2022 April Archive - People's Balita

Archive for April, 2022

Peace covenant sa halalan, nilagdaan ng mga kandidato sa Basilan, Sulu at Tawi-tawi

Posted on: April 26th, 2022 by @peoplesbalita No Comments

LUMAGDA sa isang peace covenant ang mga kandidato sa Basilan, Sulu, at Tawi-Tawi, na isinagawa sa Basilan State College, Isabela City, Basilan nitong Sabado.

Ayon kay Atty. Ray Sumalipao, Regional Election Director ng Bangsamoro Autonomous Region in Muslim Mindanao (BARMM), ang peace covenant ay para sa sure, accurate, and free and fair elections (S.A.F.E) sa Mayo 9.

Ang aktibidad ay pinangunahan mismo ni Commission on Elections (Comelec) Chairman Saidamen Pagarungan at Comelec Commissioner Erwin George Garcia.

Kasama ring lumagda ang mga opisyal ng AFP sa pangunguna ni Western Mindanao Command (Westmincom) Commander Lt. Gen. Alfredo Rosario, Jr., na kumatawan kay AFP Chief of Staff General Andres Centino.

Lumagda rin ang mga opisyal ng PNP sa rehiyon sa pangunguna ni Area Police Command – Western Mindanao Commander Police Lt. Gen. Jose Chiquito Malayo, na kumatawan kay PNP Chief General Dionardo Carlos.

Sa kanyang mensahe, nagbigay-pugay si Wesmincom Commander Lt. Gen. Rosario sa mga kandidato sa Basilan, Sulu at Tawi-Tawi sa kanilang buong suporta sa makatotohanan, maayos, at mapayapang halalan.

“I salute all our political candidates from Basilan, Sulu, and Tawi-Tawi for your gesture of support for our quest for an honest, orderly, and peaceful election. Rest assured that your armed forces will go the extra mile to ensure that everyone is always safe and secured especially during the election period,” pahayag ni Lt.Gen. Rosario.

Kasabay nito, tiniyak ng Heneral na gagawin ng militar at pulisya ang lahat para masiguro ang seguridad ng lahat sa darating na halalan.

Una ng sinabi ni Comelec Chairman Pagarungan na nasa 12 lugar sa Maguindanao at Lanao del Sur kabilang ang probinsiya ng Basilan ang posibleng isailalim sa Comelec Control. (Daris Jose)

Kaya sinabihan na hilaw ang pagiging Kakampinks… VICE GANDA, kapansin-pansin ang ‘di pag-i-endorse kay Sen. KIKO

Posted on: April 26th, 2022 by @peoplesbalita No Comments

ISA si Vice Ganda na surprise guest sa NCR grand rally ni Vice President Leni Robredo na ginawa sa Pasay City noong Sabado.

Birthday ni VP Leni that day kaya mas special ang pagtitipon ng mga Kakampinks para sa presidential aspirant.

Pero ang napansin ng ibang dumalo sa rally ay ‘yung hindi raw pag-endorse ni Vice Ganda sa kandidatura ni Senator Kiko Pangilinan.

Kahit na raw isinisigaw ng mga tao na i-endorse ni Vice si Kiko ay hindi naman daw ito ginawa ng sikat na personalidad.

Kaya marami ang nagtaka why Vice Ganda did not endorse Kiko’s candidacy. Si Leni lang daw ang iniendorso ng It’s Showtime TV host.

Pero nung group photo naman ay tinawag ni Vice si Kiko at nagyakapan pa sila.

Sabi naman ng isang defender ni Vice, huwag daw natin pilitin si Vice na sabihin kung sino ang gusto niyang ibotong VP dahil personal choice naman daw iyon.

Pero imposible naman daw na hindi iboboto ni Vice si Kiko eh friends naman sila ni Sharon Cuneta.

Baka raw nalimutan lang ni Vice to endorse Kiko dahil focused ito kay VP Leni who is celebrating her birthday.

So dahil friends sila ni Sharon so pwedeng isipin na sure na sure na si Kiko ang iboboto ni Vice.

Dating supporter ni Pres. Duterte si Vice kaya maraming kakampinks ang natutuwa na supporter na ito ni VP Leni ngayon.

Pero ayon naman sa ilan tao, hindi kumpleto ang pagtalikod ni Vice Ganda kay Digong dahil hindi nito kinondena ang mga maling ginawa ng Pangulo while in office.

Kaya para sa iba, hilaw ang pagiging miyembro ng Kakampinks ni Vice Ganda.

***

NI-REVEAL na ni Jake Cuenca na break na nga sila ni Kylie Versoza via a photo na umiiyak siya.

Pero hindi pinalampas ng bashers ang post ng binata.

Ayon sa kanila: “Napakawalang sincerity naman yang ipopost mo pang umiiyak ka. Mas lalong plastic ang datingan. Besides ano nga ulit work mo? Ah artista. Sige na nga nasaktan ka din. So di ka na nega. Charot!”

“Yuck this is just so low! Cheap to the max! Super drama.”

“Turn off.”

Wala pang sagot si Jake sa comment ng basher.

***

OBVIOUS na wala sa kanyang sarili o parang lutang ang isip ni Kylie Versoza nang dumalo siya sa face to face presscon ng Viva for the movie Ikaw Lang ang Mahal noong Friday sa La Reve Restaurant.

Halatang Kylie is trying to put up a brand front. She is definitely hurting.

Masakit nga naman na mawalan ng minamahahal. Pero hanga rin kami sa tapang ni Kylie na pagharap sa press kahit na may chance na tanungin siya about the issue.

Pero careful si Kylie sa pagsagot ng mga tanong. Kung pwede umiwas o kaya ay maigsing sagot lang, ‘yun lang ang pinapaunlak ni Kylie.

Nirespeto naman ng press ang choice ni Kylie. Hindi naman siya masyadong inurirat. Pero may nag-try pa rin na makakuha ng sagot kay Kylie tungkol sa breakup by crafting leading questions na hindi pinatulan ni Kylie.

Actually, pwede ngang hindi dumalo si Kylie sa presscon kung gusto niya. Pwede niyang idahilan na she is hurting inside because of the breakup kaya ayaw muna niyang humarap sa press.

Pero in fairness kay Kylie, hindi siya nag-break down kahit pa medyo naapektuhan siya sa ibang mga tanong.

Kasama ni Kylie sa movie na dinirek ni Richard Somes sina Zanjoe Marudo at Cara Gonzales.

Pinuri naman ni Direk Richard ang performance ng kanyang mga artista. Mahuhusay daw lahat ang mga ito.

(RICKY CALDERON)

PAGSISIYASAT SA DI PAGBABAYAD NG VENUE SA DEBATE, TINATAPOS NA

Posted on: April 26th, 2022 by @peoplesbalita No Comments

INAASAHAN ng Commission on Elections (Comelec) na matatapos ngayong linggo ang pagsisiyasat nito sa kabiguan ng kasosyo nito na magbayad sa hotel na ginamit bilang venue para sa presidential at vice presidential debate nito, sinabi ng isang poll official noong Linggo.

Sinabi ni Comelec Commissioner George Garcia na pinangunahan ni Commissioner Rey Bulay ang imbestigasyon sa kontrobersya na nagpilit sa poll body na ipagpaliban ang huling dalawang debate sa halalan, na nakatakdang maganap ngayong weekend.

Ang pinal na Comelec-organized vice presidential at presidential debates ay ipinagpaliban sa April 30 at May 1, mula sa dating April 23 at 24.

Ipinagpaliban ang debate matapos a matuklasang ang event organizer Impact Hub Manila ay bigong mabayaran ang obligasyon nito sa Sofitel Philippine Plaza, na halagang P14 milyon.

Ayon sa Sofitel paulit-ulit silang inisyuhan ng Impact Hub ng talbog na tseke

Bulay is asking for a week to complete the probe, said Garcia. “Hopefully, bago matapos ang Friday na ito ay atin pong malalaman na kung anong result ng investigation.”ani Garcia.

Tiniyak ng komisyoner na ang poll body ay magiging “very transparent” sa mga resulta ng imbestigasyon.

“We will be very, very transparent dahil walang katumbas ‘yong transparency doon sa kahihiyan na inabot, halimbawa, initially ng Commission on Elections,” pahayag ni Garcia .

Umapela rin ito sa publiko na huwag munang magbigay ng hatol sa sinuman habang hinihintay pa ang resulta ng imbestigasyon.

Inulit ni Garcia na ang Comelec ay hindi nag-isyu ng pondo para sa debate at ipinaliwanag na ang Impact Hub Manila ay pinayagang makalikom.ng pera sa pamamagitan ng advertisements na siyang gagamitin na pambayad sa hotel.

Ikinalungkot ni Garcia na ang naturang miscommunication ay nakaapekto sa Comelec at sa integridad nito.

“Yung miscommunication ay miscommunication nila. But hindi dapat madamay ang end-user. Kung kahit na kayo’y naglalabanan, ano man ang pinanggagalingan ng inyong misinformation, miscommunication, whatsoever, ang importante hindi nadadamay yung mismong end-user,” sabi ni Garcia.

“Kasi tatandaan natin na ‘yang end-user ay isang Constitutional body na responsable sa mga mamamayan. Sa bandang huli, ang mga mamamayan ang kausap nila dito, hindi naman ang Commission on Elections lang. Pinagkatiwalaan sila ng Comelec at mga mamamayan ma-deliver ‘yan,” aniya pa. (GENE ADSUARA)

Huling Comelec presidential, VP debates hindi na itutuloy

Posted on: April 26th, 2022 by @peoplesbalita No Comments

HINDI NA matutuloy ang huling PiliPinas Forum 2022 na inihanda ng Commission on Elections (Comelec) dahil sa maraming conflicts sa schedule ng mga presidential at vice presidential candidates dulot ng unang postponement ng mga debate na nakatakda sana noong weekend.

Biyernes lang nang sabihin nina presidential at VP candidate Sen. Panfilo Lacson at Senate President Vicente “Tito” Sotto III na baka hindi sila makapunta sa debates na inilipat sa ika-30 ng Abril at ika-1 ng Mayo dahil may mga ini-schedule na sila sa mga petsang ito bago ang eleksyon.

“The Commission on Elections, in partnership with the Kapisanan ng Brodkaster ng Pilipinas (KBP), has announced that the concluding event of the Pilipinas Forum 2022 Series will no longer be Vice-Presidential and Presidential Twon Hall Debates,” wika ng poll body, Lunes.

“In consideration of the inevitable scheduling conflicts as the candidates approach the homestretch of the campaign period, and as advised by the KBP, the COMELEC will now be adopting a Single Candidate/Team-Panel interview format.”

Matatandaang hindi natuloy ang mga debate na nakatakda sana nitong nakaraang ika-23 at ika-24 ng Abril kasunod ng ilang isyu sa pagbabayad diumano sa Sofitel Hotel.

Una nang iniulat na hindi pa nababayaran ng Vote Pilipinas — na organizing partner ng Comelec — ang utang na nagkakahalaga ng P14 milyon.

Bukod pa rito, binanggit ni Sotto na nawawalan sila ng motibasyon pumunta sa rescheduled debates lalo na’t hindi naman daw dumadalo ang ilang kandidato, bagay na tila patama kina presidential at VP candidate Ferdinand “Bongbong” Marcos Jr. at Davao City Mayor Sara Duterte-Carpio.

Una nang sinabi ng kandidatong si Sen. Manny Pacquiao na dadalo lang siya sa Comelec debate kung sisiputin na ito ni Bongbong.

Dati nang hinamon ni Pacquiao si Bongbong ng “one-on-one” na debate dahil sa kanyang pag-“no show” sa mga nakaraang harapan ng mga kandidato. (Gene Adsuara)

EXHIBITION FIGHT NINA HATTON AT BARRERA TULOY NA SA HUNYO

Posted on: April 26th, 2022 by @peoplesbalita No Comments

KINUMPIRMA ni retired boxing champion Ricky Hatton na ito ay magkakaroon ng exhibition match kay Marco Antonio Barrera.

Gaganapin aniya ang laban ng dalawa sa Hunyo 2 sa AO Arena sa Manchester, England.

Ang laban ay nakatakda sanang ganapin noong Pebrero subalit ito ay hindi natuloy.

Sa kanyang social media sinabi ni Hatton na wala ng makakapigil pa.

Ang 43 anyos na si Hatton ay nagwagi ng dalawang division na itinuturing bilang darling of British boxing world habang ang 48-anyos na si Barrera ay mayroong titulo sa tatlong division.

Ito rin ang unang beses na paglaban ni Hatton ng magretiro noong 2012 noong patumbahin siya ni Ukrainian boxer Vyacheslav Senchenko.

Habang si Barrera ay nakaharap sina Daniel Ponce de Leon at Jesus Soto Karass noong nakaraang taon.

Nakilala din siya sa mga showdown niya kay Erik Morales, Pacquiao, Juan Manuel Marquez at Naseem Hamed.

Mayroong 45 panalo, tatlong talo at 32 knockouts si Hatton sa kaniyang career habang si Barrera ay mayroong 67 panalo, pitong talo at 44 knockouts.

Bulacan, nakapagbakuna ng higit 5 milyong doses ng bakuna kontra COVID

Posted on: April 25th, 2022 by @peoplesbalita No Comments

LUNGSOD NG MALOLOS – Nakapagbakuna na ang Lalawigan ng Bulacan ng kabuuang 5,240,671 doses ng bakuna laban sa COVID-19 kabilang ang una at ikalawang dosis, single doses, at booster shots noong Abril 17, 2022.

Ayon sa covid19updates.bulacan.gov.ph website, 2,281,195 Bulakenyo ang kumpleto na ang bakuna habang 2,418,385 naman ang tumanggap ng kanilang unang doses.

Tinatayang 75.68% ng 3,014,027 o 80% ng populasyon ng Bulacan ngayong 2022 ang kumpleto na ang bakuna.

Dagdag pa rito, nakapagbakuna na ang lalawigan ng 541,091 indibidwal para sa kanilang booster o karagdagang dosis.

Patuloy na pinaalalahanan ni Gobernador Daniel R. Fernando ang kanyang mga nasasakupan na huwag magpabaya dahil hindi pa rin nawawala ang COVID at mayroon pa ring mga tao na nakakakuha ng virus.

“Hindi po ibig sabihin na mababa na ang ating mga kaso ng COVID ay tuluyan na po natin itong natalo. Maaaring maluwag po ang mga restriksyon sa ngayon ngunit babalik tayo sa paghihigpit na naranasan natin noong nakalipas na dalawang taon kung hindi tayo mag-iingat. Kaya naman po, ang hiling ko sa inyo ay lubusan pa rin po tayong mag-ingat, patuloy na magsuot ng face masks at sundin ang minimum health protocols upang tuluy-tuloy na ang ating maging tagumpay laban sa pandemya,” anang gobernador.

Mula Marso 1, 2022 hanggang sa kasalukuyan, nasa ilalim pa rin ng Alert Level 1 ang lalawigan.

Samantala, naitala ng Provincial Health Office-Public Health ang 4 na karagdagang kaso ng COVID noong Abril 18, 2022 na dumagdag sa bilang ng aktibong kaso na 56.

Simula nang pandemya, nakapagtala ang Bulacan ng kabuuang 109,360 beripikadong kaso ng COVID-19, 107,627 na paggaling, at 1,677 na pagkamatay. (BISHOP JESUS “JEMBA” M. BASCO)

Presyo ng petrolyo sisipa sa higit P3

Posted on: April 25th, 2022 by @peoplesbalita No Comments

POSIBLENG sumipa sa mahigit P4 ang presyo ng kada litro ng diesel habang aabot ng hanggang P3.50 sa gasolina.

Ang inaasahang fuel prices ay dulot umano ng patuloy na giyera sa pagitan ng Ukraine at Russia.

Batay sa pagtaya, aabutin ang taas sa diesel mula P3.80 hanggang P4.10 kada litro, sa gasolina ay P3.10 hanggang 3.50, kerosene P3.40-P3.60 kada litro.

Sa oil price hike, mas malaki ang taas sa presyo ng diesel kaysa gasolina batay sa net increase.

Sa mga nakalipas na taon, ang presyo ng gasolina ang palagiang tumataas.

Samantala, patuloy naman ang pagkakaloob ng pamahalaan ng fuel subsidy sa mga pampasaherong drivers.

Tulong ito ng gobyerno para mabawasan ang gastos sa pagkakarga ng gasolina sa kanilang pamamasada sa araw-araw.

Samantala hindi pa napipirmahan ng Comelec ang resolusyon ng LTFRB na nagkakaloob ng fuel subsidy sa delivery riders dahil apektado ng Comelec ban ang ginawang pag-apruba dito ng LTFRB. (Daris Jose)

Imbestigasyon sa naudlot na town hall pres’l at vice pres’l debate, tatapusin ngayong linggo – COMELEC

Posted on: April 25th, 2022 by @peoplesbalita No Comments

TARGET ng Commission on Elections (COMELEC) na makumpleto ang imbestigasyon sa panghuli na sanang presidential and vice presidential debate ngayong April 23 at 24 na kapwa town hall format, ngunit ipinagpaliban sa susunod na linggo.

Kaugnay ito ng kabiguan ng kanilang partner na Impact Hub na bayaran ang Sofitel Plaza na siyang ginamit bilang hotel venue sa mga naunang naidaos na debate.

Sa isang panayam, inihayag ni COMELEC Commissioner George Garcia na umapela si Commissioner Rey Bulay na siyang nangunguna sa imbestigasyon na bigyan siya hanggang April 30 para aralin ang magiging paliwanag ng mga concerned parties.

Hindi aniya papalpampasin ang kontrobersya lalo’t napahiya rin mismo ang COMELEC.

Maasahan aniya na kapag napatunayang may sala ang kanilang partner, pwedeng kanselahin ang kontrata, magiging blacklisted din ang kompanya, at posibleng sampahan ng reklamo.

Sa inilabas na pahayag ng Impact Hub Manila na siyang nasa likod ng PiliPinas Debate 2022: The Turning Point, wala anilang kinalaman ang COMELEC sa naging aberya nila sa venue deal.

Kasunod ito ng rebelasyon ng hotel management na tumalbog ang tseke na inisyu sa kanila ng debate organizer kung saan umaabot umano sa P14 million ang hindi pa nababayaran.

Sa darating na April 30 at May 1 ang bagong petsa ng pinal na Comelec-organized vice presidential at presidential debates.

Una nang inihayag ni COMELEC spokesman James Jimenez na ang town hall format ay ‘yaong mayroong audience na mabibigyan ng pagkakataon para makapagtanong sa mga kandidato. (Daris Jose)

‘Never-say-die spirit’ buhay na buhay – Cone

Posted on: April 25th, 2022 by @peoplesbalita No Comments

MARAMI ang nag-akalang hindi maidedepensa ng Barangay Ginebra ang kanilang korona dahil sa pagiging No. 6 team matapos ang elimination round at ilang injuries sa mga key players.

Ngunit noong Biyernes ng gabi ay muling tinalo ng Gin Kings ang Meralco Bolts sa championship series para pagharian ang PBA Governors’ Cup sa ikaapat na pagkakataon sa huling limang edisyon nito.

“It was a little bit shocking for us because we were so far down at one point and reached the bottom of the barrel,” sabi ni two-time PBA Grand Slam champion coach Tim Cone sa Ginebra.

Tinapos ng Gin Kings sa 4-2 ang kanilang best-of-seven title showdown ng Bolts tampok ang 103-92 panalo sa Game Six kamakalawa na sinaksihan ng 20,224 fans sa MOA Arena sa Pasay City.

Sinibak ng No. 6 Ginebra ang No. 3 TNT Tropang Giga, 115-95, sa quarterfinals bago pinatalsik ang NLEX, 4-1, sa kanilang best-of-five semifinals duel para itakda ang Finals rematch sa Meralco.

Laban sa Bolts, bumangon ang Gin Kings mula sa 1-2 agwat sa serye para agawin ang Game Four, 95-84, Game Five, 115-110, at Game Six, 103-92, at angkinin ang ika-14 PBA championship.

“We have a very veteran team, a great veteran leadership and they really stepped up and showed the never-say-die spirit,” sabi ng 62-anyos na si Cone kina Best Import Justin Brownlee, Best Player of the Conference Scottie Thompson, guard LA Tenorio at Christian Standhardinger.

Naidepensa ng Ginebra ang kanilang titulo nang wala sina injured Stanley Pringle, Japeth Aguilar at Jared Dillinger.

“This conference is special in a lot of ways… due to the pandemic,” wika ng 33-anyos na si Brownlee. “There’s a lot of things going on and for us to comeback in the Philippines and win a championship is a great feeling.”

Sa PBA Season 47 sa Hunyo ay muling pupuntiryahin ng Ginebra ang Philippine Cup crown na inagaw sa kanila ng TNT noong nakaraang taon.

LTFRB: May libreng sakay puntang PITX, NLET

Posted on: April 25th, 2022 by @peoplesbalita No Comments

SINIMULAN ng Land Transportation Franchising and Regulatory Board (LTFRB) ang pagbibigay ng libreng sakay sa mga pasahero ng mga pampublikong transportasyon papuntaSng mga terminals ng Paranaque Integrated Terminal Exchange (PITX) at North Luzon Express Terminal (NLET).

Ang programa ay kasama sa third leg ng service contracting ng pamahalaan kung saan ang mga pampublikong transportasyon ay nagbibigay ng libreng sakay sa mga pasahero.

“Free rides would be provided by PUVs from the North Luzon Express Terminal going to Araneta Center in Cubao and from NLET going to the Paranaque Integrated Terminal Exchange,” wika ng LTFRB.

Magsisimula ang unang biyahe ng 1:00 ng umaga at matatapos ng 12:00 ng hatinggabi. Sinigurado ng LTFRB na maglalagay sila ng sufficient na bilang ng mga PUVs upang masiguro ang ligtas at walang problemang paglalakbay ng mga pasahero.

Kasama rin sa programa ang pagbibigay ng libreng sakay sa EDSA carousel at ibang ruta. Inaasahan na ang programa ay makakapagbigay ng serbisyo sa may mahigit na 93 million na pasahero.

Ating matatandaan na naputol ang nasabing programa subalit muling binalik nitong nakaraang linggo lamang upang makatulong sa mga PUV drivers at operators ngayon panahon ng pandemya.

“The Service Contracting Program also aims to provide financial support to transport service providers and workers through a performance-based payout system. Under the program, drivers and operators will be paid by the Land Transportation Franchising and Regulatory Board (LTFRB) based on the maximum based on the maximum trips made per week, with or without passengers and in compliance with the agreed-upon performance indicators,” dagdag ng LTFRB.

Ang programa ay may pondong P7 billion para sa Phase 3 ng Service Contracting kung saan ang Department of Budget and Management (DBM) ay naglaan ng pondo.

Sa ilalim din ng programa sa service contracting, ang PUV operators ay bibigyan ng one-time incentive na P5,000 kada unit bilang “pre-operating costs.” Habang ang operational incentives ay ibibigay kada linggo. Kasama dito ang mga gastos para sa fuel expenses, disinfection, at monthly amortization at iba pang overhead expenses kung saan ito ay babayaran din ng pamahalaan.

Ang programang ito ay inilungsad sa ilalim ng Republic Act 11494 o ang tinatawag na “Bayanihan To Recover as One Act” kung saan ito ay naglalayon na magbigay ng pansamantalang kabuhayan sa mga mangagawa sa sektor ng transportasyon sa gitna ng pandemya.

“The latest implementation of the program was included in the General Appropriation Act (GAA) for the Fiscal Year 2022 and aims to ensure efficient and safe operations of PUVs, provide financial support to transport operators and workers, and sustain support to Filipino workers and commuters,” ayon pa rin sa LTFRB. LASACMAR