INAKUSAHAN ni 1-Rider Party-list Rep. Rodge Gutierrez si Davao del Norte Rep. Pantaleon Alvarez nang paglilihis sa isyu ukol sa paghahain ng kaso ng huli laban sa ilang lider ng Kamara, kung saan nakuwestiyon ang timing nito.

Ang akusasyon ay ginawa ni Gutierrez matapos ihayag ni Alvarez, nagsilbing dating Speaker ng Kamara noong panahon ni dating pangulong Rodrigo Duterte, bilang tugon sa isyu ng timing ay lasing umano sa kapangyarihan at umaakto na parang korte.

Sinabi ng mambabatas na nirerespeto nito ang karapatan ng dating speaker at iba pang indibidwal na maghain ng kaso kaugnay sa kontrobersiyal na budget insertions at budget blanks.

“Personally, I don’t agree with the mode and I don’t agree with the timing po. I mean, there was this doubt regarding that. But then for that response po, I feel like nalilihis po ulit ‘yung issue instead of answering it head-on po. But then we respect it,” ani Gutierrez.

Ang paghahain aniya ng kaso ay ginawa matapos na i-impeach ng Kamara si Vice President Sara Duterte.

“Yung sa akin lang po, it’s just that the timing that it would come out after the news of the impeachment, ‘yun lang po ‘yung tanong namin dito last time. It’s not even about probable cause po. ‘Yung tanong lang po namin talaga is just the timing in general,” dagdag nito.

(Vina de Guzman)

NANAWAGAN si dating Bayan Muna Congressman Carlos Isagani Zarate na magsagawa ng agarang imbestigasyon sa nakakaalarmang pagtaas ng inaabandonang Filipino seafarers, at agarang aksyon mula sa Department of Migrant Workers (DMW), kongreso at iba pag kaukulang ahensiya.

“The recent report about 312 abandoned ships globally, with Filipino seafarers among the most affected, is deeply disturbing. Hindi dapat ipagwalang-bahala ng gobyerno ang kapakanan ng ating mga marino na siyang backbone ng global maritime industry,” ani Zarate.

Dapat din aniyang panagutin ng pamahalaan ang mga manning agencies at foreign employers sa kanilang pag-abandona ng mga Filipino seafarers.

Kumikita aniya ng milyong ang mga ahensiya mula sa mga marino pero pagdating sa krisis ay wala silang pananagutan na kailangang matigil na.

Umpela din ito ng agarang financial assistance at comprehensive support sa mga apektadong seafarers at kanilang pamilya.

“With Filipinos comprising nearly 25% of the world’s seafarers, the government cannot afford to abandon them too. Kailangan ng agarang aksyon, hindi lip service lamang. The DMW and POEA must review and strengthen regulations on manning agencies, while Congress must investigate these systematic violations of our seafarers’ rights,” dagdag nito. (Vina de Guzman)

HINARANG ng Bureau of Immigration (BI sa Ninoy Aquino International Airport (NAIA) Terminal 3 ang dalawang indibidwal na nagpanggap na magkasama sa trabaho at magbabakasyon.

Sa ulat ng BI Immigration Protection and Border Enforcement Section (I-PROBES), ang dalawang babae na may edad 25 at 31 ay tinangkang sumakay ng biyehng Bangkok, Thailand bilang mga turista at nagtatrabaho bilang mga call center agents sa Quezon City.

Pero nang kanilang ipakita ang kanilang mga dokumento ay hindi tumutugma sa kanilang naunang mga  sinabi na sa bandang huli ay inamin  na hindi sila magkasama sa trabaho  kundi ni-recruit lamang sila upang magtrabaho sa Laos bilang mga Customer Representative na may P50,000 buwang suweldo.

Inamin din na nagbayad sila ng P3,000 sa isang fixer na nakilala nila sa social media.

“We strongly advise Filipinos to be cautious when accepting job offers abroad, especially those that seem too good to be true,” ayon kay BI Commissioner Joel Anthony Viado . “Many of these so-called call center jobs turn out to be fronts for large-scale scam operations that exploit and endanger our fellow countrymen.”

Ang mga biktima ay nasa pangangalaga ng Inter-Agency Council Against Trafficking (IACAT) para imbestigahan. (Gene Adsuara)

SHOOT sa kulungan ang isang tambay matapos ipaaresto sa pulisya ng kanyang nakakatandang kapatid na babae nang tutukan siya ng baril sa Malabon city, kamakalawa ng gabi.

Mahaharap ang suspek na si alyas “Pual”, 43, ng Sampaguita St., Brgy. Longos sa kasong Grave Threat at paglabag sa R.A. 10591 in Relation to B.P. No. 881 (Omnibus Election Code).

Ayon kay Malabon Police Chief P/Col. Jay Baybayan, nagtungo sa bahay ng nakababatang kapatid ang biktimang si alyas “Heidi”, 53, negosyante at residente ng Upper Manaliti, Brgy. Sta Cruz, Antipolo City.

Sa hindi na dahilan, nagkaroon ang magkapatid ng argumento dakong alas-8 ng gabi na humantong sa panunutok ng baril ng suspek sa kanyang ate.

Sa labis na takot, humingi ng tulong ang biktima sa nagpapatrulyang mga tauhan ng Police Sub-Station 5 na mabilis namang rumesponde sa naturang lugar.

Inabutan pa nina P/Maj. Johnny Baltan, Commander ng SS5, si alyas Paul habang hawak ang baril kaya agad siyang dinamba at inagaw ang hawak niyang baril na kalaunan ay natuklasan na isang replica ng kalibre .45 M1911 pistol. (Richard Mesa)

BINITBIT sa selda ang siyam na kahera ng isang cockpit arena nang mabisto ang ginawa nilang pang-uumit sa pera na kita ng sabungan sa Malabon City.

Mariin pang pinabulaanan ng mga kaherang sina alyas “ Geraldine”, 44, “Rhea”, 24, “Rhemie” 28, “Alissa”, 22, “Abegail” 31, “Karen”, 25, “Noriecel”, 44, “Acie” 28, at “Patricia” 20, ang bintang sa kanila na pang-uumit ng salapi na nagkakahalaga ng P264,000.00 na hindi nila ini-remit sa Matadero Cockpit Arena na matatagpuan sa Nibunco St. Brgy. San Agustin.

Sa tinanggap na ulat ni Malabon Police Chief P/Col. Jay Baybayan, nabuking ang pagkawala ng pera nang magsagawa ng pagtutuos ang Auditor ng sabungan na si alyas “Angelica”, kaya kaagad niya itong ipinabatid sa Operations Manager ng sabungan na si Chito Sumilang, 60.

Iginiit umano ng mga kahera na nai-remit na nila ang nawawalang salapi na dahilan upang iutos ni Sumilang na suriin ang mga gamit ng mga kahera at dito na nakuha ang kabuuang P207,030.00 na bahagi ng nawawalang kinitang salapi ng sabungan.

Humingi ng tulong si Sumilang sa mga tauhan ng Malabon Police Station Intelligence Section na nagresulta sa pagkakaaresto sa mga kahera.

Ayon kay Col. Baybayan, sasampahan nila ng kasong Qualified Theft ang mga babaing kahera sa Malabon City Prosecutor’s Office. (Richard Mesa)

DUGUANG humandusay sa harap ng kanyang kinakasama ang katawan ng 34-anyos na jeepney driver matapos katukin at pagbabarilin ng dalawang hindi kilalang mga suspek sa Caloocan City, Lunes ng madaling araw.

Dead-on-the-spot sanhi ng tinamong tama ng bala sa ulo at katawan ang biktimang si alyas ‘John Bryan’ habang patuloy naman ang follow-up operation ng mga tauhan ni Caloocan police chief P/Col. Edcille Canals sa posibleng pagkakaaresto sa mga suspek.

Sa nakarating na report sa tanggapan ni Col. Canals, dakong alas-2:10 ng madaling araw nang maganap ang insidente sa loob ng bahay ng biktima sa 1431 Sampaloc Ext., Brgy., 178, Camarin.

Batay sa pahayag sa pulisya ng kinakasama ng biktima na si alyas ‘Geralyn’, nag-iinuman sila ng kanyang ka-live-in sa loob ng kanilang bahay nang may kumatok sa kanilang pinto at tinawag ang pangalan ng biktima.

Nang buksan ng biktima ang pinto, sinalubong siya ng putok ng baril na nagresulta ng agaran niyang kamatayan habang mabilis namang tumakas ang mga suspek patungo sa Reparo Road, Camarin sakay ng isang motorsiklo.

Narekober ng mga tauhan ng NPD-FU sa crime scene ang dalawang basyo ng bala mula sa kalibre .45 pistol habang inaalam pa ang motibo sa pagpatay sa biktima.

Inatasan na ni Col. Canals ang kanyang mga tauhan na magsagawa ng back tracking sa mga CCTV sa lugar na maaring makatulong upang matukoy ang pagkakilanlan ng mga suspek. (Richard Mesa)

IPINAG-UTOS ni Mayor Along Malapitan ang pagsasagawa ng fogging operations sa iba’t ibang barangay at mga paaralan sa Lungsod ng Caloocan upang panatilihin ang kaligtasan ng mga mamayan mula sa dengue at iba pang karamdaman.

“Kami po sa pamahalaang lungsod, sa pangunguna ng City Environmental Management Department (CEMD) ay hindi magsasawang magsagawa ng clean-up, fogging, at mga declogging operations sa Caloocan,” aniya.

Hinihikayat niya ang mga residente ng pungsod na palaging tiyaking malinis ang mga tahanan at kapaligiran upang mapuksa ang mga lamok na nagdadala ng sakit na dengue. (Richard Mesa)