MATAPOS madakip dahil sa pananapak at panunutok ng baril sa isang lolo, sinilbihan naman ng pulisya ng dalawang warrant of arrest ang isang kelot sa loob sa custodial facility ng Malabon Police Station.

Walang piyansang inirekomenda si Malabon Regional Trial Court (RTC) Presiding Judge Josie N. Rodil ng Branch 293 nang ilabas ang arrest warrant noong Mayo 27, 2022 laban kay alyas “Erron”, 33, dahil sa kasong murder habang may inilaan namang piyansa na P30,000 si Judge Maya Joy Panaga Guiyab-Camposanto ng Metropolitan Trial Court Branch 120 para naman sa kasong paglabag sa PD 1602 o illegal gambling laban sa akusado na inilabas noong Nobyembre 15, 2022.

Nauna rito, dinakip ng mga tauhan ni Malabon Police Chief P/Col. Jay Baybayan si alyas Erron na unang nagpakilala bilang alyas “Jhon”, kasama ang kasabuwat na si alyas “Kym”, matapos sapakin at tutukan ng baril ang 66-anyos na si Lolo “Lauro” na nakiusap lang na ibalik ng dalawa ang inalis na takip ng kanal sa daraanan niyang eskinita.

Nakumpiska ng mga nagrespondeng miyembro ng Special Weapon and Tactics (SWAT) team sa mga suspek ang dalawang kalibre .45 baril na may tig-apat na bala sa magazine nang magreklamo ang biktima.

Nang dalhin sa presinto, itinago ni alyas Erron ang kanyang tunay na pangalan bunga ng pagiging wanted sa batas at nakatala ang kanyang tunay na pangalan bilang No. 2 Top Most Wanted Person sa National Capital Region (NCR). (Richard Mesa)

UMABOT sa halos P.7 milyong halaga ng shabu ang nasamsam sa dalawang tulak na itinuturing bilang high-value individual (HVI) matapos maaresto sa magkahaiwalay na buy bust operation ng pulisya sa Valenzuela City.

Ani Valenzuela police chief P/Col. Nixon Cayaban, ikinasa ng mga operatiba ng Station Drug Enforcement Unit (SDEU) sa pangunguna ni P/Capt. Joan Dorado, sa koordinasyon sa PDEA ang buy bust operation kontra kay alyas “Boss”, 20, ng Brgy. Gen T De Leon nang magpositibo ang natanggap na ulat hinggil sa umanoy illegal drug activities nito.

Nang matanggap ang signal mula sa kanyang kasama na nagpanggap na poseur-buyer na hudyat na nakabili na ito ng droga sa kanilang target, agad lumapit ang back-up na operatiba saka inaresto ang suspek alas-2:40 ng madaling araw sa M. Bernardino St., Brgy. Ugong.

Nakuha sa suspek ang nasa 50 grams ng hinihinalang shabu na nagkakahalaga ng P340,000, buy bust money na isang tunay na P500 bill at pitong P1,000 boodle money, P200 cash, cellphone at itim na coin purse.

Sunod na nadakip ng mga operatiba Northern Police District – District Drug Enforcement Unit (NPD-DDEU) sa pangunguna ni P/Capt. Regie Pobadora, katuwang ang Valenzuela Police Sub-Station 7 si alyas “Iking”, 50, sa buy bust operation sa Pacheco St., Brgy. Punturin dakong alas-5:20 ng madaling araw.

Nakumpiska sa kanya ang nasa 51 grams ng hinihinalang shabu na may katumbas na halagang P346,800.00, P500 buy bust money at isang itim sling bag.

Iprinisinta na ang mga suspek sa inquest proceedings sa Valenzuela City Prosecutor’s Office kaugnay sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 na isinampa sa kanila ng pulisya.

Pinapurihan ni P/COL Josefino Ligan, Acting District Director ng NPD ang Valenzuela police at DDEU para sa kanilang matatag na dedikasyon sa pagpapanatili ng isang kapaligirang walang droga at pangangalaga sa kapakanan ng komunidad. (Richard Mesa)

ITINANGGI ni Palace Press Officer Undersecretary Atty. Claire Castro na pinigil ng law enforcers sa Estados Unidos si Unang Ginang Louise ”Liza” Araneta-Marcos.

”There is no truth that FL was held by any law enforcers while in LA or and in any other place,” ang sinabi ni Castro.

Sinabi ni Castro na dumating ng Maynila ang Unang Ginang, Lunes ng umaga.

Ang Unang Ginang ay nagkaroon ng working visit sa Estados Unidos para magpartisipa sa   Meeting of the Minds at Manila International Film Festival. Siya ay nasa  Miami, Florida at Los Angeles, California mula Marso 5 hanggang 8.

Nito lamang Marso 11, pinangunahan ni Unang Ginang Marcos ang turnover ng mga  donasyon sa Girl Scouts of the Philippines sa kanyang tanggapan sa Maynila. (Daris Jose)

MULING nagkaroon ng pagtaas sa trust rating si Pasig City Mayoral candidate Sarah Discaya sa nakalipas na linggo kung saan karamihan sa mga sumagot sa survey ay naghahangad ng pagbabago sa liderato sa lungsod.

Sa resulta ng independent survey ng Pulso ng Lipunan, si Discaya ay nakakuha ng 44 percent suporta mula sa mga rehistradong botante, habang 46 percent si incumbent Mayor Vico Sotto na nakakuha ng 46 percent. Ayon sa mga taga-Pasig, may kakayahan si Discaya na mapabuti ang serbisyo sa lungsod dahil sa pagiging makatao at karanasan sa public service.

Sa isa pang independent poll survey, tumaas din ng 3% ang rating ni Discaya at nakapagtala ito ng 46%, mas mataas sa 43% ni Sotto.

Ayon sa parehong survey, ang pagtaas ng rating ni Discaya ay bunsod ng kanyang pagsusulong na matulungan ang mga underprivileged, pagkakaloob ng libreng gamutan, pangakong magpatayo ng mga bagong silid-aralan, magbigay ng libreng textbooks sa mga mag-aaral, at magpatayo ng modern hospitals para sa mahihirap na pamilya.

Ang pinakabagong independent survey ay ginawa noong March 4-8 kung saan nakakuha si Discaya ng 46% satisfaction rating habang ang trust ay 46.5 percent.

Lumitaw sa survey na karamihan sa suporta para kay Discaya ay mula sa mga mahihirap na komunidad at ordinaryong residente ng Pasig. (Daris Jose)