NAGSIMULA na ngang mag-shooting na may working title na ‘Socmed Ghosts’, na isang horror, tragedy and drama movie na ipo-produce ng Kapisanan ng Social Media Broadcasters ng Pilipinas, Inc. na kung saan ang founder ay si Dr. Michael Raymond Aragon.

Si Chase Romero nga ang napiling bida ng pelikula na kung saan gagampanan niya ang role bilang Desiree, na isang nerd at inililihim ang taglay na third eye.

Makakasama niya ang apat pang kaibigan na sina Alice, ang vlogger tungkol sa foods at may pagka-street wise; Mazy, na maarte mag-vlog at mahilig sa mga make-up content, Jason, content creator na may pagka-coño, at Ding, ang internet sensation na gwapo at may malaking following.

Dahil sa isang project sa Social Media at nagkaisa sila na kumuha ng isang bahay/condo para dun sila magtrabaho. May condo na ‘di ginagamit ang uncle ni Jason at pinahiram na lang muna sa kanila.

Sa kanilang pagpasok sa building, naramdaman agad ni Desiree ang mga kakaibang mga spirits sa building pero hindi nya ito sinabi sa grupo dahil takot sya na ma-bully.

Pagdating nila sa unit na pinahiram sa kanila, nagustuhan ito ng grupo pwera kay Desiree. Pinangalanan nila itong ‘Socmed House’.

Sa unang gabi ng kanilang pagtira sa SH, may mga bagay sila na pinagtataka. Una na ay kung bakit kokonti ang nakatira sa building.

Nagtaka sila kung bakit laging namamatay ang AC. Napansin ni Mazy na gumalaw ang baso sa mini bar, yun pala tinakot lang siya ni Ding. Si Alice naman ay pumunta sa banyo at namatay ang ilaw habang siya ay nakaupo sa bowl. Akala niya ay pinaglalaruan lang siya ng mga kasama. Pero paglabas niya, nakita nya na puro tulog na ang mga ito.

Kinabukasan, habang nag-aalmusal ang grupo, pinag-usapan nila ang mga kababalaghan na nangyayari sa SH. Napilitan si Desiree na aminin na may kakayahan sya na makakita ng multo at ito ay kanyang ipinaliwanag.

May paraan upang makita nila ito. Ayon sa ibang mga ghost hunters, may pagkakataon na sa CCTV ay nakikita ang mga multo.

Napagkasunduan nila na ito ay gawin at nag-install ng app si Jason para makita ang CCTV footage sa kanyang cellphone.

Sa kanilang pagkagulat, nakita nila na kung saan sila nandun, may mga nakapaligid sa kanila na apat na multo! Nagtakbuhan sila lahat palabas ng condo at pati na rin sa building.

Nagtalo ang grupo kung aalis na ba sila sa unit o mananatili pa. ang sinabi ni Desiree, may mga multo na kaya lang sila nananatili sa mundo ay dahil may injustice pa na hindi nasasagot.

Sa maayos na usapan, ito ang napili nila na maging project nila. May sinasabi sa mga ghost hunting Vlogs na kung ilalagay sa reverse exposure o infrared ang cellphone camera, maaari itong makakita ng multo. Nagkasundo sila na kakausapin na nila ang mga multo sa pamamagitan ni Desiree.

Pagsapit ng gabi, naghanda sila para makausap ang mga multo at narinig ang kanilang mga hinaing:

Si Paul (EJK ghost) na biktima ng EJK ay na-frame up lang kaya hinuli ng tokhang. Ito ay dahil sa Brgy. Captain na hindi niya nakasundo at pinag-initan lang siya.

Si Cassandra (prosti ghost) na dahil naging biktima ng panggagahasa ng sariling ama at ibinenta sa casa ay naging prostitute. Namatay sya dahil sa sadistang customer.

Si Pedro (poverty ghost) na dahil sa kahirapan ay natutong kumain ng mga pagpag o mga tira ng mga restaurant. Nalason sya at namatay.

Si Joey (climate change ghost) na namatay sa baha sa Tacloban. Isa siyang environmentalist na lumaban sa illegal logging. Sa kanyang pag-inspection ay inabot ng bagyo at baha kaya siya binawian ng buhay.

Bawat kaluluwa sa SH ay inaasahang mabibigyan ng hustisya sa tulong magkakaibigan at makatawid na sa kabilang buhay. At makatulong pa sa ibang nangangailangan.

Ayon kay Dr. Aragon, apat na direktor ang napili nilang magsanib-puwersa sa advocacy indie movie na ito, na inaasahang matatapos ngayong Oktubre at maipapadala sa mga international film festivals sa buong mundo.

(ROHN ROMULO)

AKSIDENTENG nagkaroon ng butt exposure si Diego Loyzaga sa ‘Pabuya’, na dinirek ni Phil Giordano for Vivamax pero hindi naman ito big deal sa anak nina Teresa Loyzaga at Cesar Montano.

Ayon kay Diego, maingat naman daw ang kanilang director sa pagkuha ng mga sexy scenes, which were quite a plenty sa ‘Pabuya’.

Parang every 15 minutes ay may sexy scene na ipinalalabas. Pero maganda rin naman ang kwento ng ‘Pabuya’ which is about betrayal. And what can a person do for money.

Masalimuot ang kwento nito pero maayos naman itong naipahayag ng director.

Dahil marami siyang fight scenes sa movie, Diego expressed desire na magawa ng isang matinding action film.

***

AMINADO si Gold Aceron na nahirapaan siyang mag-portray ng bulag character sa latest film niyang Selena’s Gold.

“First time ko kasi gumanap ng ganitong klaseng role kaya kahit sa bahay ay sinubukan kong magpraktis maglakad ng nakapikit ang mga mata ko,” kwento ng actor sa recent presscon ng pelikula.

“Binasa kong mabuti ang script at inaral ko talaga paano kumilos ang isang bulag. Mas mahirap gawin ang role dahil hindi ko pa ito na-experienced. Sa tenga lang ako dumedepende kung paano ang gagawin.

“Challenging ang role kasi di ko alam kung paano ba mag-isip ang bulag. Wala akong idea, unlike sa mga ibang roles na nagawa ko na dati na may idea ako sa character na ginagampanan ko,” dugtong pa ni Gold.

Sabi pa ni Gold, sana raw ay naitawid niya ang role na ginampanan niya sa Selena’s Gold.

Kasama rin sa cast ng ‘Selena’s Gold’ sina Jay Manalo, Angeli Khang at Soliman Cruz.

***

NAPAPANAHON ang stage play na “Ward 448” na tumatalakay sa HIV mula sa panulat at direksiyon ni Rodel Mercado.

Ayon kay Direk Rodel, na head ng Frontline Productions, gusto niya na mawala ang stigma sa mga HIV victims at magkaroon ng compassion para sa may sakit.

Gusto rin niya na makapaghatid ng information about HIV sa mga paaralan.

Bida sa play sina Carla Mae, Anna Escobia, at Justine Torralba, Kevin Posadas, Rey Correjado, at seasoned actors Ronnie Martinez at Roeder Camanag.

Ayon kay Direk Rodel, natabunan in terms of awareness ng Covid 19 ang HIV kaya kaya dapat na muli itong dapat mapag-usapan. Importante rin na magkaroon ng awareness ang mga bata, lalo na ang teenagers, sa kahalagahan ng sex education at kung ano ba ang dapat malaman sa sakit na HIV.

May kaibigan si Direk Rodel na nagkaroon ng HIV. Nakita niya ang struggle nito kaya naging advocacy niya ang HIV awareness. Nais din niya na thru awareness and proper education about HIV ay matanggal ang stigma na ikinakabit sa mga may sakit ng HIV.

“Pwede pa rin naman mabuhay ang isang person na nag-positive sa HIV basta ito ay naagapan at nagamot. Pwede pa rin nanan siyang mamuhay as a normal person, just like everybody else, kahit na may HIV siya,” sabi pa ni Direk Rodel.

Nang ipalabas raw nila ang play sa isang school ay maganda ang response ng mga bata pero sabi ng mga ito ay eye-opener ang kanilang napanood.

Ipalalabas ang “Ward 448” sa RCBC Theater on October 29 and 30 (with 3 pm matinee), at 7 pm.

(RICKY CALDERON)

ILAN sa mga hirit sa bagong mommy na si Angelica Panganiban ng mga kaibigan niya, sinalo raw nito ang lahat ng blessings.

Kasi nga naman, natupad na ang matagal na niyang pangarap na maging isang ina. Pero ‘yun pala, hindi lang pagiging ina ang nagkaroon ng katuparan, isang legit na pamilya na dahil ikakasal na rin siya sa partner at daddy ng anak niya na si Greg Homan.

Nag-propose si Greg sa kanya buntis pa si Angelica at ngayon lang nila inilabas sa kanilang Youtube channel. Lumuhod si Greg kay Angelica habang nasa beach sila at saka sinabi na, “Love ko, maraming paraan para sumaya sa buhay na ‘to, pero ikaw lang ang kailangan ko. Angelica David Panganiban, will you marry me?”

Noong una ay nag “no,” then, “I don’t know” na sagot pa si Angelica at saka hagulgol na yumakap kay Greg at sinagot na, “yes, I love you.”

Iyak nang iyak si Angelica sa kaligayahan at sabi nga niya, “I love you forever nang paulit-ulit” kay Greg.

Pinuri naman ng mga netizens ang naging proposal nila. ‘Yun daw ang perfect proposal. Silang dalawa lang, walang production number, walang maraming arte at kung ano-ano pang ka-echosan.

***

MAY dahilan para maging proud ang Kapuso star na si Luke Conde dahil siya ang bagong endorser ng Hanford.

Eh, known ang Hanford sa mga kinukuhang mga celebrity endorsers ay talagang mga sikat na like sina Dingdong Dantes, Geoff Eigenmann at iba pa noon. Recently ay nag-Mikael Daez at Vin Abrenica rin.

So, si Luke nga ang bago na maituturing na isa pa rin baguhan. Pero ayon sa mga taga-Hanford na part ng marketing strategy nila na si Luke ang kuhanin at gusto raw nilang makasama o makatulong din sa pagsikat nito.

Bongga!

Kaya sey ni Luke na ang huling proyektong ginawa sa GMA ay ang very successful na ‘Lolong,’ “I feel very honored po talaga knowing ba ‘yung mga nauna po sa akin ay may mga napatunayan na sa industry and I feel humbled at the same time na pinagkatiwalaan ako.

“I’m still on this part of my career na parang nag-uumpisa pa rin ako. I’m just blessed to be considered.”

Sa isang banda, hindi raw threatened si Luke na sa paglipat niya sa GMA, mas marami rin na naglipatan na sa network na ibang stars.

Katwiran niya, alam daw niya na being part of Sparkle ay hindi rin naman siya pababayaan.

“Kasi po simula naman ng lumipat ako, hindi naman po sila nagpabaya. And kung may mga dumating, they’re all welcome naman and ang maganda lang, you have to improve yourself pa rin.”

At sa mga Kapuso stars, ang palagi raw niyang sinasabi na gusto niyang makasama ay sina Rhian Ramos, Klea Pineda at Thea Toletino.

(ROSE GARCIA)