NAGLAAN  ang Department of Labor and Employment ng inisyal na P455.6 milyon para sa implementasyon ng emergency employment program sa Central Luzon at CALABARZON, na sinalanta ng bagyong ‘Karding’ noong nakaraang linggo.

Sa pamamagitan ng programang Tulong Panghanapbuhay sa Ating Disadvantaged/Displaced Workers (TUPAD), ang mga manggagawa sa impormal na sektor sa nasabing mga rehiyon ay magtatrabaho ng hindi bababa sa 10 araw upang tumulong sa paglilinis, pagtanggal ng mga bara sa kanal, paghihiwalay ng mga debris, at iba pang aktibidad na kailangan sa rehabilitasyon ng kanilang mga komunidad.

Nangako si Labor Secretary Bienvenio E. Laguesma na patuloy na susuportahan ang mga manggagawang naapektuhan ng bagyo.  Kanya ring tiniyak ang pagbibigay ng karagdagang pondo mula sa TUPAD kung hindi sapat ang inisyal na alokasyon at binigyang-diin ang pinahusay na implementasyon ng programa sa pagbibigay ng pagsasanay sa mga benepisaryo.

Ipinahayag ni DOLE Central Luzon Regional Director Geraldine M. Panlilio na naglaan ng kabuuang P365 milyon para sa implementasyon ng programa sa pakikipagtulungan ng lokal na pamahalaan at ng kani-kanilang Public Employment Service Office (PESO) sa rehiyon.

Ayon kay Panlilio, may 14,000 benepisyaryo ang kasalukuyang nasa ilalim ng programa, habang 29,000 iba pa ang nakatakdang magtrabaho sa susunod na linggo. Nagbigay rin ang DOLE Regional Office ng sahod sa 31,333 benepisaryo ng TUPAD sa Bulacan, Tarlac, at Bataan matapos ang pananalasa ng bagyo noong nakaraang linggo.

Upang maitaas ang kasanayan ng mga benepisaryo ng emergency employment, sinabi ni Panlilio na ang DOLE Central Luzon ay nakipag-ugnayan sa Technical Education and Skills Development Authority (TESDA) para sa pagbibigay ng carpentry skills training sa mga manggagawa ng Bulacan, Aurora, at Nueva Ecija.

“Hindi lamang magtatrabaho ang mga benepisyaryo sa loob ng 10 araw, sasailalim din sila sa pagsasanay sa pagkakarpintero. Sa ganitong paraan, hindi lang sila magtatayo ng sarili nilang mga bahay, kundi maaari na rin silang makapagtrabaho sa mga construction company,” ani Panlilio kasabay ng pagpapahayag na in-demand ang construction skills dahil sa maraming construction projects sa rehiyon.

Samantala, sinabi ni DOLE CALABARZON Regional Director Exequiel Ronie A. Guzman na naglaan ng P90.6 milyon para sa emergency employment ng mga manggagawa sa impormal na sektor na naapektuhan ng bagyong ‘Karding’ sa rehiyon.

Makikinabang dito ang mahigit 19,800 na manggagawa sa mga naapektuhang lugar sa Polilio Island, Burdeos at iba pang bayan ng Quezon, Rizal, Laguna, Batangas at Cavite.

Ang TUPAD ay isang institutionalized program na ipinapatupad lalo na sa panahon ng kalamidad at bagyo. Ito ay isang community-based amelioration program na nagbibigay ng emergency employment sa mga nawalan ng trabaho, underemployed, at seasonal na manggagawa para sa minimum na 10 araw at hindi hihigit sa 30 araw, depende sa uri ng trabahong gagampanan. Nakabatay ang suweldo ng mga benepisyaryo sa umiiral na minimum na sahod sa rehiyon.

IDINIIN  ni House ways and means panel chair Rep. Joey Salceda ang kahalagahan ng “mas simple at mas malinaw na mga patakaran sa buwis” sa gitna ng napipintong paglilipat ng mga BPO sa Board of Investments (BOI).

Aniya, dapat gawing “mas simple” ng gobyerno ang mga patakaran sa buwis para sa mga kumpanya ng business process outsourcing (BPO) na may mga work-from-home arrangement upang mapanatili ang pag-unlad sa sektor ng BPO.

Hiniling ni Salceda sa Department of Finance at Bureau of Internal Revenue ang “pinasimple at rationalized system ng pag-require at pagpapatunay ng documentary proof” para sa mga allowable deductions sa ilalim ng Republic Act No. 11534, o ang Corporate Recovery and Tax Incentives for Enterprises Act.

Ang batas na ito ay nagpapahintulot sa mga BPO na maka-avail ng mga bawas sa mga gastos sa kuryente, mga gastos sa paggawa, mga gastos sa pagsasanay at pananaliksik at pag-unlad sa halip na ang limang porsyento na espesyal na corporate income tax rate kung sila ay magparehistro sa Board of Investments (BOI).

Idinagdag niya na ang “madali at malinaw na pagsunod sa buwis para sa mga BPO ay makakatulong na mapanatili ang paglaki ng BPO ng bansa” sa gitna ng mga pagtataya na ang industriya ay lalago taun-taon ng 8 porsiyento sa susunod na anim na taon.