BUKAMBIBIG ngayon ng karamihan ang salitang “Okay na ‘to!” 

At saka nila sasabihin na, “Grace Tanfelix?”. Isa lang ang ibig sabihin, marami na talaga ang nanonood sa mga vlogs ng mommy ni Miguel Tanfelix.

Kaya may mga humihirit na, “Mas sikat na nanay ni Miguel kesa sa kanya!”. 

Pero in fairness to Miguel, nakausap na namin siya tungkol sa pagiging vlogger ng nanay niya at isa siya sa unang-unang natutuwa na marami ang nakakapanood.

Maging ang mga co-stars nga raw niya, masaya kapag pinapabaunan siya ng mommy niya ng luto nito at sini-share niya sa taping.

Kaya para kay Miguel, okay lang na bukod sa kanya, sumisikat na rin ang ina at nagiging word of mouth na ng karamihan ang “okay na ‘to!”  

Nakakaloka lang ang ilang mga bashers siguro ni Miguel o ng network o ng kanyang primetime series na “Mga Batang Riles” na kesyo mas nauna pa raw napasikat ng Tiktok ang nanay kesa napasikat ng Sparkle ang anak. 

Grabe naman, e, isa kami sa mga unang follower rin ng nanay ni Miguel na isa rin sa ikinaaliw namin sa kanya, yung malamang nanay siya ni Miguel at may mga instances na nakakasama pa sa video niya ang Kapuso actor.

Pero dahil nga marami na ang gumagamit ng “Okay na ‘to,” aba, mag-special guest na rin ang nanay ni Miguel sa sariling serye. 

Kung may mga namba-bash, ang dami rin naming nababasang comment na natutuwa sa mag-ina.

***

MAKIKITA ang art exhibit na kung tawagin ni Manila Vice Mayor Yul Servo na metal artwork sa arrival ng Terminal 3 sa NAIA, malapit sa may VIP parking.

Na-impress kami dahil kakaiba ang art form niya at talagang matiyaga niyang pinag-aralan, ginuhit ang mapa ng iba’t-ibang lugar sa Manila sa pamamagitan ng mga scrap na metal o stainless steel.

Matagal na itong ginagawa ni Yul, pero ang 13 pieces na makikita sa NAIA ay plano niyang iikot sa buong bansa. Isang paraan na rin niya ito para maipakita pa raw ang legacy ng Manila kunsaan siya pinanganak, lumaki at naninilbihan.

Sa ngayon, tumatakbo pa rin siya sa pagka-Vice Mayor ng Manila at sabi nga namin, kahit nasa partido siya ng incumbent Mayor, nakasama niya rin sa termino noong Congressman siya si Isko Moreno na kalaban nilang partido at kung hindi ba siya naiipit?

“Parehas ko silang mga naging lider. May time na pwede ka talagang maipit. May time na pwede ka talagang pumunta sa isang panig lang, sa isang prinsipyo.”

Although, nalulungkot daw siya na silang magkapatid ay nasa magkalaban na partido.

“Nakakalungkot pero hindi kami magka-away. Pero, pagdating sa pulitika, magkahiwalay kami. Hindi kami nag-uusap pagdating sa pulitika. Alam mo na, gusto kong lumaban na may respeto, may pagmamahal, patas. Magkahiwalay tayo, pero lumaban tayo ng patas.”

Sa isang banda, aminado si Yul na nami-miss niya ang pag-arte, pero ang huli naman daw niya ang “Black Rider” pero kahit na naka-focus siya sa pulitika, hindi raw mawawala na sa dugo niya ang pag-arte, pero sa ngayon, ang metal art ang isa sa napagtutuunan niya ng pansin.

(ROSE GARCIA)

INAMIN ni Rep. Sam Verzosa na kinonsider nila ang girlfriend at Kapuso actress na si Rhian Ramos na maging host ng “Dear SV” na magpapaalam na sa ere ngayong Sabado, March 1 dahil sa kanyang pagtakbo bilang Mayor ng Maynila.  

Ayon kay SV, “pinag-isipan ko sana baka puwede siyang pumalit pero alam ko naman kung ano ang forte ni Rhian eh.

“Kasi she’s been hosting a lot of lifestyle and travel shows sa GMA.  So, sabi ko why not featured Manila.

“Kasi lagi kong kinukuwento sa  kanya, tuwing umiikot ako, ‘alam mo Boo, maraming magagandang lugar sa Maynila, hindi lang napo-promote, hindi napupuntahan.

“Kahit kami mismo, taga doon na, hindi namin alam na they exist.  Actually, kulang talaga ng promotion sa turismo ng Maynila.

“Napakaraming magagandang lugar, na kulang ang isang linggo para maikot mo at mapuntahan.  At yun ang layunin ng show na maipakita ang kagandahan ng Maynila, para hindi na lumayo ang mga kababayan natin at ipagmalaki ang lugar natin.”

Ang tinutukoy na bagong show na papalit sa timeslot ng “Dear SV” sa GMA ang “Where In Manila” na si Rhian nga ang host, na nagkaroon ng media launch sa Winford Hotel sa Sta. Cruz, Manila nitong Huwebes.

Pagkukuwento ng actress/host tungkol sa Maynila, “Siguro iniisip lang nila na it’s just a regular city, but actually, a very deserving tourist spot.  Ako, I would gladly take friends or visitors around Manila, to really experience the city.

“I believe that Manila in itself is an experience.  It’s not just a place but also an experience.  It has its own personality na dapat nating ipagmalaki.

“Ipi-feature namin sa show ang masasarap na pagkain, a bit of adventure, at magagandang tanawin.  Pupuntahan talaga namin lahat ‘yan.  Marami na akong nakita at nakilala na small business owners na dapat talagang bigyan ng pansin. 

“Yung pino-promote nilang parts ng Manila.  I believe that the people is really what makes the city so colorful.  ‘Yung mga original nilang ideas sa ginagawa nilang negosyo at produkto na puwede talagang ipagmalaki sa buong Pilipinas.”

At sa pagsisimula ng “Where In Manila” sa March 8 (11:30 p.m.), natanong si Sam kung ano ang mangyayari na sa “Dear SV” na sa dalawang taon sa ere, ay marami na talagang natulungan.

“Magpapatuloy pa rin naman ang ‘Dear SV’, pero sa online dahil hindi lang talaga ako puwede sa telebisyon dahil sa aking pagtakbo.

“Kaya si Rhian muna ang magpapatuloy.  At titingnan natin sa mga susunod na buwan at kung ano man ang kalalabasan, kasi malapit po na ang eleksyon.  Pag tayo ay pinalapad po na manalo bilang mayor ng Manila ay doon natin mapag-iiisipan kung puwede naming maging partner ang ‘Where In Manila’ sa pagpo-promote po ng aming lungsod.

“Para mas lalong matulungan ang turismo at ang mga maliliit na negosyante para ma-promote ang kanilang negosyo.”

Samantala, natanong din si Sam kung magpapakasal na sila ni Rhian, saang simbahan kaya ito sa Manila magaganap? 

“‘Pag nangyari ‘yun, sa Maynila po kami ikakasal,” tugon ni SV.

“Minsan pinag-uusapan namin, may pinupuntahan kaming mga lugar, na baka puwede dito.

“Pero dahil deboto ako ng Mahal na Nazareno, kaya lagi kong binabanggit kay Rhian na, okey ba sa ‘yo na if ever, dito tayo (Quiapo Church)?’”

Na sinagot naman ni Rhian ng, “bahala ka, kung saan mo gusto?”

Ang lifestyle and travel show na “Where In Manila” ay hatid ng TV8 Media at base sa napanood naming teaser sa pilot episode ngayong March 8 at 11:30 p.m. sa GMA, punum-puno masasarap na pagkain, magagandang tanawin at higit sa lahat ang nakakakilig na lambingan nina Sam at Rhian.

Kaya ‘wag palagpasin lalo na ang mga kapwa Manilenyo!

(ROHN ROMULO)