HINDI dapat pigilan ang paghahanap ng katotohanan ayon kay Pangulong Ferdinand Marcos Jr., kasabay ng pagpapaalala sa mga opisyal ng pamahalaan na maayos na gampanan ang kanilang tungkulin na protektahan ang bansa at ang Saligang Batas.

Ang pahayag na ito ng Pangulo ay kasunod ng matinding bigwas ng mga banta ni Vice President Sara Duterte laban sa kanya, kay Unang Ginang Lisa Araneta-Marcos at House Speaker Martin Romualdez.

“Ang katotohanan ay hindi dapat i-tokhang. Tapos na sana ang usapang ito kung tutuparin lamang ang sinumpaang panata na bilang lingkod-bayan ay magsabi ng totoo, at hindi hahadlangan,” ang sinabi ni Pangulong Marcos, tinukoy ang itinuturing niyang ‘infamous brand’ ng drug war ng nakalipas na administrasyon.

“Kaya hindi tama ang pagpigil sa mga halal ng bayan sa paghahanap ng katotohanan. Hindi na sana hahantong sa ganitong drama kung sasagutin lamang ang mga lehitimong katanungan sa Senado at sa House of Representatives,” ang sinabi ni Pangulong Marcos sa isang video message.

Aniya pa, ang mga personalidad na sangkot dito ay kinakailangan na tugunan ng direkta ang mga usapin upang sa gayon ay malaman ng sambayanang Filipino ang katotohanan.

Sa gitna ng mga hamon na kinakaharap ng bansa, sinabi ng Pangulo na nananatili sjyang naka-pokus sa pamamahala. Ipinangako rin ng Chief Executive na hindi nito iko-kompromiso ang ‘rule of law’ na dapat lamang na ipatupad sa lahat.

“Kaya hindi ko hahayaan magtagumpay ang hangarin ng iba na hatakin ang buong bansa sa burak ng pulitika,” ang sinabi ng Pangulo.

“Igalang natin ang proseso. Tuparin natin ang batas. Alalahanin natin ang mandato na pinagkatiwala sa atin ng milyong-milyon na Pilipino. Magtrabaho po tayo sa ikauunlad ng Republika ng Pilipinas at para matamo ang Bagong Pilipinas.” ang pahayag ni Pangulong Marcos. (Daris Jose)

NAKIISA si Pangulong Ferdinand R. Marcos Jr. sa pagdiriwang sa nag-kampeon na chorale groups na nagdala ng karangalan sa bansa dahil sa kanilang katangi-tanging abilidad sa pag-awit sa international stage.

Sa isang seremonya sa Palasyo ng Malakanyang, pinarangalan ng First Couple na sina Pangulong Marcos at Unang Ginang Liza Marcos ang pitong chorale groups na nangibabaw sa iba’t ibang international competitions at ipinresenta ang musikang Filipino sa buong mundo.

Ang mga singing group ay ang University of the Philippines Manila Chorale, Quezon City Performing Arts Development Foundation Inc. Concert Chorus, Sola Gratia Chorale, University of Mindanao Chorale, Los Cantantes De Manila, IMUSICAPELLA, at University of Santo Tomas Singers.

Ang lahat ng grupo ay ipinagkalooban ng P200,000 bawat isa at certificates of appreciation.

Sa kanyang naging talumpati, isiniwalat ni Pangulong Marcos na ang kanyang kapatid na si Irene Marcos-Araneta, ang nasa likod ng “Gintong Parangal: Honoring the Champion Choirs of 2024.”

Kaya nga, umaasa ang Pangulo na ang seremonya ang siyang magiging tanda ng “beginning of a resurgence of the appreciation of Filipino artists by Filipinos.”

“This is world class, international level and Filipinos do not know about it. And they should because every other Pinoy that will hear about this will be proud once again,” ang sinabi ni Pangulong Marcos.

Aniya pa, ang pagkilala ay hindi lamang ang ipagdiwang ang tagumpay ng mga may ‘talented choirs’ kundi pagkilala at paghanga sa kanilang pasyon o pagkahumaling at disiplina.

“I hope that tonight will be the first step where we recognize the true artists that are amongst us and the artists that have gone out and have been so committed to their art to present it to the rest of the world. And thank God, the rest of the world says it’s very, very good. You win. So congratulations to all of you,” ang litanya ng Pangulo. (Daris Jose)

PINANGUNAHAN ni National Housing Authority (NHA) General Manager Joeben Tai ang groundbreaking ng Navotas Homes 5 Phase 2 nitong Nobyembre 22, 2024.

Matatagpuan sa Barangay Tanza, Navotas, binubuo ang proyekto ng tatlong low-rise buildings na magbibigay tirahan sa 180 na pamilya.

Bawat unit may sukat na 24 sqm. at kumpleto sa mga pangunahing pasilidad. Kasama rin sa itatayo sa lugar ang mga pasilidad katulad ng isang community center, terminal ng traysikel at police station.

Ang proyektong pabahay na ito ay bahagi ng plano ng Navotas na bigyan ng kalidad na tahanan ang natitirang 6,500 informal settler families (ISFs) sa lungsod na naninirahan sa mga mapanganib na lugar tulad ng mga daluyan ng tubig.

Sa kanyang talumpati, binigyang-diin ni Tai ang kahalagahan ng seremonya bilang bahagi ng pangako ni Pangulong Ferdinand Marcos Jr. na magbigay ng maayos na tirahan at pangmatagalang komunidad para sa mga Pilipino.

“Ang okasyon pong ito isang pagpapatunay ng aming parte at suporta para sa ikatatagumpay ng hangarin ng ating Pangulong Ferdinand “Bongbong” R. Marcos, Jr. na mabigyan ang ating mga kababayan ng ligtas na pabahay sa tahimik na komunidad,” sabi ni Tai.

Kasama sa programa sina NHA Assistant General Manager Alvin S. Feliciano at North Sector Regional Manager Jovita G. Panopio.

Dumalo rin sa seremonya sina Department of Human Settlements and Urban Development (DHSUD) Undersecretary Roland Samuel T. Young, Navotas City Lone District Representative Tobias Tiangco, Mayor John Reynald M. Tiangco at Vice Mayor Tito Sanchez.

Sa kabuuan, inaasahang makikinabang ang 1,440 Navoteñong pamilya mula sa kabuuang 24 low-rise buildings na bahagi ng proyekto. (PAUL JOHN REYES)