PINAYUHAN ng Department of Foreign Affairs (DFA) ang undocumented at overstaying Filipino sa Estados Unidos na manatiling “low profile” at gawing legal ang kanilang pamamalagi habang pinahihigpit ng administrasyong Trump ang kanilang mga immigration policy.

Sinabi ni Foreign Affairs Undersecretary Eduardo Jose De Vega na nakahanda ang DFA na ipaabot ang tulong nito sa mga Filipino na magpapasaklolo sa Philippine Embassy o mga konsulado sa Estados Unidos.

“Our advice is to keep a low profile as possible and work for your legalization,” ayon kay De Vega.

Aniya pa, sinabi ni President Donald Trump na maaari siyang makipagtulungan sa Democrats ukol sa illegal aliens na hindi babagsak sa ilalim ng mga kategoryang illegal immigrants na target ng mga ito na i-deport, gaya ng mga kriminal at terorista.

“That means they will make legal means to encourage these productive overstaying aliens to be totally legalized. So, take advantage of that,” ang sinabi pa ni De Vega.

Winika pa nito na ang lahat ng mga Pinoy, maging kung ito ay undocumented, bumiyahe sa Estados Unidos, ay may hawak na visa.

“Lahat iyan may visa. Nag-expire lang. Walang halos tumawid na walang kapapel-papel,” ani De Vega.

Kaya nga, halos imposible na ang tinatayang 300,000 Filipino na walang legal status sa Estados Unidos ay ide- deport sa pagtatapos ng administrasyon ni Trump.

“If you are targeted for deportation, you have legal means also to contest your deportation and at least legally stay for several months,” anito sabay sabing “(Some immigration lawyers could) argue that you are doing something productive in the US. And sometimes, it’s a success, it prevents deportation.”

Matatandaang, sa unang Trump presidency, sinabi ni De Vega na “only a few hundred or less” undocumented Filipino kada buwan ang idine-deport ng Estados Unidos, mas mababa sa bilang sa panahon ng Obama administration.

“Tingnan natin, kunwari bigla lang in six months may 20,000 na-deport o 10,000, then umakyat talaga. Huwag tayo mag-conclude until makita natin iyong data in six to eight months kung dadami ang made-deport,” aniya pa rin.

Muli namang inulit nito na handa ang gobyerno ng Pilipinas na tugunan ang epekto sa mga Filipino ng planong mass deportation.

Madali naman aniya sa gobyerno na gamitin ang DFA Assistance-to-Nationals fund.

Nandiyan din aniya ang Department of Migrant Workers’ Aksyon (Agarang Kalinga at Saklolo para sa mga OFW na Nangangailangan) Fund, gagamitin para sa legal, medical, financial at iba pang uri ng tulong para sa overseas Filipino workers, gaya ng ‘repatriation ay intervention’ para protektahan ang karapatan ng mga mamamayan.

“The President talked to President Trump and our ambassador has assured them that they’ll give them the assistance,” ang sinabi ni De Vega. (Daris Jose)

NOT GUILTY plea ang inihain ng abogado ng mga akusadong pulis sa 990 kilos shabu sa ginanap na arraignment  Lunes ng umaga, Enero 27.

Dahil dito, itinakda ng Manila Regional Trial Court (MRTC)  Branch 175 sa Pebrero 14  ang pre-trial para sa kasong paglabag sa RA 9165 sa 29 na mga pulis.

Kaugnay ito sa narekober na 990 kilo ng sahbu sa isang gusali sa Tondo Maynila noong 2022.

Bagama’t tumangging magbigay ng plea ang kampo ni MSgt Rodolfo Mayo Jr dahil sa nakabinbin nilang motion to quash sa paglilitis…ang abogado na ang naghain ng not guilty plea para sa kanya

Hindi naman sumipot ang mga abogado ng ilan sa mga akusado na nakalalaya pa rin kasama na si PLCol Glenn Gonzalez

Samantala, tinalakay din ng korte ang kanya kanyang hiling ng mga akusado sa kanilang detention, kung ililipat ba sa PNP Custodial Center

Kasama rin dito si Patrolman James Osalvo na hiniling mailipat sa PNP General Hospital at mabantayan ng isang kamag-anak

Ito ay dahil sa kondisyong medikal ng pulis na nasangkot sa aksidente at nasa kustodiya ngayon ng Custodial Center sa Kampo Crame. (Gene Adsuara)

UMAPELA si House Deputy Majority Leader at La Union Rep. Paolo Ortega V sa mga Pinoy na huwag iboto ang mga  pro-China candidates ngayong darating na May midterm elections.

Kasunod na rin ito sa ulat na gumamit ng sonic device ang isang  Chinese vessel sa Philippine Coast Guard ship malapit sa Zambales.

Ang device ay nagpapakawala ng nakakabinging ingay o noise, na nagbibigay panganib sa kalusugan at kaligtasan ng mga personnel ng bansa.

“This is no longer just about the West Philippine Sea—it’s about our future as a nation. Supporting candidates who are soft on China is the same as endorsing the harassment of our Coast Guard and the exploitation of our natural resource,” anang mambabatas.

Lalo pang pinalalakas ng Tsina ang kanilang presensiya sa wps, gamit ang  water cannons at ngayon ay acoustic weapons para takutin ang mga pinoy.

“Bawat Pilipino ay dapat magtanong: Pahihintulutan ba natin na kontrolin ng China ang ating mga desisyon? O pipiliin natin ang mga lider na ipaglalaban ang ating soberanya at hindi magpapadala sa mga dayuhang mananakot?” pahayag pa ni Ortega.

Hinikayat pa nito ang mga botante na gamitin ang kanilang balota bilang armas aat depensa laban sa panghihimasok ng dayuhan.

“A vote for pro-China candidates is a vote against the heroes who fought for our independence, the fishermen fighting for their livelihood, and the Coast Guard risking their lives to protect our seas. We must elect leaders who put the Philippines first—leaders who champion our flag in every forum and stand shoulder-to-shoulder with our people in adversity,” pagtatapos nito. (Vina de Guzman)

ISANG drug suspect na itinuturing bilang High Value Individual (HVI) ang timbog matapos makuhanan ng mahigit P.3 milyong halaga ng shabu nang kumagat sa ikinasang buy bust operation ng pulisya sa Navotas City.

Sa kanyang ulat kay Northern Police District (NPD) Acting Director P/Col. Josefino Ligan, sinabi ni Navotas police chief P/Col. Mario Cortes na nakatanggap ng impormasyon ang mga operatiba ng Station Drug Enfortcement Unit (SDEU) hinggil sa pagbebenta umano ng droga ni alyas ‘Eman’, 46, ng Brgy, NBBN.

Isinailalim ng SDEU sa validation ang suspek at nang positibo ang report, ikinasa nila ang buy bust operation sa pangunguna ni P/Capt. Luis Rufo Jr, sa koordinasyon sa PDEA matapos isa sa kanyang mga tauhan ang nagawang makipagtransaksyon kay ‘Eman’ ng droga.

Dakong alas-10:35 ng gabi nang dakmain ng mga tauhan ni Capt. Rufo ang suspek matapos tanggapin ang marked money mula sa pulis na nagpanggap na buyer sa V De Guzman St., Brgy. Bangkulasi.

Nakumpiska sa suspek ang nasa 54.39 grams ng hinihinalang shabu na may estimated street value na P369,852.00 at buy bust money.

Sinampahan ng SDEU ang suspek ng kasong paglabag sa Sections 5 at 11 sa ilalim ng Article II ng RA 9165 o ang Comprehensive Dangerous Drugs Act of 2002 sa Navotas City Prosecutor’s Office.

Pinapurihan naman ni Col. Ligan ang mga operatiba sa kanilang dedikasyon at pambihrang pagganap sa panahon ng operation.

“This significant seizure is a direct result of our relentless efforts to dismantle illegal drug operations within our jurisdiction. Disrupting the supply chain and preventing these dangerous substances from reaching our communities are major achievements,” pahayag niya. (Richard Mesa)

HIMAS-REHAS ang isang lalaki na wanted sa kasong statutory rape matapos makorner ng pulisya sa ikinasang manhunt operation sa Caloocan City, kamakalawa ng hapon.

Sa kanyang report kay Northern Police District (NPD) Acting Director P/Col. Josefino Ligan, kinilala ni Caloocan police chief P/Col. Edcille Canals ang akusado na si alyas ‘James’, 20.

Dinakip si ‘James’ sa bisa ng warrant of arrest na inisyu Presiding Judge April Anne M. Turqueza-Pabellar, ng Family Court, Branch 6, Third Judicial Region, Sta. Maria, Bulacan noong August 16, 2024, para sa kasong Statutory Rape.

Ayon kay Col. Canals, walang inirekomendang piyansa ang hukuman para sa pansamantalang kalayaan ng suspek.

Nauna rito, nakatanggap ng impormasyon ang Cadena de Amor Police Substation-11 na nagtatago umano sa Camarin ang akusado na nakatala bilang Top Most Wanted Person sa Bulacan.

Kasama ang mga tauhan ng NCRPO-RDEU Team 3, agad nagsagawa ang SS11 ng joint operation na nagresulta sa pagkakaaresto sa akusado dakong alas-3:20 ng gabi sa Lirio Street, Barangay 175, Camarin.

Pansamantalang nakapiit ang akusado sa custodial facility unit ng SS11 habang hinihintay ang pagpapalabas ng commitment order mula sa korte.

Pinuri naman ni Col. Ligan ang dedikasyon at mabilis na action ng mga tauhan ni Col. Canals na nagresulta sa matagumpay na operation. (Richard Mesa)