- March 8, 2026
Ang Diyaryong Pinagkakatiwalaan
Archive for June, 2023
COVID-19 sa Metro Manila, bumaba – OCTA
PATULOY ang pagbaba ng COVID-19 weekly positivity rate sa Metro Manila batay sa latest data ng OCTA Research Group.
Ang positivity rate ay ang bilang ng mga nagpopositibo sa COVID-19 makaraang masuri sa virus.
Batay sa inilabas na datos ni OCTA Research Fellow Dr. Guido David, nitong May 28 ay bumaba sa 2.2% ang positivity rate sa Metro Manila mula sa 25.2% noong May 21.
Maging ang reproduction number o bilis ng hawaan sa rehiyon ay bumaba rin sa 0.97 nitong May 26 data.
Gayunman, naitala naman ng OCTA Research ang bahagyang pagtaas sa hospital occupancy rate na nasa 29.1% nitong May 28.
Magla-live na raw ang ‘Eat Bulaga’: TVJ, kino-contest pa rin na makuha ang title ng show
PINAG-UUSAPAN lalo na nang magpaalam na nga ang TVJ na sina Tito Sotto, Vic Sotto at Joey de Leon sa 43 years nilang noontime show na “Eat Bulaga” noong May 31.
Nasundan pa ito ng mass resignation naman ng halos lahat ng host at staff ng show.
Naiwan ang TAPE Incorporated ni Romeo Jalosjos.
Sa ngayon, dalawang araw na replay ang napapanood sa ‘Eat Bulaga’. Balitang sa TV5 kunsaan, ang magiging producer ay si Cong. Albee Benitez daw ang magba-blocktimer sa kanila.
May chika rin sa amin na dalawang Linggo raw pinagpapahinga muna ang ibang staff pa na naiwan (yes meron pa rin naman daw naiwan!) at ibang host tulad nina Carren Eistrup… so, parang 2 weeks na replay?
Pero ang latest na nasagap namin at aabangan namin kung totoo nga, ngayong Sabado, live na raw ang Eat Bulaga with a new set of host.
And yes, katulad ng mga kumakalat na balita, most of them are Sparkle artists.
So, abangan….
Mukhang mahaba-habang “serye” pa ito dahil kino-contest pa rin ng TVJ na ang title ng show ay makuha nila.
***
NAGING special guest ng ‘Marites University’ na napapanood sa YouTube ang Star For All Season na si Ms. Vilma Santos.
Ang dami niyang chika na nakakatuwa talaga at iba talaga kapag mga veteran stars ang kausap tulad ni Ate Vi.
After seven years, ngayon na lang sila muling nagkasama sa pelikula ng kanyang “ka-loveteam” na si Christopher de Leon at sey nga niya, ‘yung chemistry raw talaga sa kanila na hindi naman naaaral, talagang nando’n.
Light drama ang kanilang reunion movie na “When I Met You in Tokyo” na ang theme song ay ang kanta ng Apo Hiking Society na “When I Met You.”
Masaya rin si Ate Vi na after ilang decades in the industry, heto’t talagang nakaka-adapt siya sa social media era. Talagang pina-follow at masasabing isa sa well-loved social media personality na rin si Ate Vi ngayon na ang Tiktok dance nga niya ay umabot na sa halos 8 million views.
Kuwento niya, ang pagsasayaw naman talaga ang isa sa paborito niyang ginagawa. Na kahit daw noong pandemic na minsan nagkaka-anxiety siya, sinasayaw lang daw niya at ito ang nakatulong din sa kanya to ease the anxiety na dulot ng pandemic.
Lalo na nga naman during that time, ilan din sa mga kakilala at kaibigan niya ang nawala.
Abangan na lang sa YouTube ang kabuuang interview na ito ng Marites University kay Ate Vi.
(ROSE GARCIA)
Kaligtasan ng pasahero, rider ¬titiyakin sa motorcycle taxis law
SISIGURUHIN umano na ligtas ang mga rider at mga pasahero bukod sa mananatiling mababa ang bilang ng mga naaksidente kapag nagkaroon ng batas na gagawing legal at magkokontrol sa motorcycle taxis sa bansa.
Sa naunang pagdinig ng Senate Committees on Public Services and Local, tumutok ang diskusyon sa training, skills at kaalaman ng mga rider sa paggamit ng motorsiklo para masigurong ligtas sila sa mga aksidente sa lansangan.
“We need to legalize to reflect the reality on the ground but we also need the highest safety standards to make this a true mobility alternative,” ayon kay Sen. Grace Poe, chair ng Senate committee on public services.
Sa ginanap din na pagdinig ay sinuring mabuti ang Angkas, JoyRide at Move it, ang mga kumpanyang pinayagang mag-operate sa ilalim ng tatlong taong pilot program ng Department of Transportation, tungkol sa safety training na kanilang ibinibigay sa kanilang mga drayber.
Nababahala naman si Sen. Raffy Tulfo sa bilang ng mga aksidente na kinasasangkutan ng Angkas, ang market leader na humahawak ng 30,000 slot sa 45,000 sa ilalim ng pilot program, kung saan may naitalang 7,500 aksidente noong 2022 lamang.
Ito ay dahil marami umanong natatanggap na reklamo si Tulfo na ang mga pasahero muna ang nagpapaluwal ng pera dahil ang hirap kausap ng mga nasabing kumpanya.
Nais din umano ni Tulfo na kapag may naaksidente na rider na may pasahero ay agad-agad pupunta ang nasabing kumpanya sa ospital at babayaran ang gastusin doon.
Ayon kay Grab Senior Executive Vice President Lim Yew Heng, sa Thailand, Vietnam at Indonesia kung saan sila nag-o-operate rin, gumagamit sila ng teknolohiya para ma-monitor ang ugali at driving skills ng kanilang mga drayber bukod pa sa kaligtasan at tamang pagsasanay ng mga Grab driver.
Rank 9th top most wanted person, timbog sa Caloocan
NABITAG ng pulisya ang isang mekaniko na listed bilang 9th top most wanted sa kasong panggagahasa sa isinagawang manhunt operation sa Caloocan City, kamakalawa ng hapon.
Kinilala ni Caloocan police chief P/Col. Ruben Lacuesta ang naarestong akusado bilang si Alfonso Ruiz Jr, 55, mekaniko ng 499 Tullahan Road, Sepa St., Barangay 162, Sta. Quiteria.
Sa kanyang report kay Northern Police District (NPD) Director P/BGen Ponce Rogelio Peñones Jr, nagsagawa ang pinagsanib na mga operatiba ng IDMS – Warrant and Subpoena Section (WSS) sa pangunguna ni PMAJ Jeraldson Rivera at Sta. Quiteria Police Sub-Station 6 sa pangunguna ni P/Cpt Marlon Landong ng manhunt operation kontra wanted persons.
Natimbog ng mga operatiba ng WSS sa nasabing police operation ang akusado dakong alas-3:50 ng hapon sa kahabaan ng Libis Baesa, Sta. Quiteria, Brgy. 160.
Ani Major Rivera, ang akusado ay dinakip nila sa bisa ng warrant of arrest na inisyu ng FC Branch 1, ng Caloocan City noong May 11, 2023, para sa kasong Rape.
Pansamantalang nakapiit ang akusado sa custodial facility unit ng Caloocan CPS habang hinihintay ang pagpapalabas ng commitment order ng korte.
Pinuri naman ni P/MGen Edgar Alan Okubo, RD, NCRPO ang operating team sa kanilang walang tigil na manhunt operation alinsunod sa pinaigting na kampanya ng PNP laban sa mga wanted person na pinaghahanap ng batas. (Richard Mesa)
‘Di makapaniwalang 5 months na si Peanut: LUIS, pinagtripan na naman ang pagsasayaw ni VILMA
ANG bilis ng panahon at five months old na pala si Isabelle Rose, ang first born ng mag-asawang Luis Manzano at Jessy Mendiola.Pinost ni Luis sa kanyang Instagram si Baby Rose na naka-pink ruffle dress at may number 5 sa tabi nito na puno ng bulaklak.
“Happy 5th month our little Peanut,” caption ni Luis.
Caption naman ni Jessy: “You’re growing up too fast. I can’t believe you are 5 months already. I love you so much, my little one.”
At siyempre, hindi mawawala ang post ni Luis ng Tiktok video nila ng lola ni Baby Rose na si Ms. Vilma Santos-Recto.
Sa bagong Tiktok dance video ng mag-ina Vilma at Luis, nag-ala Universal Motion Dancers sila. Nakakatawa lang si Luis dahil pinaglaruan na naman niya ang pagsayaw ng kanyang Mommy Vi.
Caption niya: “Ewan ko dito kay Momski di makasabay”
May ilang dance moves naman na nakakasabay si Ate Vi kay Luis, pero dahil sa pagiging natural na komedyante ng anak, hindi mapigilan ni Ate Vi na matawa at mawala sa timing ang pagsayaw niya.
***
HINDI mapigilan ni Shaira Diaz na maging emotional nang kunan siya ng photo na nakasuot siya graduation cap and toga sa morning show na Unang Hirit.
Matagal na kasing dream ni Shaira ang makapagtapos ng kolehiyo at maka-experience na umakyat ng entablado para tumanggap ng diploma. Next year daw ay matatapos na si Shaira sa kanyang kursong marketing and management sa University of Perpetual Help sa Las Pinas City.
Inamin ni Shaira na kahit na puyat siya sa taping at kailangan pa niyang magising ng maaga para sa hosting job niya sa UH, hindi naging dahilan iyon para tumigil siya sa kanyang pag-aaral. Ilang beses na raw siyang nag-stop sa pag-aaral noon dahil sa trabaho, pero this year daw ay tinuluy-tuloy niya para makatapos na siya.
“Naalala ko ‘yung struggle kasi mahirap pagsabayin yung pag-aaral saka yung pagtatrabaho. Nakailang stop ako tapos nakailang enroll ulit kasi nga ‘pag sobrang busy.
***
NANINIWALA ang ‘The Big Bang Theory’ star na si Kaley Cuoco na susunod sa kanyang acting footsteps ang kanyang baby girl na si Matilda.
Kahit na two months old pa lang daw ito, ginagaya na raw ni Baby Matilda ang mga expressions ng mukha niya.
Pinost ng daddy ni Matilda na si Tom Pelphrey sa kanyang Instagram ang nakakatuwang photos nito habang ginagaya ang facial expressions ng kanyang mommy.
“The acting is in her genes. I don’t know how she won’t,” sey ni Kaley.
Balik-trabaho si Kaley at bida ito sa bagong series sa Peacock titled Based On A True Story na mag-premiere on June 8. Makakasama rito ni Kaley sina Chris Messina at Tom Bateman.
BIKTIMA NG TRAFFICKING NAGPANGGAP NA MGA SEAFARERS, NA-RESCUE
NA-RESCUE ng mga ahente ng Bureau of Immigration (BI) sa Clark International Airport (CIA) sa Pampanga ang dalawang kababaihan na hinihinalang biktima ng trafficking na tinangkang pumuslit ng bansa at nagpanggap na mga seafarers.
Ang dalawang ay papasakay ng Cebu Pacific patungong Hongkong , ayon sa report kay Immigration Commissioner Norman Tansingco ng BI travel control and enforcement unit (TCEU).
Ang dalawang babae ay nagpanggap na Overseas Filipino workers (OFWs) na ni-recruit na magtrabaho sa Thailand at nagpakita ng mga pekeng dokumento, pero sa bandang huli ay inamin na patungo sila sa Laos upang magtrabaho bilang mga call center agents.
“The modus operandi here is for the victims to initially fly to Thailand where they would then board their connecting flight to Laos,” ayon kay Tansingco.
Sinabi ng mga biktima na ni-recruit sila upang magtrabaho sa Laos na nakita nila sa social media at nagbayad ng P4,000 kapalit ng kanilang pekeng dokumento.
Ang dalawa ay nasa kustodiya na ng Inter-Agency Council Against Trafficking (IACAT) at pagsasampa ng reklamo laban sa kanilang recruiters. GENE ADSUARA
CIVIC ORGANIZATION NAGBIGAY NG CASH DONATION PARA SA QUEZON CITY LEARNING RECOVERY PROGRAM
NAGBIGAY ng donasyong aabot sa 310 thousand pesos ang Rotary International District 3780 sa pamahalaang lokal ng Quezon City para sa proyekto ng lungsod na Learning Recovery Fund.
Personal na iniabot ni District Governor Florian Entiquez kay Quezon City Mayor Joy Belmonte ang nabanggit na halaga ng donasyon bilang pagpapakita ng sinserong komitment nila sa proyekto ng Quezon City LGU.
Sabi ni Belmonte, lubos ang kanilang pasasalamat sa Rotary International District 3780. Dahil aniya, mahalaga ang tulong ng pribadong sektor upang iaddress ang isyu ng Learning Recovery.
Dagdag pa ng alkalde, muli at muli nyang inaanyayahan ang mga NGO at business sector na mag-invest sa mga learners.
Matatandaan na kamakailan ay inaprubahan ng city council ang CITY ORDINANCE SP-3182 na nagtatatag ng Learning Recovery Trust Fund kung saan ilalagak ang mga cash donation para sa learning recovery program.
Dinaluhan ng ilang mga opisyal ng pamahalaang lungsod at ng mga opisyal at dating pangulo ng Rotary International District 3780.
Ang donasyon ng ROTARY INTERNATIONAL DISTRICT 3780 ay ilaan sa mga mag-aaral ng Bago Bantay Elementary School na kalahok sa QC Gabay Aral, isang programang nagsasagawa ng tutoring para sa Math at Reading. (PAUL JOHN REYES)
Maharlika Fund lusot na sa Senado
LUSOT na sa ikatlo at pinal na pagbasa ng Senado ang panukala para sa pagbuo ng Maharlika Investment Fund (MIF) na sinertipikahang urgent ni Pangulong Ferdinand Marcos Jr.
Sa botong 19-2-1, ipinasa ng Senado ang Senate Bill No. 2020 o Maharlika Investment Fund Act of 2023.
Sina Senate Minority Leader Aquilino “Koko” Pimentel III at Sen. Risa Hontiveros ang bumoto kontra sa panukala habang nag-abstain si Sen. Nancy Binay.
Wala naman sa ginanap na botohan sa plenaryo na inabot ng madaling araw sina Pimentel, Senators Chiz Escudero at Imee Marcos.
Sa bersyon ng Senado, ipagbabawal na mag-invest sa MIF ang SSS, GSIS, PhilHealth, Pag-IBIG, OWWA at Philippine Veterans Affairs Office.
Bagama’t noong una ay inalis na sa Senate Bill 2020 ang probisyon sa paggamit ng pondo ng GSIS at SSS, malinaw namang nakasaad sa Section 12 ng panukala na maaari pa ring mamuhunan ang mga GFIs at GOCCs sa MIF lalo na kung ito ay aaprubahan ng kanilang board.
Nagmosyon naman sina Sens. Ronald “Bato” dela Rosa, Raffy Tulfo at Pia Cayetano na amyendahan at magsingit ng probisyon na titiyak na hindi magagalaw ang pension funds ng government at private sector employees.
Iginiit naman ni Sen. Sherwin Gatchalian na tanggalin ang Bangko Sentral ng Pilipinas (BSP) dividends bilang source ng pondo sa unang dalawang taon ng MIF, pero ibinasura ito ni Sen. Mark Villar.
Tinanggap naman ni Villar ang panukala ni Hontiveros na idiskuwalipika sa MIF Board of Directors ang sinumang may nakabinbing kaso na may kinalaman sa fraud, plunder, corrupt practices, money laundering, tax evasion at iba pa.
Kasunod nito, inadopt na ng Kamara sa bicameral conference committee meeting ang bersyon ng Senado sa MIF Bill. Tuma-gal lamang ng 20 minuto ang ginanap na pulong ng bicam sa Manila Golf & Country Club sa Makati.
Kapag naratipikahan na ay diretso na ito sa tanggapan ng Pangulo para malagdaan. (Daris Jose)
PBBM, hinikayat ang mga magulang na pabakunahan ang kanilang mga anak laban sa tigdas, tigdas-hangin, polio
HINIKAYAT ni Pangulong Ferdinand R. Marcos Jr. ang mga magulang na pabakunahan ang kanilang mga anak laban sa tigdas, tigdas-hangin at polio.
Sa isang video na naka-upload sa kanyang official Facebook page, sinabi ng Pangulo na dapat na samantalahin ng mga magulang ang Department of Health’s (DOH) month-long “Chikiting Ligtas” program na naglalayong protektahan ang kanilang mga anak mula sa vaccine-preventable diseases.
“Bilang mga magulang, nasa atin ang responsibilidad na proteksyunan ang ating mga anak laban sa sakit. Hangad po nating magkaroon ng ligtas na kapaligiran at malusog na pangangatawan ng bawat batang Pilipino,” ayon sa Pangulo.
“Kaya ngayong buwan ng Mayo, makiisa po tayo sa kampanya ng Kagawaran ng Kalusugan laban sa tigdas, rubella at polio,” dagdag na wika nito.
Ang nationwide Chikiting Ligtas 2023 ay naglalayong bakunahan ang 95% ng kabuuang populasyon na mga bata na ang edad ay mula 0 hanggang 59 buwang gulang laban sa polio at 9 hanggang 59 buwang gulang laban sa tigdas at tigdas-hangin.
Tiniyak naman ni Pangulong Marcos sa mga magulang na ang bakuna laban sa nakahahawang sakit ay “libre, ligtas at epektibo.”
“Libre, ligtas at epektibo ang mga bakunang ito kaya wala po kayong dapat ikabahala. Magtungo lamang po tayo sa pinakamalapit na health center o mga itinalagang vaccination site sa ating barangay ,” ani Pangulong Marcos.
“Huwag po nating hayaang malagay sa panganib ang ating mga anak dahil sa tigdas, sa rubella, o sa polio. Tiyakin po nating mabakunahan ang mga kabataan sa ilalim ng ating Chikiting Ligtas program ,” dagdag na wika ng Panvulo.
Samantala, nasa pangalawang puwesto naman ang Pilipinas sa East Asia and the Pacific Region at pang-apat naman sa buong mundo pagdating sa mga bansang mayroong mataas na bilang ng mga bata na may zero vaccination doses sa pagitan ng 2019 at 2021, ayon sa data mula sa United Nations International Children’s Emergency Fund. (Daris Jose)