NANGUNA si Malabon Mayor Jeannie Sandoval sa ibobotong mayoral candidate ng mga Malabueno, batay sa isinagawang kumprehensibong survey ng Capstone Intel Corporation kung saan nakakuha siya ng 60% voter preference habang ang katunggali sa mayoral race na si Jaye Noel ay 28 %.

Ayon kay UP Professor Guido David, Chief Data Scientist ng Capstone, isang kilalang research company, ang voter confidence na nakuha ni Sandoval ay sumasalamin sa naging magandang pamamalakad nito.

Ipinaliwanag ni David na 91% ng mga respondents sa isinagawang survey ay pawang bumoto noong nakaraang eleksyon kaya naman ang kanilang intensyon na iboto muli si Sandoval ay pagpapakita ng pagiging epektibo nito sa kanyang tanggapan.

“When voters believe in a candidate’s ability to serve, their engagement and decisions at the polls can significantly shape the election’s direction,” ani David.

“It is clear that their willingness to support Sandoval again reflects their satisfaction with her performance. This highlights how past governance significantly influences future electoral decisions, as constituents tend to favor candidates who have proven their reliability and effectiveness in office,” dagdag niya.

Ani Capstone Intel Research and Publications Director Ella Kristina Domingo, ang survey ay isinagawa nitong Enero 22 hanggang 26, 2025, sa may 1,200 participants na nasa pagitan ng edad 18 hanggang 55-anyos, karamihan ay may-asawa.

Nasa 16.90% ng mga respondents ay 16 hanggang 20 taon nang naninirahan sa Malabon; 14% residente na ng 21 hanggang 25 taon; 13.50% ay 26 hanggang 30 taon at may grupo na 6 hanggang 10 taon at 46 taon pataas nang residente ng lungsod.

Nang tanungin sa survey kung pamilyar kay Sandoval, 93% ng nagsabi na kilala nila ito habang 51% ang familiarity rating ni Noel sa mga residente.

Nasa 67.30% ang nagsabi na iboboto nila si Sandoval dahil “naniniwala sa kanyang adbokasiya”, nasa 55.90% ang nagsabi na “madaling lapitan” at 55.40% ang “patunay ng kakayahang maglingkod”.

Umabot sa 43.40% ang nagsabing kinilala nila ang “konkretong aksyon sa mga nangangailangan”, 37.60% “magandang track record” at 29.80% “walang bahid ng korapsyon”.

Kung ano ang “qualities” na hinahanap ng mga botante, 79.60% ang nagsabi na “ nakakapagpatupad ng mga programa at serbisyo” at 51.80% “may karanasan sa pamumuno at marunong rumespeto”.

Sinuri din sa survey ang “satisfaction” sa government services sa Malabon, nasa 45.80% ng mga respondents ang nagsabi na “very satisfied” habang nasa 2.80% lamang ang “very dissatisfied.”

“Respondents specifically acknowledged the effectiveness of key services, such as medical assistance and health services, financial assistance/ayuda, educational assistance; disaster relief, emergency response, job assistance and livelihood opportunities, assistance to seniors, community programs and activities and security and peacekeeping efforts” nakasaad sa survey report.

Ipinaliwag ni Domingo na kung pagbabasehan ang nakalap na polling data ay nagpapakita na nakita at naramdaman ng mga respondents ang mga naging pagbabago partikular sa edukasyon , paglago ng ekonomiya at public safety na syang nakadagdag sa positibong kinabukasan para sa Malabon. (Richard Mesa)

LAGLAG sa selda ang isang lalaki na nakatala bilang Top 3 most wanted person sa Lungsod ng Malabon makaraang malambat ng pulisya sa manhunt operation sa Navotas City.

Ayon kay Navotas police chief P/Col. Mario Cortes, nakatanggap sila ng impormasyon na naispatan sa Brgy. NBBS Proper ang presensya ng 48-anyos na akusado na si alyas ‘Asyong’ na nakatala din bilang Top 4 MWP sa NPD.

Agad bumuo ng team ang mga tauhan ng Warrant and Subpoena Section (WSS) bago ikinasa ang manhunt operation na nagresulta sa pagkakaaresto sa akusado dakong alas-10:40 ng umaga sa Road 10 corner C-3 St., Brgy. NBBS Proper.

Ang akusado ay binitbit ng pulisya sa bisa ng warrant of arrest para sa kasong Murder na inisyu ni Presiding Judge Rhoda Magdalene I. Mapile-Osinada, ng RTC Branch 170, Malabon City, noong January 22, 2025, na walang inirekomendang piyansa.

Pinuri ni P/Col. Josefino Ligan, Acting District Director ng NPD, ang dedikasyon ng mga operatiba sa neutralizing sa high-profile na akusado.

“This operation showcases the unyielding dedication of our personnel in the pursuit of justice for victims. We are resolute in our mission to intensify initiatives aimed at safeguarding our communities.” pahayag niya. (Richard Mesa)

IPINAGDIWANG ng Philippine Heart Center (PHC) ang kanilang ika-50th anibersaryo nitong Pebrero 14, 2025. Sa isang press conference na ginanap nitong Pebrero 14, tinalakay ng mga opisyal ng PHC ang kanilang mga nagawa at mga plano para sa hinaharap.

Bilang bahagi ng pagdiriwang, inilunsad ng PHC ang iba’t ibang aktibidad, kabilang ang isang charity fun run na tinatawag na “Run with a Heart,” na naglalayong tumulong sa mga pasyenteng may valvular disease.

Bukod dito, nakipagtulungan ang PHC sa Makina Watches upang lumikha ng isang limitadong edisyon ng relo bilang paggunita sa kanilang ginintuang anibersaryo.

Sinabi ni Dr. Avenilo Aventura Jr., Executive Director ng PHC, na taon taon may 14,000 ang  mga pasyenteng may sakit sa puso ang kanilang naaadmit at mahigit na 5,000 ang naooperahan sa kanilang ospital.

Samantala, katuwang din ng PHC ang Philhealth sa ilalim naman ng programang Philhealth Z-Package Benefit. Ayon pa sa mga Cardiologist mula sa PHC, competitive  ang nabanggit na ospital sa ibang bansa kung ang pag uusapan ay heart surgery. (PAUL JOHN REYES)

SHOOT sa kulungan ang isang lalaki matapos inguso sa pulisya na may bitbit na bakal habang gumagala sa Caloocan City, kahapon ng madaling araw.

Mahaharap ang suspek na si alyas “Dagul”, 25, sa kasong paglabag sa R.A. 10591 (Comprehensive Firearms and Ammunition Regulation Act) at B.P. 881 (Omnibus Election Code of the Philippines).

Sa ulat, nakatanggap ng impormasyon mula sa isang concerned citizen ang mga tauhan ni Caloocan police chief P/Col. Ecille Canals hinggil sa isang lalaki na gumagala habang may bitbit umanong baril na nagdulot ng pangamba sa mga residente sa Morning Star St., Brgy. 178.

Agad namang remesponde sa lugar ang mga tauhan ni Col. Canals kung saan naabutan nila ang suspek na hawak umanong baril na nagresulta sa pagkakaaresto sa kanya dakong alas-3:40 ng madaling araw.

Nakumpiska kay alyas Dagul ang isang kalibre .9mm revolver na kargado ng limang bala at walang kaukulang mga dokumento habang inaalam pa ng pulisya kung nasangkot na ang suspek sa illegal na mga gawain.

Pinuri ni P/Col. Josefino Ligan, Acting District Director of the Northern Police District (NPD) ang mabilis at epektibong pagkilos ng mga tauhan ng Caloocan police. “This operation demonstrates our unwavering commitment to public safety, especially during the election period,” ani Ligan. (Richard Mesa)

BILANG bahagi ng pagdiriwang ng ika-27 anibersaryo ng pagiging lungsod ng Valenzuela, ang lokal na pamahalaan, sa pangunguna ni Mayor WES Gatchalian, ay nag-turnover ng 33 fiber-made rescue boats—isa sa bawat barangay—upang palakasin ang rescue response ng lungsod sa panahon ng bagyo at baha.

Sinisiguro nito na ang bawat barangay sa Valenzuela ay handa sa tuwing may malaking pagbaha habang nakatanggap naman ang City Disaster Risk Reduction and Management Office (VCDRRMO) ng dalawang mobile water filtration truck na magbigay ng ligtas na inuming tubig sa mga apektadong lugar sa panahon ng kalamidad.

Ang bawat fiber rescue boats ay mayroong dalawang paddle at dalawang life jacket na piniling matibay na paglaban at maaasahan para matiyak ang mas ligtas na operasyon sa panahon ng emergencies at magsisilbi sa komunidad sa maraming darating na taon.

Ang mga mobile water filtration truck ay kayang kumarga ng hanggang 1,000 litro ng malinis na tubig na maiinom sa mga evacuees sa panahon ng bagyo at baha kung saan ide-deploy ang mga ito sa mga evacuation center at mga komunidad na nakararanas ng kakulangan sa tubig. Samantala, dalawang mobile shower unit na para sa bawat distrito, ay ipapakalat upang mag-supply ng malinis na tubig sa mga komunidad.

Sa kanyang talumpati, binigyang-diin ni Mayor WES ang kahalagahan ng pagiging handa sa mga krisis. “Ipanalangin po natin na sana ay hindi natin magamit ang mga ito (rescue boats). Gayunpaman, kung sakali mang magkaroon pong muli ng matinding bagyo ay handa na rin tayo, kahit papaano. Ito pong 33 fiber glass boats ang pinaka gamit na gamit sa tuwing may rescue operations po ang mga barangay po sa ating lugar.” pahayag niya. (Richard Mesa)