2022 October Archive - People's Balita

Archive for October, 2022

Utol ni Percy Lapid kumbinsidong hindi ‘fall guy’ si Escorial

Posted on: October 21st, 2022 by @peoplesbalita No Comments

KUMBINSIDO si Roy Mabasa, kapatid ni Percy Lapid na hindi fall guy si Joel Escorial at ito mismo ang bumaril at nakapatay sa kanyang kapatid noong Oktubre 3 sa Las Piñas.

Sa kanyang pagsama sa ginawang walk through sa crime scene ng pulisya, sinabi ni Mabasa na nagkaroon siya ng pagkakataon na makausap at kuwestiyunin si Escorial at mapalitaw kung nagsasabi ito ng totoo.

Ayon kay Mabasa, kumbinsido siyang nagsasabi ng totoo si Escorial dahil sa mga mahahalagang impormasyon, pagpaplano at detalye ng pagpaslang sa kanyang kapatid.

“On the basis of what he (Escorial) said, I believe in this suspect. I believe the statements he made because the specific details he discussed are really important,” ani Mabasa.

Aminado si Mabasa na una siyang nagduda na posibleng fall guy si Escorial. Ito rin ang mga espekulasyon ng mga netizens.

Sa walkthrough din niya nalaman na nagpagupit ito bago sumuko.

Una nang sinabi ni Escorial na ang kanyang pagsuko ay bunsod ng takot na patayin at ang matinding konsensiya.

Dito na binanggit ni Escorial kay Mabasa na kinontak sila ng ‘middleman’ upang magtungo sa ‘safehouse’. Para kay Escorial ang ‘safehouse’ ay nangangahulugang pagpatay sa kanila kaya nagpasya na siyang sumuko.

Aniya, ang mahalaga sa ngayon ay matiyak ang kaligtasan ni Escorial na sumuko at handang tumulong sa pagresolba sa pagpatay sa kanyang kapatid.

Tiniyak naman ni Mabasa na hindi kilala ni Escorial kung sino ang nagpapatay sa kanyang kapatid dahil ang middleman lamang na nasa New Bilibid Prisons ang kumontak sa kanya. Sinabi ni Escorial na binayaran silang lima ng P550,000 para sa pagtumba kay Lapid. Nasa P140,000 ang kanyang nakuha.

Nanawagan din si Mabasa sa pulisya na tiyakin ang kaligtasan ng ‘middleman’ dahil ito ang posibleng nakakakilala sa masternmind.

Ibinunyag na rin ni Escorial ang tatlo pa niyang nakasama na kinabibilangan nina Edmund at Israel Dimaculangan at isang nagngagalang Orly.

Samantala, sinampahan na ng kasong murder ang suspek na si Escorial at tatlo nitong kasabwat sa Department of Justice (DOJ) kahapon.

Personal na nagtungo kahapon sa DOJ si Mabasa para sa pagsasampa ng kaso laban kay Escorial at tatlong iba pa na sina Israel Dimaculangan, Edmon Dimaculangan, at isang alyas Orly/Orlando.

Kasama ni Mabasa ang mga tauhan ng PNP-Criminal Investigation and Detective Group sa pangunguna ni Police LtCol. Joel Manual Ana, bilang complainant din sa kaso.

Sinabi ni Prosecutor General Benedicto Malcontento na isinagawa ang ‘inquest proceeding’ nitong Martes ng gabi at posibleng mailabas ang resolusyon ngayong Huwebes. (Daris Jose)

Marcos Jr. suportado ang modernisasyon ng PCG

Posted on: October 21st, 2022 by @peoplesbalita No Comments

TINIYAK ni Pangulong Ferdinand “Bongbong” Marcos Jr. na suportado ng kanyang administrasyon ang modernisasyon ng Philippine Coast Guard (PCG).

“As your leader, I assure you that this Administration will always be behind you, supportive of your efforts and initiatives to modernize the Philippine Coast Guard, which will redound to the better delivery of service to the nation,” ani Marcos sa kanyang talumpati sa 121st PCG Founding Anniversary na ginanap sa Port Area, Manila.

Nilibot din ng Pangulo ang BRP Gabriela Silang (OPV-3801), ang ikatlong pinakamalaking modernong sasakyang-dagat sa fleet ng Coast Guard.

Hinikayat din ni Marcos ang mga miyembro ng PCG na ipagpatuloy ang kanilang dedikasyon at pagpupursige sa kanilang tungkulin at responsibilidad at isulong ang pagsasakatuparan ng kanilang pananaw na maging isang world-class na tagapag-alaga ng dagat.

Ang PCG ang pinakamatanda at nag-iisang humanitarian armed service sa bansa mula nang mabuo ito noong 1901. Isa na itong attached agency ng Department of Transportation.

UP, NU ayaw bumitaw sa unahan

Posted on: October 21st, 2022 by @peoplesbalita No Comments

PATULOY ang pagsososyo ng nagdedepensang University of the Philippines at National University sa liderato sa UAAP Season 85 men’s basketball tournament.

Ito ay matapos talunin ng UP ang University of the East, 84-77, at gibain ng NU ang De La Salle University, 80-76, para sa magkatulad nilang 5-1 record kahapon sa MOA Arena sa Pasay City.

Isang 15-3 bomba ang inihulog ng Fighting Maroons sa fourth quarter para itayo ang 69-58 kalamangan sa 6:13 minuto.

Ngunit naputol ito ng Red Warriors, may 3-3 marka ngayon, sa 77-80 agwat mula sa dalawang sunod na triples ni CJ Payawal at layup ni Nikko Paranada sa natitirang 15.3 segundo.

Tumipa naman si Steve Nash Enriquez ng 16 points, 3 rebounds at 2 assists para pamunuan ang pagsakmal ng Bulldogs sa Green Archers (3-3), habang kumolekta si John Lloyd Clemente ng 16 points at 10 boards.

“Hopefully coming to second round, improve pa,” ani coach Jeff Napa. “We have to take care like our next game against FEU.”

Ito ang ikatlong sunod na panalo ng NU na winakasan din ang kanilang 10-game losing skid sa La Salle simula noong 2015.

Nauna nang tinapos ng Bulldogs ang kanilang five-year slump sa Fighting Maroons.

Samantala, umiskor si Kai Ballungay ng season-high na 21 points para sa 76-55 pagdagit ng Ateneo Blue Eagles (4-2) sa Adamson Falcons (2-4).

Philippines BEST nakapag-ensayo agad sa Dubai

Posted on: October 21st, 2022 by @peoplesbalita No Comments

HANDA na ang lahat ng miyembro ng Philippines BEST (Behrouz Elite Swimming Team) Killerwhale sa 2022 Hamilton Aquatics Short Course Swimming Championships na lalarga sa Oktubre 22 hanggang 23 sa Hamdan Bin Mohammed Bin Rashid Sports Complex.

Sabak agad sa ensayo ang 10 miyembro ng delegasyon upang masigurong preparado ang lahat bago sumalang sa pukpukang labanan.

“We just rest a bit in the morning then went on to training in the afternoon to shake off some rust. Our swimmers are all pumped up and ready to compete,” ani PH BEST delegation head Marilet Basa.

Nanguna sina Cavite pride Jarold Kesley Camique ng God The Almighty Academy-Dasmariñas at Immaculate Heart of Mary College-Parañaque standout Julia Ysabelle Basa sa dalawang oras na training sa City Towers Hotel swimming pool.

Kasama rin sina Andrae Kenzie Samontanes, Hannah Mikaela Lim at Louis Andrei Lim ng St. Joseph College of Novaliches; Kathryn Leigh Kier ng Baguio City SPED Center, Lyyld Wynn Robles ng Casa Del Bambino Emmanuel Montessori, Davidmorvyn Gillego ng Holy Trinity School of Padre Garcia, Patricia Celine De Chavez ng Anselmo A. Sandoval Memorial National High School, Reneilly Trinidad ng Calayan Educational Foundation at Master Charles Janda ng Centro Escolar Integrated School Malolos.

Bantay-sarado nina team head coach Bryan Estipona at assistant coach Christine Keith De Luna ang buong koponan.

2 bagong State-of-the-Art Buildings sa Valenzuela, itatayo na

Posted on: October 20th, 2022 by @peoplesbalita No Comments

SISIMULAN na ng Pamahalaang Lungsod ng Valenzuela sa pamumuno ni Mayor WES Gatchalian ang pagtatayo ng bago at modernized na Finance Center Building at Legislative and People’s Center Building kasunod ng isinagawang groundbreaking ng mga ito bilang sagot sa mga umiiral na isyu sa city hall.

Ayon kay Mayor Gatchalian, napanssin niya ang mga isyung naobserbahan niya nang mag-ikot siya sa unang linggo ng panunungkulan ay ang limitadong parking slots, kakulangan ng storage area, at kawalan ng disenteng cafeteria na kayang tumanggap ng humigit-kumulang 13,000 empleyado ng city hall.

Ang New Finance Center Building ay isang anim na palapag na gusali na may basement parking na may kabuuang 157 car slots at 113 motorcycle slots. Ito ay maglalaman ng mga opisinang nagbibigay ng kita ng Lungsod, tulad ng Treasurer’s Office, Business Permits and Licensing Office (BPLO), City Assessor’s Office, Geographical Information System – Data Management Office (GIS-DMO), Office of the Building Official (OBO), City Business Inspection and Audit Team (CBAT), Local Civil Registry, Zoning Office, at City Environment and Natural Resources Office (CENRO), at Valenzuela City Information and Communication Technology Office (ICTO).

Samantala, ang Legislative and People’s Center Building ay dinisenyo bilang isang apat na palapag na gusali na may dalawang basement parking. Ang bago at mas modernong Legislative building na ito ay naghihintay sa mga opisina ng Sangguniang Panglungsod ng Valenzuela, Plenary Hall, ang 100-seater food hall para sa mga empleyado, at ang mas malaki at mas magandang City Child Protection Center.

“Isang karangalan sa akin na sa first 100 days ko in office na personally ipresent sa inyo ang dalawang imprastraktura na magiging landmark in the history ng ating mahal na lungsod.” Pahayag ni Mayor WES.

Kinilala ng alkalde si Senador WIN Gatchalian sa pagtulong sa lokal na pamahalaan na makakuha ng pondo upang bigyang-daan ang bago, mas malaki, mas mahusay, at makabagong mga gusali na tutugon sa mga pangangailangan ng bawat Valenzuelano at mas mapagsilbihan ang mga nagbabayad ng buwis sa lungsod na tinawag niyang “Proyektong Kakaiba”. (Richard Mesa)

Susunod na laban ni Ancajas gagawin na sa Pilipinas

Posted on: October 20th, 2022 by @peoplesbalita No Comments

GAGAWIN na sa Pilipinas ang susunod na laban ni dating world super flyweight champion Jerwin Ancajas.

Sinabi nito na gagawin sa Pebrero 2023 ang nasabing laban.

Ang 30-anyos na si Ancajas ay galing sa pagkatalo kay Fernando Martinez noong nakarang mga linggo.

Sa mga susunod na araw aniya ay iaanunsiyo nito kung saan at sino ang makakalaban niya.

Dagdag pa nito na aakyat siya ng timbang sa 118 pound division sa susunod nitong laban.

Mayroon siyang 33 panalo, tatlong talo at dalawang draw ang record.

YUL SERVO, MANUNUNGKULAN BILANG MAYOR NG MAYNILA

Posted on: October 20th, 2022 by @peoplesbalita No Comments

PANSAMANTALANG manunungkulan bilang Alkalde ng Lungsod ng Maynila si Vice Mayor John Marvin “Yul Servo” Nieto dahil sa pagdalo ni Mayor Honey Lacuna-Pangan sa C4 World Mayors Summit na gaganapin sa Buenos Aires, Argentina.

Ayon kay Acting Mayor Yul Servo, ibinilin nito sa kanya ang pagpapanatili ng maayos, malinis at tapat nilang paghahatid ng serbisyo sa mga kapwa Manilenyo.

Nabatid din sa bise alkalde na hahalili pansamantala sa kanya si 3rd District Councilor Johanna “Apple” Nieto-Rodriguez na siya ring mauupo bilang presiding officer ng Sangguniang Panlungsod.

Hiling naman ni Servo Nieto sa mga opisyal at kawani ng lokal na pamahalaan na magkaisa nilang ipanalangin ang mapayapa at ligtas na paglalakbay ng alkalde pati na rin ang matagumpay na pakikilahok niya sa pandaigdigang summit ng mga mayor mula sa iba’t ibang sulok ng daigdig.

“Sa pagdalo ni Mayor Honey Lacuna sa C4 World Mayors Summit sa Buenos Aires, Argentina na naglalayong pagtuunan ng pansin ang seryosong usapin sa climate change at ang mahalagang responsibilidad ng mga pamahalaan na pangunahan ang mga hakbang upang tiyakin ang pagbibigay proteksiyon sa ating kalikasan, atin sanang ipanalangin ang kanyang mapayapa at ligtas na paglalakbay, gayun din ang mabunga at matagumpay na pakikilahok sa pandaigdigang summit ng mga mayor mula sa iba’t-ibang sulok ng daigdig,” pahayag ni Acting Mayor Yul Servo.

Napag-alaman na tanging ang alkalde ng Pamahalaang Lungsod ng Maynila at alkalde ng Pamahalaang Lungsod ng Quezon lamang ang naimbitahang dumalo sa tatlong araw na summit mula sa mga siyudad sa bansa.(Gene Adsuara)

Pagtanggal ng pagtuturo ng ‘mother tongue’ bilang asignatura, hindi pa pinal – Department of Education

Posted on: October 20th, 2022 by @peoplesbalita No Comments

NILINAW ng Department of Education (DepEd) na hindi pa pinal ang pagtanggal ng pagtuturo ng mother tongue o sariling dialect bilang asignatura.

Ito ay dahil kasalukuyang nakabinbin pa ang paglalabas ng final curriculum para sa Kinder to Grade 10 (K-10) program.

Ginawa ni DepEd spokesperson Michael Poa ang naturang pahayag kasunod ng naunang pahayag ni Education Undersecretary Epimaco Densing III sa planong pagtanggal ng 50 minutes Mother tongue subject para sa Grade 1 hanggang Grade 3 para ma-decongest ang kasalukuyang curriculum ng mga estudyante.

Paliwang pa ni USec. Densing na hindi na kailangan ng Mother tongue subject dahil ito ang pang-araw-araw na ring ginagamit ng mga mag-aaral na dialect sa eskwelahan, sa komunidad at sa pakikipagusap sa kanilang pamilya. Sa halip ay dapat na ilaan na lamang ang oras sa pagtuturo ng asiganaturang mother tongue sa reading at national math programs.

Subalit, ayon kay Poa na kasalukuyang nasa proseso ang DepEd ng pagkonsulta sa stakeholders, sa academe at iba pang government agencies kaugnay sa pag-review ng K-10 curriculum.

Sa halip na magpasa ng mga batas na makatutulong: Sen. ROBIN, nais ipa-ban ang K-dramas at pabor din si Sen. JINGGOY

Posted on: October 20th, 2022 by @peoplesbalita No Comments

HINDI kami pabor sa sinasabi nina Senator Robin Padilla at Senator Jinggoy Estrada na dapat i-ban ang mga K-dramas sa Pilipinas.

Sabi ni Sen. Jinggoy, kung minsan daw ay naiisip niyang solution sa pag-angat ng TV shows ay ang pag-ban ng K-dramas. Pero ito raw ay obserbasyon lamang niya.

Pareho sila ng sentiment ni Senator Robin – na ang paraan para itaas ang kalidad ng TV shows sa Pilipinas ay patayin ang competition from foreign series. Na dapat puro Filipino shows lang ang dapat ipalabas sa ating TV screens.

But is this the right solution?

May mungkahi pa si Robin na dapat taasan ang taxes na ipinapataw sa mga foreign shows na dumarating sa Pilipinas.

Mali po ito kasi paano uunlad ang quality ng TV shows natin kung iisang peg ang ating sinusundan? Dapat global na ang puntirya natin, hindi lang basta local audience.

Sa dinarami ng mga artista na naupo sa Senado at Kongreso, wala naman kahit sa kanila ang nakaisip na magpasa ng batas na makatutulong sa mga manggagawa sa entertainment industry.

Bago sila naging senador ay mga artista sila kaya alam na alam nila for sure ang mga problema sa entertainment industry – piracy, mataas na taxes, mababang pasuweldo, just to name a few.

Pero kahit isa sa mga artistang naluklok sa Senado at Kongreso ay wala nagawa para tulungan ang mga kasamahan nila sa entertainment industry. Walang naipasang batas para maibaba ang taxes o protektahan ang mga workers sa entertainment industry.

Kung sakaling may mga Pinoy shows na sumikat sa ibang lugar sa mundo, ikatutuwa ba natin kung ang iba-ban din tayo sa ibang bansa dahil sikat tayo?

Bilang mga televiewers, nasa atin ang choice kung ano ang gusto natin panoorin. Bahagi iyon ng freedom of choice.

Kaya sa halip na mag-isip kayo na ipa-ban ang K-dramas, magpasa kayo ng batas na makatutulong para umunlad ang entertainment industry.

***

NATUTUWA kami for Keempee de Leon dahil nagbabalik-pelikula ang actor.

Kasali si Keempee sa cast ng ‘I Love You, Beksman’ kung saan gumaganap siyang gay dad ni Christian Bables.

Hindi na namin matandaan when was the last time napanood namin si Keempee sa pelikula. He is one of the more competent actors of his batch at naniniwala kami na given the right material and handled by a good director, pwedeng-pwede siyang mag-excel sa acting.

Sa ngayon ay napapapanood si Keempee sa ABS-CBN series sa Netflix na ‘2 Good 2 Be True.’

Hindi namin alam kung paano na-convince ni Direk Perci Intalan si Keempee to play the gay dad of Christian sa ‘I Love You, Beksman’ pero tama naman na lumabas siyang muli sa pelikula, gay role man iyan o hindi.

Keri naman niya ang role bilang flamboyant guy na asawa ni Katya Santos sa pelikula.

We hope to see Keempee doing more movies kaya sa masundan pa itong paglabas niya sa ‘I Love You, Beksman.’

(RICKY CALDERON)

Bagong highly transmissible Omicron XBB subvariant at XBC variant, na-detect na sa PH

Posted on: October 20th, 2022 by @peoplesbalita No Comments

NAKAPAGTALA na ang Pilipinas ng bagong mas nakakahawang Omicron XBB subvariant at XBC variant ayon sa Department of Health (DOH).

Iniulat ng DOH na nasa 81 kaso ng Omicron XBB subvariant ang na-detect mula sa dalawang rehiyon sa bansa.

Ayon kay DOH officer-in-charge Maria Rosario Vergeire, nasa 70 dito ay nakarekober na, walong pasyente ang sumasailalim pa sa isolation habang ang status naman ng tatlo pang pasyente ay kasalukuyang biniberipika.

Sa kabutihang palad ay walang naitalang nasawi.

Batay sa preliminary studies, nauna ng ipinaliwanag ng DOH na ang XBB sublineage ay nagpapakita ng mas mataas na immune evasion ability kumpara sa BA.5. Ito ay nasa ilalim ng omicron subvariants na kabilang sa minomonitor ng World Health Organization (WHO).

Samantala, ang 193 kaso naman ng XBC variant ay na-detect sa 11 rehiyon.

Sa kasamaang palad, ayon kay Vergeire may limang pasyente na dinapuan ng XBC variant ang nasawi.

Nasa 176 katao naman ang nakarekober na, 3 ang sumasailalim pa sa isolation habang ang status ng iba pang pasyente ay kasalukuyang beniberipika pa ng Health department. (Gene Adsuara)