2023 June Archive - People's Balita

Archive for June, 2023

Sinumpaang tungkulin, hindi pinipersonal

Posted on: June 2nd, 2023 by @peoplesbalita No Comments

HINDI umano personal kundi tinutupad lamang ni Speaker Ferdinand Martin Romualdez at ng mga miyembro ng Kamara ang kanilang tungkulin ng muling suspendihin si Negros Oriental Rep. Arnolfo Teves Jr. na nagtatago at humingi ng political asylum sa ibang bansa.

“Hindi natin papayagan na sirain ninuman ang integridad ng kongreso. Walang personalan dito. Ginagawa lamang natin ang sinumpaan nating tungkulin at pangako sa sambayanan,” pahayag ni Speaker Romualdez sa kanyang talumpati bago ang sine die adjournment ng kongreso.

Ipinaalala nito na bilang kinatawan ay may pananagutan sila sa mga Pilipino na gampananan ang kanilang mandato na maglingkod na may integridad at buong katapatan.

Kabilang aniya rito ang pagsunod sa Code of Conduct, Rules of the House at Rules of the Committee.

Ang pagtalima sa mga panuntunan na ito ay sumasalamin sa kredibilidad ng institusyon.

“I would like to reiterate that as members of this House, we must be accountable to the people at all times and perform our legislative mandates with utmost competence, efficiency, effectiveness, integrity and fidelity to the people’s welfare – nothing less. Let this be a reminder to all of us,” pahayag pa nito.

Marso ng unang dinggin ng House Committee on Ethics and Privileges ang pagkabigo ni Teves na umuwi sa Pilipinas kahit expired na ang travel authority na ibinigay sa kanya ng Kamara.

Si Teves ay iniuugnay sa pagpatay kay Negros Oriental Gov. Roel Degamo na kilalang kalaban nito sa pulitika at tumalo sa kanyang kapatid na si Henry Pryde nitong nakalipas na 2022 elections.

Inirekomenda ng Ethics committee na patawan si Teves ng 60-araw na suspensyon at pinagtibay ito ng mga miyembro ng Kamara.

Nagtapos ang suspensyon noong Mayo 22 subalit nanatili pa rin si Teves sa ibang bansa at naghain pa ng aplikasyon para sa political asylum sa Timor-Leste.

Dahil dito, muling nagsagawa ng pagdinig ang Ethics committee na nagrekomenda na muling patawan si Teves ng 60-araw na suspensyon at alisan ng membership sa lahat ng komite.

Walang tumutol sa muling pagpapataw ng parusa kay Teves na sinang-ayunan ng 285 kongresista. (Ara Romero)

QUIAPO CHURCH ISA NANG ARCHDIOCESAN SHRINE

Posted on: June 2nd, 2023 by @peoplesbalita No Comments

INILAGAY na sa katayuan ng isang Archdiocesan Shrine ang parokya ni San Juan Bautista na karaniwang kilala bilang Simbahan ng Quiapo.

Ito ay matapos aprubahan ni Manila Archbishop Jose Cardinal Advincula ang petisyon ni Fr. Rufino Sescon Jr., rector ng parokya.

“We hereby decree that the Minor Basilica of the Black Nazarene – St John the Baptist Parish (Quiapo Church), be conferred the title of the Archdiocesan Shrine of the Black Nazarene,” sabi ng Manila archbishop sa isang kautusan na may petsang Mayo 10.

“By this Decree of Erection, We likewise grant to the said Archdiocesan Shrine of the Black Nazarene all the rights and privileges as embodied in the statutes which we also approve at the same time,” dagdag pa.

Inanunsyo nitong Miyerkules ang bagong katayuan ng Quiapo Church sa isang misa na pinangunahan ni Fr.Reginald Malicden, ang archdiocese’s vicar general.

Sa kanyang homily, binigyang-diin ng pari na ang deklarasyon sa simbahan bilang “archdiocesan shrine ay “long overdue”.

“But for us devotees, whether there is a formal declaration, or none is made, this church is a real shrine because here we feel the presence of God,” sabi ng pari.

Inaprubahan din ang merito sa petisyon sa pagsangguni sa komunidad ng Minor Basilica of the Black Nazarene — St. John the Baptist Parish (Quiapo Church) at ng Presbyteral Council.

Upang maging isang diocesan shrine ang isang simbahan, bukod sa iba pang mga kinakailangan, ay dapat na isang lugar ng makasaysayang kahalagahan, panalangin at pilgrimage para sa isang espesyal na dahilan ng kabanalan.

Ang parokya ay naghain ng petisyon na humihiling sa obispo na itaas ang simbahan.

Ang Quiapo Church ay naging tahanan ng imahe ng Black Nazarene na dinadagsa ng mga deboto tuwing Enero 9.

Noong 1987, itinaas ni St. John Paul II ang simbahan bilang Minor Basilica of the Black Nazarene dahil sa papel nito sa pagpapalakas ng malalim na debosyon kay Hesukristo at ang kontribusyon nito sa kultura sa pagiging relihiyoso ng mga Pilipino. GENE ADSUARA

Gobyerno, hindi gagamitin ang pension funds bilang seed funds para sa Maharlika

Posted on: June 2nd, 2023 by @peoplesbalita No Comments

WALANG BALAK at hindi kailanman naisip ng gobyerno na gamitin ang state pension funds bilang “seed fund” para sa panukalang Maharlika Investment Fund (MIF).

Sinabi ni Pangulong Ferdinand Marcos Jr., na ang pension funds ay maaaring i-invest sa panukalang sovereign wealth fund kung sa tingin ng mga ito ay ito’y “good investment.”

“Of course, ah no, I agree. We have no intention of using… kukuha tayo ng pera ng pension fund,” ayon kay Pangulong Marcos.

“We will not use it as a seed fund. However, if a pension fund, which is what pension funds do, is they invest. If the pension fund decides that Maharlika fund is a good investment, it’s up to them if they want to invest in it,”dagdag na wika nito.

Kasunod ng marathon deliberations, inaprubahan naman ng Senado ang panukalang batas na naglalayong magtatag ng sovereign wealth fund.

Nakasaad sa batas na ang MIF ay nilikha sa pamamagitan ng pondo na huhugutin mula sa Land Bank of the Philippines (LBP): P50 bilyong piso; Development Bank of the Philippines (DBP): P25 bilyong piso at National Government: P50 bilyong piso.

Samantala, ang kontribusyon mula sa national government ay manggagaling naman mula sa “total declared dividends ng Bangko Sentral ng Pilipinas (BSP), National government’s share mula sa kinita ng PAGCOR, Properties, real and personal na i-dentify ng DOF-Privatization and Management Office at iba pang sources gaya ng royalties and/or special assessments.”

Kabilang naman sa major amendments na ipinakilala sa batas ay ang ganap na pagbabawal sa paggamit ng pondo ng Government Service Insurance System (GSIS), Social Security System (SSS), Philippine Health Insurance (PhilHealth) corporation, Pag-IBIG, Overseas Workers Welfare Administration (OWWA), Philippines Veterans Affairs Office (PVAO) sa capitalization at investments sa Maharlika fund. (Daris Jose)

Sa mga pinagdaanang hirap… MARK, nakaranas din ng matinding anxiety dahil sa pandemya

Posted on: June 2nd, 2023 by @peoplesbalita No Comments

HINDI namin sinasadyang paiyakin ang hunk actor/singer na si Mark Rivera nang makausap namin siya kamakailan.

Napadako kasi ang usapan namin sa nagdaang kasagsagan ng pandemya ng COVID-19 na nagsimula noong 2020 kung kailan nag-impose ng mahigpitang lockdown sa buong mundo.

At si Mark ang isa sa pinaka naapektuhan ng nasabing lockdown dahil naririto siya sa Pilipinas noong mga panahong iyon habang ang kanyang mga magulang ay nasa Milan sa Italy kung saan nakabase ang mga ito.

Bukod sa pagkakalayo nila, namatayan pa ng lola si Mark na noon ay kapiling niya dito sa Pilipinas.

“Sobra, because I was the one to take care of my grandmother here in the Philippines. I was the one to do the groceries for my relatives… It was very hard.

“Kahit na I wanted to be there [in Italy], but I couldn’t leave my relatives here. Ang hirap hatiin ang sarili,” ang lumuluhang pahayag ng binata.

Inamin rin ni Mark na matinding anxiety ang naranasan niya dahil sa mga pinagdaanan niyang hirap, pero dahil siya ang kinakapitan ng kanyang mga kaanak na may mga sakit, nilakasan ni Mark ang kanyang loob.

“I was just being positive. I just want to be healthy and take care of my self–physically, mentally, and emotionally–para mabigay ko rin yung energy na kailangan nila, so I could support them emotionally kahit malayo ako. It was really hard.

“There was so much pain. Back to back, ang daming nangyayari, tapos walang work, walang taping. So, I didn’t know how to help my family, hospital bills were so expensive. I was really struggling.”

Hanggang sa dumating ang silver lining sa kanyang madilim na buhay; napasama siya sa cast ng “Unbreak My Heart”, ang pinakamalaking collaboration ng GMA Network, ABS-CBN, at VIU Philippines!

“Unbreak My Heart is really the rainbow of this pandemic because it really gives me joy and hope about the future, about life. Kaya ayun, very grateful ako with what’s happening in my life right now.”

Happy pa si Mark na noong nagsu-shoot siya para sa “Unbreak My Heart” sa Italy ay nakadalaw pa sa set nila ang kanyang buong pamilya at nakapagpalitrato pa sa mga artistang kasama ni Mark sa show.

***

EERE na sa Linggo, June 4, 7:50 ng gabi ang “Walang Matigas Na Pulis Sa Matinik Na Misis” kaya sa dalawang programa ng GMA Network sabay na mapapanood si Raphael Landicho linggu-linggo.

Nasa cast rin kasi ng Voltes V: Legacy si Raphael bilang si Little John Armstrong.

“Masaya po siyempre kasi sa isang buong week mapapanood po ako ng mga tao, mapapanood po ako ng mga Kapuso,” ang nakangiting sinabi ng Kapuso child star.

“Magiging pamilyar na po yung mukha ko sa kanila! Kaya masaya po talaga ako.”

Kapag raw nasa mga pampublikong lugar si Raphael ay Voltes V ang tawag sa kanya ng mga tao.

“Opo, sasabihin din po nila, ‘Let’s volt in!’

“Actually nakaka-proud po talaga kasi ilang years po naming pinaghirapan yung project na yun, yung ‘Voltes V: Legacy’, ang dami pong nangyari, ako po noong una hindi pa po ako puwede mag-taping.”

Mahigpit pa ang health protocols noong nagsimulang mag-taping ang “Voltes V: Legacy” dahil sa pandemya; ang mga menor de edad (na tulad ni Raphael) at senior citizen ay bawal lumabas ng bahay that time.

Kaya naman noong umere na at mainit na tinanggap ng publiko ang serye ay tuwang-tuwa si Raphael.

“Tapos nalaman ko po na sinusuportahan nila yung Voltes V: Legacy, na pinaghirapan namin, tinatawag nila akong Little John, tinatawag nila akong Voltes V, kaya super-proud po ako talaga.”

Anak nina Senator Ramon ‘Bong’ Revilla at Beauty Gonzalez ang papel ni Raphael sa Walang Matigas Na Pulis Sa Matinik Na Misis.

Kasama rin sa cast ng sitcom sina Max Collins, Kate Valdez, Kelvin Miranda, Nikki Co, ang baguhang Sparkle actress na si Angel Leighton at ang mga batikang aktor na sina Niño Muhlach, Jeric Raval at Maey Bautista.

Ang nabanggit na upcoming action-comedy series ay sa direksyon nina Enzo Williams at Frasco Mortiz.

(ROMMEL L. GONZALES)

Panukalang nagdedeklara sa national election day bilang holiday, pasado sa ikalawang pagbasa

Posted on: June 2nd, 2023 by @peoplesbalita No Comments

INAPRUBAHAN ng Kamara sa ikalawang pagbasa ang House Bill 8187 na nagsusulong na gawing regular non-working holiday ang araw ng halalan upang ma-engganyo ang mas maraming botante na bumoto.

Sa ilalim ng panukala, kabilang sa “national elections” ang plebesito, referendums, people’s initiatives, at special elections.

Samantala, ipinasa din ng kamara sa ikalawang pagbasa ang HB 8269 o panukalang “Rights of Internally Displaced Persons (IDPs) Act,” na naglalayong isulong at protektahan ang karapatan ng mga non-combatant citizens.

Magaging mandato para sa estado na protektahan ang mga IDPs mula sa anumang uri ng diskriminasyon o persecution, at ipaprayoridad sa rehabilitation at reintegration sa sosyedad.

Kabilang din sa ilalaan ng estado sa mga IDPs ay ang probisyon at access sa basic necessities, ‘protection against criminal offenses and other unlawful acts, freedom of movement, recognition, issuance and replacement of documents, family unity, health and education, protection of their properties and possessions, and right to participation.’

Ang iba pang panukala na ipinasa sa ikalawang pagbasa ay ang 1) HB 7728, simplifying the procedure in the disposition of public agricultural lands; 2) HB 8327, restructuring the Philippine National Police; at 3) HB 8265, providing for the registration, regulation, and operation of cooperative banks.

Ipinasa rin ang House Resolution 1056, na inihain ni Speaker Ferdinand Martin Romualdez, para sa pagpapalakas ng mutual cooperation sa pagitan ng Pilipinas at Korea sa pamamagitan ng Philippines-Korea Parliamentarians’ Friendship Association. (Ara Romero)

Nakapag-recharge sa bakasyon sa Japan; CARLA, naging stress-reliever ang mag-yoga

Posted on: June 1st, 2023 by @peoplesbalita No Comments

PROUD si Patricia Javier sa kanyang 16-year old son na si Robert Douglas Walcher IV dahil ito ang mag-represent ng ating bansa sa Mister Teen International 2023 pageant na magaganap sa Thailand on June 1.

Noong May 28 ay sinamahan ni Patricia si Robert sa paglipad nito sa Thailand. Bilang mother ay gustong masiguro ni Patricia na maayos ang mga gagamitin ng anak sa kanyang pag-compete sa naturang male pageant.

Mensahe ni Patricia sa kanyang anak ay: “Thank you for being a good son. Ang galing pala sumagot ng anak ko sa Q&A. Just enjoy your pageant journey and be proud to be a Filipino. We plant a good seed in your heart. Be God-fearing and continue to e generous to others. And when you are in the pageant, show them how Filipinos love other people. As you have said also, it’s not the looks but how you treat people. We love you.”

Mensahe naman ng ama ni Robert na si Dr. Robert Walcher: “I’ve said to Robert, you have been presented this opportunity to represent the Philippines. So why not do this and why not give it 100 percent? Who knows what’s gonna happen? This is just a part of your journey in life. I always tell my kids that we grow when we come out of our comfort zone. Whether you’re old or young you have to continue to push yourself. Of course, this is gonna be hard and Robert needs to be strong and lean to God. Just do the best that you can. You’re gonna do great and I’m just excited for you.”

Sinabi naman ni Robert sa kanyang supportive parents ay: “I just want to thank my parents for the support. You guys have been so good to me. So thank you guys. I love you!”

Papasukin din daw ni Robert ang show business after ng competition sa Thailand. Ang Fashion designer na si Don Cristobal ang gumawa ng national costume at ilang outfits na isusuot ni Robert sa naturang international competition.

***

NAKAPAG-RECHARGE na si Carla Abellana noong magbakasyon ito sa Japan kamakailan.

Bukod sa pag-asikaso ng kanyang malapit nang matapos na bahay, nagiging therapy niya ang kanyang handcrafted soap business.

Pinost ni Carla sa Instagram ang proseso sa paggawa ng kanyang sabon. Isa raw ito sa nakakakalma sa aktres lalo na kapag nase-stress ito sa trabaho at para na rin gumaan ang anumang mabigat sa kalooban niya.

“Sharing my passion with all of you. Looking for ways to cope with my pain and grief, I decided to turn my vulnerability into something creative in hopes of encouraging others that they can overcome their own pain and grief too,” caption pa ni Carla sa IG.

Naging stress-reliever din ng Voltes V: Legacy star ang mag-yoga. Pinost nga niya ang ilang yoga poses sa social media na kayang gawin ng kanyang followers.

At kapag gusto naman daw ng aktres na magsaya, nagvi-videoke ito kahit na mag-isa lang siya. Caption pa ni Carla sa pinost na IG video: “When you’re the last one standing, ay este singing. Missing the barkada extra tonight!”

(RUEL J. MENDOZA)

PBBM, malugod na tinanggap ang $2.5-B investment pledge ng Thai firm

Posted on: June 1st, 2023 by @peoplesbalita No Comments

MALUGOD na tinanggap ni Pangulong Ferdinand R. Marcos Jr. ang plano ng Thailand conglomerate Charoen Pokphand Group (CP Group) na mamuhunan ng USD2.5 billion (P140.8 billion) sa Pilipinas para palakasin ang sektor ng agrikultura.

Tinalakay ang investment pledge nang makipagpulong si Pangulong Marcos sa mga opisyal ng CP Group, pinangunahan ni chairman Soopakij Chearavanont, sa Palasyo ng Malakanyang.

Sinabi ni Communication Secretary Cheloy Garafil na ang expansion plans ng CP Group ay may kinalaman sa paggamit ng bagong teknolohiya, sakop ang babuyan (USD1.3 billion), manukan (USD280 million), shrimp (USD800 million), at pagkain (USD120 million).

Sa nasabing pulong, winika ng Pangulo na layon ng CP Group na magbitbit ng “state-of-the-art” technology sa bansa na gagayahin ng Pilipinas.

“We’re very impressed with the new technologies that you use. I remember you told me that each plant farm you build is different from the last one because you immediately incorporate and adopt new techniques in technology,” ang sinabi ni Pangulong Marcos sa CP Group executives, ayon kay sa Presidential Communications Office (PCO).

“Learning new things and applying new things, that’s the only way I think to compete as well. CP Group has done so well… to be a state-of-the-art company,” ayon pa rin kay Garafil.

Sa naturang pulong pa rin, nagpasaklolo ang CP Group sa administrasyong Marcos na maghanap ng angkop na lupain sakop ang 400 ektarya ng aquaculture (hipon) at 300 ektarya para sa baboy at manok kabilang na itlog.

Nais din ng grupo na gumamit ng makabagong teknolohiya upang matupad ang “whole upstream at downstream raw materials” hanggang sa finished product para sa merkado at future exports.

Sinabi pa nito na ang bansa ay mayroong raw materials at magaling na labor force na pupunan sa available na teknolohiya para palakasin ang value chain sa agriculture sector.

“Even in terms of the ecosystem of agronomists and agriculturists, experts in fisheries, experts in rice, in broiler production… we have many people who are very, very good. It’s the system that we need,” ayon kay Garafil.

“They’re not working independently as if the other parts of the system don’t exist. That’s more or less where we find ourselves. Now…, I suppose we could start from where we are and try to just keep improving,” dagdag na wika nito.

Kinilala ang papel ng pamahalaan para suportahan ang inisyatiba ng pribadong sektor, sinabi ni Pangulong Marcos na tatalakayin niya sa mga stakeholders ang kakayahan na pagsama-samahin ang proyekto na magpapalakas sa produksyon at katatagan ng agriculture sector.

Nangako naman ang Pangulo na pananatilihin ang momentum ng agrikultura na “move forward,” tinukoy nito ang non-mechanization bilang dahilan ng pagkabigo ng bansa na ipagpatuloy ang proseso ng konsolidasyon apra mapabuti ang sistema.

“That’s why now we’re trying to catch up. So yes, we, I’m sure we can. I’m sure that there has to be a way… to get all the lessons that have been learned by not only you, but everyone around the world,” aniya pa rin sabay sabing “We will discuss amongst ourselves with all the others, those who will be helping put together the project. We will certainly see what is the most ideal way.”

Matatandaang, unang nakipagpulong si Pangulong MArcos sa CP Group executives noong November 2022 kung saan bumisita ang una sa Thailand.

“The CP Group is now a leading holding company in Thailand, holding investments in 21 countries and economies worldwide, operating through more than 200 subsidiaries, and employing more than 300,000 people,” ayon sa ulat.

“It operates across eight business lines – agro-industry and food; retail and distribution; media and telecommunications; e-commerce and digital; property development; automotive and industrial products; pharmaceuticals; and finance and investment,” ayon pa rin sa ulat.

Samantala, nakita naman sa pulong ang presensiya nina business tycoons Sabin Aboitiz at Francis Chua, at mga mga opisyal at kinatawan ng Asia-Pacific Economic Cooperation Business Advisory Council (ABAC) Philippines.

Ang mga opisyal ng PIlipinas na dumalo sa pulong ay sina Garafil, Presidential Adviser on Investment and Economic Affairs Frederick Go, House of Representatives Speaker Martin Romualdez, at Deputy House Speaker at Pampanga Rep. Gloria Macapagal-Arroyo. (Daris Jose)

PBBM, pinangunahan ang ‘Malacañang Heritage Tours’

Posted on: June 1st, 2023 by @peoplesbalita No Comments

PINANGUNAHAN ni Pangulong Ferdinand Marcos Jr. ang pagbubukas ng “Malacañang Heritage Tours,” kabilang na ang museo na nagpapakita ng “road to the Palace” ng Pangulo.

Pinasimulan ni First Lady Liza Araneta-Marcos, ang Malacañang Heritage Tours ay umikot sa dalawang tanyag na museo na nagnagpapakita ng mga pamana ng mga Pangulo ng Pilipinas.

Kabilang na rito ang Bahay Ugnayan, nagpapakita ng buhay at political career ni Marcos. naka-display naman ang mga ‘early photos’ ni Marcos gaya ng buhay-estudyante, may lugar na nagpapakita ng pananatili sa Oxford University at larawan ng kanyang special diploma sa social studies.

Samantala, ang Teus Mansion ay isang museo na naglalayong turuan ang publiko ukol sa iba’t ibang kasaysayan ng mga Pangulo ng Pilipinas.

Makikita roon ng mga bisita ang mga dating “presidential attire, footwear, flags, and exquisitely sculpted busts, paying homage to the former leaders of the country.”

Tampok din sa museo ang portraits ng mga dating naging Unang Ginang.

Sa kabilang dako, ang Goldenberg Series exhibit ay nagsisilbi bilang platform para itaas ang kamalayan at ipagdiwang ang iba’t ibang “cultural heritage’ ng Pilipinas sa pamamagitan ng iba’t ibang nakabibighaning events.

Dahil dito, inimbitahan ni Pangulong Marcos ang publiko lalo na ang mga estudyante na pumunta at bisitahin ang mga nabanggit na museo.

“It is now open to the public. I invite everyone to come, puntahan ninyo lalo na ‘yung mga estudyante na nais makita ang lahat ng mga Pangulo ng ating Republika. Nandiyan lahat, may kaunting kwento ng kanilang buhay,” ang pahayag ng Pangulo sa kanyang naging talumpati.

Sinabi naman ng Presidential Communications Office na ang Malacañang Heritage Tours ay “provide a unique opportunity for individuals seeking a deeper appreciation for the remarkable past and distinguished leaders of the Philippines.”

“It stands as a must-see attraction, offering an engaging and enlightening experience that delves into the rich tapestry of Philippine history,” ayon sa PCO.

Tiniyak naman ng PCO na ang tours ay bukas sa publiko ng libre, ang guided tours ay available mula alas-9 ng umaga hanggang alas-4 ng hapon.

Magugunitang, naglabas si Pangulong Marcos ng executive order (EO) para sa pagtataguyod at pag-iingat ng mga makasaysayan at kultural na pamana ng Pilipinas sa pamamagitan ng mahusay na pamamahala sa Malacañang Heritage Mansions at paglikha ng mga advisory at management bodies.

Ayon kay PCO, batay sa EO No. 26 ay ipinag-utos ni Pangulong Marcos nang pagbuo ng isang advisory board na bubuuin ng tatlong kinatawan mula sa Office of the President (OP), na magsisilbi sa ex officio capacity, at tatlong kinatawan mula sa pribadong sektor na itatalaga ng chief executive.

Inatasan ng Pangulo ang advisory board na bumalangkas ng mga patakaran, proyekto at programa para sa mahusay na pamamahala ng Malacañang Heritage Mansions na napapailalim sa mga umiiral na batas at regulasyon.

Nakapaloob din sa naturang kautusan ang pagtatatag ng Malacañang Heritage Mansions Management Center na magbibigay naman ng technical at administrative support sa binuong Advisory Board.

Ito ay pamumunuan naman ng isang Executive Director na titiyak sa day-to-day operations at maintenance sa mga subject properties.

Pangangasiwaan din nito ang mga operational activities kabilang na ang performance ng lahat ng empleyado at tauhan nito, kasama ang SoSec na nagsasagawa ng administrative supervision dito. (Daris Jose)

Panukala na isama ang personal financial education sa mga tech-voc na paaralan, inaprubahan ng Komite

Posted on: June 1st, 2023 by @peoplesbalita No Comments

INAPRUBAHAN ng House Committee on Higher and Technical Education na pinamumunuan ni Baguio City Rep. Mark Go ang House Bill 7333 o “Personal Financial Education for Tech-Voc Schools and Centers.”

Naglalayong isama nito ang kaalaman sa pananalapi sa teknikal-bokasyonal na kurikula, na ganap na nakatuon sa pansariling pananalapi.

Ayon kay Bukidnon Rep. Jose Manuel Alba, awtor ng panukala, ang kahalagahan ng personal na pagpaplano sa pananalapi ay nagbibigay ng kapangyarihan sa mga mag-aaral na magtakda ng mga layunin sa pananalapi, kontrolin ang paggasta, at gumawa ng maingat na mga desisyon sa pananalapi.

Sa ilalim ng panukalang batas, makikipagtulungan ang Technical Education and Skills Development Authority (TESDA) sa Bangko Sentral ng Pilipinas (BSP), Department of Finance (DOF) at Securities and Exchange Commission (SEC), para bumuo ng mga pamantayang pang-akademiko, kurikula, at materyales para sa kursong personal na pananalapi.

Ang iba pang mga panukalang inaprubahan ay ang HB 7219, o “Higher Education Institutions’ Development Research Fund Act of 2023;” HB 2316, na naglalayong magtatag ng Artificial Intelligence Industrial Research Park sa Mindanao State University – Iligan Institute of Technology; HB 321, na magtatatag ng Dinagat Islands State College; HB 7289, na naglalayong gawing State University of Siquijor ang Siquijor State College at ang extension campus nito; HB 6566, na naglalayong itatag ang Sarangani State College; HB 1457, na magtatatag ng Techno-Parks Development Fund (TPDF) para sa University of Science and Technology of Southern Philippines; HB 1451, na naglalayong maglaan ng P1 bilyon para pondohan ang pagpapaunlad ng imprastraktura ng Alubijid Campus sa University of Science and Technology of Southern Philippines; HB 7643, na naglalayong gawing regular na kampus ang satellite campus ng Bukidnon State University; at mga HBs 7173, 7516, 7570, 7571, 7702 at 7746, na naglalayong magtatag ng TESDA training and assessment

centers sa iba’t ibang bahagi ng bansa.

Nagsagawa rin ng pagdinig ang komite kasama ang Committee on Disaster Resilience na pinamumunuan ni Dinagat Islands Rep. Alan 1 Ecleo, para aprubahan ang mga HBs 5462, 7279 at 7710, na naglalayong suspindihin ang mga pagbabayad ng student loan sa panahon ng kalamidad at iba pang kagipitan.

Iginiit ni Ecleo na dapat palawigin ng kongreso ang tulong na ito para maibsan ang pinansiyal na pasanin ng mga pamilyang Pilipino, lalo na ang mga walang kabuhayan at matatag na pinagkukunan ng kita.

Sinabi ni Go na inaprubahan na ng senado ang katulad na panukalang batas sa ikatlo at huling pagbasa. (Ara Romero)

Desisyon na ng bawat isa kung sasama o maiiwan: TITO, VIC at JOEY, nagpaalam na sa Tape Inc. at sa Dabarkads

Posted on: June 1st, 2023 by @peoplesbalita No Comments

NAGPAALAM na ang Eat Bulaga!

Ayon kay Tito Sotto, pumasok daw silang lahat, pero hindi raw sila pinayagan ng new management na mag-live. Pero sa kalagitnaan ng show, pumasok ang tatlo ng live.

Nagpasalamat sila sa lahat ng mga tumangkilik daw sa kanila mula noong July 30, 1979, kaya 44 years na sila sa taong ito, ayon naman kay Joey de Leon. Kaya lubos ang pasasalamat nila sa RPN-9, ABS-CBN-2 at GMA-7.

At saka sinabi ni Vic Sotto na, “Simula po ngayong araw, May 31, 2023, kami po ay magpapaalam na sa TAPE Incorporated.”

“Karangalan po namin na kami’y nakapaghatid ng tuwa’t-saya mula Batanes hanggang Jolo at naging bahagi ng buhay niyo.

“Maraming salamat po sa inyon lahat. Hanggang sa muli… Saan man kami dalhin ng tadhana, tuloy ang isang libo’t isang tuwa.”

Ang naisip namin ay ang bagong dabarkads na si Carren Eistrup. Bilang winner siya ng contest, kung sakali at magkakalipatan at magtutuloy-tuloy naman ang TAPE sa GMA-7 sa noontime show pa rin bilang meron silang kontrata sa network hanggang sa December ng taong ito, ano ang mangyayari sa kanya?

So ‘eto na, wala palang kontrata ang mga host. At kahit si Carren na winner, hindi rin ito naka-bound sa any written contract. Talagang ang pinanhahawakan lang ay loyalty at word of honor.

Base sa nakausap namin like in the case of Carren, wala raw itong alam talaga sa mga nangyayari at magaganap. Trabaho lang daw ito at kung ano ang kailangan niyang gawin.

Kaya siguro kung sakali at magkakalipatan, desisyon na ng bawat isa kung sasama sa aalis o maiiwan sa TAPE at sa GMA-7.

***

BREAK na nga ba sina Liza Soberano at Enrique Gil?

Nagti-trending ang LizQuen at si Ogie Diaz dahil rebelasyon ng huli na diumano’y may nagsabi sa kanya na break na ang dalawa. At nanghihinayang daw siya kung totoo dahil halos 8 years din daw ang relasyon ng mga ito.

Dahil dito, maraming netizens ang bina-bash si Ogie. Hindi raw proper na siya ang nagbabalita kung totoo man bilang ex-manager ni Liza. At bakit daw hindi hayaan ang dalawa ang mag-announce totoo man o hindi.

Sa iba naman, hindi na sila nagugulat.

Una, sa mga sunod-sunod na desisyon daw kasi ni Liza sa career niya, hindi na nakapagtataka na makikipag-break din ito kay Enrique.

So, abangan natin kung ano nga ang katotohanan.

(ROSE GARCIA)