- October 20, 2025 WordPress timezone: Asia/Manila
Current date: October 20, 2025
Current time: October 20, 2025 3:42 PM Ang Diyaryong Pinagkakatiwalaan
Archive for September 30th, 2024
Alice Guo ‘spy’ ng China, iimbestigahan ng DILG-PNP
INIIMBESTIGAHAN na ng Department of Interior and Local Government (DILG) ang lumutang na alegasyon na isang espiya ng China ang nadismis na si dating Bamban, Tarlac mayor Alice Guo.
“Definitely DILG-PNP [Department of the Interior and Local Government-Philippine National Police] should investigate these allegations,” pahayag ni DILG Secretary Benhur Abalos.
Lumutang sa pagdinig ng Quad Committee ng Kamara nitong Biyernes ng gabi ang isang documentary video ng Al Jazeera kung saan inamin ni She Zhiijiang, isang self-confessed Chinese spy na siya at si Guo ay mga espiya na handang ialay ang buhay sa China’s Ministry of State Security (MSS).
Ayon kay Abalos, aatasan niya si PNP Chief P/Rommel Francisco Marbil para siyasatin ang seryosong alegasyon ng detenidong Chinese spy na magkasama sila ni Guo sa misyon.
Una nang pinagdudahan ang nagkalat at sangkaterbang bilang ng mga Chinese nationals na dumagsa sa bansa, karamihan dito ay mga estudyante umano at mga negosyante na nagkalat sa buong Pilipinas partikular na malapit sa EDCA (Enhanced Defense Cooperation Agreement) sa Cagayan.
“It’s unfair, hindi ako spy,” tugon naman ni Guo kay Davao del Norte Rep. Cheeno Almario nang tanungin ito kung totoo ang isiniwalat ni She na kasamahan niyang espiya ng MSS si Guo.
Ang MSS ay responsable sa pange-espiya ng China sa ibang bansa, counter-intelligence, seguridad sa pulitika na ikinokonsiderang isa sa makapangyarihan at masikretong security agency sa buong mundo.
Sa nasabing video ay sinabi ni She na si Guo ay si Guo Hua Ping na Chinese name ng nasabing nadismis na alkalde, na hindi aniya dapat pagkatiwalaan at hinikayat itong sabihin na sa buong mundo ang katotohanan dahilan bistado na ito.
Idinagdag pa ni She na humingi umano si Guo na pondohan niya ang mayoralty campaign nito sa bansa noong Mayo 2022 polls pero tinanggihan niya.
Bagaman nabulaga si Guo sa nasabing video ay mariin niyang itinanggi na kilala niya si She at sinabing nais niyang maghain ng kaso laban dito pero sinabi ng solon na nakakulong na ang nasabing Chinese spy sa Thailand. (Daris Jose)
3K POGO workers na-downgrade visa, nakaalis na ng Pinas
NASA 55 porsyento na o 3,000 mula sa 5,995 dayuhang manggagawa ng Philippine Offshore Gaming Operators (POGOs) na may downgraded visas ang nakaalis na ng bansa, ayon sa Bureau of Immigration nitong Sabado.
Nabatid na iniulat ni BI Officer-in-Charge Commissioner Joel Anthony Viado sa pulong ng “Task Force POGO Closure” na noong Setyembre 24 ay nag-downgrade sila ng 5,955 visa.
Ang task force ay binubuo ng Department of Justice (DOJ), Department of Labor and Employment (DOLE), Philippine Amusement and Gaming Corporation, Presidential Anti-Organized Crime Commission at BI.
Dumalo rin ang mga kinatawan ng Philippine National Police at National Bureau of Investigation.
“During the meeting, members agreed to conduct service days for POGO companies, where we will implement their downgraded visa status and issue exit clearances,” ani Viado.
Sinabi ni Viado na nabuo ang mga team para personal na pumunta sa mga POGO, na kilala ngayon bilang Internet Gaming Licensees (IGLs), at ipatupad ang downgrading on-the-spot.
Dagdag pa niya, sasamahan din sila ng mga kinatawan ng DOLE sa mga araw ng serbisyo para tumanggap ng mga sumukong alien employment permit ng mga POGO workers.
Aniya, ang pagsisikap ay bahagi ng aksyon na ginawa ng iba’t ibang ahensya ng gobyerno upang mapabilis ang aplikasyon ng mga POGO o IGL para sa mga dayuhang manggagawa nito na makalabas ng bansa.
Nauna nang binigyan ng DOJ ang lahat ng dayuhang manggagawa ng POGO hanggang Oktubre 15 para boluntaryong mag-downgrade.
Ang mga hindi makapag-apply bago ang deadline ay uutusang umalis ng bansa sa loob ng 59 araw.
Kung hindi sila aalis bago ang Disyembre 31, sisimulan ng BI ang mga paglilitis sa deportasyon.
Sinabi ni Viado na sa darating sa 2025, kung kailan ang mga tumangging umalis ay huhulihin, ide-deport at i-blacklist mula sa Pilipinas.