ITINUTURING ng Malakanyang na ‘unacceptable” approach sa anumang gobyerno ang kontrobersiyal na drug war policy na ikinasa ni dating Pangulong Rodrigo “Digong ” Roa Duterte.

“Hindi siya dapat polisiya ng isang gobyerno in the first place. It’s against the law,” ang sinabi ni Presidential Communications Undersecretary at Palace Press Officer Claire Castro sa press briefing sa Malakanyang.

Kinuwestiyon ni Castro ang pagiging epektibo ng drug war ni Digong Duterte mula sa malawak na ‘societal perspective’, tinukoy ang malubhang kahihinatnan para sa mga biktima at kanilang pamilya.

Binigyang diin din nito na ang pagpatay, partikular na ang walang due process, ay paglabag sa batas.

“Killing is against the law. Wala nga tayong death penalty sa Pilipinas, uunahan mo pa na patayin. Ang masama wala pang hearing,” aniya pa rin.

“Kung may natulong sa iba, paano naman yung namatayan?” ang inihayag ni Castro, kinuwestiyon ang tagumpay ng polisiya na nagbalewala sa buhay ng mga apektado ng extrajudicial killings.

Sa kabilang dako, ang war on drugs ay inulan ng pagpuna matapos simulan ng International Criminal Court (ICC) ang imbestigasyon sa posibleng ‘crimes against humanity’ partikular na ang extrajudicial killings, di umano’y ginawa ng mga awtoridad sa ilalim ng administrasyong Duterte.

Sinabi pa ni Castro na may karapatan ang mga biktima ng drug-related crimes na ituloy ang legal action, binigyang diin ni Castro na ang approach ni Digong Duterte ay hindi polisiya na dapat sundin.

“Kung merong mga nabiktima itong mga drug users, then the victim can file cases against those drug users. Pero hindi natin matatanggap na polisiya na siya na dapat sundin ng isang gobyerno,” ang sinabi pa rin ni Castro. (Daris Jose)

MATAPOS umalis ng Pilipinas si dating Pangulong Rodrigo Duterte patungong The Hague para harapin ang International Criminal Court, nakakuha ng travel clearance ang kanyang anak na si Rep. Paolo “Pulong” Duterte para makasunod sa kanya.

Sinabi ni Secretary General Reginald Velasco na nagsumite ng si Paolo ng kanyang travel clearance request kay Speaker Martin Romualdez nitong Marso 11 para makabiyahe sa Netherlands at Japan mula Marso 2 hanggang Abril 15, 2025.

Sa liham, sinabi ni Paolo na gagamitin niya ang kanyang personal funds sa naturang biyahe.

Inaprubahan naman ni Speaker Romualdez ang request para sa travel clearance.

“As requested, travel clearance is hereby granted to the Honorable Paolo Z. Duterte, Representative, 1st District, Davao City, in connection with his personal trip to the Netherlands and Japan on March 12 to April 15, 2025,” nakasaad sa clearance (Vina de Guzman). 

NAGHAIN ang kampo ng dating Pangulong Rodrigo Duterte ng petition for writ of habeas corpus sa Supreme Court ,Miyerkules ng umaga kaugnay sa iligal na pag-aresto at pagdetine sa kanya Marso 11.

Sa pamamagitan ni  dating Presidential Legal Counsel Atty. Salvador Panelo at kanyang anak na abogado na si Atty. Salvador Panelo Jr hiniling  sa Kataas-taasang Hukuman ng petitioner at anak ni dating Pangulong Rodrigo Duterte na  atasan ang gobyerno na gumawa ng paraan upang agarang ibalik sa bansa ang kanyang ama.

Sinabi ni Atty. Panelo Jr na ang batayan ng habeas corpus ang pagdetine kay Duterte ng walang basehan o illegal detention .

Paliwanag ng mga abogado , hindi  pwedeng batayan ng pag-aresto at pagdetine sa dating pangulo ang International Criminal Court (ICC) warrant of arrest  dahil walang hurisdiksyon ng ICC sa ating bansa.

Sinabi pa ng legal counsel na hindi pwedeng mag-exercise ng hurisdiksyon ang ICC dahil maayos namang tumatakbo  ang national legal system ng Pilipinas .

Sa kanilang petisyon, binanggit din ng kampo ni Duterte ang pahayag mismo ng gobyerno ng Pilipinas  sa ICC na wala itong hurisdikyon dahil namamayagpag ang system sa Pilipinas.

Giit ng legal counsel ng Duterte, batay sa kanilang pag-aaral ay walang basehan ang warrant of arrest ng ICC.

Umaasa naman ang mga legal counsel ni Duterte na hindi pa huli ang lahat kaya umaasa rin silang agarang mag-intervene ang Korte Suprema.

Kabilang sa mga respondents sa petisyon sina  Executie Secretary Lucas P.bersamin, Secretary Jesus Crispin C.remulla, Police General Rommel Francisco D. Marbil at Nicolas D.Torre III. (Gene Adsuara)

NANAWAGAN si OFW Party List Rep. Marissa “Del Mar” Magsino sa mga Overseas Filipino Workers (OFWs), Overseas Filipinos (OFs), at Filipino seafarers na magpre-enroll nang maaga para sa Online Voting and Counting System (OVCS) na gagamitin para sa overseas voters sa 2025 Midterm Elections.

Ito ay matapos ianunsiyo ng Commission on Elections (COMELEC) ang paglipat ng petsa ng pre-enrollment period para sa internet voting sa Marso 20, 2025 sa halip na Marso 10. Mananatili naman ang deadline sa Mayo 7 ng kasalukuyang taon.

Naniniwala si Magsino na ang pagbabagong ito ay hakbang upang tiyakin ang maayos at epektibong pagpapatupad ng OVCS, na unang beses pa lamang gagamitin sa kasaysayan ng halalan sa Pilipinas.

Suportado rin ng Department of Foreign Affairs (DFA) ang pagpapalawig ng pre-enrollment period upang masiguro na lahat ng teknikal na aspeto at mga probisyon sa ilalim ng Republic Act No. 9369 o Election Automation Law ay matutupad, nang sa gayon ay maging maayos at maaasahan ang bagong sistemang ito.

Gayunpaman, pinaalalahanan nito na dahil pinaikli ang pre-enrollment period, mahalagang mag-enrol agad ang mga OFWs, OFs, at Filipino seafarers upang hindi malampasan ng enrolment period.

“Dahil mas maikli na ang pre-enrollment period, kailangang kumilos tayo agad upang masigurong walang OFW ang maiiwan sa online voting. Huwag nating sayangin ang pagkakataong makibahagi sa kauna-unahang at makasaysayang internet voting sa bansa,” aniya.

Bilang isang masigasig na tagapagtaguyod ng Internet Voting Bill, muling iginiit ng mambabatas na ang pagpapatibay nito ay isa sa kanyang pangunahing adbokasiya. (Vina de Guzman)

REHAS na bakal ang kinasadlakan ng isang lalaki na wanted sa tatlong bilang na kaso ng qualified theft matapos maaresto sa manhunt operation ng pulisya sa Valenzuela City.

Sa patuloy na pinaigting na kampanya ng pulisya kontra wanted persons, ikinasa ng mga tauhan ni Valenzuela police chief P/Col. Nixon Cayaban ang pagtugis kay alyas “Vincent”, 32, na kabilang sa mga Most Wanted Person sa lungsod.

Dakong alas-10:35 ng umaga nang matiyumpuhan ng pinasanib na mga tauhan mula sa Warrant and Subpoena Section, Police Sub-Stations 2, 3, 4 at 9 ng Valenzuela police ang akusado sa C.F Natividad St., Barangay Mapulang Lupa.

Maayos naman naisilbi sa akusado ng mga tauhan ni Col. Cayaban ang warrant of arrest na inisyu ni Presiding Judge Orven Kuan Ontalan ng Regional Trial Court Branch 285, Valenzuela City noong March 7, 2025 para sa kasong Qualified Theft (RPC Art. 310) (3 counts) na may inirekomendang piyansa na P120,000.00 for each count.

Pansamantalang nakapiit ang akusado sa Custodial Facility Unit ng Valenzuela police habang hinihintay ang pagpapalabas ng commitment order mula sa hukuman.

Pinuri ni Col. Cayaban ang pagtutulungan ng mga team na nagpapatupad ng batas. “This arrest demonstrates our commitment to ensuring justice for all and maintaining peace and order in our community,” pahayag niya. (Richard Mesa)

SHOOT sa kulungan ang 24-anyos na dalagang kahera ng isang sabungan nang ireklamo ng hindi pagre-remit sa kinita ng cockpit arena sa Malabon City.

Sa Del Monte Cockpit Arena sa Brgy. Potrero pinuntahan at dinakip ng mga tauhan ni Malabon Police Chief P/Col. Jay Baybayan ang teller na si alyas “Ara” nang ireklamo siya ng Officer-In-Charge ng Security Office ng naturang sabungan na si alyas “Julius” Lunes ng umaga.

Batay sa tinanggap na reklamo ng Malabon Police Sub-Sttion 1, nadiskubre ni alyas Julius ang pagkawala ng P149,981.00 na kita ng sabungan na nasa pangangalaga ni alyas Ara bilang teller.

Hindi umano nag-remit ng kita ang kahera kaya’t hinalughog ng security officer ang kanyang cash box at dito nakita ang P36,678,00 habang nawawala na ang P112,403.00 kaya’t naghain na sila ng reklamo sa pulisya.

Ayon kay Col. Baybayan, iprinisinta na ang suspek sa Malabon City Prosecutor’s Office para isailalim sa inquest proceedings kaugnay sa kakaharapin niyang kasong Qualified Theft. (Richard Mesa)

MAHIGIT P10 milyong peso halaga ng marijuana ang nasamsam sa apat drug suspects, kabilang ang 25-anyos na bebot matapos kumagat sa ikinasang buy bust operation ng pulisya sa Cloocan City, kahapon ng umaga.

Kinilala ni Caloocan police chief P/Col. Edcille Canals ang mga suspek bilang sina alyas “RamRam”, encoder, alyas “Raul”, 49, alyas “Chris”, 26, construction  worker, at “Jahz”, 23, pawang residente ng lungsod.

Sa kanyang ulat kay Northern Police District (NPD) Acting District Derictor P/Col. Josefino Ligan, sinabi ni Col. Canals na nakatanggap ng impormasyon ang mga operatiba ng Station Drug Enforcement Unit (SDEU) hinggil sa umano’y ilegal drug activities ng mga suspek.

Nang magawang makipagtransaksyon ng isa sa mga operatiba ng SDEU sa mga suspek, ikinasa nila ang buy bust operation, katuwang ang mga tauhan ng Caloocan Police SS14 at SS15 sa koordinasyon sa PDEA.

Matapos matanggap ang signal mula sa isa nilang kasama na nagpanggap poseur-buyer na positibo na ang transaksyon, agad pinasok ng mga operatiba ng SDEU sa pangunguna ni P/Lt Restie Mables ang isang bahay sa San Lorenzo St., Malaria, Brgy., 185 at inaresto ang mga suspek dakong alas-7:25 ng umaga.

Ayon kay Col. Canals, nakuha sa mga suspek ang 90.5 kilograms ng hinihinalang pinatuyong dahon ng marijuana na may katumbas na halagang P10,860,000, buy-bust money na isang tunay na P500 bill at 15 pirasong P1,000 boodle money, tatlong itim na box, dalawang malaking transparent plastic at isang weighing scale.

Kasong paglabag sa Sections 5, 26 at 11 sa ilalim ng Article II ng R.A. 9165 o ang Comprehensive Dangerous Drugs Act of 2002 ang isinampa ng pulisya laban sa mga suspek sa Caloocan City Prosecutor’s Office.

Pinuri ni Col. Ligan ang Caloocan sa kanilang mabilis na pagkilos sa pagbuwag sa isa pang operasyon ng droga, na nagpapatibay sa pangako ng NPD na panatilihing ligtas mula sa ilegal na droga ang mga komunidad. (Richard Mesa)