NAGPAHAYAG ang Department of Transportation (DOTr) na magkakaron ng karagdagan gastos ang konstruksyon ng Metro Rail Transit Line 4 dahil sa pagbabago ng design at technology na gagamitin.

Ang pamahalaan ay kinakailangan gumastos ng kabuuang P87 billion upang matapos ang civil works at ang pagbili ng systems at trains na gagamitin sa MRT 4. Ang dating kinakailangan pondo nito ay nagkakahalaga lamang ng P59.3 billion.

Maglalaan ang DOTr ng P2.32 billion para sa paunang trabaho ng MRT 4 habang ang malaking halaga na P1.03 billion ay gagamitin sa structural demolition at site clearing operations sa mga lugar na dadaanan.

Magbabayad ang DOTr ng $865 million o P48 billion sa mga contractors na siyang gagawa ng depot, istasyon, main line at receiving substations. Magdadagdag pa ng budget ang DOTr para gamitin sa 600-meter na elevated walkway na magdudugtong sa MRT 4 at MRT 3.

Gagastos din ang DOTr ng $864 million o P37 billion para sa electromechanical at track works kasama na ang supply ng rolling stock ng MRT 4.

“The cost of the project has gone up due to the technical changes made by Spanish multinational IDOM in its consultancy work. It has increased due to the change in technology after the consultant conducted an update of the demand study,” wika ni MRT project manager Jumar Ramos.

Ayon kay Ramos na wala pang finalization kung magkano talaga ang itataas ng project cost. Kapag nalaman ang final na costing, ang Department of Finance (DOF) ay gagawa ng adjustments sa loan request ng pamahalaan para sa MRT 4.

Ang proyekto ay co-funded ng Asian Development Bank (ADB) at Asian Infrastructure Investment Bank. Ang pamahalaan ay may pending na $900 million request mula sa ADB upang bigyan pondo ang konstruksyon ng MRT 4.

Magpapadala ang ADB ng fact-finding team mula Aug. 25 hanggang 31 at magkakaron din ng management review sa darating na Oct. 30.

Umaasa ang pamahalaan na malalagdaan ng ADB ang loan contract ng MRT 4  sa looba ng taon ito sapagkat magsisimula na ang procurement ng contractors sa katapusan ng 2023.

Sinabi ni Ramos na ang pamahalaan ay nagsusulong sa kanilang plano na ang MRT 4 ay maging isang heavy metro rail system na may rapid-transit structure tulad ng Light Rail Transit Line 2 (LRT 2).

Sa unang plano, ang DOTr ay gustong gawin ang MRT 4 na isang monorail system na nangangailangan lamang ng konting space para sa kanyang operasyon. Subalit nagdesisyon ang DOTr na sundin na lamang ang recommendation ng IDOM na gawing metro rail upang masiguro na ang passenger demand ay mabigyan ng sapat na serbisyo.

Nakalagay sa timetable na dapat ang DOTr ay simulan na ang early works sa unang quarter ng 2024. Habang sa pagitan ng 2023 at 2024 ay dapat mayron ng project management consultancy para sa proyekto at nagkaron na ng bid contract packages para sa civil works at railway systems kasama ang trains.

Nakalagay din sa timeline na dapat ay may full operasyon na sa taong 2028. Mayron 12.7 kilometers ang MRT 4 na may 12 estasyon na dadaan sa 2 lungsod ng Metro Manila tulad ng Quezon City at Pasig City kasama rin ang 2 bayan sa Rizal tulad ng Cainta at Taytay.

Ang nasabing railway na idudugtong sa MRT 3 at Metro Manila Subway ay makakabawas ng travel time mula Quezon City papuntay Taytay at Ortigas ng 30 minuto. LASACMAR

MAS MAKIKINABANG umano ang mga mananakay sa sandaling maisabatas ang motorcycle law dahil makakahikayat pa ito ng pagpasok ng motorcycle companies sa bansa.

Ito ang sinabi ni Grab Senior Executive Vice President Lim Yew Heng sa joint public hearing ng Senate committees on Public services and Local government kaugnay sa panukalang pag-regulate at gawing legal ang motorcycles for hire at pagsiguro na ligtas at affordable ito bilang pampublikong sasakyan.

Ayon pa kay Lim, na ang well regulated at inclusive framework para sa motorcycle taxis sa bansa ay magkakaroon ng magandang benepisyo.

“Passing a law that regulates motorcycle taxis stabilizes the regulatory environment, which will encourage healthy competition,” pahayag pa ng ehekutibo ng Grab na lumipad pa mula Singapore para makadalo sa pagdinig na pinamumunuan ni Senador Grace Poe.

Kapag mabilis umanong naisabatas ang nasabing panukala ay mas makakabuti sa mga consumer na sa ilalim ng kasalukuyang setup ay makakapili lamang sa tatlong motorcycle companies.

Ang tatlong kumpanya ay ang Angkas, Joyride at Move It na pinapayagang na tumakbo sa mga lansangan sa Metro Manila sa ilalim ng provisional authority na inisyu ng Department of Transportation.

MAHIGPIT na ipinatutupad nina Gob. Daniel R. Fernando at Bise Gob. Alexis C. Castro ang kanilang direktiba kaugnay sa istriktong implementasyon ng panlalawigang ordinansa laban sa sobra-sobrang karga ng trak at proteksyon sa kapaligiran sa ginanap na pulong sa Balagtas Hall sa Hiyas ng Bulacan Convention Center dito kamakailan.

Ipinaalala ni Fernando sa daan-daang stakeholders na dumalo kabilang ang haulers, may-ari ng processing plants, quarry permittees at operators sa Bulacan na sundin ang mga batas tulad ng Panlalawigang Ordinansa C-005 at Panlalawigang Ordinansa 64-2018 at iba pa upang maiwasan ang pagharap sa mga multa at parusa kaugnay ng pagkasira ng imprastraktura at kapaligiran.

“Hinihiling ko po sa inyong lahat na sumunod kayo sa itinakdang regulasyon. Gawin po natin legal ang operasyon at naayon sa batas para hindi na rin po kayo maabala. At ‘yung mga mahuhuli na hindi tumatalima, harapin din po ninyo ang karampatang parusa para sa inyong nagawang paglabag,” ani Fernando.

Tinalakay din ni Abgd. Julius Victor C. Degala, pinuno ng Bulacan Environment and Natural Resources Office, ang laganap na isyu sa excessive volume o labis na mga karga ng in-transit vehicles na nakasisira ng pampublikong kalsada.

Aniya, ang pinapayagang volume o bigat ay depende sa quarry materials hauled (20-24 cu.m. o MT na nakalagay sa Delivery Receipt hanggang sa maximum nito na 28 cu.m. o MT bilang konsiderasyon) at ang karga ay dapat nasa orihinal na sidings at mayroong takip.

Binigyang-diin din niya ang kahalagahan ng pagkakaroon ng kumpletong dokumento kapag nagbibiyahe ng mga karga tulad ng mga mineral o produkto ng quarry na nakalagay sa Delivery Receipts (DR) at Transport Slips (TS) upang makadaan sa publikong kalsada sa lalawigan.

Ipatutupad rin ang nasabing regulasyon sa ibang mga trak mula sa malalapit na probinsya na nangangailangang dumaan sa Bulacan patungo sa kanilang destinasyon.

Iprinisinta din ni Abgd. Degala ang kitang nakolekta ng BENRO mula sa P68,251,596.79 (Enero hanggang Abril 2022) hanggang P78,067,259.50 koleksyon (Enero hanggang Abril 2023), na mayroong 14.37 % na itinaas kumpara sa parehong panahon noong nakaraang taon.

Ayon pa sa abogado, sa pagsasagawa nila ng panghuhuli sa mga trak na may karga na labis ang timbang katuwang ang PNP at iba pang ahensiya mula Enero hanggang Abril, 46 na trak ang nahuli at kumita ang probinsiya ng P300,000 para sa multa at noong May 1-12, 51 trak ang hinuli at nakakolekta ng P280,000 na multa kung saan sumama pa ang gobernador sa pagsasagawa ng ispesyal na operasyon.

Dumalo rin sa pulong sina Provincial Director PCOL Relly B. Arnedo ng Bulacan Police Provincial Office na kinatawan ni PMAJ. Almer Eustaquio, Provincial Legal Officer Abgd. Gerard Nelson C. Manalo, Panlalawigang Tagapangasiwa Antonia V. Constantino at mga Bokal Raul A. Mariano at Arthur A. Legaspi. (BISHOP JESUS “JEMBA” M. BASCO)