INAASAHANG maaantala pa ang extradition o pagbabalik sa Pilipinas kay dating Negros Oriental representative Arnolfo Teves, Jr.

Ipinaliwanag ng Department of Justice (DOJ) na kinakailangan pa kasing dumaang muli sa panibagong proceedings ang extradition case ni Teves sa Timor Leste bilang resulta ng procedural objections na isinagawa ng mga abogado nito.

Ayon naman kay DOJ Assistant Secretary Mico Clavano, sa nasabing panibagong pagdinig, ang mga parehong ebidensiya laban kay Teves ay ipiprisinta muli, ngunit sa pagkakataong ito ay sa harap naman ng tatlong hukom.

Sa kabila nito, kumpiyansa ang DOJ na pareho rin ang magiging resulta ng panibagong proceedings at sa lalong panahon ay mapapauwi sa Pilipinas ang pinatalsik na mambabatas upang harapin ang inihaing multiple murder charges laban sa kanya.

Si Teves ang itinuturong utak sa pagpatay kay da­ting Negros Oriental governor Roel Degamo sa loob mismo ng kanyang tahanan, na ikinasawi rin ng siyam katao pa.

Sa kanyang panig, tiniyak naman ni DOJ Secretary Jesus Crispin Remulla na anumang taktika ang gamitin ni Teves ay hindi nito mahahadlangan ang kanilang determinasyon na maibalik siya sa Pilipinas upang panagutan ang mga kinakaharap na kaso. (Daris Jose)

IPINANUKALA ni Bicol Saro Partylist Rep. Brian Raymund Yamsuan ang pagbibigay ng Christmas bonuses at iba pang insentibo sa mga barangay tanods.

Ito ay bilang pagkilala sa ibinibigay na serbisyo para sa pagmementina ng peace and order sa komunidad.

Sa House Bill (HB) 10909, kabilang sa benepisyo na ilalaan sa mga barangay tanods ay ang libreng legal assistance at insurance coverage.

Gayundin, ang pagsama sa kanila sa livelihood programs ng national government o local government units (LGUs).

“Maraming barangay tanod ay nalalagay sa panganib ang buhay at minsan pa nga ay napapatay dahil sa pagtupad ng kanilang mga tungkulin. Sa kabila nito, tila ba napabayaan na ang kanilang kapakanan sa ilalim ng ating mga kasalukuyang batas kung saan kakarampot ang kanilang mga benepisyo. Layunin nating mai-upgrade ang kanilang benefits para naman may sapat silang proteksyon laban sa mga posibleng panganib na maari nilang makaharap,” ani Yamsuan.

Sa ilalim ng HB 10909, ang bawat kuwalipikadong tanod ay entitled sa Christmas bonus na katumbas sa kalahati sa tinatanggap ng punong barangay.

Poprotektahan din ng HB 10909 tenure ng barangay tanod kung saan kapag na-appoint ay hindi basta matatanggal serbisyo maliban sa mga dahilan na nakapaloob sa barangay resolution na nagbuo sa barangay tanod brigade.

Sa ilalim ng panukala, ang desisyon sa pagtanggal sa barangay tanod ay depende sa desisyon ng sangguniang barangay. (Vina de Guzman)

ALINSUNOD sa direktiba ni Pangulong Ferdinand Marcos Jr., itinulak ni Speaker Ferdinand Martin Romualdez at ng Tingog Partylist ang agarang pagpapalabas ng P20 milyong halaga ng cash assistance para sa may 2,000 pamilyang nasunugan sa Barangay 105 Aroma sa Tondo, Manila noong Sabado.

Ang tig-P10,000 tulong sa bawat pamilyang nasunugan ay kukunin sa Ayuda sa Kapos ang Kita Program (AKAP) ng Department of Social Welfare and Development (DSWD).

Bukod sa cash assistance, nakipagtulungan din ang tanggapan ni Romualdez sa Tingog Partylist na pinangungunahan nina Reps. Yedda Romualdez at Jude Acidre para sa pamimigay ng mainit na pagkain sa mga biktima noong Linggo.

Ayon kay House Deputy Secretary General Sofonias Gabonada Jr., sa pakikipagtulungan sa tanggapan ni Manila Rep. Ernesto Dionisio Jr. ay nakapamigay ng 4,500 bowl ng lugaw at arroz caldo sa General Vicente Lim Elementary School evacuation center, Barangay 105 at Barangay 106 covered courts.

Nagpasalamat naman si Dionisio kina Pangulong Marcos, Speaker Romualdez at DSWD Secretary Gatchalian sa mabilis na pagtugon sa pangangailangan ng mga nasunugan.

Umaasa si Gabonada na mabilis na makababangon ang mga biktima ng sunog. (Vina de Guzman)

DUMATING sa unang pagdinig kahapon ng House Committee on Good Government and Public Accountability sa naging paggamit ng pondo ng opisina ni Vice President Sara Duterte.

Bukod sa Office of the Vice President (OVP), iniimbestigahan din ng komite kung papaano ginamit ng Department of Education ang pondo nito nang kalihim pa ng departamento si Duterte.

Tumanggi naman si Duterte na manumpa, na nagsabing ang imbitasyong liham na ipinadala sa kanyang opisina ng komite ay imbitado ito bilang isang resource person.

Kasama aniya sa sulat na ipinadala ay kopya ng rules in aid of legislation kung saan nakalagay umano doon na witnesses lang ang ino-oath.

Sa kanyang pahayag, sinabi ni Duterte na ang pagdinig ay hindi isang ordinaryong imbestigasyon kundi isang nagkakaisa at political attack.

Sinabi pa nito na ito ang dahilan kung bakit mas pinili niyang huwag idepensa ang 2025 budget ng OVP at ipinauubaya na niya sa liderato ng kamara ang kapasiyahan ukol sa pondo ng OVP sa darating na taon.

Iginiit pa nito na walang naganap na misuse of funds at kung may audit findings, ay handa silang sagutin ito sa Commission on Audit gayundin sa kaukulang korte. (Vina de Guzman)

NASABAT ng mga ahente ng Bureau of Immigration (BI) ang tatlong Chinese national na sangkot sa pagnanakaw sa kanilang biyahe sa Manila.

Kinilala ni BI Officer-in-Charge Joel Anthony Viado ang tatlo na sina Lyu Shuiming, 48; Xu Xianpu, 41; and Xie Xiaoyong, 54 matapos silang i- report ng mga opisyal ng BI sa Ninoy Aquino International Airport (NAIA) Terminal 3 matapos na magnakaw ng handbag sa isang flight sa Philippine Airlines mula Kuala Lumpur.

Si Lyu at mga kasama nito ay naaktuhan ng isang flight attendant habang ninanakaw ang handbag ng isang babaeng judge na may kasamang abogado na may laman na P63,000 .

Kinuha umano ng suspect ang bag sa overhead storage bin habang hinahalughog nito.

Ang tatlo ay bumiyahe ng Pilipinas mula Malaysia patungong Hongkong.

Si Lyu ay may visa na pumasok ng Pilipinas. Agad namang inaresto ng mga miyembro ng Philippine National Police (PNP) Aviation Security Group (AVSEGROUP) habang sina Xu at Xie ay isinakay pabalik at silang tatlo ay isinama sa listahan ng blacklist.

“ We will not allow these kinds of foreigners to victimize our kababayan,” ayon kay Viado. “The BI will continue to monitor the progress of this case, and blacklist any other members that might be found,” dagdag pa niya . GENE ADSUARA

MAHIGIT 600,000 deactivated voters ang nag-apply para sa reactivation para sa 2025 national at local elections (NLE), ayon sa Commission on Elections (Comelec) nitong Miyerkules.

Sinabi ni Comelec Spokesperson John Rex Laudiangco na mula sa 6.4 million applications na natanggap ng komisyon, ang 3.3 milyon nito ang nadagdag na mga bagong botante kung saan 2.6 milyon ang bagong botante at mahigit na 600,000 ang nagpapa-reactivate.

Ayon kay Laudiangco, inaasahan na sa dalawang linggo na nalalabi para sa registration ay mas dadami pa ang mag-apply bilang bagong rehistradong botante at lalong-lalo na ‘yung mga na-deactivate.

Ang deadline para sa online na aplikasyon para sa muling pagsasaaktibo ay pinalawig mula Setyembre 7 hanggang Setyembre 25, 2024.

Ang proseso sa pag-reactivate ay pareho ng iba’t ibang klase ng application. Ang kanilang application ay ipapaskil sa iba’t ibang bahagi ng lungsod, o bayan,” said Laudiangco.

Ang pinakahuling data mula sa poll body ay nagpakita na ang bilang ng mga na-deactivate na botante para sa 2025 May elections ay nasa 5,376,630 noong Setyembre 11.

Ang mga dahilan para sa pag-delist ay ang hindi pagboto sa dalawang magkasunod na naunang regular na halalan, sa pamamagitan ng utos ng hukuman, pagkawala ng pagkamamamayang Pilipino, at pagkakaroon ng mga di-wastong dokumento.

Samantala, inulit ni Laudiangco ang panawagan ng poll body para sa mga deactivated voters na mag-apply para sa reactivation. Maaari silang mag-apply online hangga’t mayroon silang kumpletong biometrics sa lokal na tanggapan ng Comelec kung saan sila nagparehistro. GENE ADSUARA