KINONDENA ng 45 na matataas na mga opisyal ng Eastern Visayas si Vice President Sara Duterte kaugnay ng walang ingat at mapaghating aksyon nito laban kina Pangulong Bongbong Marcos at Speaker Ferdinand Martin Romualdez.

Pinangunahan nina Leyte Rep. Anna Victoria Veloso-Tuazon, Biliran Rep. Gerardo “Gerryboy” J. Espina Jr., at Samar Reps. Reynolds Michael Tan at Stephen James Tan, ang kabuuang 45 opisyal ang paglalabas ng Joint Manifesto of Indignation kung saan kanilang sinabi na ang mga aksyon ni Duterte ay insulto sa mga Waray at kanilang mga lider.

Ang pahayag, na nilagdaan ng mga opisyal ng probinsya, lungsod, at munisipyo sa Eastern Visayas, ay nagsimula sa pagtuligsa, “We, the undersigned local government leaders of Eastern Visayas, express our profound indignation at the malicious, baseless and reckless accusations made by Vice President Sara Duterte against Speaker Ferdinand Martin G. Romualdez.”

Tinuligsa ni Duterte si Speaker Romualdez, isang kilalang lider ng mga Waray at pinsan ni Pangulong Marcos, kaugnay ng imbestigasyon ng Kamara sa umano’y maling paggastos sa P612.5 milyong confidential fund ng Office of the Vice President (OVP) at Department of Education (DepEd).

Ayon sa manifesto, ang hindi makatwirang pag-atake ay isang paghamak hindi lamang sa mga lider kundi maging sa dangal at dignidad ng mga Waray— na ang ugali ng pagiging matatag, nagsusumikap, at may karangalan ay ipinakikita ni Speaker Romualdez.

Kinilala rin ng mga lider si Speaker Romualdez na mayroong mahabang kasaysayan ng pagseserbisyo sa publiko at nakapaghatid ng kaginhawahan sa buhay ng mga Pilipino at ng pag-unlad sa bulnerableng sektor.

Kinondena rin ng mga lider si Duterte sa kawalang respeto nito hindi lamang kay Speaker Romualdez kundi maging kay Pangulong Marcos, na mayroon ding dugong Waray.

“Her reckless tirades strike at the very heart of a region that has overcome countless challenges through hard work, solidarity and trust in capable leadership,” sabi pa rito.

Kinilala rin ng mga lider ang mga nagawa nina Speaker Romualdez at Pangulong Marcos na nakapagdala ng makahulugang pagbabago sa bansa.

Ang mga naging aksyon umano ni Duterte ay lumagpas sa personal na pag-atake.

Dumipensa ang lahat ng pitong alkalde sa unang distrito ng Leyte para kay Speaker Ferdinand Martin G. Romualdez, at tahasang tinuligsa ang walang basehan at malisyosong akusasyon ni Vice President Sara Duterte.

Sa isang manifesto, inilahad ng mga alkalde ng Palo, Alangalang, San Miguel, Tanauan, Sta. Fe, Tolosa, at Babatngon na ang mga paratang ni Duterte ay hindi lamang pag-atake kay Speaker Romualdez kundi sa buong unang distrito ng Leyte.

“We, the undersigned mayors of the First District of Leyte, stand in staunch defense of Leyte First District Representative and Speaker Ferdinand Martin G. Romualdez, a leader whose integrity and dedication to public service have been consistently proven throughout his exemplary political career,” saad ng manifesto.

Lumagda sa manifesto sina Palo Mayor Remedios Petilla, pangulo ng Leyte Chapter of the League of Municipalities of the Philippines, Mayors Lovell Anne Yu-Castro ng Alangalang, Norman Sabdao ng San Miguel, Gina Merilo ng Tanauan, Amparo Monteza ng Sta. Fe, Erwin Ocana ng Tolosa, at Eleonor Lugnasin ng Babatngon.

Binigyang diin sa manifesto ang mga napagtagumpayan ni Romualdez kasama na ang kanyang liderato sa pagpapasa ng mga mahahalang lehislasyon at epektibong paglalaan ng resources para sa kanyang mga nasasakupan at para sa bayan.

Pinuri din nila ang Speaker sa kanyang pagsusulong sa paglilingkod sa bayan, at kinilala ang kanyang trabaho na kilala sa “diligence, transparency, and unwavering dedication to the greater good of the nation.”

Binatikos din ng mga alkalde ang mga pahayag ni Vice President Duterte laban kay Pangulong Ferdinand “Bongbong” R. Marcos Jr., na anila’y nakakalala lang sa sitwasyon at banta sa pagkakaisa at katatagan ng bansa.

Babala pa ng mga alkalde, “such conduct is unbecoming of an elected leader and is detrimental to the stability and progress of our country.”

Pinayuhan din ng mga alkalde si Vice President Duterte na iwaksi ang pagkakawatak-watak at tuparin na lang ang kanyang atas na isulong ang pagkakaisa at pananagutan.

Mula sa Biliran, ang mga lumagda ay sina Board Member Roselyn Espina Parabos at Mayors Rhodessa Revita (Caibiran), Humphrey Olimba (Culaba), Gemma Adobo (Cabucgayan), Myra Cabrales (Biliran), at Richard Jaguros (Almeria).

Gayundin sina Calubian Mayor Marciano Battancela, Jr. at Villaba Mayor Lito Veloso na mula naman sa Leyte.

Para naman sa Northern Samar lumagda sina Mayors Maria Ana Abalon (San Roque), Leo Jarito (Silvino Lobos), Felipe Sosing (Pambujan), Florence Batula (Palapag), Maria Luisa Menzon, (Lapinig), at Raquel Capoquian (Gamay).

Mula sa Samar, lumagda naman sina Mayors Raymund Uy (Calbayog City), Marinell Apolonio (Sto. Niño), Danny Tan (Tarangnan), Sed Tan (Pagsanghan), Leo De Guia (San Jorge), Amy Cano (Almagro), Aran Boller (Matuginao), Vicente Limpiado (Tagapul-An), Warren Aguilar (Gandara), Felix Ranganoron (Sta. Margarita), Luz Ponferrada (Basey), Myrna Tan (Zumarraga), Red Nacario (Calbiga), Ferdinand Gaviola (San Sebastian), Eunice Babalcon (Paranas), Renato Cabael (Motiong), Philip Astorga (Daram), Julie Cereno (Jiabong), Clarito Rosal (Hinabangan) at Percival Ortillo Jr. (Marabut).

Sinabi rin sa pahayag na ang mga sinabi ni Duterte ay malisyoso at walang basehan at isa umanong direktang pag-atake sa mga Waray na matagal ng haligi ng pagkakaisa at pag-unlad ng bansa.

Hinamon din sa pahayag si Duterte na baguhin ang mga prayoridad nito.

Bilang isang kaalyado ng administrasyon, si Speaker Romualdez ay isang instrumento rin umano sa pagsulong ng legislative agenda ni Pangulong Marcos. Kinilala rin nila ito sa kanyang walang bahid na rekord at pangako sa serbisyo publiko na nagpapakita umano ng pagiging tapat, may pananagutan, at tunay na malasakit sa mga Pilipino.

“Eastern Visayas stands united behind Speaker Ferdinand Martin G. Romualdez and President Ferdinand ‘Bongbong’ Marcos Jr. Their leadership is a source of pride for the Waray people and a symbol of hope for the entire nation.” (Vina de Guzman)

TINULIGSA ni Senior Deputy Speaker Aurelio “Dong” Gonzales Jr. si Vice President Sara Duterte dahil sa umano’y pagbaligtad sa isinasaad sa standard protocols ng Kamara partikular na sa isyu ng paggamit ng phone ng detainees.

“It is infuriating to see the Vice President and her allies twisting facts to suit their narrative. The claim that phones were confiscated is a blatant lie,” ani Gonzales.

Paliwanag ng Pampanga congressman, boluntaryong ibinigay ng nakadetineng Office of the Vice President (OVP) Chief of Staff and Undersecretary Zuleika Lopez at kanyang kasama makaraang matapos ang nakalaang oras ng paggamit, alinsunod sa security protocols.

“These rules are not arbitrary. They are enforced consistently to maintain order and security within the facility. This is not about special treatment or discrimination,” giit ni Gonzales.

Batid aniya ito ni VP Duterte subalit ipinilit umano nito na magpakalat ng disinformation para idiskredito ang institusyon.

Si Lopez ay nakadetine sa Kamara matapos ma-cite in contempt sa pagdinig ng House Committee on Good Government and Public Accountability kaugnay sa misuse ng ₱612.5 milyong confidential funds ng OVP at Department of Education ng nagsisilbi pang Education Secretary si VP Duterte.

Sa isang statement, nilinaw ni House Secretary General Reginald Velasco na hindi totoo ang akusasyon na kinumpiska ang kanilang cellphones.

Niliwanag pa ni Velasco na pinapayagan ang mga detainees ng limitadong paggamit ng phone bilang bahagi ng routine security at sumunod naman si Lopez at kanyang kasamahan na boluntaryong i-surrender ang kanilang phones matapos maimpormahan na tapos na ang oras ng kanilang paggamit.

Ang naturang protocol, ani Velasco ay ipinatutupad sa lahat detainees ng walang exception.

Tinuligsa pa ni Gonzales sa pamumulitika umano ni Duterte sa isyu.

Inakusahan pa niya ang vp ng paggawa ng palabas sa pamamagitan ng paggamit ng sitwasyon upang atakihin ang institution.

“Instead of respecting the rules, she has chosen to politicize the matter, tarnishing the House’s reputation in the process. Let’s call this what it is: a deliberate attempt to smear the institution to protect her own political interests,” pahayag ni Gonzales. (Vina de Guzman)