“WALANG PAGSISISI.”

Ito ang naging tugon ni Presidential Communications Secretary Jay Ruiz nang tanungin sa isang press briefing sa Malakanyang kung nagsisisi na ba ito ngayon na tinanggap ang nasabing posisyon matapos na paratangan na nakasungkit siya ng P206-million deal sa Philippine Charity Sweepstakes Office (PCSO) para sa page-ere ng lotto draws sa state-run IBC 13.

Ang usaping ito kasi ayon kay Ruiz na malinaw na ‘demolition job’ ay nagdulot ng epekto sa kanyang pamilya.

“Walang pagsisisi. Ako po ay nandito para magsilbi, to serve our people, iyon lang,” aniya pa rin na ang tinutukoy ay pagtanggap niya ng posisyon bilang PCO Secretary sabay sabing “totoo po iyan, wala naman akong—ano ang makukuha ko dito? Pagpasok ko dito ang unang gagawin, reform, streamline, eh di magkakaroon ka ng maraming kaaway, iyong mga mawawalan ng posisyon. Iyong mga maapektuhan, mahirap. Tinanong nga ako, kaya mo ba, Jay?  Inisip ko, gusto ko ba ito? Nanahimik ako eh, I live a stress-free life already, then I was focus on the business.”

Sa kabilang dako, tiniyak naman ni Ruiz hindi na nakarating sa kaalaman pa ni Pangulong Marcos ang isyung ito. Iyon nga lamang ay nakarating ito sa kaalaman ng kanyang nanay na 78 taong gulang, may heart disease at na-high blood pa at sa kanyang pamilya.

“Ito lang po, nakarating lang sa nanay ko, nakarating sa asawa ko at nakarating sa anak ko, iyon iyong mahalaga. Kaya ginagawa ko ito, para sa kanila, I owe it to them to explain. Kasi ang hirap naman, baka ma-bully sa school eh ‘di ba? Kasi, wala naman silang kinalaman dito, kaya please lang ha, ito na talaga, kapag pinakita iyong mga mukha ng anak ko, please huwag isasama iyon ha, okay lang ako, walang problema. Pero not my family, please lang, hindi sila kasama dito,” ang pahayag ni Ruiz.

“Kasi iyon nga iyong security concern ko lang, iyong security concern, huwag na iyon, hindi pupuwede iyon,” ang diing pahayag ni Ruiz. (Daris Jose)

KALABOSO ang 42-anyos na lalaki na hinihinalang gumagamit ng ilegal na droga nang bentahan ng hindi lisensiyadong baril ang pulis na nagpanggap na buyer sa Caloocan City, kamakalawa ng gabi.

Ayon kay Caloocan Police Chief P/Col. Edcille Canals, ikinasa ng mga operatiba ng Intelligence Section ang buy bust operation matapos magawang makipagtransaksyon kay alyas “Boom” ng isa mga operatiba.

Kaagad dinamba ng mga tauhan ni Col. Canals ang suspek nang tanggapin ang P6,500 markadong salapi mula isang operatiba na nagpanggap na buyer kapalit ng ibinenta na kalibre .9mm pistol na may tatlong bala sa magazine.

Isinagawa ang bentahan ng armas sa C3 Road, Brgy. 21, matapos makarating sa kaalaman ni P/Maj. Arnold Lising, hepe ng Intelligence Section, na naghahanap ng buyer ng kanyang baril si alyas “Boom” na kilalang gumagamit ng ilegal na droga sa kanilang lugar.

Bukod sa ibinentang baril, nakumpiska din sa suspek nang kapkapan ang nasa 6.1 gramo ng hinihinalang shabu na nagkakahalaga ng P41,480.00.

Pinapurihan naman ni P/Col. Josefino Ligan, Acting District Director ng Northern Police District (NPD) ang Caloocan City Police Station sa kanilang dedikasyon na mapanatili ang katahimikan at kaayusan sa naturang lungsod.

Iprinisinta na ang suspek sa inquest proceedings sa piskalya ng Caloocan City kaugnay sa kakaharin niyang kasong ilegal na pagbebenta ng armas at pag-iingat ng bawal na droga. (Richard Mesa)

SHOOT sa selda ang isang construction worker na may kinakaharap na kasong murder nang maispatan ng tumutugis na pulisya malapit sa kanilang lugar sa Navotas City.

Kaagad kinorner ng tauhan ni Navotas Police Chief P/Col. Mario Cortes ang akusadong si alyas “Eric”, residente ng Blk 31, Lot 59, Phase 2, Area 2, Brgy. NBBS Dagat-dagatan nang matiyempuhan sa Matambaka St. sa naturang ding barangay ng dakong alas-2:30 ng hapon.

Hindi na nakapalag si alyas Eric nang isilbi sa kanya ng pinagsanib na puwersa ng Warrant and Subpoena Section (WSS) at Navotas Police Sub-Station-4 ang warrant of arrest na inilabas ni Malabon Regional Trial Court (RTC) Presiding Judge Zaldy Balagat Docena ng Branch 170 noong Setyembre 22, 2024 para sa kasong murder.

Anio Col. Cortes, walang piyansang inirekomenda ang hukuman para sa pansamantalang paglaya ng akusado na nasa Top 4 wanted person sa District Level at Top 1 wanted person sa Station Level.

Pansamantalang nakapiit ang akusado sa custodial facility unit ng Navotas police habang hinihintay ang pagpapalabas ng commitment order mula sa korte. (Richard Mesa)

KALABOSO ang 39-anyos na lalaki na sangkot umano sa pagbebenta ng ilegal na droga nang pagbintahan umano ng shabu ang isang pulis na nagpanggap na buyer sa Valenzuela City.

Sa kanyang ulat kay Valenzuela police chief P/Col. Nixon Cayaban, sinabi ni Station Drug Enforcement Unit (SDEU) chief P/Capt. Joan Dorado na isinagawa nila ang buy bust operation nang magawa ng isa sa kanyang mga tauhan na makipagtransaksyon kay alyas “Jek-Jek” na taga-Caloocan City.

Nang matanggap ang signal mula sa kanyang kasama na nagpanggap na buyer na hudyat na nakabili na siya ng droga sa kanilang target, agad lumapit ang back up na operatiba saka dinamba ang suspek dakong alas-11:00 ng gabi sa 3rd St. beside Andoks Manok, Brgy. Marulas.

Nakumpiska sa suspek ang nasa 31 grams ng hinihinalang shabu na nagkakahalaga ng P210,800, buy bust money na isaang P500 bill at 14-pirasong P500 boodle money at P200 recovered money.

Ani PMSg Ana Liza Antonio, kasong paglabag sa Sections 5 at 11 ng Article II ng RA 9165 o ang Comprehensive Dangerous Drug Act of 2002 ang isinampa nila laban sa suspek sa Valenzuela City Prosecutor’s Office.

Pinapurihan ni NPD Acting District Director P/Col. Josefino Ligan ang Valenzuela police sa kanilang pagsisikap at didekasyon sa paglaban sa ilegal na droga. (Richard Mesa)

MAHIGIT P700K halaga ng shabu ang nasamsam sa dalawang drug suspects na kapwa itinuturing bilang High Value Inidividual (HVI) matapos magbinta ng shabu sa isang pulis na nagpanggap na buyer sa Valenzuela City, kamakalawa ng hapon.

Sa kanyang ulat kay Northern Police District (NPD) Acting District Director P/Col. Josefino Ligan, sinabi ni District Drug Enforcement Unit (DDEU) chief PLTCOL Timothy Aniway Jr na ikinasa nila ang buy bust operation sa koordinasyon sa PDEA at sa tulong ng Valenzuela Police Sub-Station 7 matapos ang natanggap na reklamo hinggil sa umano’y illegal drug activities nina alyas “Eric”, 43, at alyas “Totoy”, 64, kapwa ng Brgy. Bignay.

Nang matanggap ang hudyat mula sa isa nilang kasama na nagpanggap na buyer na positibo na ang transaksyon, agad pinasok ng mga operatiba ng DDEU sa pangunguna ni P/Capt. Regie Pobadora ang isang bahay sa Northville 2, Brgy. Bignay saka dinamba ang mga suspek dakong alas-4:35 ng hapon.

Nakumpiska sa mga suspek ang nasa 109 grams ng hinihinalang shabu na nagkakahalaga ng P741,200.00, buy bust money isang tunay na P500 bill at 23 P500 boodle money at itim na sling bag.

Kasong paglabag sa  RA 9165 o ang Comprehensive Dangerous Drug Act of 2002 ang isinampa ng pulisya laban sa mga suspejk sa piskalya ng Lungsod ng Valenzuela.

Pinuri ni COL. Ligan ang mga operatiba ng DDEU sa kanilang mabilis na pagkilos sa pagbuwag sa isa pang operasyon ng ilegal na droga, na nagpapatibay sa pangako ng NPD na panatilihing ligtas mula sa illegal na droga ang mga komunidad ng CAMANAVA. (Richard Mesa)

NAGSASAGAWA ng imbestigasyon ang pulisya hinggil sa pagkamatay ng isang guro sa Emilio Aguinaldo College (EAC) na umano’y natagpuang nakalutang sa gilid ng ilog sa Dasmarinas City, Cavite Lunes ng umaga.

Kinilala ang biktima na si Julian Dante, 42, may-asawa, Teacher ng EAC at residente ng Brgy San Lorenzo Ruiz, Dasmarinas City, Cavite.

Ayon sa salaysay ng kanyang asawa, huli nitong nakita na naglalakad sa gilid ng kalsada malapit sa ilog sa Block M16 Excess Lot, Barangay Emmanuel Bergado 2, Dasmarinas City, Cavite at simula noon ay hindi na siya umuwi.

Bandang alas-6:30 kamakalawa ng umaga nang nakita ng ilang residentee sa lugar ang bangkay nito na nakalutang sa ilog sa boundery ng Brgy Emmanuel Bergado at Brgy San Lorenzo Ruiz ng naturang Lungsod.

Inaalam pa ng pulisya kung pagkakalunod nga ang sanhi ng pagkamatay nito. (Gene Adsuara).