HINDI pa mababago sa ngayon ang mga terminal assignments sa Ninoy Aquino International Airport (NAIA) ayon sa mga Philippine air carriers.

Sinabi ito ng mga airlines matapos na magkaroon ng announcement ang bagong operator ng NAIA na magkakaroon ng posibleng terminal reassignments pero sa darating pa na panahon.

Ang Cebu Pacific ang nagsabi na ang kanilang flights ay normal pa rin ang operasyon sa NAIA Terminal 3 para sa kanilang 5J domestic at international flights habang ang CebGo DG flights ay patuloy pa rin ang operasyon sa NAIA Terminal 4.

Habang ang Air Asia Philippines naman ay patuloy pa rin ang operasyon ng kanilang international flights sa Terminal 3 at ang kanilang domestic flights ay sa NAIA Terminal 2 naman.

Ayon sa dalawang airlines na tinatangap nila ang New NAIA Infrastructure Corporation (NNIC) bilang bagong operator ng NAIA na nagsimula noong Sept. 14. Umaasa naman sila na magkakaroon ng konsultasyon sa kanila bago mangyari ang sinasabing terminal reassignments.

“We would implement terminal reassignments, but that would have to be done over many years,” wika ni NNIC general manager Lito Alvarez.

Sinabi ni Alvarez na ang lahat ng ito ay plano pa lang at wala pang eksaktong schedule o petsa kung kelan ito ipapatupad. Sa ngayon, ang terminal assignments ay dati at mananatili pa rin.

Ang Terminal 1 ay para sa Philippine Airlines (PAL) international flights at ibang foreign airlines habang ang Terminal 2 ay para naman sa operasyon ng PAL at Air Asia domestic flights. Ang Terminal 3 ay sa international at domestic flights ng Cebu Pacific at international flights ng Air Asia at iba pang foreign airlines. Habang ang Terminal 4 ay sa CebGo flights.

Binibigyan ng advise ang mga pasahero na makigpag-ugnayan sa kanilang airline upang matiyak ang terminal kung saan ang kanilang flights. LASACMAR

LUNGSOD NG MALOLOS – “Ang pamana ng Bulacan ay nagpapaalala na ang isang malakas na bayan ay itinayo sa mga haligi ng kalayaan, katarungan, at soberanya—mga pagpapahalagang dapat nating ipaglaban at ipagpatuloy. Nawa’y magsilbing paalala ang pagdiriwang na ito na, habang ipinagpapatuloy natin ang laban para sa ating soberanya at patuloy naitaguyod ang responsableng pamumuno. Ipagpatuloy natin ang pamana ng Kongreso ng Malolos—isang pamana ng tapang, pagkakaisa, at hindi matitinag na pangako sa kinabukasan ng ating minamahal na bayan.”

Ito ang pahayag ni Gobernador Daniel R. Fernando sa harap ng daan-daang Bulakenyo bilang panauhing pandangal sa Ika-126 Anibersaryo ng Kongreso ng Malolos na ginanap kamakailan sa harap ng makasaysayang bakuran ng Simbahan ng Barasoain sa lungsod na ito.

Sinamahan siya nina Alvin R. Alcasid, kinatawan ni National Historical Commission of the Philippines (NHCP) Chair Regalado Trota Jose, Jr. at PNP Provincial Director PCOL. Satur L. Ediong sa isinagawang pag-aalay ng bulaklak sa harap ng monumento ni Heneral Emilio Aguinaldo, na sinaksihan nina Bise Gob. Alexis C. Castro, Punong Lungsod ng Malolos Christian D. Natividad, Pangalawang Punong Lungsod Miguel Alberto T. Bautista at Reb. Padre Domingo M. Salonga ng Nuestra Senior Del Carmen.

May temang “Kalayaan. Kinabukasan. Kasaysayan”, binigyang-diin din ni Fernando ang kahalagahan ng Kongreso ng Malolos bilang simbolo ng pagiging makabayan, pagkakaisa, at lakas ng mga Pilipino habang inaalala kung paano ginawa ng mga delegado ang Konstitusyon ng Malolos na naglatag ng pundasyon para sa Unang Republika ng Pilipinas at nagmarka ng mahalagang kaganapan sa kasaysayan ng bansa.

Ang Kongreso ng Malolos na opisyal na tinatawag bilang National Assembly at karaniwang kilala bilang Rebolusyonaryong Kongreso, ay nagsilbing lehislatibong katawan ng Rebolusyonaryong Pamahalaan ng Pilipinas, habang ang mga miyembro nito ay nahalal sa pagitan ng Hunyo 23 at Setyembre 10, 1898.

Samantala, ang Rebolusyonaryong Kongreso na naitatag noong Setyembre 15, 1989 sa Simbahan ng Barasoain sa Malolos, Bulacan at ang komemorasyon nito ang hudyat ng pagtatapos ng isang linggong pagdiriwang ng Singkaban Festival 2024.

LUNGSOD NG MALOLOS- Wagi ang bayan ng Pulilan sa Hari at Reyna ng Singkaban sa taong ito sa pagkakapanalo ng kanilang Hari na si Mark Lawrence L. Contreras at Reyna na si Maria Faraseth E. Celso sa parehong titulo sa ginanap na Grand Coronation Night sa The Pavilion, Hiyas ng Bulacan Convention Center noong Biyernes.

Maliban sa pinag-aagawang titulo, nakuha din ni Celso ang Best Formal Wear at Smart Choice Award; habang tinanggap rin ni Contreras ang Best in Formal Wear.

Sa question-and-answer na bahagi ng patimpalak, tinanong si Contreras ni Miss World Philippines 2018 1st Princess Chanel Morales kung sinong Bulakenyong makasaysayang personalidad ang hinahangaan niya, na kanyang sinagot na si Francisco Balagtas.

“Bilang isang Bulakenyo, ako ay isang manunulat at ang isang modelo ko ay si Francisco Balagtas. Nalaman ko kung gaano makapangyarihan ang mga salita kaya’t alam ko na bilang mga Bulakenyo may mga nakatago tayong kwento sa mga suluk-sulok na kung sisipatin ito, sa mga salitang ito, sa mga istoryang mayroon tayo bilang Bulakenyo, sana matuto tayong magpabago at magwasto katulad ni Francisco Balagtas,” anang bagong koronang Hari ng Singkaban.

Samantala, ang isinagot ng nanalong Reyna ng Singkaban, na tinanong ni National Commission for Culture and the Arts Public Affairs and Information Section Head Rene Napenas kung anong aspeto ng kasaysayan at kultura ng Bulacan ang kanyang bibigyang-pansin kung binigyan siya ng oportunidad na manguna sa kampanya ng turismo ng lalawigan, ay ang agri-eco-tourism.

“As we all know, Bulacan is an agricultural province, and today, we are now introducing agri-eco-tourism to our province. And through this, we do not only help our local farmers but we also introduce the rich cultural heritage of Bulacan as a farming community,” ani Celso.

Sa kabilang banda, sinabi ni Gobernador Daniel R. Fernando na ang entablado ng Hari at Reyna ng Singkaban ay daan ng mga kalahok upang ibahagi ang kanilang mga adbokasiya bilang kabataan ng lalawigan.

“Sa gitna ng inyong magagandang ngiti at matitikas na tindig ay makikita ang mga kabataang buong pusong nagsisikap at nagpupunyagi para makamit ang kani-kanilang mga pangarap. Ang tunay na kagandahan at kakisigan ay hindi lamang po makikita sa pisikal na kaanyuan kung hindi higit sa pagkakaroon ng mabuting pusong kumakalinga at nagsusulong sa kapakanan ng kanyang kapwa,” anang gobernador.

Samantala, magkaparehong mga parangal ang natanggap nina Hari at Reyna ng Bocaue Ronald Ervin DC. Arciaga at Amalia E. Aronikabilang ang Hari at Reyna ng Turismo, Best in Kasuotang Filipino, at Best in Swimwear.

Gayundin, iniuwi ni Hari ng Marilao Randanniell M. Marilag ang mga parangal na Hari ng Sining at Kultura, Mr. Talent, at Mr. Sunnyware; nakuha ni Reyna ng Balagtas Kristeen Mia SJ. Lucero ang Reyna ng Sining at Kultura; napanalunan ni Hari ng Calumpit Jonas S. Carillo ang Hari ng Kasaysayan at Mr. Photogenic award; at tinanggap ni Reyna ng Santa Maria Leslie Jane C. Domingo ang Reyna ng Kasaysayan at Ms. Talent award.

Kabilang sa iba pang nagwagi mula sa mga kalalakihang kandidato sina Hari ng Santa Maria John David V. Almadin bilang 1st runner up; Hari ng Pandi Nathaniel E. Dela Cruz bilang 2nd runner up; Hari ng Obando Ernesto E. Andaya III para sa Best Tourism Video atKatrionn’s Choice Award; Hari ng San Miguel Julius Y. Dela Cruz para sa Smart Choice Award at Photographer’s Choice Award; Hari ng Baliwag Jonard S. Sandoval para sa Leticia’s Choice Award; at pasok sa Top 10 ng kumpetisyon sina Hari ng Meycauayan Marc Anthony Balitaan at Hari ng Malolos Emmanuel T. Aguilera.

Samantala, ang iba pang nagwagi sa mga kababaihan ay sina Reyna ng San Rafael Janella Marie C. Ventura bilang 1st runner up at Ms. Sunnyware award; Reyna ng Paombong Bianca Mae B. Bautista bilang 2nd runner up, Best Tourism Video, at Ms. Photogenic; Reyna ng San Miguel Djanelle Irish DG. Villanueva para sa Photographer’s Choice Award; Reyna ng Pandi Chezka Monique B. Abique para saKatrionn’s Choice Award; Reyna ng Plaridel Aira Faith B. Manumbas para sa Leticia’s Choice Award; at pumasok sa Top 10 ng patimpalak sina Reyna ng Obando Pamela Amor SJ. Enriquez, Reyna ng Baliwag Christine Gayle P. Dabu, Reyna ng Calumpit Almia Genanda, at Reyna ng Malolos Heart Gwyneth C. Ocampo.

INUMPISAHAN na nitong Lunes sa plenaryo ng Kamara ang pagtalakay sa P6.352 trilyong national budget para sa 2025.

Ayon kay Speaker Ferdinand Martin Romualdez na ang pondo ay sumusuporta sa Agenda for Prosperity at Bagong Pilipinas programs ni Pangulong Ferdinand Marcos Jr.

Pinasalamatan ni Romualdez sina House Committee on Appropriations Chairman at Ako Bicol Party-list Rep. Zaldy Co at Senior Vice Chairperson at Marikina City Rep. Stella Quimbo sa pagtapos ng panukalang badyet sa itinakdang oras.

Matapos ang sponsorship speech ni Co, sisimulan na ang debate sa general principles at panukalang badyet ng Department of Finance, DOJ at NEDA, kasama ang attached agency at lumpsum na badyet ng mga ito.

Ilan sa mga ahensiyang mahigpit na binabantayan ang pondo ay Comelec, DAR, DFA, DTI, at ilan pang executive offices at state colleges and universities ang sasalang. Gayundin ang Department of National Defense, Department of Migrant Workers, DENR, at kanilang mga attached agencies, at budgetary support sa mga government corporations.

Ang panukala na bawasan ang badyet ng Office of the Vice President (OVP) ay sasalang sa Setyembre 23.

Target ng Kamara na maaprubahan ang ­General Appropriations Bill bago ang adjournment sa Setyembre 25.