SUMAILALIM na sa inquest proceedings sa Department of Justice noong Pebrero 24 ang mga naarestong dayuhan sa pagsalakay sa offshore  gaming  operations sa ATI Building  sa tapat ng PITX Terminal sa Paranaque City, ayon sa Presidential Anti-Organized Crime Commission.

“Na-inquest na po natin yung mga foreign nationals na nagpapatakbo ng POGO hub dito sa PITX. And, 20 foreign nationals ang kinasuhan namin dun,” ayon kay  PAOCC Director Undersecretary Gilbert Cruz.

Ang mga suspek ay kinasuhan ng qualified trafficcking, ayon kay Cruz.

“Makikita mo naman na talagang sila ang nag facilitate nung mga nagtatrabaho sa POGO hub na ito para mag-work ng matagal. Yung ginagawa nila, marami silang violation, bukod dun sa mga dokumento na kulang-kulang na pinakikita nila, and yung pagpapatakbo ng isang POGO hub na wala namang kaukulang mga papeles,” aniya.

Ilang Pinoy na suspek ang kinasuhan habang ang iba ay pakakawalan base sa rekomendasyon ng piskal.

Ayon sa PAOCC, sa  kabuuang  465 indibidwal,  146 ay banyaga at 319 Pilipino, ang nahuli sa raid noong Pebrero 20. (Gene Adsuara)

NALAMBAT ng mga operatiba ng Northern Police District – District Special Operations Unit (NPD-DSOU) ang 35-anyos na bebot na wanted sa droga matapos ang ikinasang manhunt operation sa Navotas City.

Ayon sa DSOU-NPD, nakatanggap sila ng impormasyon na naispatan sa Brgy. NBBN ang presensya ng akusado na kabilang sa mga talaan ng mga ‘Most Wanted Persons’ sa Lungsod ng Manila.

Agad bumuo ng team ang DSOU saka ikinasa ang manhunt operation na nagresulta sa pagkakaaresto sa akusado dakong alas-2:20 ng hapon sa Road 10, Barangay NBBN, Navotas City.

Dinakip ng mga operatiba ng DSOU ang akusado sa bisa ng warrant of arrest para sa paglabag sa Section 11(3) ng Article II ng RA 9165 na inisyu ni Presiding Judge Maria Bernardita J. Santos, ng RTC Branch 35, Manila, noong December 22, 2014, na may inirekomendang piyansa na P120,000.00.

Pansamantalang nakapiit ang akusado sa DSOU-NPD Custodial Facility Unit habang hinihintay ang pagpapalabas ng commitment order mula sa hukuman.

Binati ni P/COL Josefino Ligan, Acting District Director ng NPD ang dedikasyon at tiyaga ng mga operatiba sa pagtugis sa mga pugante na nauugnay sa krimen

“This operation showcases the unyielding dedication of our personnel in the pursuit of justice for victims. We are resolute in our mission to intensify initiatives aimed at safeguarding our communities.”. pahayag niya. (Richard Mesa)

KALABOSO ang 22-anyos na part-time worker ng isang bodega ng iba’t-ibang produkto nang kanyang tangayin sa tanggapan nito ang mga gadgets sa Valenzuela City.

Ani Valenzuela Police Chief P/Col. Nixon Cayaban, natuklasan ng Human Resource Manager ng Surewin Household Corp. sa Malakas St., Brgy. Dalandanan na si alyas “ Ela”, 27, ang pagkawala ng dalawang laptop at dalawang cellular phone ng may kabuuang halagang Php105, 000.00 nang buksan niya ang kanilang opisina dakong ala-12:41 ng Linggo ng hapon.

Nang personal niyang rebisahin ang kuha ng CCTV ng kompanya, dito niya natuklasan na ang kanilang part-time na kawani na si alyas Ranuel ang tumangay sa mga gadgets kaya i-nireport niya ang insidente sa barangay.

Sunod na humingi siya ng tulong sa mga tauhan ng Police Sub-Station 6 kaya sinamahan siya ng mga tauhan ni SS6 Commander P/Capt. Doddie Aguirre sa Police Detective Unit ng Valenzuela police.

Sa ikinasang follow-up operation ng mga tauhan ni Col. Cayaban, nadakip ang suspek sa kanyang bahay sa Area 4, Pinalagad, Malinta dakong alas-2:35 ng madaling araw.

Pagnanakaw ang kasong inihain ng pulisya laban sa suspek sa Valenzuela City Prosecutor’s Office matapos mabawi sa kanya ang mga gadgets na kanyang kinulimbat sa tanggapan ng naturang bodega. (Richard Mesa)

LAGLAG sa selda ang isang tulak ng droga na itinuturing bilang High Value Individual (HVI) nang makuhanan ng mahigit P2.1 milyong halaga ng shabu sa ikinasang buy bust operation ng pulisya sa Caloocan City, Lunes ng madaling araw.

Kinilala ni Northern Police District – District Drug Enforcement Unit (NPD-DDEU) Chief PLTCOL Timothy Aniway ang naarestong suspek na si alyas “Boss”, 54, residente ng Brgy. 176.

Sa kanyang ulat kay NPD Acting District Director P/Col. Josefino Ligan, sinabi ni Lt. Col. Aniway na positibo ang nakatanggap nilang impormasyon hinggil sa malakihan umanong pagbibenta ng shabu ng suspek.

Nang magawa ng isa sa kanyang mga tauhan na makipagtransaksyon sa suspek, agad bumuo ng team si Lt. Col. Aniway saka ikinasa nila ang buy bust operation sa koordinasyon sa PDEA.

Agad sinunggaban ng mga operatiba ng DDEU ang suspek matapos tanggapin ang markadong salapi mula sa isang pulis na nagpanggap na buyer dakong alas-4:47 ng madaling araw sa Phase 3, Package 2, Lot 1, Block 52, Barangay 176, Bagong Silang.

Nakumpiska ng mga operatiba ng DDEU sa suspek ng nasa 320 grams ng hinihinalang shabu na may katumbas na halagang P2,176,000 at buy bust money.

Sasampahan ng DDEU ang suspek ng kasong paglabag sa Sections 5 at 11 sa ilalim ng Articla II ng RA 9165  o ang Comprehensive Dangerous Drugs Act of 2002.

Pinapurihan ni Col. Ligan ang dedikasyon at pagsisikap ng mga operatiba sa kanilang pangako sa pagpuksa sa ilegal na droga at pagprotekta sa komunidad. (Richard Mesa)