MULI na namang binira ni Vice-President Sara Duterte si Pangulong Ferdinand Marcos Jr., ang hamunin nito sa kanyang Facebook live, Linggo ng gabi ang mga matataas na opisyal ng gobyerno na sumailalim sa drug test at paalalahanan ang kanyang mga taga-suporta na mayroong karapatan ang mga ito na magdaos ng mapayapang pagtitipon.

Sa isang live video sa kanyang social media page, sinabi ni VP Sara na ginagamit siya ng kanyang kaaway para itago ang kanilang korapsyon.

“Wala na kayong mapuna sa akin. Pinagtatakpan ninyo ang mga kakulangan ng pamahalaan. Ako ang ginagawa ninyong punching bag para hindi napapansin, nakikita, naririnig ng mga tao ang kalokohan, ang korapsyon, at ang katiwalian na ginagawa sa gobyerno,” aniya pa rin.

Hinamon din niya ang mga opisyal ng pamahalaan kabilang na iyong mga nasa Office of the President (OP) at Kongreso na sumailalim sa drug tests.

“Magpa-drug test tayong lahat sa harap ng taongbayan. Dalawa lang ‘yan mga kababayan—ibigay namin ang mga pangako namin sa inyo noong nangangampanya kami, at ipapakita namin sa inyo na matino kami. Mapapa-drug test kaming lahat. Simulan namin sa Office of the Vice President,” dagdag na wika nito.

Tinukoy ni VP Sara ang campaign promises ni Pangulong Marcos na kanyang running mate noong 2022, na gagawin nitong P20 kada kilo ang bigas na hanggang sa ngayon ay hindi nangyayari.

Makikita sa data mula sa Department of Agriculture (DA) na ang presyo ng local commercial rice sa Metro Manila ay mula P40.00 hanggang P61.00 per kilogram, at ang imported commercial rice naman ay mula P40.00 hanggang P63.00 per kilogram ‘as of November 20, 2024.’

“Dapat po ‘pag ang politiko ay nag-promise na magbibigay ng P20 per kilo na bigas, dapat ay tinutupad ‘yun dahil binoto ka ng mga tao base sa mga sinabi mo, base sa mga kampanya mo,” ayon kay Duterte

“Dapat binibigay ‘yan lahat kung anuman ang sinabi ng isang tao, ng isang politiko sa entablado, dapat nakikita ‘yan ng taongbayan at higit pa dapat ang nakikita natin,” dagdag na wika nito.

Sa kapareho pa ring video, sinabi ni VP Sara na sinusubukan niyang magtrabaho ng maayos sa DepEd subalit hindi niya maintindihan kung bakit patuloy na binabastos ng Kongreso ang budget ng nasabing departamento.

“Mga kababayan, nararamdaman ko kung ano ‘yung matagal niyo nang nararamdaman. Sinubukan ko na magtrabaho, magtrabaho nang maayos sa Department of Education, dahil ‘yun naman ang aking pangako sa inyo, ginamit ko ang pangalan ko—Sara Duterte, Inday Sara Duterte,” ani VP Sara.

“Sabi ko sa inyo trabaho, edukasyon, mapayapang pamumuhay. Pero anong nangyari? Binastos ang budget ng Department of Education. Hindi ko na kailangan magbigay ng ebidensya. Makikita niyo sa GAA simula sa NEP, papunta sa GAB, papunta sa BiCam,” dagdag na wika nito.

Samantala, pinasalamatan naman ni VP Sara ang kanyang mga taga-suporta sa Veterans Memorial Medical Center (VMMC) sa Quezon City, kung saan naka-confine ang kanyang chief of staff n a si Undersecretary Zuleika Lopez.

Sa ulat, na-cite for contempt kasi Atty. Zuleika Lopez, Chief of Staff ni Vice Pres. Sara Duterte nang hindi magustuhan ng mga mambabatas mula sa Mababang Kapulungan ng Kongreso ang naging sagot nito kaugnay ng kontrobersiyal na confidential fund ng Office of the Vice President.

“Gusto ko lang ipaalala sa ating mga kababayan na ayaw natin ng kaguluhan, na tayo ay may karapatan sa peaceful assembly at tayo ay may karapatan na magsalita kung ano ‘yung nararamdaman natin at gusto nating makita mula sa ating gobyerno. Ang gusto natin makita ay genuine public service,” aniya pa rin. (Daris Jose)

HINDI dapat pigilan ang paghahanap ng katotohanan ayon kay Pangulong Ferdinand Marcos Jr., kasabay ng pagpapaalala sa mga opisyal ng pamahalaan na maayos na gampanan ang kanilang tungkulin na protektahan ang bansa at ang Saligang Batas.

Ang pahayag na ito ng Pangulo ay kasunod ng matinding bigwas ng mga banta ni Vice President Sara Duterte laban sa kanya, kay Unang Ginang Lisa Araneta-Marcos at House Speaker Martin Romualdez.

“Ang katotohanan ay hindi dapat i-tokhang. Tapos na sana ang usapang ito kung tutuparin lamang ang sinumpaang panata na bilang lingkod-bayan ay magsabi ng totoo, at hindi hahadlangan,” ang sinabi ni Pangulong Marcos, tinukoy ang itinuturing niyang ‘infamous brand’ ng drug war ng nakalipas na administrasyon.

“Kaya hindi tama ang pagpigil sa mga halal ng bayan sa paghahanap ng katotohanan. Hindi na sana hahantong sa ganitong drama kung sasagutin lamang ang mga lehitimong katanungan sa Senado at sa House of Representatives,” ang sinabi ni Pangulong Marcos sa isang video message.

Aniya pa, ang mga personalidad na sangkot dito ay kinakailangan na tugunan ng direkta ang mga usapin upang sa gayon ay malaman ng sambayanang Filipino ang katotohanan.

Sa gitna ng mga hamon na kinakaharap ng bansa, sinabi ng Pangulo na nananatili sjyang naka-pokus sa pamamahala. Ipinangako rin ng Chief Executive na hindi nito iko-kompromiso ang ‘rule of law’ na dapat lamang na ipatupad sa lahat.

“Kaya hindi ko hahayaan magtagumpay ang hangarin ng iba na hatakin ang buong bansa sa burak ng pulitika,” ang sinabi ng Pangulo.

“Igalang natin ang proseso. Tuparin natin ang batas. Alalahanin natin ang mandato na pinagkatiwala sa atin ng milyong-milyon na Pilipino. Magtrabaho po tayo sa ikauunlad ng Republika ng Pilipinas at para matamo ang Bagong Pilipinas.” ang pahayag ni Pangulong Marcos. (Daris Jose)

NAKIISA si Pangulong Ferdinand R. Marcos Jr. sa pagdiriwang sa nag-kampeon na chorale groups na nagdala ng karangalan sa bansa dahil sa kanilang katangi-tanging abilidad sa pag-awit sa international stage.

Sa isang seremonya sa Palasyo ng Malakanyang, pinarangalan ng First Couple na sina Pangulong Marcos at Unang Ginang Liza Marcos ang pitong chorale groups na nangibabaw sa iba’t ibang international competitions at ipinresenta ang musikang Filipino sa buong mundo.

Ang mga singing group ay ang University of the Philippines Manila Chorale, Quezon City Performing Arts Development Foundation Inc. Concert Chorus, Sola Gratia Chorale, University of Mindanao Chorale, Los Cantantes De Manila, IMUSICAPELLA, at University of Santo Tomas Singers.

Ang lahat ng grupo ay ipinagkalooban ng P200,000 bawat isa at certificates of appreciation.

Sa kanyang naging talumpati, isiniwalat ni Pangulong Marcos na ang kanyang kapatid na si Irene Marcos-Araneta, ang nasa likod ng “Gintong Parangal: Honoring the Champion Choirs of 2024.”

Kaya nga, umaasa ang Pangulo na ang seremonya ang siyang magiging tanda ng “beginning of a resurgence of the appreciation of Filipino artists by Filipinos.”

“This is world class, international level and Filipinos do not know about it. And they should because every other Pinoy that will hear about this will be proud once again,” ang sinabi ni Pangulong Marcos.

Aniya pa, ang pagkilala ay hindi lamang ang ipagdiwang ang tagumpay ng mga may ‘talented choirs’ kundi pagkilala at paghanga sa kanilang pasyon o pagkahumaling at disiplina.

“I hope that tonight will be the first step where we recognize the true artists that are amongst us and the artists that have gone out and have been so committed to their art to present it to the rest of the world. And thank God, the rest of the world says it’s very, very good. You win. So congratulations to all of you,” ang litanya ng Pangulo. (Daris Jose)