UMAPELA ang tatlong mambabatas sa mga kritiko ng gobyerno na itigil ang pagtuligsa sa social welfare o programang ayuda matapos na magsalita na ang publiko na nakakatulong sa kanila ang ibinibigay na ayudad ng pamahalaan.

Ang apela ay kasunod na rin sa lumabas na pinakahuling survey ng Social Weather Stations (SWS) at Pulse Asia na mayorya ng mamamayan — 8 hanggang 9 sa 10, o 80% hanggang 90% — ang nagdeklara na nakatulong ng malaki sa kanilang ang nasabing ayuda ng gobyerno.

“Pakinggan natin ang ating mga kababayan. Suportado nila ang mga social welfare program at nakakatulong ang mga ito sa kanila. Tama na at itigil na ang paninira,” pahayag ni Senior Deputy Speaker Aurelio “Dong” Gonzales Jr.

Sa pagkakaalala ni Gonzales ay walang ibang government program ang nakakuha ng ganitong lebelo ng acceptance at support mula sa publiko.

Ikinatuwa naman ni Deputy Speaker David “Jay-Jay” Suarez ang resulta ng magkahiwalay na SWS at Pulse Asia surveys. Aniya sa ilalim ng liderato ni Speaker Ferdinand Martin Romualdez, ay isinulong ang AKAP (Ayuda para sa Kapos ang Kita Program) sa national budget noong nakalipas na taon.

“We knew from the very start that it was helpful, and that is why we decided to continue to fund it in the 2025 budget, though some senators tried to scrap it,” anang mambabatas.

Para naman kay Majority Leader Manuel Jose Dalipe, ang naturang social welfare programs ay isang pamamaraan upang maipamahagi ang benepisyo ng economic growth sa marginal sectors ng populasyon.

“These programs are funded by taxpayers’ money, which Congress is putting to good use by helping the poor and those whose income is not enough for their daily needs,” paliwanag ni Dalipe.

Sa SWS survey, 90% ng respondents ang nagsabing nakatulong sa kanila ang Pantawid Pamilyang Pilipino Program (4Ps) habang nasa 88% naman ang nagsabing nakatulong sa kanila ang Tulong Panghanapbuhay sa Ating Disadvantaged/Displaced Workers (TUPAD) program.

Ang 4Ps at AKAP ay ipinamamahagi ng Department of Social Welfare and Development, habang ang TUPAD ay ipinatutupad naman ng Department of Labor and Employment.

Habang sa Pulse Asia survey, lumitaw na 82% ng respondents ang nagsabing 4Ps ay nagpabuti sa financial stability ng mga Pinoy sa lower social class. (Vina de Guzman)

PORMAL nang nanumpa bilang bagong commissioner ng Commission on Elections (Comelec) si Atty. Noli Avelino Pipo.

Si Atty. Pipo ay papalit sa nabakanteng puwesto ng nagretirong si Commisioner Marlon Casquejo.

Magiging miyembro ng 2nd division ng poll body si Pipo na naging Director din ng Comelec sa Ilocos Region.

Pinalitan din ng Comelec legal department head Atty. Maria Norina Tangaro- Casingal ang nagretirong si Commissioner Socorro Inting.

Kumpleto na ang anim na commissioner ng Commission on Elections na tututok sa nalalapit na halalan ngayong Mayo 2025.

Si Commissioner Casingal ay naglingkod sa komisyon ng mahigit 2 dekada habang si commissioner Pipo naman ay mahigit 3 dekada na sa serbisyo.

Sa pagkakatalaga ng dalawang bagong commissioner,  nakumpleto na ang anim na commissioner ng poll body na tututok sa halalan 2025.

Sinabi ni Comelec Chairma George Garcia na naging lamang nina Casingal at Pipo sa 200 aplikante ang pagiging insider .

Umaasa naman ang dalawang bagong commissioner na lulusot sa plenaryo ng Commission on Appointment o COA ang kanilang  ad interim appointment. (Gene Adsuara)

LAGLAG sa selda ang dalawang tulak ng droga na itinuturing bilang High Value Individual (HVI) matapos kumagat sa ikinasnag buy bust operation ng pulisya sa Caloocan City, kamakalawa ng gabi.

Sa ulat ni District Drug Enforcement Unit (DDEU) chief P/Lt. Col. Timothy Aniway Jr. kay Northern Police District (NPD) Acting Director P/Col. Josefino Ligan, kinilala ang mga suspek na sina alyas “Nunong”, 25, at alyas “Ver”, 46, kapwa residente ng lungsod.

Ani Lt. Col. Aniway, ikinasa nila ang buy bust operation sa koordinasyon sa PDEA at Police Sub Station 9 ng Caloocan police matapos magawang makipagtransaksyon sa mga suspek ng isa sa kanyang mga tauhan.

Dakong alas-8:20 ng gabi nang dambahin ng mga operatiba ng DDEU ang mga suspek sa Daniel Street, Tierra Nova, Phase 1, Bagumbong, Barangay 171, matapos tanggapin ang marked money mula sa pulis na nagpanggap na buyer.

Ayon kay P/Capt. Regie Pobadora na nanguna sa operation, nakumpiska nila sa mga suspek ang nasa 55 grams ng hinihinalang shabu na may estimated street value P374,000 at buy bust money.

Kasong paglabag sa Sections 5, 26 at 11 sa ilalim ng Article II ng Republic Act 9165 o ang Comprehensive Dangerous Drug Act of 2002 ang isasampa ng DDEU sa mga suspek sa Caloocan City Prosecutor’s Office. (Richard Mesa)

REHAS na bakal ang kinasadalakan ng 29-anyos na electrician matapos tutukan ng baril ang kanyang naka-alitang welder sa Malabon City, kamakalawa ng gabi.

Ayon kay Malabon Police Chief P/Col. Jay Baybayan, mahaharap sa kasong Grave Threat, Illegal Possession of Firearms and Ammunition at paglabag sa Omnibus Election Code ang suspek na si alyas “Regie”, residente ng Kadima, Brgy. Tonsuya

Ani Col. Baybayan, nagpapatrulya ang mga tauhan ni P/Maj. Johnny Baltan, Commander ng Police Sub-Station 5, sa Block 4, Kadima, nang humingi ng tulong ang biktimang si alyas “John-John”, 39, ng nasabi ring barangay dakong alas-9 ng gabi dahil sa ginawang panunutok ng baril sa kanya ng suspek nang magkaroon umano sila ng argumento.

Kaagad namang rumesponde ang mga pulis na nagresulta sa pagkakaaresto sa suspek makaraang naaktuhan nilang may hawak itong baril.

Nakumpiska sa suspek ang isang kalibre .45 pistola na may kargang pitong bala sa magazine at nang hanapan siya ng kaukulang dokumento hinggil sa legalidad nito ay walang naipakita si alyas Regie.

Pinuri naman ni NPD Acting Director P/Col. Josefino Ligan ang Malabon police sa kanilang mabilis na aksyon at pagresponde. (Richard Mesa)

DEDBOL ang 59-anyos na American national matapos umanong mahulog mula sa ika-walong palapag ng isang condominium sa Valenzuela City.

Dead-on-the-spot ang biktimang si alyas “Robert”, American national at pansamantalang nanunuluyan sa Unit 819, Tower A Condominium, Isabelle de Valenzuela, Brgy. Marulas sanhi ng matinding pinsala sa ulo at katawan matapos bumagsak sa lobby ng naturang condo.

Lumabas sa imbestigasyon ng Valenzuela City Police, naganap ang insidente Lunes ng alas-9:40 ng umaga bagama’t nito lang Miyerkules ng madaling araw nakapaglabas ng ulat ang mga tauhan ni Valenzuela Police Chief P/Col. Nixon Cayaban dahil kinakailangan pa nilang ipabatid sa Foreign Liason Division ng Embahada ng Estados Unidos ang malagim na sinapit ng dayuhan para maipaalam sa kanyang pamilya ang nangyari.

Sa pahayag sa pulisya ng 52-anyos na lady guard ng condominium na si alyas “Anita”, residente ng University Avenue, Brgy. Potrero, Malabon City, ginagampanan niya ang kanyang tungkulin nang laking gulat niya nang bumagsak sa kanyang tabi ang katawan ng biktima.

Kaagad naman niyang ipinaalam sa mga tauhan ng Valenzuela Police Sub-Station 3 ang insidente.

Sinabi ni Col. Cayaban na isasailalim pa nila sa autopsy examination ang bangkay ng dayuhan upang matiyak ang sanhi ng kanyang kamatayan habang patuloy pa rin ang kanilang ginagawang pagsisiyasat para mabatid kung sadyang tumalon sa kanyang kamatayan ang dayuhan o aksidenteng nahulog mula sa tinutuluyan niyang unit. (Richard Mesa)