Ito ang sinabi ni Presidential Communications Office Ad Interim Secretary Jay Ruiz hinggil sa memorandum na nag-uutos sa lahat ng presidential appointees sa mga ahensya, tanggapan at burukrasya sa ilalim ng PCO na magsumite ng kanilang ‘unqualified courtesy resignations.’

”Usually ganoon naman talaga considering all presidential appointees here, di ba… para lang kumbaga siyempre free hand sa pagpili ng ating mga kasama… Mahirap din po kasi siyempre dapat pagkakatiwalaan mo kasi kung di mo kasama, di mo naman sila kakilala, of course, as secretary dapat dalhin mo rin ‘yung sarili mong tao,” ang sinabi ni Ruiz sa isang ambush interview, araw ng Lunes.

”Sa akin lang siyempre, walang personalan, marami po kasing tatamaan… maraming posibleng tamaan… siyempre aassess natin kung ano ‘yung ginawa nila, ng bawat opisina, proper evaluation,” aniya pa rin.

Sinabi ni Ruiz na tatagal ng dalawa hanggang tatlong linggo para tapusin ang assessment ng mga departamento sa ilalim ng PCO.

Matatandaang, si Executive Secretary Lucas Bersamin ang nagpalabas ng memorandum, sabay sabing ang hakbang ay naglalayon na pahintulutan at bigyan ang bagong itinalagang PCO secretary ng ‘free hand’ sa pagtupad sa kanyang mga tungkulin at pagpapatupad ng kanyang mga patakaran.

Ayon sa memorandum, ang lahat ng mga apektadong appointees ay dapat na magsumite ng kanilang resignation letter sa PCO secretary hindi lalampas sa Pebrero 28, 2025

Nanumpa naman si Ruiz bilang bagong hepe ng PCO noong nakaraang linggo. Mismong si Pangulong Ferdinand Marcos Jr., ang nangasiwa ng panunumpa sa tungkulin ni Ruiz.

Samantala, pinalitan ni Ruiz si Cesar Chavez, nagbitiw sa tungkulin matapos na aminin na “fallen short of what was expected of him.” (Daris Jose)

UMABOT na sa mahigit 53 milyon ang naimprentang balota para sa May 2025 elections, ayon sa Commission on Elections (Comelec).

Base sa datos, kabuuang 53,894,129 balota na ang naimprenta o 76.58% ng 72 milyong kinakailangan. Ang kabuuang 16,338,956 balota pa ang natitira na kailangang iimprenta.

Una nang sinabi ni Comelec Chairman George Garcia na target na makapag-imprenta ng 1.5 milyong balota  upang makabawi sa pinaikling timeframe para sa produkdyon ng mga opisyal na balota. Nagpahayag din siya ng kumpiyansa na makumpleto ng Comelec ang proseso ng pag-imprenat sa Abril 14,2025.

Gayunpaman, sinabi ni Garcia na ang pag-imprenta ay tumaas sa 1.7 milyong mga balota kada araw at ang Comelec ay nagnanais na makumpleto ang proseso ng pag-imprenta ng balota sa Marso  at verifcation ng balota sa Abril.

Ayon kay Garcia, basta magtuloy-tuloy ang performance ng makina ay maaring sa ikalawang linggo hanggang ikatlong linggo ng Marso maaring matapos ang ballot printing.

Maalala na ipinagpatuloy ng Comelec ang pag-imprenta ng opisyal na balota noong Enero 27, isang linggo matapos itong suspendihin  nang maglabas ng temporary restraining orders ang Korte Suprema laban sa mga diskwalipikasyon ng ilang kandidato. (Gene Adsuara)

NAGPAHAYAG nang pagkabahala si House Assistant Majority Leader Jay Khonghun ng Zambales sa kakulangan o kawalan ng tugon mula sa ilang mga senatorial candidates kaugnay sa lumalaking banta ng Chinese espionage sa Pilipinas.

Reaksyon ito ng mambabatas kasunod nang pagkakaaresto ng pinagsususpetsahang dayuhang espiya na nagsasagawa ng surveillance sa olang kritical na government at military sites.

Ayon kay Khonghun, chairman ng House Special Committee on Bases Conversion, dapat maging top priority ang usapin ng national security lalo na sa mga kakandidatong senador, kasabay na rin ng lumalaking ebidensiya ng intelligence-gathering operations na iniuugnay sa China.

“Napakalaking isyu ng pambansang seguridad, pero bakit tila walang gustong magsalita? Ang Senado ang may tungkulin sa paggawa ng mga batas na magpapalakas sa ating depensa. Dapat marinig natin kung ano ang plano nila para sa ating kaligtasan,” ani Khonghun.

Kamakailan lamang ay binuwag ng otoridad ang umano’y espionage ring na nago-operate sa bansa.

Sa imbestigasyon ng National Bureau of Investigation (NBI) ay nadiskubre ang ginagawang surveillance activities sa ilang matataas na sensitibong lokasyon kabilang na ang Malacañang, Armed Forces of the Philippines (AFP) headquarters, at Philippine National Police (PNP) compound.

Kabilang sa mga naaresto ay dalawang Chinese nationals na nakuhanan ng advanced surveillance equipment na kayang harangan ang mobile communications.

Nitong Enero, isa pang grupo ng Chinese nationals ang nahuling minomonitor ang Philippine Coast Guard at Navy operations sa Palawan.

Nadiskubre ng mga imbestigador ang high-resolution, solar-powered cameras na nakalagay malapit sa maritime security areas.

“Hindi natin pwedeng ipagwalang-bahala ang ganitong mga insidente. Kung patuloy natin itong babalewalain, paano natin maipagtatanggol ang ating bansa?” pahayag ni Khonghun.

(Vina de Guzman)

PINANGUNAHAN nina Mayor John Rey Tiangco at Congressman Toby Tiangco, kasama ang iba pang mga opisyal ng Pamahalaang Lungsod ng Navotas ang pagbabasbas at pagpapasinaya sa Milflores Bombastik Station sa Brgy. Tanza 2, at Taganahan Bombastik Station sa Brgy. Bagumbayan South, bilang karagdagang pasilidad na panlaban sa baha. (Richard Mesa)

SA layunin ng Navotas na palakasin pa ang kanilang panlaban sa baha at community facilities, pinabasbasan at pinasinayaan ng Pamahalaang Lungsod sa pangunguna nina Mayor John Rey Tiangco at Congressman Toby Tiangco ang tatlong bagong pumping stations at school covered court.

Ang Navotas ay mayroon na ngayon kabuuang 87 estratehikong lokasyon na mga pumping station sa buong lungsod na matatagpuan sa Milflores St. sa Brgy. Tanza 2, M. Naval St. sa Brgy. Sipac-Almacen, at Taganahan St. sa Brgy. Bagumbayan South.

Samantala, ang bagong tayong covered court ay matatagpuan naman sa Dagat-dagatan Elementary school.

“We are building not just structures but stronger foundations for a safer and more progressive Navotas. These additional pumping stations will significantly reduce flood risks, safeguarding lives and livelihoods, especially during high tide and typhoon season,” ani Mayor Tiangco.

Binigyang-diin din niya ang kahalagahan ng bagong itinayong school facility.

“Education must continue, rain or shine. This covered court will provide students with protection from extreme heat and heavy rains, allowing them to focus on their school activities without disruption,” dagdag niya.

Binigyang-diin ni Congressman Tiangco, sa kanyang mensahe, ang mahalagang papel ng komunidad sa pagtiyak na mananatiling epektibo ang mga hakbangin sa pagkontrol sa baha ng lungsod

“Our pumping stations are powerful tools against flooding, but their effectiveness depends on all of us. Proper waste disposal and environmental responsibility are key to keeping them functioning optimally. Taking care of Navotas is a shared duty—let’s do our part to keep our city clean, safe, and flood-free,” pahayag naman ni Cong. Tiangco.

Dumalo rin sa naturang aktibidad sina Vice Mayor Tito Sanchez, mga miyembro ng konseho ng lungsod, mga barangay chairperson, at mga kinatawan mula sa Department of Public Works and Highways Malabon-Navotas District. (Richard Mesa)

KALABOSO ang 27-anyos na lalaki matapos pagsasaksakin ang isang binatilyong estudyante bago tinangay pa ang motorsiklo at iba pang gamit ng biktima sa Valenzuela City.

Ayon kay Valenzuela Police Chief P/Col. Nixon Cayaban, nagtungo ang 15-anyos na biktima sa bahay ng ka-klase sa Brgy. Parada upang humiram ng isusuot sa kanilang school activity bago mag-alas 2 ng Sabado ng madaling araw nang ma-ispatan siya ng suspek na si alyas “Rico” na kailan lang niya nakilala.

Nakiusap umano si alyas Rico sa biktima na samahan muna siya sa Santiago St. Brgy. Gen. T. De Leon na pinagbigyan ng binatilyo.

Pagdating sa eskinita ng Santiago St., dito na siya hinoldap at pinagsasaksak sa leeg ng suspek bago tumakas patungo sa direksiyon ng Sta Quiteria sa Caloocan City, tangay ang motorsiklo, helmet, cellular phone, at kasuotan ng biktima.

Sa ginawang pagsisiyasat, nakilala ni P/Capt. Ronald Bautista, Commander ng Valenzuela Police Sub-Station 2 ang suspek na dati ng may mga kasong pagnanakaw, panghoholdap, pananakot, ilegal na sugal, at alarm and scandal kaya nalaman nila kung saan ito nakatira.

Inabangan ng grupo ni Capt. Bautista ang suspek hanggang sa maispatan nila ito pasado alas-2 ng hapon malapit sa kanyang bahay sa Salazar St., Brgy. Parada habang minamaneho ang tinangay na motorsiklo sa biktima na nagresulta sa pagkakaaresto sa kanya.

Narekober sa suspek ang cellphone ng biktima, motorsiklo, helmet, coin purse at isang isang caliber .38 revolver na kargado ng tatlong bala.

Ani Col. Cayaban, nahaharap ang suspek sa mga kasong Robbery with Serious Physical Injuries, paglabag sa Comprehensive Law on Firearms and Ammunition, Omnibus ElectionCode, Illegal Possession of Bladed Weapon at  Carnapping. (Richard Mesa)

TIMBOG ang 69-anyos na lolo na akusado sa karumal-dumal na krimen kasabwat ang tatlo niyang kaanak na nangyari sa Valenzuela City, nang matunton ng pulisya sa tinutuluyan niyang bahay sa Quezon City.

Sa kanyang ula kay Northern Poice District (NPD) Acting District Director P/Col. Josefino Ligan, sinabi ni Valenzuela Police Chief P/Col. Nixon Cayaban, nakatanggap sila ng impormasyon hinggil sa tinutuluyang bahay ng akusado na si alya “Badok” na nasa talaan ng lungsod bilang No. 2 Most Wanted Person.

Sa pakikipag-koordinasyon sa Quezon City Police District (QCPD) at opisyal ng barangay, dinakip ng mga operatiba ng Warrant and Subpoena  Section (WSS) sa pangunguna ni P/Lt. Jaime Abarientos si alyas Badok dakong alas-7:30 ng gabi sa kanyang tirahan sa Pook Pagasa, Batasan, Quezon City.

Ayon kay Col. Cayaban, kasama ni alyas Badok ang kanyang mga kaanak na sina alyas “Albino”, alyas “Roderick”, at alyas “Joeven”, nang isagawa ang pa-traidor umanong pagpatay sa kanilang biktima sa Valenzuela City.

Naglabas ng warrant of arrest si Valenzuela City Regional Trial Court (RTC) Presiding Judge Mateo B. Altarejos ng Branch 172 noong Nobyembre 26, 2024 laban sa apat nang hindi na sila mahagilap ng pulisya makaraan ang pagpatay.

Sinabi ni Cayaban na walang inirekomendang piyansa ang hukuman para sa pansamantalang paglaya ni alyas Badok habang patuloy nilang tinutugis ang tatlo pa niyang kaanak na pawang kabilang sdin sa No. 2 MWP sa lungsod. (Richard Mesa)