‘BAGONG BAHAY, BAGONG BUHAY’! Pinangunahan ng Social Housing Finance Corp. (SHFC) at Pamahalaang Lungsod ng Valenzuela sa ilalim ng pamumuno ni Mayor Wes Gatchalian ang groundbreaking ceremony para sa Phase III ng Laon HOAs Federation, Inc. Community Mortgage Program (CMP) Vertical Housing Project, bilang bahagi ng selebrasyon ng ika-27 Charter Day ng Lungsod.

Ayon kay Mayor Wes, ito ay bahagi ng Pambansang Pabahay Para sa Pilipino (4PH), higit ₱292 milyon ang inilaan para sa initial na 240 housing units na itatayo sa limang three-story buildings sa C. Molina St., Brgy. Veinte Reales. (Richard Mesa)

ITINALAGA ni Presidential Communications Office (PCO) Acting Secretary Cesar B. Chavez si Senior Undersecretary Emerald Anne R. Ridao bilang Officer-in-Charge ng PCO.

Sa ipinalabas na Special order No. 25-044 ni Chavez, layon nito na tiyakin na magpapatuloy ang operasyon ng PCO.

Si Ridao ay uupo bilang OIC ng PCO mula Pebrero 17 hanggang 21, 2025.

“As such, Senior Undersecretary Ridao shall take care of the day-to-day operations of the PCO, and if neceessary, act for and on behalf of the Acting Secretary,” ayon kay Chavez

Ang nasabing Special Order ay may petsang Pebrero12, 2025.

Samantala, hindi naman nabanggit sa Special Order ang dahilan ng pagtatalaga kay Ridao bilang OIC ng PCO. (Daris Jose)

KINUMPIRMA ni Executive Secretary Lucas Bersamin na si Vivencio “Vince” Bringas Dizon na ang susunod na Kalihim ng Department of Transportation, epektibo Pebrero 21, 2025.

Papalitan ni Dizon, isang ekonomista at consultant na nagsilbi noon bilang pangulo ng Bases Conversion and Development Authority (BCDA) si outgoing Sec. Jaime Bautista na nagbitiw sa tungkulin dahil sa “health reason.”

“He is already authorized by the Office of the President to start the transition at the DOTr in coordination with the team of Secretary Jaime Bautista, who has resigned due to health reasons,” ayon kay Bersamin.

Samantala, napabilang sa myembro ng gabinete ni Pangulong Ferdinand Marcos Jr. si outgoing Scretary Bautista noong taong 2022.

Pinalitan noon ni Bautista si Arthur Tugade bilang DOTr secretary .

Si Bautista, na isang certified public accountant, ay nanungkulan sa pal sa loob ng 25 taon bilang pangulo bago nag-retiro noong 2019.

Kabilang sa mga naging marching order sa kanya ni Pangulong Marcos noon ay mag-develop ng premier airport na pasok sa international standards.

(Daris Jose)

HINIMOK ni Mayor Jeannie Sandoval ang mga Malabueno na makiisa sa kampanya ng Pamahalaang Lungsod na magsagawa ng sabay-sabay na clean-up drive sa iba’t ibang bahagi ng lungsod para maiwasan ang pagdami ng sakit na dengue

“Kalusugan pa rin ang ating prayoridad dahil ito ang siyang pinakauna na kailangan nating mapangalagaan at mapanatili para sa bawat residente sa lungsod sa ating patuloy na pag-unlad. At ngayon na may mga balitang pagtaas ng kaso ng dengue sa iba’t ibang lungsod ay nakahanda po tayo para kaligtasan ng bawat mamamayan. Nagsasagawa po tayo ng mga clean-up drives upang masiguro na ang mga lamok na pinanggagalingan ng sakit na ito ay hindi mamamahay sa mga lugar sa ating lungsod,” pahayag ni Mayor Jeannie.

“Kasabay nito ay ang ating patuloy na paghikayat sa ating mga kababayan na sumama sa atin upang mapigilan ang pagdami  ng kaso dengue at masiguro na tayo ay ligtas at masayang mamumuhay sa ating lungsod,” dagdag niya.

Ibinahagi ng City Health Department (CHD) na nakapagtala ito ng kabuuang 151 kaso sa lungsod mula Enero 1 hanggang Pebrero 1, 2025.

Ayon sa ulat ng CHD, ang Barangay Longos ang may pinakamataas na bilang ng mga kaso, na may 29 na hinihinalang dengue infection, habang ang Barangay Flores, Acacia, Muzon, at Bayan-bayanan ay nag-ulat ng tig-isang kaso.

Bilang tugon, agad nagsagawa ang mga tauhan ng City Environment and Natural Resources Office (CENRO) ng clean-up operations sa mga pangunahing lugar na may pinakamataas na naiulat na kaso ng dengue. Kabilang dito ang Magsaysay at S. Pascual Streets sa Barangay San Agustin, C. Perez Street at Palmario II sa Barangay Tonsuya, at Sampaguita Street sa Barangay Potrero. Ang mga lugar na ito ay kinilala bilang mga “hot spot” ng dengue dahil sa magkakasunod na linggo ng maraming naiulat na kaso.

Pinayuhan din CHD ang mga residente na panatilihing malinis ang kanilang kapaligiran.

Ang aktibong komunikasyon sa pagitan ng community leaders, city departments, at iba pang ahensya ay patuloy na sinusubaybayan ang mga aktibidad sa paglilinis at ang katayuan ng mga kaso ng dengue sa iba’t ibang lugar.

“Sa ating patuloy na pagsasagawa ng mga aktibidad para sa kalinisana ay ang ating patuloy na pagpapaalala sa ating mga kababayang Malabueno na pag-ingat, at maging responsable pagdating sa kanilang kapaligiran. panatilihing malinis, at maaliwalas upang ating kalusugan ay mapangalagaan,” ani City Administrator Dr. Alexander Rosete. (Richard Mesa)

SHOOT sa kulungan ang dalawang holdaper na bumiktima sa isang taxi driver matapos masakote ng pulisya sa ikinasang follow-up operation sa Caloocan City, kahapon ng madaling araw.

Sa salaysay ng 47-anyos na taxi driver sa mga tauhan ni Caloocan Police Chief P/Col. Edcille Canals, dakong alas-4:00 ng madaling araw nang maisakay niya ang mga suspek sa Clover Leaf, Quezon City.

Pagsapit nila sa Brgy. 139, Caloocan City sa kahabaan ng EDSA ay biglang naglabas ng baril ang isa sa mga suspek at tinutukan ang biktima sabay nagdeklara ng holdap.

Sa takot sa kaligtasan, hindi na pumalag ang biktima nang sapilitang kunin ng mga suspek ang kanyang personal na gamit, kabilang ang cellphone, P1,600 cash at driver’s license bago mabilis na tumakas patungong West Service Road, Quezon City.

Humingi naman ng tulong ang biktima sa Caloocan Police Sub-Station 5 (SS5) kaya agad nagsagaqawa ang mga ito ng follow up operation sa pangunguna ni P/Lt. Jefren Aganos na nagresulta sa pagkakaaresto sa mga suspek na si alyas ‘Micahel’, 26 at kasabwat nitong edad 19-anyos.

Nakumpiska ng mga tauhan ni Col. Canals kay alyas Michael ang isang kalibre .38 revolver na kargado ng apat na bala habang hindi nakalagay sa ulat kung nabawi ba ang mga gamit at pera na tinangay sa biktima.

Mahaharap ang mga suspek sa kasong Robbery Holdap at paglabag sa Republic Act 10591 (Comprehensive Firearms and Ammunition Regulation Act) in relation to Batas Pambansa Blg. 881 (Omnibus Election Code).

Binati naman ni PCOL Josefino Ligan, Acting District Director ng Northern Police District ang mga tauhan ni Col. Canals sa kanilang mabilis na pagresponde at epektibong aksyon.

“This accomplishment is a clear indication of the NPD’s unwavering commitment to keeping our communities safe. We will continue to intensify our efforts to ensure that criminals are held accountable for their actions,” pahayag niya. (Richard Mesa)

NAPAPANAHON na umanong amyendahan ang kasalukuyang election laws sa bansa kung saan malayang nakakapangampanya ang mga kandidato bago pa man opisyal na magsimula ang campaign period na dapat na ituring na paglabag sa batas ng halalan.

“We hope that our legislators will amend the rules that allow candidates to advertise themselves before the campaign period because it goes against the spirit of the law. If they use taxpayer’s money for these, it is an abuse of authority and wrongful use of taxpayers’ money,” ayon kay Parish Pastoral Council for Responsible Voting (PPCRV) Chairperson Evelyn  Singson.

Paliwanag ni Singson, napapanahon na upang muling pag-aralan at suriin ang kasalukuyang umiiral na election laws sa bansa upang maiakma ito sa kasalukuyang panahon kung saan higit na umiiral ang teknolohiya at makabagong paraan ng pangangampanya.

Kabilang sa partikular na tinukoy ni Singson ang pangangailangan na mawakasan na ang political dynasties sa bansa at ang pagpapataas sa kamalayan ng mga botante sa kahalagahan ng kanilang boto para sa bayan.

Giit ni Singson, mahalaga na masuri ang pag-amyenda sa mga batas ng halalan sa bansa upang matiyak na manaig ang tunay na demokrasya sa pamamagitan ng pagkakaroon ng patas na pagkakataon sa lahat mahirap man o mayaman na maglingkod sa bayan.

“It is time to review our Election Laws and introduce reforms that recognize changes in technology and the needs of the time. We need laws that prevent political dynasties and improve the quality of voters and candidates. We need reforms that will not allow money to determine winners but reforms that will give fair and equal opportunity for rich and poor candidates to run for public office,” ayon pa kay Singson. (Gene Adsuara)