NANGANGAKO si senatorial candidate Benjamin “Benhur” Abalos Jr. na magbigay ng regular na gratuity pay at insentibo para sa tinatayang 832,000 contract-of-service (COS) at job order (JO) workers sa gobyerno.

Ayon kay Abalos, kung mahalal siya sa 2025, sisiguraduhin niyang mabibigyan ng gratuity pay ang mga manggagawang nasa ilalim ng contract of service at job order, lalo na tuwing Pasko.

Ibinahagi rin niya ang kanyang karanasan bilang dating alkalde ng Lungsod ng Mandaluyong, kung saan nakita niyang nakakalungkot na hindi nakatatanggap ng anumang insentibo ang mga COS at JO workers tuwing Kapaskuhan dahil ito ay labag sa mga umiiral na circular ng COA at DBM.

“Ako naranasan ko nung mayor ako, talagang awang-awa ako na kung minsan sariling pera ko dahil di ko magastos yung sa City Hall dahil baka mamaya mapahamak ako. That’s a circular of COA at DBM,” isinalaysay ni Abalos.

Hindi tulad ng mga regular na empleyado ng gobyerno na may hawak na permanent, casual, temporary, co-terminus, at iba pang posisyon, ang mga manggagawang nasa job order (JO) at contract of service (COS) ay hindi nakakatanggap ng mga karaniwang benepisyo sa trabaho.

Batay sa datos ng Department of Budget and Management noong 2023, bumubuo ang mga JO at COS na empleyado ng 29.68% ng kabuuang lakas-paggawa sa gobyerno. Tinatayang mahigit 580,000 sa kanila ang nagtatrabaho sa mga lokal na pamahalaan, habang humigit kumulang 173,227 naman ang nasa iba’t ibang ahensya ng pambansang gobyerno.

Ang contract of service (COS) ay isang kasunduan kung saan ang mga indibidwal, kompanya o iba pang entidad ay kinukuha bilang consultant, tagapagsanay o teknikal na eksperto para sa mga natatanging proyekto sa loob ng itinakdang panahon. Samantala, ang job order (JO) ay tumutukoy sa mga trabahong piraso-piraso o pansamantalang gawain na isinasagawa sa maikling panahon para sa partikular na mga tungkulin.

“Sa lokal na pamahalaan at pati national government, meron tayong tinatawag na mga regular employees, meron tayong mga casual, merong contractual at meron mga job order. Apat po yan. Pero pagdating sa benepisyo, minimum benefits, ang kawawa lalo na yung dalawa. Yung job order at government service contractors,” saad ni Abalos.

Maliban sa mga yunit ng lokal na pamahalaan na may 580,323 JO at COS na manggagawa, ang iba pang ahensya na may kaparehong kasunduan sa trabaho ay ang mga National Government Agencies na may 173,227 manggagawa, mga State Universities and Colleges na may 44,168 manggagawa, mga  Government-Owned and-Controlled Corporations na may 28,667 manggagawa at mga Local Water Districts na may 6,427 manggagawa.

“Huwag kayo mag-alala sa mga nakikinig po ngayon, yung mga job order o mga service contractors. Basta nandiyan na po tayo, gagawa tayo ng batas na maski incentive pay, gratuity pay, meron po kayo n’yan. You deserve it,” tiniyak ni Abalos sa kampanya ng Alyansa Para sa Pagbabago sa Negros Occidental. (PAUL JOHN REYES)

INUTUSAN ng bagong Department of Transportation (DOTr) sa katauhan ni Secretary Vince Dizon ang Land Transportation Office (LTO) na bigyan ng license plates ang mga bagong sasakyan sa loob ng tatlong (3) araw lamang.

     Matapos lamang ang isang lingo matapos batikusin ang LTO dahil sa mabagal ng paglabas ng mga license plates, hinamon naman niya ang LTO na ipatupad ang mabilis na pagbibigay ng license plates sa mga bagong sasakyan sa loob ng three working days.

     “Can we make sure that moving forward, that will not happen again? Can we ensure that in 24, 48, or 72 hours, they get their plates? Both motorcycles and four-wheeled vehicles. We will post that challenge and see if the LTO can deliver,” hamon ni Dizon sa isang panayam.

     Piniga rin ang LTO upang kanilang iresolba ang madaming backlog na 9 milyon unissued motorcycle plates mula noong taong 2014.

     Ayon sa Commission on Audit (COA) na naglabas ng bagong report na ang LTO ay may higit sa 9.1 milyon na license plates ng mga motorcyles na sa hanggang ngayon ay hindi pa nailalabas mula pa ng 2023.

     Dagdag ng COA na ang dahilan ay gawa sa kakulangan sa pondo, pagkabalam sa procurement, at mga logistical lapses kung kaya’t maraming registrants na kahit na nagbayad ay wala pa rin natatangap ng license plates at naghihintay ng madaming taon na upang magkuha ito.

     “In addition to motorcycle plates, COA found that 1.69 million pairs of motor vehicle replacement plates which have paid for by registrants as early as 2015 have yet to be produced and distributed. These undelivered plates amount to staggering P763.55 million in fees collected without fulfillment,” saad ni Dizon.

     Sinabi rin ni Dizaon na dapat ay malinaw ang pagkakaron ng accountability kayat sinabi niya ang plano na dapat ay magkaron ng istriktong deadlines para sa LTO dahil kung walang malinaw na deadline ay tiyak na magkakaroon ng inefficiencies sa serbisyo ng ahensya.

     “Because it there is no deadline, naturally, you will just take it easy and will not feel any pressure. But if there is a deadline, at the very least, you will be driven to push forward,” saad ni Dizon.

     Tinatanggap naman ng LTO na may ganitong talagang problema sa sistema kung kaya’t kanilang ginawan na ng request ang Department of Budget (DBM) para sa kaulang P2.1 bilyon na pondo upang mawala na ang backlog mula 2014 hanggang 2022.

     Sinabihan din ng COA ang LTO na pabilisin ang produksyon upang masiguro na makukuha ng mga rehistradong sasakyan ang kanilang rightful na license plates. Nagbigay din ng rekomendasyon ang COA na makipagugnayan sa DBM para sa mabilis na pagbigay ng pondo at maghanap ng mga solusyon upang maiwasan ang pagkabalam sa mga darating na panahon.

     Samantala, natuwa naman ang grupong Akbayan Party-list dahil sa openness ni Dizon na pahabain ang operating hours ng Light Rail Transit 1 & 2 at Metro Rail Transit Line 3 (MRT3). Hiniling ng grupo na pahabain ang operating hours ng mga nasabing railways hanggang hatinggabi.

     Si Senator Grace Poe naman ay pinapurihan si Dizon dahil sa pagdinig ng kahilingan ng Senado na magkaron ng pagrerepaso ng public transport modernization program ng pamahalan. LASACMAR

KAILANGAN umano ng karagdagang suporta para sa mga estudyante sa ilalim ng flexible-learning scheme upang magkaroon ng dekalidad na edukasyon para sa mga Pilipinong mag-aaral.

Ito ang panawagan GP (Galing sa Puso) Party-list kasunod ng ulat na pamamahagi ng Department of Education ng mahigit 87 milyong modules at 74,000 tablets sa mga estudyante sa ilalim ng flexible learning.

Sa kabila ng pagkilala ng grupo sa inisyatiba ng gobyerno, idiniin ni GP first nominee Atty. JP Padiernos na simula pa lamang ito ng mas maraming inisyatibang kailangan upang matugunan ang krisis sa edukasyon.

“Isa itong magandang hakbang pero marami pang kailangang abutin ang ating kampanya para sa pagbibigay ng dekalidad na edukasyon sa mga kabataan,” sabi ni Padiernos sa isang pahayag.

Ayon kay Padiernos, dapat na maglaan ng mas mataas na badyet sa educational initiatives ang gobyerno dahil maraming mga Pilipinong mag-aaral ang nananatiling nasa laylayan.

Base sa 2022 World Bank report kaugnay ng learning poverty, siyam sa 10 na Pilipinong mag-aaral ay hindi nakababasa o nakakaintindi ng simpleng sulatin sa edad na 10.

Sinabi ni Padiernos na ang pamimigay ng mga learning tools ay kahanga-hanga ngunit hindi ito sapat upang matugunan ang mas malaking isyu sa sistema ng edukasyon.

Nanawagan ang abogado sa gobyerno na lalo pa nitong paigtingin ang mandato ng 1987 Philippine Constitution na nagsasabing dapat na bigyan ng pinakamataas na prayoridad ang edukasyon sa national budget.

“Edukasyon ang susi sa magandang kinabukasan ng mga kabataan. Ito ang susi sa progresong inaasam ng ating bansa. Sa pamamagitan ng mga magagandang inisyatibong tutugon sa suliraning pang-edukasyon, nalalapit na rin ang magandang kinabukasang inaasam natin para sa bawat Pilipinong mag-aaral,” dagdag pa niya.

Binanggit din ng grupo ang problema sa kakulangan ng mga impraktrasturang magagamit ng mga mag-aaral. Ayon sa Second Congressional Commission on Education (EDCOM II), may kakulangan ng mahigit 165,443 classrooms ang Pilipinas na siyang dahilan upang maging “aisle learners” o estudyanteng nag-aaral sa overcrowded at masikip na lugar ang lagpas 5.1 milyong estudyante.