WALONG tinitingala at itinuturing nang haligi ng entertainment industry ang gagawaran ng espesyal na pagkilala sa gaganaping 6th Entertainment Editors’ Choice o The EDDYS ngayong 2023.

Bibigyang-pugay ng Society of Philippine Entertainment Editors (SPEEd) sa ika-anim na edisyon ng The EDDYS ang hindi matatawarang kontribusyon ng mga napiling Icon awardees sa industriya ng pelikulang Filipino.

Ang mga EDDYS Icon honorees ngayong taon ay sina Aga Muhlach, Richard Gomez, Gabby Concepcion at Niño Muhlach. Kasama rin sa mga parar

angalan bilang EDDYS Icons sa The 6th EDDYS sina Snooky Serna, Jaclyn Jose, Barbara Perez at Nova Villa.
Samantala, kabilang sa mga bibigyan ng Isah V. Red Award sina Herbert Bautista, Rosa Rosal, Coco Martin at Piolo Pascual para sa walang sawa nilang pagtulong at pagbibigay ng inspirasyon sa mga kababayan nating nangangailangan.

Igagawad naman sa The 6th EDDYS ang Joe Quirino Award sa veteran entertainment columnist, dating TV host at content creator na rin ngayon na si Aster Amoyo. Ang beteranong manunulat naman at dati ring entertainment editor na si Ed de Leon ang tatanggap ng Manny Pichel Award.

Samantala, ang napiling Producer of the Year naman ay ang Viva Films habang ang Rising Producer of the Year naman ay igagawad sa MavX Productions. Kamakailan ay inihayag na ng SPEEd ang magaganap na 6th Entertainment Editors’ Choice sa darating na Oktubre, 22, 2023 sa EVM Convention Center, 37 Central Avenue, Quezon City, mula sa direksyon ng award-winning actor at filmmaker na si Eric Quizon.

Ihahatid ng Airtime Marketing Philippines na pag-aari ng event producer na si Tessie Celestino-Howard ang ikaanim na edisyon ng The EDDYS. Magkakaroon din ito ng delayed telecast sa NET 25 na pinamumunuan ng Presidente nitong si Caesar Vallejos, sa Oct 28, 2023.

Ang annual event na ito na mula sa samahan ng mga entertainment editors sa Pilipinas ay nagbibigay ng pagkilala at pagpapahalaga sa mga pelikula at personalidad na itinuturing na “best of the best” sa Philippine Cinema.

Mamimigay ng 14 acting at technical awards ang SPEEd para sa The 6th EDDYS na pipiliin mula sa mga nominadong pelikula na ipinalabas sa mga sinehan at ilang digital platforms noong 2022.

Ang SPEEd ay binubuo ng mga current at former entertainment editors ng mga leading newspaper at online site sa Pilipinas, sa pangunguna ng presidente nitong si Eugene Asis ng “People’s Journal”.

(ROHN ROMULO)

IBANG klase rin ang pagtingin ng mga Kapuso sa New Generation Movie Queen na si Bea Alonzo.

Talagang todo max ang pagpuri kay Bea ng kanyang mga co-stars sa bagong GMA Primetime series na “Love Before Sunrise.”

Si Andrea Torres ay nagmistulang fan na fan ni Bea na aminadong nang malaman na Kapuso na ang actress, talagang winish na makasama niya.

At si Dennis Trillo na leading man ni Bea at masasabing kasabayan niya noon ay nai-starstruck pa raw rito.

At sabi pa niya, “Parang sobrang magical para sa akin. Biruin mo, halos nagsimula kami ni Bea noon sa ABS-CBN.

Sabay kaming nagwo-workshop. Sabay kaming nagkaroon ng unang dance production sa TV.

“Sabay kaming ni-launch, sabay kaming nagre-rehearsal. Tapos ‘eto, after 20 years, gagawa naman kami ng isang napakagandang proyekto.”

Ang kay Dennis, talagang humahanga raw siya kay Bea dahil sa layo na nang narating nito pagdating sa career.

Sey pa niya, “Feeling ko, sobrang blessed ko and proud. Hindi naman kahit sino, nakakatrabaho ang isang Bea Alonzo.
“Masuwerte ko na nakakasama ko ngayon ang mahuhusay na artista rito at siyempre, si Bea.”

Sa Lunes, September 25 na ang pilot ng “Love Before Sunrise” na papalit sa magtatapos na “Royal Blood.” Napanood na namin ang pilot episode at feel namin na magugustuhan at mae-enjoy ito ng mga Kapuso viewers.

Malakas din ang dating ng Korean touch ng serye.

***

ANG haba ng caption ni Chito Miranda bilang depensa sa mga natanggap na negative at pangngunguwestiyon talaga ng mga netizens sa ginawang weekly meal plan ni Neri Naig.

Kung pagbabasehan talaga ang mga comments sa post ni Neri, halos lahat ay walang sumang-ayon dito at sinabihan nga na para lang daw ba mapanindigan ang title niya na “Wais na Misis.”

Dinilete na raw ni Neri ang post nito.

Nilahad ni Chito ang hindi nasabi ni Neri sa post niya. Tulad ng most of the sahog na gulay ay galing pala sa farm nila. At kung pang-ilang tao rin. Marami kasi na hindi talaga malinaw na nilahad ni Neri, though personally, parang imposible pa rin talaga na ma-achieve sa halagang isang libo lang sa ngayon.

Bahagi ng post ni Chito, “Grabe di ba? Naisip lang naman ng asawa ko na baka sakaling makatulong yung meal plan nya sa mga tao that might find it useful, na-bash pa siya ng mga taong hindi naman nakasubaybay kung bakit ginawa niya yung meal plan.

“What a cruel, cruel world.

“Anyway, for those who knew what Neri was doing, ayusin n’ya lang daw muna yung details para mas maging helpful yung guide niya.

“For those who got angry and threw stones without knowing the details of what she was doing, good job sa inyo.”
Sa isang banda, dapat maintindihan din siguro ni Chito kung bakit majority ay negatibo talaga ang naging reaksiyon sa post ni Neri.

May dahilan din naman.

(ROSE GARCIA)

KAHIT matagal silang nagkasama sa Maria Clara At Ibarra ay may mga nadiskubre pa rin si Barbie Forteza kay David Licauco sa muli nilang pagsasama sa ‘Maging Sino Ka Man’ na umeereng teleserye ngayon ng GMA.

“Ako, na-discover ko kay David na ngayon ko lang din na-realize, ever since pala kasi na magkatrabaho kami, never siyang nag-tsinelas!

“So, dito sa Maging Sino Ka Man, since lagi siyang naka-tsinelas, nun ko lang nakita yung mga paa niya, ang cute pala ng daliri niya sa paa,” at tumawa si Barbie, “malinis, tsaka neat, yun.”

Sinabi ni ER Ejercito, na co-star sa serye, na si Barbie ang next Nora Aunor o Vilma Santos, at ang loveteam raw nila ni David ay maihahalintulad sa tambalan noon nina Nora at Tirso Cruz III na Guy and Pip?

“Grabe naman po yun, Gov,” ang unang reaksyon ni Barbie sa sinabi ng dating Gobernador ng Laguna.

“Paano ko ba sasagutin ‘to? Naku po, dalawa po yun sa pinaka-iniidolo ko po sa industriya natin, so siguro po nagpapasalamat na lang po ako dahil sa isang very iconic actor like Gov na mapansin po yung trabaho ko is such a fulfilling moment for me, enough na po yun, masyadong na pong mataas ang Ms. Nora at Ms. Vilma.

“I’m just happy na some of our respected actors today ay napapansin ang trabaho natin, yun na lang po, maraming salamat po.”

***

SA mga hindi nakakaalam, bukod sa pagiging aktres sa telebisyon, pelikula at teatro ay isang drama teacher si Pinky Amador.

“At this point in my career where I need to be giving back, that’s where you find the satisfaction. “That happened when I started teaching. I became head of the drama department of Mint College [2011 -2015].”

Lumipat si Pinky sa Thames International kung saan kumuha siya ng kursong Innovative and Creative Enterprise at nagturo ng Basic Acting and Performance Arts.

“In the pandemic, all our income dropped, if not vanished, teaching buoyed me up.

“I was able to form my own start-up [Amador Creative Concepts]. I give workshops to groups, individuals, organizational workshops. I am teaching basic acting and performance arts.

“We are a mission-based cultural, educational workshops to companies, organizations and individuals.”

May speaking engagement si Pinky, sa ilalim ng kanyang Amador Creative Concepts, bilang resource person at lecturer sa Likha Creative Summit sa September 21 sa Crowne Plaza Hotel.

Nagtuturo rin siya ng Theater Acting matapos kumpletuhin ang kanyang Master’s Degree in Theater sa United Kingdom sa pamamagitan ng isang scholarship mula sa British Council.

Nag-aral rin siya sa Bristol Old Vic Theater School na affiliated sa University of West England.

Ang namamahala ng showbiz career ni Pinky ay si Arnold Vegafria ng ALV Talent Circuit.

Si Pinky ay sikat na kontrabidang si Moira sa ‘Abot Kamay Na Pangarap’.

(ROMMEL L. GONZALES)

ANG mahusay na singer-songwriter na kilala sa kanyang heartfelt lyrics ang napiling first brand ambassador ng Maria Clara Sangria – ang leading sangria brand sa Pilipinas.

Ini-launch din ang non-alcoholic version na Maria Clara Virgin Sangria, na masarap pang-chill-chill lang at hindi nakalalasing.

Lumikha rin si Moira ng anthem na “Maria Clara,” isang full-length song bagong jingle ng brand.

Sa pamamagitan ng kanyang malumanay na tinig, maikakalat ang positibong mensahe ng self-love, ano man ang sitwasyon.

Sinasabi ng “Maria Clara” sa lahat na kung minsan, okay lang na hindi maging okay, ngunit hindi kailangang magmadali at siguradong lahat ay magiging maayos.

Sa launching na naganap noong Huwebes, Sept. 14, inamin ni Moira na mabilis siyang malasing, dahil hindi naman siya pala-inom. Sa katunayan, naka-tatlong baso lang ng Maria Clara Sangria, dahil wala pa ang ini-endorse nila na ‘virgin’ variant, ay tipsy na siya at “nag-i-speech” na, ayon ito sa mismo sa ka-bandmates.

May nakatutuwa siyang ibinahagi nang minsan malasing siya sa ibang bansa. Nangyari daw ito four years ago, nang mag-‘ASAP’ sila sa Rome, Italy at nagkayayaan silang mag-inuman ng kaibigan na si KZ Tandingan.

“Sabi ko kay KZ, ‘Ako bahala sa ‘yo, aalagaan kita, inom tayo.’ Ang ending po, siya ang nag-alaga sa akin,” pagbabahagi ni Moira sa kanyang karanasan.

“Tapos po, hinila kami nina Kuya Zanjoe (Marudo), ng KathNiel, ni Ate Dimples (Romana), ni Ms. Jodi Sta. Maria, naglakad po kami sa outskirts ng Rome after ng show,” dagdag kuwento pa niya.

“Kaladkarin lang po kami ni KZ. Tapos, nakahanap po kami ng resto, umorder po kami. Ang mahal pa po ng inorder namin ni KZ. Umorder kami ng t-bone steak at pasta, tapos nu’ng dumating ‘yung bill, nagtinginan kami. ‘Wala tayong dalang pera.’

“So, hindi po kami nagbayad, si Kuya Zanjoe po ang nagbayad.”

Samantala, humanized na ang leading brand sa pamamagitan ng “Maria Clara.” Dito makikita na isang steady companion ang produkto at isa rin itong mabuting kaibigan sa panahon ng pangangailangan. Ayon sa songwriter,
“It’s basically a friend for all seasons. And so, ‘Maria Clara’ is a reminder of where you’ve been and where you’re going and who you are as a woman.”

Dagdag pa ni Moira na nais niyang mag-focus sa epekto ng Maria Clara sa buhay ng mga tao, “It’s been a friend. It’s helped ease loneliness, it has helped people cope, It has helped people celebrate.”

At ngayon, maaari nang i-enjoy ang mga milestones ng buhay ng walang alcohol kasama ang with Maria Clara Virgin, na akma sa mensahe ni Moira na maging totoo sa ating mga sarili.

Pakinggan at mag-enjoy sa lyrics at melody ng “Maria Clara,” na sinulat ni Moira, habang or umiinom ng Maria Clara Sangria o Maria Clara Virgin.

Mapapakinggan ang “Maria Clara” ni Moira Dela Torre sa Spotify.

Mabibili ang Maria Clara Sangria at Maria Clara Virgin sa lahat ng major retail outlets.

Para sa karagdagang impormasyon sa Maria Clara Sangria at Maria Clara Virgin Sangria at para sa kapana-panabik na news updates kay Moira Dela Torre, sundan ang Maria Clara Sangria on Facebook, Instagram and TikTok sa @mariaclarasangria.ph.

(ROHN ROMULO)