AGAD inatasan ni Assistant Secretary at Land Transportation Office (LTO) Chief, Atty. Vigor D. Mendoza II ang pagsasagawa ng refresher courses para sa lahat ng enforcers ng ahensya sa buong bansa matapos ang viral na insidente sa Panglao, Bohol.

“Ang insidenteng naganap sa Bohol ay nangangailangan ng mas malalim at sistematikong hakbang upang matiyak na hindi na ito mauulit sa hinaharap. Kaya naman magkakaroon tayo ng retraining para sa lahat ng LTO enforcers sa buong bansa, at ito ay magiging mandatory,” ani Asec Mendoza.

Sinabi rin ni Asec Mendoza na inatasan na niya ang pinuno at mga tauhan ng LTO-Law Enforcement Service (LES) sa Central Office na bumuo ng updated version ng protocol na dapat sundin sa pagpapatupad ng batas-trapiko.

Ayon kay Asec Mendoza, ang retraining program ay magtutuon ng pansin sa paggalang sa karapatang pantao at tamang proseso sa pagpapatupad ng mga regulasyon sa kaligtasan sa kalsada.

Ang kautusan ni Asec Mendoza ay bunsod ng isang viral video na nagpapakita umano ng marahas na pagtrato ng limang LTO enforcers sa isang motorcycle rider na di-umano’y may dalang patalim habang isinasagawa ang enforcement sa Panglao.

Samantala, iniutos na ni DOTr Secretary Vince Dizon ang agarang preventive suspension sa lahat ng LTO personnel na sangkot sa insidente sa Panglao, Bohol.

“Mananatili itong epektibo habang isinasagawa ang masusi at patas na imbestigasyon sa mga pangyayari sa likod ng insidente,” ayon sa pahayag ng DOTr.

Nauna nang ipinag-utos ni Asec Mendoza ang pansamantalang suspensyon ng deployment ng LTO enforcers sa Bohol habang hinihintay ang resulta ng imbestigasyon na kanyang iniutos matapos matanggap ang ulat tungkol sa insidente.

Aniya, kasalukuyang ipinatutupad ngayon ang corrective measures, at bahagi nito ang pagsasagawa ng retraining program para sa lahat ng LTO enforcers.

Dagdag pa ni Asec Mendoza, hihingi rin sila ng tulong mula sa Philippine National Police (PNP) sa pagbubuo ng mga panuntunan sa LTO enforcement at sa mismong pagsasagawa ng retraining. (PAUL JOHN REYES)

ITINALAGA ng dalawang grupo  ng motorcycle riders si Senatorial candidate Benjamin “Benhur” Abalos Jr., sa layuning isulong ang mas ligtas na kalsada para sa mga nagmomotorsiklo at mga guma­gamit ng tatlong-gulong na sasakyan.

Sa ginanap na forum kinilala ng Motorcycle Philippines Federation at Motorcycle Road Safety Warriors si Abalos sa kanyang malawak na karanasan sa serbisyo publiko at dedikasyon sa pamamahala ng trapiko.

“As a leader who has long advocated for road safety, we believe that Benhur Abalos is the right person to champion the welfare of motorcycle and three-wheeled ­riders,” sinabi ng grupo sa isang joint statement. “We trust that he will work towards policies that protect and benefit riders across the country,” anang  motorcycle groups.

Binigyang-diin nina Abalos at ng mga grupo ang agarang pangangai­langan para sa mas mahigpit na mga hakbang sa kaligtasan sa kalsada, kasabay ng pagtaas ng bilang ng mga aksidenteng may kinalaman sa mga motorsiklo.

Samantala, batay sa datos ng PNP-Highway Patrol Group, may 31,258 aksidente sa kalsada na naitala sa buong bansa noong 2024. Sa bilang na ito, 15,690 ay may kinalaman sa motorsiklo, habang 4,224 ang sangkot ang mga traysikel.