“TROPANG Magaling” pala ang tawag ni Mr. M (Johnny Manahan), starmaker and director ng “The Voice Generations” sa mga coaches na sina Chito Miranda, Billy Crawford, Julie Anne San Jose, at si Stell Ajero ng SB 19. 

Inamin ni Mr. M. na nakatrabaho na niya sina Chito, Billy at Julie Anne, pero ang nasorpresa at nabulabog daw siya ay kay Stell, na ayon sa kanya ay isang revelation.

“Speechless ako, kaya niya ang ginagawa niya, he has the makings of a star. Impressed ako by his presence at napaka-professional niya.  Presence pa lamang niya, talbog na ako, eh.

“Wala akong masabi at maipintas sa kanya.  Kapag kumanta na siya, saka the way he moves, isa na siyang star.  Kaya niyang makipagsabayan kahit kanino.  Noong una, ang worry ako kung magiging confident siyang makipag-banter sa mga experienced coaches na, pero hindi, he’s quick witted, bago mo mapansin, nauuna pa siyang makipag-usap sa mga contestants.”

Nakita raw naman ni Mr. M. ang full support nina Chito, Billy at Julie Anne kay Stell, kaya nga niya tinawag niya sila na “Tropang Magaling.”

“Hindi sila nagpapataasan sa isa’t-isa, tulungan sila, na madalas ay nauuwi sa tawanan, kapag nakapili na ang mga contestants ng gusto nilang mag-coach sa kanila.”

Hindi na bago kay Mr. M ang “The Voice Generations” dahil naidirek na niya ang “The Voice” noong nasa ABS CBN pa siya, kaya happy siya na ngayon, he has a different set of judges.

Napapanood ang show na hino-host ni Kapuso Primetime King Dingdong Dantes, every Sunday, 7:00 p.m. sa GMA-7.

                                                            ***

NGAYONG may second project na sina Barbie Forteza at David Licauco, ang “Maging Sino Ka Man,” hindi maiwasan na may mga fans sila na medyo hindi tanggap kapag napag-uusapan ang tungkol kina Barbie at sa boyfriend nitong si Jak Roberto.

Lalo na kung nagpu-promote sila ng serye at nababanggit si Jak, may nagri-react na dapat daw ay tungkol lamang kina Barbie at David ang pag-uusapan.

Sa totoo lang naman, open naman si Jak sa pagsasabing wala siyang selos tungkol kina Barbie at David, kaya naman si Barbie ay walang ipinag-aalaala dahil wala naman daw siyang nakikitang dahilan para mag-explain siya kay Jak tungkol sa sitwasyon.

Dagdag pa ni Barbie suportahan lamang sila ni Jak, dahil tulad ngayon, may serye ring lumalabas si Jak, daily, ang “The Missing Husband” with Yasmien Kurdi at Rocco Nacino sa GMA Afternoon Prime.

Sa Monday, September 11, 8:00 p.m. na ang world premiere ng “Maging Sino Ka Man” sa GMA-7. Sa direksyon ni Enzo Williams, ang special limited series ay mapanonood lamang for eight weeks, after “24 Oras.”

                                                            ***

SA kabila ng pagiging busy ni Jillian Ward sa taping niya ng top-rating series na “Abot-Kamay na Pangarap,” may time pa siya para mag-guest sa primetime series na “Royal Blood” na pinangungunahan ni Dingdong Dantes.

Hindi pa niri-reveal kung ano ang role na gagampanan ng “Star of the New Gen” ng GMA Network, pero may kinalaman din kaya ito sa role niya bilang si Dr. Analyn Tanyag sa afternoon prime?

Malapit na ring magtapos ang “Royal Blood” na napanonood gabi-gabi at 8:50 p.m.

(NORA V. CALDERON)

ANG larong Bingo na paborito ng mga Pilipino ay may bagong bihis na nagdadala ng susunod na antas ng paglalaro sa Philippine TV.

Sa pamamagitan ng international format, kasama ang first-time game show host na si John Arcilla, ipakikilala ng TV5 ang SPINGO, isang game show na maghahandog ng interactive na karanasan para sa mga manonood simula ngayong Setyembre 11.

Pangungunahan ito ng kinikilalang aktor, ang bagong hirang na Heneral ng Papremyo at si Spingorgeous Girl Sam Coloso bilang kanyang co-host, bibigyan ng SPINGO ang mga Pilipino ng kakaibang karanasan sa game show.

Ayon kay John, sobrang saya niya at nagpapasalamat na napiling mag-host ng bagong game show na sisimulan nga ng TV5, na hopefully na magkaroon ng franchise soon sa mga karatig-bansa sa Asya.

Kahit na malaking challenge ito at natutuwa nga ang premyadong aktor dahil nailalabas niya ang tunay niya na katauhan na hindi na niya kailangang umarte, na tulad ng ginagawa niya sa pelikula at teleserye.

Natural daw kasi kay John ang magiging masiyahin, at hilig din sa pagpapatawa, na magagamit niya sa pagho-host. Bukod pa rito, ang husay niya sa pag-awit na posible ring lumabas nang pasundot-sundot habang nagho-host ng nakaka-excite na SPINGO.

At base nga sa nasaksihan namin, parang minamani lang ito ni John dahil swak na swak siya na host ng game show. Hindi rin siya nangangamba na magkaroon ng pagkakamali habang nagti-taping ng bagong show, na gusto nga niyang i-share sa manonood, kung may pagkakataon.

Kaya mukhang nakahanap na ang TV5 ng bagong pangtapat bilang game show host. Kung may Luis Manzano ang Kapamilya channel at Dingdong Dantes ang Kapuso Network, hindi naman magpapahuli ang isang John Arcilla.

Kaya dapat abangan at tutukan ng manonood, kung paano niya itatawid ng SPINGO araw-araw mula Lunes hanggang Biyernes, simula sa Setyembre 11, 5:30-6:30 PM.

Itatampok sa game show ang mga trivia-based challenges at isang dynamic na gameplay na magbibigay sa mga kalahok at manonood ng pagkakataong manalo ng malalaking premyong salapi.

Gaya ng tagline ng palabas na, “Sa bawat spin, go for the win!,” ang bawat pag-ikot ng wheel ay nagbibigay ng pagkakataong magbukas ng malaking kapalaran.

Sa bawat episode ng SPINGO, tatlong studio contestant na may sarili nilang mga Bingo digital tube ang kakailanganing mangolekta ng mga may numero na bola sa tatlong round. Sa simula ng bawat round, pinapaikot ang roulette wheel at tinutukoy nito kung magkano ang naipon sa digital prize pot.

Ang unang makakolekta ng 15 bola ay maglalaro sa Final Round at magkakaroon ng pagkakataong kunin ang lahat ng pera sa prize pot at higit pa.

Maaari ding sumali ang mga home viewers sa SPINGO fun para sa pagkakataong manalo ng hanggang P100,000. Para makasali, kailangan lang nilang i-download ang SPINGO app mula sa Google Play Store. Pagkatapos ng matagumpay na pagpaparehistro, dapat nilang hintayin ang kanilang mga e-pin sa pamamagitan ng SMS, na nagbibigay sa kanila ng mga digital na SPINGO card.

Pagkatapos, maaari nilang simulan ang pag-black out ng kanilang mga card habang nanonood ng palabas. Nanalo sila sa sandaling makaipon sila ng 15 katugmang numero mula sa mga numerong nakolekta ng lahat ng 3 studio contestant bago ianunsyo ng host ang pagtatapos ng home game.

Para sa higit pang impormasyon at kapana-panabik na update, sundan ang TV5 sa kanilang opisyal na mga social media page sa Facebook at YouTube at bisitahin ang SPINGO website sa tv5.com.ph/spingo.

(ROHN ROMULO)

AYON sa aming reliable source, suportado ng 31 board members ng MTRCB (Movie, Television, Review & Classification Board) ang Chairwoman ng MTRCB na si Lala Sotto.

Hindi maitatanggi na siya ang sentro ng galit at sumpa pa mga netizens, partikular na ang mga Kapamilya at avid viewers ng ‘It’s Showtime.’

Ang totoo raw pala, ang 31 members ang talagang unanimous ang boto o desisyon ng pagpataw ng 12 airing days suspension sa noontime show. Hindi lang daw kasi itong ‘icing incident’ ang case, mahigit sampu pa raw yata sa mga nakaraan.

Base pa rin sa source namin, sa lahat ng ito, cool lang si Chairwoman Lala na sanay na rin sa mga batikos sa kanya at sa mga taong negatibo ang mga naibabatong comments. Pinanganak at lumaki ba naman sa pulitika at showbiz.

Ang bago nga lang ngayon, maging ang Department of Broadcast Communication ng U.P. Diliman ay may petisyon na mag-resign na si Lala bilang chairwoman ng MTRCB.

***

HINDI nagpo-post si Jillian Ward, pero may pakiramdam kami na masayang-masaya ito dahil sa isa na rin siya sa mga artistang may sarili ng title.

As in, sa panahon ngayon na magugulat ka na lang talaga sa mga nagsusulputang title ng mga artista na as we all know, may ‘Asia’s Limitless Star’, ‘Multimedia Star’, ‘Breakout Star’, ‘Global Endorser’, at kung ano-ano pa, heto naman ngayon ang bago—‘Star of the New Gen.’

Si Jiliian Ward na nga raw ang may hawak ng titulong ‘Star of the New Gen’ na maaaring bininyag dito ng kanyang Sparkle family.

Pwede rin naman dahil halos lahat ng teleserye na pinagbibidahan niya ay top-rater. At ang ‘Abot Kamay na Pangarap’ ay umabot na ng isang taon sa telebisyon at nananatiling top-rater sa panghapong programa.

Fourteen years na rin sa showbiz si Jillian simula noon child star siya. At ngayon nga, hindi lang sa telebisyon, kahit daw kasi sa social media, proven ang lakas at following nito sa lahat ng kanyang social media accounts.

(ROSE GARCIA)