2022 July 05 Archive - People's Balita

Archive for July 5th, 2022

Flood control project ng MMDA nakumpleto na

Posted on: July 5th, 2022 by @peoplesbalita No Comments

NATAPOS na ngayong taon ang kabuuang proyekto sa flood control ng Metropolitan Manila Development Authority (MMDA) na una nang binanggit ng Commission on Audit (COA) na naantala noong 2021.

Ipinaliwanag ni Engineer Baltazar Melgar, pinuno ng MMDA Flood Control and Sewerage Management Office (FCSMO), at kasalukuyang officer-in-charge ng MMDA, ang naka-program na 59 flood control projects sa Metro Manila para sa 2021 ay hindi natapos dahil sa pandemya at iba pang kadahilanan gaya ng mga isyu sa right-of-way; relokasyon ng mga pamilyang informal settler; pagbabago sa pagkakasunud-sunod dahil sa karagdagang mga item/realignment ng mga aktibidad batay sa kasalukuyang sitwasyon/kondisyon sa site sa pagpapatupad; at mga paghihigpit sa mobility ng manggagawa at kagamitan na dala ng pandemya.

Tiniyak ni Melgar na ‘operational and serviceable’ na ngayong taon na unti-unti nang bumabalik sa normal ang sitwasyon.

Ngayong tag-ulan na, ang lahat na 77 pumping stations ng ahesnya sa Metro Manila ay gumagana sa full capacity, aniya pa.

Gayundin, ang flood-mitigation activities para sa declogging at paglilinis ng daluyan ng tubig tulad ng mga estero at sapa na buong taon ginagawa. (Ara Romero)

Sobrang bastos, kaya ‘di napigilan na patulan: JANNO, minura ng isang netizen dahil sa pagbabayad ng tax

Posted on: July 5th, 2022 by @peoplesbalita No Comments

DAHIL sa IG post ni Janno Gibbs tungkol sa pagbabayad ng tax, minura siya ng isang netizen,

Sa post ng singer-comedian, “Bayaran na naman ng Tax.

“Buti pa mahirap, walang babayaran.

“Buti pa mayaman, maraming paraan.

“Kawawa middle class, walang takas.

“Buti na lang wala akong trabaho (rolling on floor emojis).

“Buwis-et (laughing emoji).”

Ni-repost ni Janno sa Instagram account niya ang isang Facebook post ng netizen na kung saan minura-mura siya.

Sabi ng matapang na basher na sinasabing solid supporter ni Pangulong BBM at VP Sara, “Hoy Janno Gibbs lahat tayo ay nagbabayad ng tax b*w*k*ng i*a ka moving on.”

Hindi nga napigilang patulan ni Janno ang basher na ganun-ganun na kung makapanlait ng kapwa.

Kaya naman bumuwelta ang TV host…

“Ganito na ba talaga tayo ngayon? (disappointed faces emojis).

“Oo vocal ako sa mga social at political views ko. Pero laging mahinahon, disente at may halong komedya.

“Dahil sa vocal ako, alam kong may kaakibat itong kritisismo at open ako dito. Handa ako sa masinsinang diskurso.

“Yun nga ang pakay ko e. Basta’t disente ang usapan.

“Pero kung bastos ka, marunong din ako nu’n, P*k*n*ng i*a mo ka!”

Kasama ang mga hashtags #paumanhinsalenguahe at #yunlangnaiintindihannila.

Umapaw naman ang komento sa IG post ni Janno at magkakaiba man ang naging reaksyon ng mga netizens, mas marami ang kumampi sa kanya at nagsabing ‘wag na lang patulan ang mga trolls at mag-stoop down sa kanilang level.

Say nga isang netizen, “BBM at Sara supporter din ako pero dapat hindi ganyan kaloka, respeto pa jusko mga tao talaga ngayong tsk!”

“Nakakasuka na talaga kabastusan ng iba dyan… napaghahalata talaga mga walang breeding.”

“BBM/SARA ako pero grabe naman yan. Parang walang respeto at pinag-aralan. Pagpasensyahan niyo na po sir idol Janno.”

“Haist people now a days… nanalo na nga mga manok nila pero putak pa din ng putak.”

“You’re just voicing out… ano naman??? mga tao ngayon makapag-comment lang bastos pa… busseetttt!”

“Fight lang sir. Hayaan mo silang ma-highblood sa mga posts mo. Parang sila ang may-ari ng Pilipinas mga impakto na yan.”

Na sinagot naman niya ng, “Salamat! Respetado at tanggap ko ang BBM/Sara supporters.”

(ROHN ROMULO)

DICT, lilikha ng task force, complaint center kontra text scams, illegal sites

Posted on: July 5th, 2022 by @peoplesbalita No Comments

NAKATAKDANG magtatag ang Department of Information and Communications Technology (DICT) ng task force at complaint center kontra text scams at illegal sites.

Sa isang panayam, binigyang diin ni DICT Secretary Ivan Uy, ang pangangailangan na paigtingin ang paglansag sa cybercrimes.

Sa katunayan, inatasan na niya ang kanilang field personnel na agad na imbestigahan at ireport ang patuloy na operasyon ng e-sabong o online cockfighting websites.

“Dahil sa order na pagpapatigil sa online sabong… hinahabol na natin kung anong mode ang ginagamit para maipagpatuloy ang operasyon nito… We will set-up a task force to monitor ‘yung mga illegal na gumagamit ng ating teknolohiya,” ayon kay Uy.

“Magtatatag [rin] tayo ng central complaint center kung saan pwedeng i-consolidate ang mga reklamo laban sa mga text scams,” dagdag na pahayag nito.

Malaking tulong aniya kung ang SIM Card registration Act ay maipasa at maging ganap na batas sa ilalim ng 19th Congress.

Matatandaang buwan ng Abril ng i-veto ni dating Pangulong Rodrigo Roa Duterte ang SIM Card Registration Act na naglalayong magsagawa ng “mandatory registration” sa lahat ng SIM cards at social media accounts.

Gayundin, sinabi ni Uy na plano nilang maglunsad ng call center na tatanggap ng mga reklamo na may kinalaman sa serbisyo ng telecommunication providers.

“Gagawa tayo ng task force o call center na tatanggap ng mga reklamo kaugnay sa serbisyo ng mga telco… Gagawa tayo ng public score card… every month maglalabas tayo ng assessment sa performance ng telcos para mapilitan sila na ayusin o bantayan ang kanilang serbisyo,” ani Uy.

Habang may plano na palakasin ang paglansag sa cybercrimes, inamin ni Uy na mahirap arestuhin ang mga perpetrators dahil maaari pa silang buweltahan ng pagsikil sa freedom of expression.

“Ang internet is a free resource… Sa disenyo nito, it’s supposed to be open… It was designed to survive nuclear war as a form of communication… Kung gagawa tayo ng mga paraan para i-block ito, maaaring violation ito ng freedom of expression,” diing pahayag nito.

“Kung magkakabit tayo ng mga device na magse-censor sa internet, baka maakusahan tayo na nire-restrict ang freedom of expression,” aniya pa rin. (BISHOP JESUS “JEMBA” M. BASCO)

P1.7 bilyong shabu sa tea bag nakumpiska, 2 Chinese tiklo

Posted on: July 5th, 2022 by @peoplesbalita No Comments

NAKAKUMPISKA ng 260 kilo ng hinihinalang shabu na nakasilid sa tea packs at nagkakahalaga ng kabuuang P1.768 bilyon, ang mga tauhan ng Philippine Drug Enforcement Agency (PDEA), katuwang ang Philippine National Police (PNP), sa dalawang sabayang buy-bust operation sa Quezon City at Cavite kahapon.

Batay sa ulat ni PDEA Director General Wilkins Villanueva, unang naaresto ang suspek na si Cai Jia Zhu alyas Anson Chua, 41, ng Durian St., Cuevas Ville Subdivision, Molino III, Bacoor, Cavite.

Ayon kay Regional Director Christian Frovaldo, ng PDEA-National Capital Region (NCR), dakong alas-10:30 ng umaga nang isagawa ang operasyon laban kay Chua, sa kahabaan ng Maria Clara St., sa Banawe, Quezon City.

Kaagad na inaresto ang suspek at nakumpiskahan ng 40 kilo ng hinihinalang shabu na nagkakahalaga ng P272 milyon, isang unit na android phone; dalawang COVID-19 vaccination ID; driver’s license, at isang Toyota Corolla.

Samantala, dakong alas-11:30 ng umaga naman nang maaresto ang suspek na si Hai Lin, 41, sa kanyang tahanan sa Fullana St. corner Soriano St., Avida Residences, Santa Catalina, Molino-Paliparan Road, sa Dasmariñas, Cavite.

Kaagad na inaresto si Lin na nakumpiskahan naman ng 220 kilo ng hinihinalang shabu na nagkakahalaga ng P1.496 bilyon, tatlong Unit na Android phone; isang analog na telepono; isang IOS phone; isang COVID-19 vaccination ID at driver’s license.

Ang mga suspek ay nakapiit na at kapwa sasampahan ng mga kasong paglabag sa Republic Act 9165 o The Comprehensive Dangerous Drugs Act of 2002.

Paghina ng piso vs dolyar malaking epekto sa presyuhan ng oil products – DOE

Posted on: July 5th, 2022 by @peoplesbalita No Comments

MULING binigyang diin ng Department of Energy (DOE) na nakatali ang kamay ng gobyerno at walang magawa sa walang humpay na pagtaas ng presyo ng produktong petrolyo kada linggo.

Ginawa ni Atty Rino Abad, director ng Department of Energy-Oil Management Bureau, ang paliwanag sa Bombo Radyo dahil sa nakaamba na namang pagtaas sa presyo ng gasolina sa susunod na linggo.

Habang ang krudo naman at kerosina ay merong oil price rollback sa pagitan ng P2 hanggang P3 kada litro.

Paliwanag ni Atty Abad, kaya hindi ganon kalaki ang rollback ay sumabay naman daw ang pagsadsad din ng halaga ng piso kontra dolyar na malaki rin ang apekto sa presyuhan ng krudo na inaangkat ng Pilipinas sa international market.

Nadagdag pa raw dito ang wala pa ring tigil na giyera sa pagitan ng Russia at Ukraine.

Bagama’t ang Pilipinas ay hindi naman kumukuha ng suplay ng langis sa Europa at sa Russia pero tatlo hanggang apat na porsyento sa world supply ang nawawala.

Ang araw-araw daw na produksyon ng Russia ay nasa pagitan ng limang milyon hanggang pitong milyong bariles kada araw at nasa tatlong milyon ang hindi nailalabas dahil sa economic sanctions.

Kaugnay nito, ang mga European countries ay kumukuha na rin sa Middle East ng langis kung saan doon nag-aangkat naman ng suplay ang Pilipinas.

Nangangahulugan ito na lumipat na rin ang European countries sa pag-angkat ng ng langis doon sa inventory ng global storage facility.

Samantala, ipinayo naman ni Abad lalo na sa mga pampublikong sasakyan at iba pang pribadong sasakyan na tangkilikin muna ang mga gas stations na nagpapatupad ng P2 hanggang P4 na discount. (Daris Jose)

VP Sara, nagbukas ng 6 OVP satellite offices

Posted on: July 5th, 2022 by @peoplesbalita No Comments

NAGBUKAS ang Office of the Vice President (OVP) sa ilalim ni Vice President Sara Duterte – Carpio ng anim na satellite offices sa buong bansa.

Sa isang Facebook post nitong Sabado ng gabi, sinabi ni Duterte-Carpio na ang OVP satellite offices ay matatagpuan sa Dagupan City, Cebu, Tacloban, Zamboanga, Davao, at Tandag sa Surigao del Sur.

Kumpiyansa ang bise presidente na sa tulong ng mga naturang satellite offices, madaling maipapaabot ng publiko sa kanyang tanggapan ang anumang problema o concerns upang kaagad na maaksiyunan ang mga ito.

“Sa aking unang buong araw bilang bise presidente, nagbukas po tayo ng mga satellite office sa iba’t ibang bahagi ng bansa upang matulungan ang ating mga kababayan na magkaroon ng madali at agarang access sa mga serbisyong mula sa Office of the Vice President,” ayon pa kay Duterte-Carpio, na siya ring nagsisilbing kalihim ng Department of Education (DepEd).

Una nang napaulat na maayos ang idinaos na transition sa pagitan ng kampo nina dating Vice President Leni Robredo at Duterte-Carpio.

Ipinauubaya naman ni Robredo sa bagong bise presidente kung ipagpapatuloy nito ang kanilang mga programang napasimulan. (Daris Jose)