NAKIPAG-UGNAYAN ang Land Transportation Office (LTO) sa Pamahalaang Lungsod ng Valenzuela para sa pagpapatupad ng isang proyekto na naglalayong matugunan ang backlog sa plaka ng mga sasakyang pag-aari ng lokal na pamahalaan at mga tricycle na ginagamit sa pampublikong transportasyon.

Nagpahayag ng pasasalamat si LTO Chief Assistant Secretary Atty. Vigor D. Mendoza II kay Valenzuela City Mayor Wes Gatchalian sa kanyang tiwala at kumpiyansa sa LTO, na naging daan upang maisakatuparan ang kasunduang magpapabilis sa pagpapalabas ng mga plaka.

“Nagawa natin ito sa Quezon City at nagawa natin ito sa Marikina City. Walang dahilan para hindi natin magawa ito sa Valenzuela City sa lalong madaling panahon,” ani Asec Mendoza.

Batay sa kasunduan, ang Pamahalaang Lungsod ng Valenzuela, sa pangunguna ng project action officer na si Konsehal Sel Sabino-Sy, ay magbibigay ng kinakailangang suporta sa LTO para sa mabilisang pagproseso ng mga plaka. Magsisimula ito sa pagtukoy ng lahat ng sasakyang pag-aari ng pamahalaang lungsod.

Nagpahayag din ng pasasalamat si Mayor Gatchalian kay Asec Mendoza at sa LTO team sa kanilang pagpupulong na dinaluhan nina LTO Executive Director Atty. Greg G. Pua Jr., LTO Valenzuela Chief Johnny Dog-E, LTO-NCR Operations Chief Hanzley Lim, at Chief ng Plate Unit ng LTO NCR na si Lito Pandi.

“Sa simula, ang proyektong ito ay tututok muna sa mga sasakyang pag-aari ng Pamahalaang Lungsod ng Valenzuela bilang bahagi ng kasunduang gobyerno sa gobyerno. Ngunit kalaunan, palalawakin ito upang maisama ang mga Tricycle Operators and Drivers’ Associations (TODAs) sa Valenzuela City,” ayon kay Mayor Gatchalian.

Ang kasunduang ito ay isinulong kasunod ng matagumpay na pagtugon sa backlog ng plaka ng mga tricycle sa Quezon City noong nakaraang taon at sa Marikina City kamakailan at binigyang-diin ni Asec Mendoza ang kahalagahan ng suporta at tiwala mula sa mga lokal na pamahalaan upang mapabilis ang proseso.

Sa patnubay ni DOTr Secretary Jaime J. Bautista, at sa pangunguna ni Asec Mendoza, malayo na ang narating ng LTO sa paglutas ng backlog sa plaka na nagsimula pa noong 2014.

Sa loob lamang ng anim na buwan mula nang maupo si Asec Mendoza bilang pinuno ng LTO, natugunan ang backlog sa plaka ng mga sasakyang may apat na gulong matapos makapagprodyus ang ahensya, sa tulong ni Secretary Bautista, ng humigit-kumulang 800,000 plaka kada buwan.

Ayon kay Asec Mendoza, nasa tamang direksyon ang layunin ng ahensya na matugunan ang backlog sa plaka ng mga motorsiklo ngayong taon. (PAUL JOHN REYES)

PORMAL nang sinimulan ng Commission on Elections (Comelec) ang kanilang ‘Oplan Baklas’ o crackdown laban sa illegal campaign materials ng mga kandidato dakong alas-4:00 ng madaling araw, Miyerkoles.

Kasabay na rin ito nang pormal nang pag-arangkada ng campaign period para sa national elections kahapon.

Mismong si Comelec Chairman George Erwin Garcia at iba pang opisyal ng poll body ang nanguna sa operasyong isinagawa sa Tondo, Manila.

Ayon kay Garcia, “Ito po ay napakalaking simbolismo, at ito ay para sa buong bansa, upang ipakita sa mga kandidato, sa mga political parties na sa mga susunod na araw, ‘pagka nagkabit sila doon sa mga lugar na hindi dapat sila nagkakabit, tatanggalin at tatanggalin namin.”

Aminado naman si Garcia na hindi nila maaaring alisin ang mga campaign materials na nakapaskil sa private properties dahil ang mga ito ay protektado aniya ng karapatan ng mismong may-ari ng naturang ari-arian.

Itatago rin aniya nila ang mga nakumpiskang posters at gagamiting ebidensiya sa gagawing paghahain ng kaukulang mga kaso.

Pinaalalahanan ni Garcia ang mga kandidato na sundin ang tamang sukat ng mga campaign materials at i­paskil sa designated common poster areas upang makaiwas sa parusa.

Hindi pa naman inaalis ng Task Force Oplan Baklas ang mga campaign materials para sa lokal na kandidato dahil ang campaign period para sa mga lokal na kandidato ay magsisimula pa lamang sa Marso 28.

Mahigpit din ang paalala ng Comelec na ang isang political party candidate ay maaari lamang gumastos ng P3 kada registered voter at P5 kada registered voter para sa mga walang political party.

Nagbabala rin si Garcia na ang mga mapapatuna­yang nakagawa ng election offense ay maaaring madiskuwalipika sa halalan at makulong ng hanggang anim na taon.

Ang campaign period para sa national at local positions ay nakatakdang magtapos sa Mayo 10, 2025, dalawang araw bago ang mismong araw ng halalan sa Mayo 12.