SUSURIING mabuti ni Pangulong Ferdinand Marcos Jr. ang mga miyembro ng kanyang gabinete sa gitna ng kumakalat na tsismis na may nakaambang na malawakang balasahan sa gabinete ng Chief Executive.

“Every time kailangan namang mag-evaluate ng Pangulo eh kung ang kaniyang secretaries, Cabinet members are doing well for the government, for the people,” ang sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

“Pero as of now, wala pa po talaga,” dagdag na wika nito.

Sinagot naman ni Castro ang espekulasyon na magbibitiw na sa puwesto sina Presidential Security Command (PSC) Maj. Gen. Jesus Nelson Morales at Department of Information and Communications Technology (DICT) Secretary Ivan John Uy.

Binigyang diin ni Castro na hanggang ngayon ay wala pa namang personal na pagbabago.

Sa kabilang dako, posibleng magkaroon din ng potensiyal na pagbabago sa PCO sa ilalim ng liderato ni Secretary Jay Ruiz, na kamakailan lamang ay nanumpa para sa kanyang bagong tungkulin sa harap mismo ni Pangulong Ferdinand Marcos Jr.

Kinumpirma ni Castro na maging si Ruiz ay nagpahiwatig na may pagbabagong magaganap sa Palace media office.

“Sinabi niya po talaga na magkakaroon ng pagbabago at maaaring may ma-retain, maaaring may mawala. So, hintayin po natin kung ano iyong magiging order ni Secretary Jay Ruiz,” ang pahayag ni Castro. (Daris Jose)

SUPORTADO ng Malakanyang ang paghahain ng batas na magpaparusa sa mga taong nagpapakalat ng pekeng impormasyon.

“Siguro naman kahit po hindi Palasyo ang tanungin natin, gugustuhin po talaga natin na ma-ban ang fake news,” ang sinabi ni Press Officer Undersecretary Atty. Claire Castro sa Palace press briefing.

Sa katunayan, ang suhestiyon pa nga ni Castro ay iparehistro ang “all content creators” para matigil ang paglaganap ng misinformation at disinformation.

Gayunman, kailangan aniyang pag-aralang mabuti ng mga mambabatas ang ‘full scope’ ng fake news, lalo na ang depinidong kahulugan nito.

“We have to define first that there will be a law, if they will make such law, they have to define what’s fake news and what’s the limitation, how they can gauge that those statements will be considered as fake news,” ani Castro.

Samantala, ang PCO, sa ilalim ng pamumuno ni Jay Ruiz, ay nakatuon para paigtingin ang laban sa fake news sa social media.

Ani Castro, babalewalain lang kasi ng kasalukuyang administrasyon ang mga pahayag mula sa political rivals nito.

Itinanggi ni Castro na tila sinusulsulan pa ni Pangulong Ferdinand R. Marcos Jr. ang “negative campaigning” sa gitna ng mudslinging o paninirang-puri ng partido ng oposisyon.

“Unang-una po, ang sasagutin lang natin ay ‘yung mga intriga na may sense. Kung wala naman, I mean, walang meaning, walang sense, hindi po natin ito sasagutin, okay,” ang sinabi ni Castro.

“At patungkol po kung sa nauna ang Pangulo sa pagbabatikos, it’s just part of the campaign propaganda and wala naman po siyang pinatungkulan kung sino. Marami pong kandidato. Ang nagtataka lang po ulit tayo kung bakit nag-aray, hindi naman sila iyong pinatutungkulan,” dagdag na wika nito.

Samantala, pinayuhan naman ni Castro ang mga tatakbo sa midterm elections na tiyakin na kuwalipikado sila sa tinatarget nilang posisyon dahil pag-aaksaya lamang ng oras at public funds kung ang mga mananalo sa eleksyon ay pawang mga “newbies” sa pulitika. (Daris Jose)