PINANGUNAHAN ni National Housing Authority (NHA) General Manager Joeben Tai, ang inspeksyon ng Arkong Bato Housing Project sa Lungsod ng Valenzuela upang matiyak ang kalidad at napapanahong pagtatapos ng proyekto.

Matatagpuan sa loob ng lungsod, ang Arkong Bato Housing Project ay sumasalamin sa dedikasyon ng NHA sa in-city development. Ang proyekto ay nakalaan para sa mga pamilyang naninirahan sa mga mapanganib na lugar, kabilang ang mga nasa baybayin ng Ilog Tullahan.

“Alinsunod sa ating programang Build Better More (BBM) Housing at sa direktiba ng ating Pangulong Ferdinand R. Marcos Jr. para makamit ang isang Bagong Pilipinas, atin pong sinisigurado na ang mga pabahay na itinatayo ng NHA ay de-kalidad at malapit sa mga pampublikong pasilidad,” ani GM Tai.

Pagkatapos ng inspeksyon na sinamahan ni Assistant General Manager Alvin S. Feliciano, pinangunahan din ni GM Tai ang inagurasyon at seremonya ng paggugupit ng laso para sa bagong Tanggapan ng NHA-NCR-North Sector sa Brgy. North Bay Boulevard South, Lungsod ng Navotas.

Ayon kay GM Tai, ang bagong opisina ay isang mahalagang hakbang upang mas mailapit sa publiko, stakeholders, at mga benepisyaryo ang mga serbisyo ng NHA, at matiyak na mas madali nilang maa-access ang mahahalagang programa, suporta, at iba pang kinakailangang mapagkukunan.

“Ipinatayo po natin ang gusaling ito upang mas lalo pa nating mailapit sa publiko’t benepisyaryo ang mahusay at maaasahang serbisyo ng NHA,” diin ng GM Tai. (PAUL JOHN REYES)

 INIHAYAG ng Department of Transportation (DOTr) na magkakaroon na ng four-car train sets ang Metro Rail Transit Line 3 (MRT) dahil sa tumataas na bilang ng mga pasahero.

Dadagdagan ng isang (1) bagon ang three-car trains na tumatakbo ngayon sa darating the June pagkatapos ang ginagawang rehabilitasyon ng pasilidad upang mapagkasya ang four-train configuration.

“Come June, the extension of the Taft (Avenue station) pocket track will be completed in preparation for the deployment of four-car train sets in our rail line. A turnback facility capable of accommodating a four-car MRT 3 train set is being constructed by Japanese maintenance contractor Sumitomo at the North Avenue station,” wika ni MRT general manager Oscar Bongon.

Ang Sumitomo rin ang namamahala sa pag-aayos ng rail tracks, signaling system at catenary system na siyang nagbibigay ng electricity sa mga bagon. Magkakaron ng testing ang mga bagon sa ginawang linya.

Makapagsasakay ang isang three-car MRT 3 set ng 1,182 na pasahero habang ang four-car train set naman ay makapagsasakay ng 1,576 na mga tao. Sa ngayon, ang MRT 3 ay mayroon 18 hanggang 20 three-car train sets. Ang bilang ng mga tumatakbo ay 12 hanggang 14 lamang.

Noong nakaraang Linggo ay sinabi ni Metropolitan Manila Development Authority (MMDA) chairman Romando Artes na ang MRT ay may plano na magdagdag ng isang bagon sa MRT’s three-car set dahil sa planong pagtatanggal ng EDSA busway kung saan dumadaan ang EDSA Carousel buses.

Subalit ang nasabing mungkahi ay hindi gusto ng mga iba’t ibang sektor sa transportasyon lalo na ang mga pasahero at grupo ng mga negosyante sa bansa sa Metro Manila.

Habang ang DOTr na siyang namamahala sa MRT 3 ay nagpahayag naman na hindi aalisin ang EDSA busway.

Taong 2022 ng ginamit ang unang four-car train sets sa kahabaan ng EDSA subalit tuwing rush hour lamang ito tumatakbo at may operasyon.

“The expansion of train capacity is part of a two-year rehabilitation program for the rail system, which also involves refurbishing 72 light rail vehicles,” saad ni DOTr Secretary Jaime Bautista.

Samantala, ang Metro Manila Subway Project (MMSP) naman ay nahaharap sa problema tungkol sa right-of-way kung kayat nagkakaroon ng pagkabalam sa pagtatayo nito.

Dahil dito ay nanawagan sa pamahalaan ang Management Association of the Philippines (MAP) na iresolba sa lalong madaling panahon ang nasabing problema sa right-of-way (ROW).

Ayon kay MAP chairman Eduardo Yap na ang P488 billion na subway ay siyang kaunaunahang underground mass transit system na siyang makapagbabago sa takbo ng trapiko sa Metro Manila sapagkat maiengganyo ang mga pasahero na sumakay dito at mahihikayat din ang mga negosyante na magtayo ng negosyo sa bansa.

Ang problema sa right-of-way ay siyang nagiging sanhi ng pagkabalam ng konstruksyon lalo na sa lungsod ng Pasig at dahil dito inaasahan na hindi matatapos ang nasabing proyekto sa 2028 na siyang target ng completion nito.

Hiniling din ni Yap na sana ay mabigyan ang DOTr ng full authority upang maresolba ang problema dahil kung matatagalan pa ang completion ng proyekto ay magkakaroon rin ng setbacks sa programa ng pahamalaan.

“The MMSP is backed by Japanese funding, is a key project in the government’s infrastructure program aimed at improving mobility in the capital, where traffic congestion costs the economy billions of pesos annually,” dagdag ni Bautista. LASACMAR

SIMULA  sa Marso 15, balik na sa cashless o contactless toll collection sa mga pangunahing toll expressway, ayon sa Toll Regulatory Board (TRB) nitong Sabado.

Paalala ng TRB, ang lahat ng mga motorista ay kinakailangang magkaroon ng valid Electronic Toll Collection (ETC) device o radio frequency identification (RFID) stickers sa kanilang mga sasakyan.

Ang mga motoristang walang ETC o RFID sticker ay papayagan pa ring makapasok sa mga toll plaza subalit kailangan na silang magpalagay ng tag.

Gayunpaman, ang mga walang ETC o RFID ay iisyuhan ng deputized personnel ng Land Transportation Office (LTO) ng Temporary Operator’s Permit o Show Cause Order dahil sa paglabag sa “No Valid ETC Device, No Entry” Policy sa ilalim ng Joint Memorandum Circular No. ng Department of Transportation, LTO, at TRB.

Pagmumultahin din ang mga motorista na walang valid RFID at sa may RFID subalit ‘insufficient load balance”.

Paliwanag ng TRB, ang cash lanes ay kadalasang nagdudulot ng paghaba ng linya at pagbagal ng daloy ng trapiko patungo sa kanilang ETC designated lanes.

Unang ipinatupad noong Disyembre 2020 ang cashless collection ngunit ito ay nasuspinde dahil sa ilang mga isyu sa operasyon.

Samantala, nagpahayag naman ng suporta ang San Miguel Infrastructure, Metro Pacific Tollways Corp. (MPTC), MCX Tollway Inc., Bases Conversion and Development Authority (BCDA), Philippine Reclamation Authority (PRA) at subsidiary PEA Tollway Corp.

(PEATC) sa inisyatibong ito ng TRB.

Ang MPTC ang may hawak ng North Luzon Expressway (NLEX), Subic-Clark-Tarlac Expressway (SCTEX), Manila-Cavite Toll Expressway (CAVITEX), Cavite-Laguna Expressway (CALAX), Cebu-Cordova Link Expressway (CCLEX), at NLEX Connector.

Ang SMC Infrastructure sa pamamagitan ng SMC ang nagpapatakbo naman ng South Luzon Expressway (SLEX), Skyway Stage 3, Southern Tagalog Arterial Road (STAR), NAIA Expressway, at ng Tarlac-Pangasinan-La Union Expressway (TPLEX).

Ang MCX Tollway Inc., naman ang nag-oopereyt ng Muntinlupa-Cavite Expressway.

Batay sa pinakabagong data mula sa TRB, na 97% ng mga user ng expressway ay gumagamit na ng ETC/RFID sticker para sa pagbabayad ng toll.