SHOOT sa kulungan ang dalawang holdaper na bumiktima sa isang taxi driver matapos masakote ng pulisya sa ikinasang follow-up operation sa Caloocan City, kahapon ng madaling araw.

Sa salaysay ng 47-anyos na taxi driver sa mga tauhan ni Caloocan Police Chief P/Col. Edcille Canals, dakong alas-4:00 ng madaling araw nang maisakay niya ang mga suspek sa Clover Leaf, Quezon City.

Pagsapit nila sa Brgy. 139, Caloocan City sa kahabaan ng EDSA ay biglang naglabas ng baril ang isa sa mga suspek at tinutukan ang biktima sabay nagdeklara ng holdap.

Sa takot sa kaligtasan, hindi na pumalag ang biktima nang sapilitang kunin ng mga suspek ang kanyang personal na gamit, kabilang ang cellphone, P1,600 cash at driver’s license bago mabilis na tumakas patungong West Service Road, Quezon City.

Humingi naman ng tulong ang biktima sa Caloocan Police Sub-Station 5 (SS5) kaya agad nagsagaqawa ang mga ito ng follow up operation sa pangunguna ni P/Lt. Jefren Aganos na nagresulta sa pagkakaaresto sa mga suspek na si alyas ‘Micahel’, 26 at kasabwat nitong edad 19-anyos.

Nakumpiska ng mga tauhan ni Col. Canals kay alyas Michael ang isang kalibre .38 revolver na kargado ng apat na bala habang hindi nakalagay sa ulat kung nabawi ba ang mga gamit at pera na tinangay sa biktima.

Mahaharap ang mga suspek sa kasong Robbery Holdap at paglabag sa Republic Act 10591 (Comprehensive Firearms and Ammunition Regulation Act) in relation to Batas Pambansa Blg. 881 (Omnibus Election Code).

Binati naman ni PCOL Josefino Ligan, Acting District Director ng Northern Police District ang mga tauhan ni Col. Canals sa kanilang mabilis na pagresponde at epektibong aksyon.

“This accomplishment is a clear indication of the NPD’s unwavering commitment to keeping our communities safe. We will continue to intensify our efforts to ensure that criminals are held accountable for their actions,” pahayag niya. (Richard Mesa)

NAPAPANAHON na umanong amyendahan ang kasalukuyang election laws sa bansa kung saan malayang nakakapangampanya ang mga kandidato bago pa man opisyal na magsimula ang campaign period na dapat na ituring na paglabag sa batas ng halalan.

“We hope that our legislators will amend the rules that allow candidates to advertise themselves before the campaign period because it goes against the spirit of the law. If they use taxpayer’s money for these, it is an abuse of authority and wrongful use of taxpayers’ money,” ayon kay Parish Pastoral Council for Responsible Voting (PPCRV) Chairperson Evelyn  Singson.

Paliwanag ni Singson, napapanahon na upang muling pag-aralan at suriin ang kasalukuyang umiiral na election laws sa bansa upang maiakma ito sa kasalukuyang panahon kung saan higit na umiiral ang teknolohiya at makabagong paraan ng pangangampanya.

Kabilang sa partikular na tinukoy ni Singson ang pangangailangan na mawakasan na ang political dynasties sa bansa at ang pagpapataas sa kamalayan ng mga botante sa kahalagahan ng kanilang boto para sa bayan.

Giit ni Singson, mahalaga na masuri ang pag-amyenda sa mga batas ng halalan sa bansa upang matiyak na manaig ang tunay na demokrasya sa pamamagitan ng pagkakaroon ng patas na pagkakataon sa lahat mahirap man o mayaman na maglingkod sa bayan.

“It is time to review our Election Laws and introduce reforms that recognize changes in technology and the needs of the time. We need laws that prevent political dynasties and improve the quality of voters and candidates. We need reforms that will not allow money to determine winners but reforms that will give fair and equal opportunity for rich and poor candidates to run for public office,” ayon pa kay Singson. (Gene Adsuara)

“DAPAT naman talagang mapanagot si VP Sara sa ginawa niyang pagbabanta at sana ay hindi matulad sa parehong kaso na sinampa ko sa kanyang ama.”

Pahayag ito ni House Deputy Minority Leader France Castro kasunod sa naging rekomendasyon ng National Bureau of Investigation na maghain ng kaso laban kay VP Sara Duterte. Kabilang na dito ang kasong inciting to sedition at grave threats dala na rin sa naging pagbabanta umano ng VP kay Presidente Bongbong Marcos.

Ayon kay dating ACT Teachers Representative Antonio Tinio, ang mga inirekomendang kaso ay iilan lamang o tip of the iceberg dahil kailangan umano managot ang bise hindi lamang sa kanyang banta kundi magiging sa alegasyon ng misuse of confidential funds.

Kapwa naman naniniwala ang dalawa na ang rekomendasyon ng NBI ay isang positive development, kasunod na rin sa inaasahang pagdinig sa impeachment complaint laban kay VP Duterte.

“Aside from these charges, what we and the people are waiting for is the start of the impeachment trial. Sana ay kagyat na simulan ito at huwag nang patagalin pa ang pagpapanagot kay VP Duterte sa paglustay sa pera ng taumbayan,” dagdag ni Castro.

Una nang inihayag ni NBI Director Santiago na inirerekomenda nila ang paghahain ng naturang mga kaso laban sa bise presidente. (Vina de Guzman)