INAALAM pa kung bangkay ng isang estudyante ang natagpuan sa loob ng comfort room ng Laguna State Polytechnic University makaraang lamunin ng apoy sa Sta Cruz, Laguna Huwebes ng hapon.

Sa ulat, bandang alas-12:50 kamakalawa ng hapon nang nagsimula ang sunog sa College of Arts and Sciences Bldg., sa loob ng Laguna State Polytechnic University sa Brgy Bubukal, Santa Cruz, Laguna.

Ayon kay FO2 Mark Anthony Samia  Bureau of Fire Protection (BFP) Santa Cruz, Laguna, bandang alas-3:09 kamakalawa ng hapon  nang ideklarang fire-out at nadiskubre ang bangkay ng isang babae sa comfort room  na matatagpuan sa ilkalawang palapag ng nasabing gusali.

Inaalam din kung ano ang pinagmulan ng sunog at kung magkano ang naging pinsala. (Gene Adsuara)      

NAGWAKAS na ang maliligayang araw ng isang notoryus na miyembro ng kilalang ‘Monsanto Robbery Gang’ nang masakote ng pulisya sa ikinasang manhunt operation sa Valenzuela City.

Ayon kay Valenzuela police chief P/Col. Nixon Cayaban, nakatanggap sila ng impormasyon na naispatan ang presensya ng akusadong si alyas “Jonard”, 32, na kabilang sa listahan ng mga Most Wanted Person sa lungsod.

Inatasan ni Col. Cayaban ang Warrant and Subpoena Section (WSS) na bumuo ng team at kasama ang mga tauhan mula sa Sub-Stations 1, 6, at 7, agad ikinasa ng WSS ang joint operation na nagresulta sa pagkakaaresto sa akusado dakong alas-5:00 ng hapon sa Brgy. Bagbaguin.

Hindi na nakapalag si alyas Jonard nang isilbi sa kanya ng mga tauhan ni Col. Cayaban ang warrant of arrest na inisyu ni Presiding Judge Evangeline M. Francisco, ng RTC Branch 270, Valenzuela City, noong January 31, 2013, para sa kasong Robbery under Article 294, Paragraph 5 of the Revised Penal Code in relation to Republic Act 7610 na may inirekomendang piyansa na P100,000.

Kilala umano sa pagiging mailap si alyas Jonard na matagal din naiiwasan ang tumutugis na mga alagad ng batas subalit, ang pagsisikap at hindi natitinag na dedikasyon ng mga tauhan ng Valenzuela police ang nagsiguro ng matagumpay na operasyon.

Pansamantalang nakapiit ang akusado sa Custodial Facility Unit ng Valenzuela Police habang hinihintay ang pagpapalabs ng commitment order mula sa hukuman.

Pinuri ni P/Col. Josefino Ligan, Acting District Director ng NPD ang Valenzuela City Police Station sa kanilang hindi natitinag na pangako sa batas at kaayusan.

“This arrest sends a clear message to criminals that their actions will not go unpunished. The NPD remains steadfast in its mission to apprehend criminals and maintain peace and security in the CAMANAVA area. We will not rest until our communities are free from the threat of organized crime,’ pahayag niya. (Richard Mesa)

SINABI ni Kabataan Partylist Rep. Raoul Manuel na ayon sa 1987 Constitution, Art VI, Sect 11, ay puwede lang protektahan ng senado ang mga miyembro nito mula sa pagkakaaresto habang naka-sesyon.

“Eh, di ba ayaw ng Senado na mag-session hanggang June? Besides, di dapat ginagamit ang posisyon bilang shield sa pagharap sa pananagutan,” ani Manuel.

Sinabi ng mambabatas na ‘pathetic’ na masaksihan ang isang dating mataas na opisyal ng pulisya na gumamit ng salitang nanlaban ay nanginginig umano ngayon sa pagharap sa international justice.

“Bato Dela Rosa’s desperate attempt to hide behind parliamentary immunity exposes the hollowness of the past administration’s bravado. The thousands of victims’ families deserve justice, not this shameful spectacle of powerful men cowering in fear of accountability,” dagdag ni Manuel.

Ayon pa sa kongresista, napakaraming Pilipino ang nawalan ng mahal sa buhay dahil sa madugong war on drugs na ito at ngayong may pananagutan na ay biglang naghahanap ng lusot.

Sinabi naman ni Gabriela Party List Rep. Arlene Brosas na hindi dapat gawing hideout ng kriminal ang Senado. Isang malaking kahihiyan kung ang isang institusyong dapat nagtataguyod ng hustisya ay gagamitin bilang taguan ng mga umiiwas sa pananagutan.”

Sa halip aniya na gamitin ang kanyang political privilege, hinamon ni Brosas si Dela Rosa na harapin ang ICC.

“Just a few days ago, he boldly challenged the ICC with ‘bring it on’ and even said he was ready to join and take care of Duterte in jail. But now that accountability is catching up to him, especially after Duterte’s arrest, he’s suddenly trembling in fear and scrambling for Senate protection,” dagdag ni Brosas. (Vina de Guzman)

KAAGAD bumisita si Malabon City Mayor Jeannie Sandoval at nagbigay ng tulong sa 16 mga pamilya o 69 individuals na naapektuhan ng sunog sa Blk 15, Brgy. Longos, kung saan apat ang napaulat na nasawi.

“Agarang tulong po sa mga naapektuhan ng sunog dito sa Barangay Longos ang inihanda at inihatid sa kanila. Inalam din po natin ang kanilang mga pangangailangan matapos ang hindi inaasahang insidenteng ito. Ngunit, sa kabila ng trahedyang ito, ay naririto ang pamahalaang lungsod para umalalay at siguruhing nasa mabuti silang kalagayan. May pag-asa para sa pagbangon ng bawat isa,” pahayag ni Mayor Sandoval.

Namahagi ang pamahalaang lungsod ng mga food packs na naglalaman ng bigas, noodles, kape, tubig, mga de-lata, hygiene kits at iba pang non-food items para sa mga apektadong pamilya na nananatili sa Longos Multi-Purpose Hall at Longos Disaster Building.

Nauna rito, nabigay ang mga tauhan ng City Social Welfare and Development Department (CSWDD) ng maiinit na pagkain sa mga nasunugan bilang bahagi ng paunang ayuda. Nagtayo din ng mga modular na tolda para ma-accommodate ang mga pamilyang lumikas.

Sa ulat ng Malabon City Fire Station (MCFS), itinaas sa unang alarma ang sunog dakong alas-3:45 ng madaling araw na idineklarang under control pasado alas-4:50 ng umaga at ganap na naapula ang apoy alas-6:52 ng umaga.

Apat na ang napaulat na nasawi sa sunog na kinabibilangan ng tatlong magkakapatid at kanilang pamangkin habang nagsagawa na ng rapid needs assessment ang CSWDD para matukoy ang mga kinakailangan ng mga apektadong residente, kabilang ang mga pamilya ng mga nasawing biktima.

“Sa nangyaring insidenteng ito, pagkakaisa ang ating nais ipaalala sa bawat Malabueño. Mayroon mang naapektuhan ng sunog, nawa’y maipadama natin sa bawat biktima ang kalinga at pagtulong. Sa pamumuno ng ating Mayor Jeannie Sandoval, patuloy rin ang ating paalala sa mga mamamayan na mag-ingat lalo na ngayong Fire Prevention Month,” ani City Administrator Dr. Alexander Rosete.

Pinaalalahanan ng pamahalaang lungsod ang mga residente na laging tanggalin sa saksakan ang mga electronic device at appliances bago umalis sa kanilang mga tahanan, iwasan ang mga ilegal na koneksyon ng kuryente at tiyaking hindi maabot ng mga bata ang mga nasusunog na materyales upang maiwasan ang mga insidente ng sunog. (Richard Mesa)

MATAPOS madakip dahil sa pananapak at panunutok ng baril sa isang lolo, sinilbihan naman ng pulisya ng dalawang warrant of arrest ang isang kelot sa loob sa custodial facility ng Malabon Police Station.

Walang piyansang inirekomenda si Malabon Regional Trial Court (RTC) Presiding Judge Josie N. Rodil ng Branch 293 nang ilabas ang arrest warrant noong Mayo 27, 2022 laban kay alyas “Erron”, 33, dahil sa kasong murder habang may inilaan namang piyansa na P30,000 si Judge Maya Joy Panaga Guiyab-Camposanto ng Metropolitan Trial Court Branch 120 para naman sa kasong paglabag sa PD 1602 o illegal gambling laban sa akusado na inilabas noong Nobyembre 15, 2022.

Nauna rito, dinakip ng mga tauhan ni Malabon Police Chief P/Col. Jay Baybayan si alyas Erron na unang nagpakilala bilang alyas “Jhon”, kasama ang kasabuwat na si alyas “Kym”, matapos sapakin at tutukan ng baril ang 66-anyos na si Lolo “Lauro” na nakiusap lang na ibalik ng dalawa ang inalis na takip ng kanal sa daraanan niyang eskinita.

Nakumpiska ng mga nagrespondeng miyembro ng Special Weapon and Tactics (SWAT) team sa mga suspek ang dalawang kalibre .45 baril na may tig-apat na bala sa magazine nang magreklamo ang biktima.

Nang dalhin sa presinto, itinago ni alyas Erron ang kanyang tunay na pangalan bunga ng pagiging wanted sa batas at nakatala ang kanyang tunay na pangalan bilang No. 2 Top Most Wanted Person sa National Capital Region (NCR). (Richard Mesa)