NAGBIGAY ng paunang tulong ang Department of Social Welfare and Development (DSWD) sa pamilya ng nag-viral na babaeng college student na inatake ng security guard sa labas ng isang mall sa Mandaluyong City.

Sa naging kautusan na rin ni DSWD Secretary Rex Gatchalian, personal na iniabot ni Assistant Secretary Irene Dumlao ang P20,000 kay Judith, ina ng sampaguita vendor na nagngangalang Jeny, 22, na nasa eskuwelahan nang mag-house visit ang mga DSWD social workers.

“Nanay, ito pong ipinaabot namin sa iyo ay initial pa lamang. Sabi po ng case manager natin, babalik sya at mag-iinterview sya para humingi ng additional information kasi gusto rin po namin kayong matulungan,” ang sinabi ni Dumlao sa ina sa bahay ng mga ito sa Quezon City.

Sinabi nito na lalo pang aalamin ng mga social worker ang situwasyon ng pamilya upang madetermina kung ano pa ang maaaring maitulong gaya ng Sustainable Livelihood Program.

Sa isinagawang panayam, sinabi ni Judith na ang kanilang pamilya ay dating benepisaryo ng Pantawid Pamilyang Pilipino Program subalit gradweyt (graduate) na dahil ang pinakabunsong anak ay 19 taong gulang.

Sinabi ni Judith na si Jeny ay first-year student, kumukuha ng kursong Bachelor of Science in Medical Technology.

Sinabi pa rin nito sa mga social worker na nagsisikap si Jeny na tapusin ang kanyang pag-aaral, dahilan para magtinda ito ng sampaguita pagkatapos ng kanyang klase.

“Kaya sila nagsusumikap na magtinda, doon sila kumukuha ng baon at pamasahe. Tapos ang iba ay itatabi nila para pagdating ng babayarin [sa school] ay mayroon silang pagkukunan,” ayon kay Judith.

Si Judith ang gumagawa ng sampaguita habang ang kanyang mga anak at asawa ang nagbebenta nito.

Sa ulat, hindi itinago ng mga magulang ng viral sampaguita vendor na masama ang loob nila sa ginawa ng security guard sa kanilang anak. Napag-alaman na 22-anyos na college student na ang dalaga at mayroong kakambal.

“Masakit sa kalooban kasi akong nanay hindi ko sila nahampas ng ganyan. Masakit kasi ginawa nila sa anak ko, na sinipa parang ganoon naghahanap-buhay nang maayos,” ayon sa ina ni Jeny.

“Nakikiupo lang siya kasi umaambon ng time na ‘yon.… Eh ngayon dumating ang guard. Pilit siya pinapaaalis. Ang anak ko na ‘yan ‘pag alam niya tama siya ipaglalaban niya sarili niya eh hanggat hindi nagkakaunawaan, hinablot ngayon ang sampaguita,” sabi naman ng ama ni Jeny.

December 17, 2024 umano nang mangyari ang insidente sa labas ng SM Megamall. Tinanggal na sa mall ang sangkot na security guard sa insidente.

“On the part of the DSWD,lagi po nating sinasabi na hindi po natin tino-tolerate ang gender-based violence. Dapat ay there is a collective effort on the part of the private and public sectors na protektahan at pangalagaan ang karapatan ang well-being ng bawat isa,” ang sinabi ni Dumalo. (Daris Jose)

IPINAG-UTOS ni Social Welfare Secretary Rex Gatchalian sa Disaster Response Management Group ng Department of Social Welfare and Development (DSWD) na magpadala ng mas maraming food packs sa Negros Island para sa inaasahang pagputok ng Bulkang Kanlaon, huling sumabog noong nakaraang Disyembre at nananatiling nasa Alert Level 3.

Sinabi ng DSWD na tiniyak ni Gatchalian sa mga field offices ng departamento sa Central at Western Visayas regions na ang karagdagang food packs ay darating, araw ng bukas, Linggo, Enero 19.

“We will fill our provincial warehouses on the island to the brim,” ang winika ni Gatchalian.

Aniya pa, kailangang tiyakin ng DSWD na maihahatid ang 40,000 food packs sa Negros Oriental at panibagong 40,000 sa Negros Occidental sa araw ng Lunes, Enero 20.

Ang Food packs ay ay sinadya upang mapanatili ang pamilya na na-displaced ng kalamidad gaya ng pagsabog ng bulkan, lindol at pagbaha.

“Check the maximum capacity for both sides of Kanlaon. I want maximum capacity the warehouses of Negros Oriental and Occidental. So we have to be ready,” ayon sa Kalihim. (Daris Jose)

NAGPAHAYAG ng kanyang buong suporta si Navotas Congressman Toby Tiangco sa isinusulong ni Pangulong Ferdinand Marcos para sa mas magandang koneksyon sa buong Pilipinas.

“Sabi nga ng Pangulo, wala dapat maiiwan. Dapat lahat ng Pilipino magkaroon ng access sa internet,” ani Tiangco.

“Handa ang Kongreso na suportahan ang pananaw ng Pangulo, lalo na sa pag-streamline ng mga proseso at pag-institutionalize ng mga reporma na kinakailangan para sa mas mahusay na digital na imprastraktura,” dagdag niya.

Idiniin ni Tiangco ang panawagan ng pangulo sa Department of Information and Communications Technology (DICT) na unahin ang Common Tower Program (CTP) nito para maabot ang mga underserved at remote na lugar.

“Malinaw ang mga utos ng Pangulo–kailangan ng DICT na mag-step up para mapakinabangan ang mga benepisyo ng CTP at magbigay ng mas magandang koneksyon sa mas maraming Pilipino,” sabi pa niya.

Ang CTP ay inilunsad upang mapahusay ang imprastraktura ng telekomunikasyon sa pamamagitan ng pagtataguyod ng pagtatayo ng mga shared tower.

Sa pamamagitan ng programang ito, ang mga mobile network operator ay na-insentibo na mag-set up ng mas maraming antenna sa mga rural na lugar na may mababang populasyon.

“Lahat ay nagsisimula sa koneksyon. Sa pamamagitan lamang ng pagbibigay ng mas maraming Pilipino ng access sa maaasahang internet maaari nating i-unlock ang buong potensyal ng pagsisikap ng digitalization ng ating pamahalaan. Umaasa kami na bilisan ng DICT ang pagkilos sa pagpapatupad ng CTP,” pagtatapos ni Tiangco. (Richard Mesa)

UPANG isulong ang kalinisan at diwa ng “Bayanihan” sa mga komunidad sa Malabon City, inilunsad ng pamahalaang lungsod ang “Search for the Cleanest Barangay 2025” kung saan ang barangay na mananalo ng unang cash prize ay tatanggap ng isang milyong peso.

“Isang patimpalak para sa dalawampu’t isang barangay kasabay ng ating layunin na mas gawing malinis, luntian, at maaliwalas para sa lahat ang Malabon. Kaya para sa ating mga mahal na Malabueno. Ito na ang panahon upang tayo ay magtulong-tulong tungo sa pagkakaroon ng malinis na kapaligiran. Dahil higit pa sa gantimpalang matatanggap ng mga magwawagi, ay ating maipapamalas ang ating galing, pagkakaisa, at pagkakaroon ng pakialam at pagkalinga sa ating kalikasan na siya ring kinakailangan para sa ating magandang kinabukasan,” pahayag ni Mayor Jeannie Sandoval.

Ayon kay City Environment and Natural Resources Office (CENRO) Officer-in-Charge Mr. Mark Mesina, ang programang ito ay upang hikayatin at bumuo ng kooperasyon sa pagitan ng Lungsod, mga barangay, at komunidad tungo sa pagkamit ng malinis at environment-friendly na kapitbahayan na magpapanatili ng isang malinis at luntiang paligid, na walang anumang uri ng debris at sagabal.

Sinabi ng alkalde na pormal na magsisimula ang Search for the Cleanest Barangays 2025 sa Marso at isang serye ng inspeksyon at assessment ang isasagawa mula Abril hanggang Nobyembre kung saan ang mga mananalo sa paligsahan ay papangalanan sa Disyembre.

Inihayag naman ni Mesina na ang mga barangay ay huhusgahan ng mga piling judges mula sa Malabon City Solid Waste Management Board, Metro Manila Development Authority (MMDA), Department of Environment and Natural Resources (DENR), Department of Interior and Local Government (DILG) at Mother Earth Foundation, Inc batay sa mga sumusunod na pamantayan:

Malinis at maayos na Barangay (40%), Sustainability Measures (25%),  Pakikilahok sa Komunidad (15%), Innovaton and Creativity (10%) at Dokumentasyon (10%).

Ibinahagi din ni Mayor Jeannie na ang mga mananalong barangay ay tatanggap ng cash prize na P1,000,000 para sa unang gantimpala, P500,000 para sa ikalawang gantimpala, P250,000 para sa ikatlong gantimpala, P150,000 para sa ikaapat na gantimpala, at P50,000 para sa ikalimang gantimpala, kasama ang mga plake at sertipiko.

“Maayos at malinis na kapaligiran ang prayoridad natin dito sa Malabon. Hindi lang ito para sa kalikasan, kundi para na rin sa kalusugan at kagalingan ng bawat isang Malabueno. Kaya kasabay ng ating patuloy na pagsasagawa ng paglilinis sa mga daanan ng tubig at mga kalsada ay ating isinusulong ang bayanihan ng bawat komunidad upang maisagawa at maipagpatuloy ang ating hangarin,” pahayag naman ni City Administrator Dr. Alexander Rosete. (Richard Mesa)

INAASAHAN na idedeklara ng Department of Agriculture (DA) ang food security emergency sa Enero 22, ng taong kasalukuyan, araw ng Miyerkules.

“Ang expectation by Monday, mare-receive na ng DA ‘yung kopya ng resolution ng approval ng recommendation na mag-declare nga ng food security emergency,” ang sinabi ni DA spokesperson Assistant Secretary Arnel de Mesa sa mga mamamahayag sa sidelines ng isang news forum, araw ng Sabado.

“So ine-expect na ma-review ‘yan ng Monday din hanggang Tuesday at ang expectation by Wednesday ay meron ng aksyon ang ating kalihim and most likely again the declaration of food security emergency,” ang dagdag na pahayag ni de Mesa.

Sa kabilang dako, kamakailan lamang ay inaprubahan ng National Price Coordinating Council ang isang resolusyon na hinihikayat ang Department of Agriculture na magdeklara ng “food security emergency for rice” dahil sa patuloy an pagtaas ng presyo ng mga pangunahing bilihin.

Sa ilalim ng Republic Act 12078, o batas na nag-aamyenda sa Agricultural Tariffication Act, ang Agriculture Secretary ay may kapangyarihan na magdeklara ng food security emergency sa bigas bunsod ng supply shortage o extraordinary increase sa presyo ng nasabing produkto.

Nauna rito, sinabi ni Agriculture Secretary Francisco Tiu Laurel Jr. na ang posibilidad na pagdedeklara ng ‘food security emergency for rice’ ay ‘justidfied” sabay sabing may sapat na data para suportahan ang nabanggit na aksyon.

Tinuran naman ni Trade Secretary Ma. Cristina Roque, chairman ng NPCC, ang nasabing hakbang ay magbibigay pahintulot sa National Food Authority (NFA) para ipalabas ang buffer stock ng bigas para maging matatag ang presyo, palitan ang ipinalabas na stocks kasama ang locally produced rice para suportahan ang mga magsasakang Filipino.

“This will empower the DTI to take decisive action in protecting consumer welfare while strengthening the country’s agricultural backbone,” aniya pa rin.

Sa kasalukuyan, hawak ng NFA ang 300,000 metric tons ng bigas na buffer stocks. “Releasing these reserves will help decongest warehouses in preparation for the February harvest,” ayon sa DA.

Samantala, sinabi ni Pangulong Ferdinand Marcos Jr., na ang deklarasyon ng food security emergency ay naglalayon na “to force the price down” matapos na gawin ng gobyerno ang lahat ng magagawa nito.

Winika ni De Mesa na ang panukalang food security emergency declaration ay sanhi ng “extraordinary increase ng rice,” sabay sabing sa kabila ng pagtapyas sa tariff rate para sa imported rice, ang presyo ng pangunahing butil ay bumaba.

Ipagpapatuloy naman ng DA ang mga programa nito na nag-aalok ng ‘affordable rice’ gaya ng “Rice for All” na nagbebenta ng P38 per kilo ng bigas, inihalo sa mga sirang butil ng bigas.

Inaasahan naman ni De Mesa na palalawakin ng departamento ang Rice-for-All initiative sa ibang lalawigan sa susunod na buwan o Pebrero o Marso.

“Uunahin natin yung mga Metro areas outside of Metro Manila kagaya ng Cebu, Davao, Cagayan de Oro, Iloilo. So unahin natin yung mga ganitong areas,” aniya pa rin. (Daris Jose)