaong may front-of-pack labeling (FOPL).

Nang tanungin ukol sa readability ng kasalukuyang nutrition labels, marami ang nagsabing nahihirapang idetermina kung sapat o lagpas ang nutrient levels sa recommended daily intake, Kadalasan na pinagtutuunan nila ng pansin ang presyo at expiration date sa pagpili ng produktong pagkain.

“This proves that the current nutrition labeling does not work. We need FOPL as an intervention to provide clear and accessible food information for all,” dagdag ni San Luis.

Nabatid na mas preferred ng mga magulang ang front-of-pack warning labels dahil sa direktang mensahe at madaling intindihin.

Naniniwala rin ang mga respondents na sa pamamagitan ng babala ukol sa posibleng health harms ng food products, ay makakatulong sa kanila ang labels kung bibilhin ang produkto o hindi.

Suportado rin ng mga respondents ang pagkakaroon ng isang national policy para sa paglalagay ng warning labels sa pagkaintulad ng panukalang Front-of-Pack Warning Label Bill (FOPWL Bill).

Layon ng FOPWL Bill na makurbahan ang tumataas na kaso ng diet-related non-communicable diseases (NCDs) sa pamamagitan nang paglalaan ng choice sa mga Pinoy sa pagpili ng mas masustansiyang pagkain.

Ayon sa World Health Organization (WHO), ang mataas na intake ng unhealthy food high in fats, sugar, and sodium, ay nagtataas sa panganib ng pagkakaroon ng non-communicable diseases tulad ng diabetes, heart disease, at ilang uri ng cancer. (Vina de Guzman)

TINANGAY ng nagpakilalang taga-Bureau of Customs (BOC) ang P5.5 milyong pambayad sana sa binibiling sports car ng isang lalaki matapos itong palitan ng bundle ng papel sa Intramuros,Maynila.

Ayon kay MPD DIrector P/Brig.Gen. Arnold Thomas Ibay, pagsakay sa sasakyan ay hiniling umano ng suspek na bilangan muna ang pera sa harapan nila bago iproseso ang transaksyon at kung kumpleto ang naturang halaga bago i-release ang sports car mula sa Customs.

Matapos bilangin ang pera ay muling isinilid sa loob ng brown envelope ngunit lingid sa kaalaman ng biktima ay napalitan  na pala ng bundle na papel ang kanyang pera na tinangay ng dalawa niyang kausap.

Nagduda lamang ang biktima nang hindi na matawagan ang kanyang katransaksyon .

Agad namang nagtungo sa tanggapan ng Manila Police District ang biktima para magreklamo .

Masigasig ang mga awtoridad na silipin ang mga CCTV footage para sa backtracking para matunton ang sasakyan na ginamit ng mga suspek.

Ayon kay Gen.Ibay, sinundan ang lahat na dinaanan nila kung saan ang isang babae  at lalaki ng suspek ay nagkita pa sa Caloocan .

Dito naaresto ang 63 anyos na lalaki na siyang nagbilang  at tumangay sa pera ng biktima.

Napag-alaman na ang suspek ay under probation dahil nagkaroon na ng warrant at nasentensyahan na ng illegal possession of  treasury notes, matapos mahulihan ng mga pekeng pera, ayon kay Gen. Ibay base na rin sa isinasagawang pag-iimbestiga ng mga awtoridad.

Kasong syndicated estafa at theft ang kakaharapin ng suspek habang patuloy na hinahanap ang kasabwat na babae habang hindi pa naibabalik ang pera sa biktima dahil hindi pa ito narerekober. (Gene Adsuara)

ISANG mungkahi ang nilalatag ng Land Transportation Office (LTO) na tinatawag na “plate out of the showroom,” kung saan ang mga motorcycles at ibang motor vehicles ay magkaron ng license plate bago lumabas ng showroom.

Sa ngayon ay nakikipag-ugnayan ang LTO sa mga stakeholders kasama ang mga dealers at manufacturers para sa isang posibleng dry run gagawin ngayon lingo.

“It’s already 2025, we have good technology so there is no more reason for delay of license plates. We will focus more on the basic services of LTO to the people. Assec Mendoza has taken up the challenge and will work towards that finally within the term of President Marcos. We will say goodbye to all the problems of the past and we will move forward with better services. But, we have to start with the basics,” wika ni Department of Transportation (DOTr) secretary Vince Dizon.

Isa ito sa mga pinangako ni Dizon pagkatapos na siya ay maupo sa DOTr kung saan sinabi niya na kung siya ang masusunod ay dapat mag refund ang LTO sa perang binayad ng mga motorista na apektuhan ng backlog sa pagbibigay ng license plates simula pa ng taong 2014.

Sinabi ni Dizon sa isang press conference na gusto niya na maresolba ng LTO ang problema sa nasabing backlog na ang ahensya ay pinamumunuan ni Assec Vigor Mendoza.

Nais din ni Dizon na kung maaari ay mailabas ang license plate sa loob ng 72 oras pagkatapos ang sasakyan ay mabili at marehistro.

Kung kayat nagbigay ng plano ang LTO na reresolbahin nila ang problema sa backlog ngayon 2025.

“LTO assistant secretary Vigor Mendoza assured the public that the problem on the license plate backlog that hounded millions of its clients since 2014 will be addressed this year,” pahayag ni Dizon.

Nagpapasalamat naman si Mendoza kay Dizon dahil sa binibigay na madtinding suporta ng DOTr sa LTO sa mga programa ng ahensya na sagot at naayon sa mga hamon ni President Marcos na dapat ay maging madali ang buhay ng bawat mga motoristang Filipino.

“Since Day One of his assumption in the top DOTr post, we have been in constant coordination with Secretary Dizon in presenting all the challenges and solutions on all the challenges that we are facing now,” saad ni Mendoza. LASACMAR