TINULIGSA ng Makabayan ang desperadong hakbang umano ng kampo ni Vice President Duterte para makaiwas sa pananagutan.

“This is nothing but a last-ditch effort to escape scrutiny over the millions of confidential funds that were questionably spent under her watch. Kung walang tinatago, bakit ayaw humarap? First, she refused to appear in House hearings, now she wants to prevent the impeachment trial altogether,” ayon kay Rep. France Castro.

Sinabi naman ni Rep. Arlene Brosas na malinaw na paulit-ulit ang pattern ni Duterte na hindi umano haharap sa mga pagdinig ng kamara at ngayon ay gustong pigilan nito ang impeachment court.

“This is the height of arrogance and contempt for public accountability. Ang tanong: saan napunta ang milyon-milyong confidential funds?” pagtatanong ni Brosas.

Ayon kay Kabataan Party List Rep. Raoul Manuel, nararapat na malaman ng sambayanan ang katotohanan.

“The Vice President cannot hide behind her Davao lawyers forever. Kung talagang malinis ang konsensya, harapin ang impeachment court,” giit ni Manuel.

Iginiit ng Makabayan bloc na balido at tama ang pagkakahain ng impeachment complaint laban kay Duterte matapos makasunod ito sa isinasaad sa konstitusyon.

Nanawagan naman ang mga mambabatas sa Korte Suprema na ibasura ang petisyon na inihain ng supporters ng bise presidente at payagan ang proseso ng impeachment na magtuloy base na rin sa isinasaad sa konstitusyon.

“All the more the Senate must convene as an impeachment court without delay. The Filipino people deserve no less than full transparency and accountability from their public officials,” pahayag ng mga mambabatas. (Vina de Guzman)

SA pagdiriwang ng Oral Health Month ngayong Pebrero, nag-alok ang Pamahalaang Lungsod ng Malabon ng libreng dental services, kabilang ang mga konsultasyon at pagbunot ng ngipin sa 664 na residente.

Ang inisyatiba na inorganisa ng City Health Department (CHD), ay ginaganap tuwing Martes at Huwebes bilang bahagi ng Espesyal na Dental Mission, at sa mga katapusan ng linggo bilang bahagi ng patuloy na medikal na misyon ng lungsod.

Binigyang-diin ni Mayor Jeannie Sandoval ang kahalagahan ng pagpapanatili ng oral health na binanggit na ang malusog na ngipin ay hindi lamang mahalaga para sa wastong nutrisyon ngunit nakakatulong din sa tiwala at pangkalahatang kagalingan ng isang tao.

“Napakalahalaga na mapangalagaan din ng bawat Malabueno ang kanilang mga ngipin. Maliban sa ito ay kailangan upang tayo ay makakain ng maayos, ay nakakadagdag pa ito sa ganda ng mga ngiti ng bawat isa. Kapag ito ay maayos, maipapapakita natin ang ating kasiyahan ng hindi nahihiya o natatakot,” ani Mayor Sandoval.

Ipinaliwanag ni Dr. Bernadette Bordador, Officer-in-Charge ng CHD, na ang programa ay kinabibilangan ng mga dental professional na nagbibiyahe sa iba’t ibang barangay bilang bahagi ng mga medical mission ng lungsod. Ang kahalagahan aniya ng wastong kalinisan sa bibig, at mabuting kalusugan ng ngipin ay mahalaga hindi lamang para sa isang kaakit-akit na ngiti, ngunit para sa pangkalahatang nutrisyon at kalinisan din.

Ang libreng dental mission ay magpapatuloy hanggang Marso, at iaanunsyo ang mga iskedyul nito

Sa ating pagsisikap na mapabuti ang kalusugan ng ating kapwa Malabueño, isinasagawa po natin ang mga aktibidad na ito. Kung gaano kahalaga ang maayos na pangangatawan, ganoon din kahalaga ang pangangalaga ng ating mga ngipin. Lumapit lamang po sa ating pamahalaang lungsod at abangan ang mga susunod na aktibidad kung kinakailangan ng serbisyong pangkalusugan,” sabi ni City Administrator Dr. Alexander Rosete. (Richard Mesa)

INAKUSAHAN ni 1-Rider Party-list Rep. Rodge Gutierrez si Davao del Norte Rep. Pantaleon Alvarez nang paglilihis sa isyu ukol sa paghahain ng kaso ng huli laban sa ilang lider ng Kamara, kung saan nakuwestiyon ang timing nito.

Ang akusasyon ay ginawa ni Gutierrez matapos ihayag ni Alvarez, nagsilbing dating Speaker ng Kamara noong panahon ni dating pangulong Rodrigo Duterte, bilang tugon sa isyu ng timing ay lasing umano sa kapangyarihan at umaakto na parang korte.

Sinabi ng mambabatas na nirerespeto nito ang karapatan ng dating speaker at iba pang indibidwal na maghain ng kaso kaugnay sa kontrobersiyal na budget insertions at budget blanks.

“Personally, I don’t agree with the mode and I don’t agree with the timing po. I mean, there was this doubt regarding that. But then for that response po, I feel like nalilihis po ulit ‘yung issue instead of answering it head-on po. But then we respect it,” ani Gutierrez.

Ang paghahain aniya ng kaso ay ginawa matapos na i-impeach ng Kamara si Vice President Sara Duterte.

“Yung sa akin lang po, it’s just that the timing that it would come out after the news of the impeachment, ‘yun lang po ‘yung tanong namin dito last time. It’s not even about probable cause po. ‘Yung tanong lang po namin talaga is just the timing in general,” dagdag nito.

(Vina de Guzman)

NANAWAGAN si dating Bayan Muna Congressman Carlos Isagani Zarate na magsagawa ng agarang imbestigasyon sa nakakaalarmang pagtaas ng inaabandonang Filipino seafarers, at agarang aksyon mula sa Department of Migrant Workers (DMW), kongreso at iba pag kaukulang ahensiya.

“The recent report about 312 abandoned ships globally, with Filipino seafarers among the most affected, is deeply disturbing. Hindi dapat ipagwalang-bahala ng gobyerno ang kapakanan ng ating mga marino na siyang backbone ng global maritime industry,” ani Zarate.

Dapat din aniyang panagutin ng pamahalaan ang mga manning agencies at foreign employers sa kanilang pag-abandona ng mga Filipino seafarers.

Kumikita aniya ng milyong ang mga ahensiya mula sa mga marino pero pagdating sa krisis ay wala silang pananagutan na kailangang matigil na.

Umpela din ito ng agarang financial assistance at comprehensive support sa mga apektadong seafarers at kanilang pamilya.

“With Filipinos comprising nearly 25% of the world’s seafarers, the government cannot afford to abandon them too. Kailangan ng agarang aksyon, hindi lip service lamang. The DMW and POEA must review and strengthen regulations on manning agencies, while Congress must investigate these systematic violations of our seafarers’ rights,” dagdag nito. (Vina de Guzman)

HINARANG ng Bureau of Immigration (BI sa Ninoy Aquino International Airport (NAIA) Terminal 3 ang dalawang indibidwal na nagpanggap na magkasama sa trabaho at magbabakasyon.

Sa ulat ng BI Immigration Protection and Border Enforcement Section (I-PROBES), ang dalawang babae na may edad 25 at 31 ay tinangkang sumakay ng biyehng Bangkok, Thailand bilang mga turista at nagtatrabaho bilang mga call center agents sa Quezon City.

Pero nang kanilang ipakita ang kanilang mga dokumento ay hindi tumutugma sa kanilang naunang mga  sinabi na sa bandang huli ay inamin  na hindi sila magkasama sa trabaho  kundi ni-recruit lamang sila upang magtrabaho sa Laos bilang mga Customer Representative na may P50,000 buwang suweldo.

Inamin din na nagbayad sila ng P3,000 sa isang fixer na nakilala nila sa social media.

“We strongly advise Filipinos to be cautious when accepting job offers abroad, especially those that seem too good to be true,” ayon kay BI Commissioner Joel Anthony Viado . “Many of these so-called call center jobs turn out to be fronts for large-scale scam operations that exploit and endanger our fellow countrymen.”

Ang mga biktima ay nasa pangangalaga ng Inter-Agency Council Against Trafficking (IACAT) para imbestigahan. (Gene Adsuara)

SHOOT sa kulungan ang isang tambay matapos ipaaresto sa pulisya ng kanyang nakakatandang kapatid na babae nang tutukan siya ng baril sa Malabon city, kamakalawa ng gabi.

Mahaharap ang suspek na si alyas “Pual”, 43, ng Sampaguita St., Brgy. Longos sa kasong Grave Threat at paglabag sa R.A. 10591 in Relation to B.P. No. 881 (Omnibus Election Code).

Ayon kay Malabon Police Chief P/Col. Jay Baybayan, nagtungo sa bahay ng nakababatang kapatid ang biktimang si alyas “Heidi”, 53, negosyante at residente ng Upper Manaliti, Brgy. Sta Cruz, Antipolo City.

Sa hindi na dahilan, nagkaroon ang magkapatid ng argumento dakong alas-8 ng gabi na humantong sa panunutok ng baril ng suspek sa kanyang ate.

Sa labis na takot, humingi ng tulong ang biktima sa nagpapatrulyang mga tauhan ng Police Sub-Station 5 na mabilis namang rumesponde sa naturang lugar.

Inabutan pa nina P/Maj. Johnny Baltan, Commander ng SS5, si alyas Paul habang hawak ang baril kaya agad siyang dinamba at inagaw ang hawak niyang baril na kalaunan ay natuklasan na isang replica ng kalibre .45 M1911 pistol. (Richard Mesa)