INAASAHANG makakatanggap ang mga em­pleyado ng Quezon City Hall ng tig-P10,000 bonus bilang pagpapaabot ng pasasalamat sa kanilang kontribusyon sa “sound financial management” re­cognition na natanggap ng pamahalaang lungsod sa ikalawang sunod na taon.

Mismong si Quezon City Mayor Joy Belmonte ang nag-anunsiyo hinggil sa pagkakaloob ng bonus sa mga city hall employees sa ginanap na Inter-department Dance Competition sa Quezon Memorial Circle nitong Sabado ng gabi.

Una nang inaprubahan ni Belmonte ang Ordinance No. SP-3138, S-2022, na nagkakaloob ng insentibo sa mga QC Hall emplo­yees, kabilang yaong may contracts of service, job orders at consultancy contracts.

“Ang bonus na ito ay pagkilala ng ating pamahalaang lungsod at ng ­ating Quezon City Council, sa pamumuno ni presi­ding officer at Vice Mayor Gian Sotto, sa sipag ng ating mga tauhan na nakatulong para makuha natin ang mga karangalan mula sa Commission on Audit (COA),” ayon kay Belmonte.

“Malaking tulong ang ha­lagang ito sa ating mga empleyado bilang pandagdag gastos sa pangangailangan ng kanilang mga pamilya, lalo ngayong tumataas ang halaga ng ilang pangunahing bilihin,” dagdag pa niya.

Inatasan na ni Belmonte ang City Budget Officer na ­ilabas na ang kinakailangang pondo para sa naturang insentibo.

Nabatid na inaprubahan ng Quezon City Council ang naturang ordinansa matapos na umani ang city government ng “unqualified opinion” mula sa Commission on Audit para sa mga taong 2020 at 2021.

Ang ‘unqualified opinion’ ay ang pinakamataas na audit opinion na maaaring ibigay ng COA sa isang ahensiya ng gobyerno. (BISHOP JESUS “JEMBA” M. BASCO)

INAASAHAN  na ng World Health Organization (WHO) ang pagtaas ng mga bagong kaso sa iba’t ibang panig ng mundo sa mas malamig na panahon na magiging dahilan ng indoor activities habang nasa ilalim ng pinaluwag na health protocols.

Sa lingguhang briefing, sinabi ni WHO Director-General Tedros Adhanom Ghebreyesus, ilang bansa na sa Europa ang nag-uulat ng pagtaas ng mga kaso ng COVID-19 na humantong din sa mas maraming naoospital at pagkamatay.

Sinabi ni Ghebreyesus na ang Omicron pa rin ang karamihan sa impeksyon, bagamat may sinusubaybayan pa rin na 300 subvariants ang mga scientists.

“So, we continue to call on all countries to increase surveillance, testing and sequencing, and to ensure the most at-risk groups are vaccinated,”panawagan ni Ghebreyesus.

Hinimok naman ni Infectious diseases specialist Dr. Rontgene Solante ang publiko na magpa-booster na dahil karamihan sa mga pasyente na naospital ay walang booster shots.

Sa Pilipinas, nasa 93.81 % ng 73.3 milyong Pinoy ang fully vaccinated nitong Oktubre 6, subalit nasa 25.62 % ng general population ang nabigyan ng first booster o 20 milyong Pinoy.

Bumababa na aniya ang immunity ng mga naturukan lalo na sa may anim na buwan nang nakalipas bakunahan kaya dapat na maging maingat at magsuot ng face mask, ani Solante.

Samantala, hinikayat din ni Ghebreyesus ang publiko na magpasaksak ng flu vaccine dahil nagsisimula na ang panahon ng Northern hemisphere influenza.