MAY HIGIT kumulang na 1.2 million na mga drivers ng tricycle ang maaaring mabigyan ng fuel subsidy mula sa pamahalaan.

Ito ang sinabi ni Department of Interior and Local Government (DILG) secretary Eduardo Ano sa isang panayam.

Inutusan ni Ano ang mga local government units (LGUs) na magbigay ng listahan ng mga pangalan ng mga tricycle drivers at operators na magiging eligible sa nasabing programa ng fuel subsidy.

“More or less the estimate is about 1.2 million tricycle drivers. Some LGUs have already submitted their list of beneficiaries,” wika ni Ano.

Ang nasabing listahan ay ibibigay sa Land Transportation Franchising and Regulatory Board (LTFRB) na silang naatasan na mamahagi ng fuel subsidy sa mga beneficiaries na naaapektuhan ng patuloy na pagtaas ng krudo at iba pang produktong petrolyo. Bawat isang beneficiary ay makakatangap ng one-time payment na P6,500.

Nabigyan na ng exemption ang petisyon na inihain ng LTFRB para sa pagbibigay ng fuel subsidy sa mga drivers at operators ng Commission on Elections (Comelec) subalit hindi pa rin maipagpatuloy ang programa sapagkat hinihintay pa ng LTFRB ang resolusyon na mangagaling sa Comelec.

Sa ilalim ng Comelec Resolution 10747, ang mga ahensiya ng pamahalaan ay pinagbabawalan na mamigay ng mga cash assistance mula March 25 hanggang May 8 kung kayat naghain ng petisyon ang LTFRB para sa exemption.

Ayon sa Comelec, ang petisyon ay pinahintulutan subalit kailangan na sumailalim ang programa sa mahigpit na implementasyon.

“The LTFRB’s petition was granted but subject to strict implementation of the program as we would require the board to submit information on how the project will be implemented,” wika ni Comelec Commisisoner George Garcia.

Idiniin din ni Garcia na kailangan din malaman ng Comelec ang mga parameters ng implementasyon lalo na ang specific target beneficiaries at kung paano sila makakuha ng nasabing benipisyo.

“We also want to know the parameters of the implementation, specifically on the specific target beneficiaries and on how they intend to apply to avail themselves of the grants, among other conditions,” dagdag ni Garcia.

Ang mga nasabing kondisyon ay ilalagay sa ibibigay na resolusyon ng Comelec na inaasahang lalabas sa lalong madaling panahon.

Sinabi pa rin ni Garcia na madali ng mapapatupad ang implementasyon ng programa sa fuel subsidy basta nabigay na ang resolusyon mula sa Comelec na nagsasaad ng mga kondisyon sa implementasyon ng program.

Hinihintay na lamang ng LTFRB ang resolusyon na magmumula sa Comelec upang masimulang muli ang pamamahagi ng fuel subsidy sa mga PUV drivers at operators.

Habang hinihintay pa ang resolusyon, ang LTFRB naman sa ngayon ay nakikipagugnayan sa Land Bank of the Philippines (LBP) na siyang namamahagi ng cash subsidy upang tanggapin nila ang kanilang authority para madebit ito sa mga beneciaries.

“What we forwarded are news links of the Comelec’s announcement so that when the resolution finally gets released, the cash subsidy would only need to be credited immediately,” saad ni LTFRB executive director Cassion.

Samantala, pinuri naman nila Senators Grace Poe at Panfilo Lacson ang Comelec dahil sa desisyon nito at sa madaling aksyon na binigay ng Comelec. Hinimok naman ni Poe ang LTFRB na dapat siguraduhin na ang fuel subsidy ay talagang makakarating at maibibigay sa mga PUV drivers at operators. LASACMAR

HINDI sigurado ang Malakanyang kung ilalabas ni Pangulong Rodrigo Roa Duterte ang listahan ng narco-politicians bago pa ang May 9, 2022 national at local elections.

“On whether the Chief Executive would release a list of candidates involved in illegal drug trade, we cannot second guess the President in this regard,” ayon kay acting Presidential Spokesperson at Communications Secretary Martin Andanar sa isang kalatas.

Matatandaang, may inilabas din na drug list ang Pangulo noong 2019 midterm elections.

Ang pahayag na ito ni Andanar ay tugon sa tanong ng mga mamamahayag kung may posibilidad na isapubliko ng Pangulo ang tinatawag nitong “narco list” na naglalaman ng mga pangalan ng mga politiko na dawit sa ilegal na droga.

Bago pa isagawa ang May 2019 midterm elections, isa-isang pinangalanan ni Pangulong Duterte ang ilang politiko na di umano’y sangkot sa illegal drug trade, layon nito na tulungan ang publiko na pumili ng tamang kandidato.

Ginawa ng Punong Ehekutibo ang hakbang na ito upang matiyak na makapipili ang mga botanteng filipino ng “competent, able, [and] honest” na kandidato noong 2019 polls.

Bagama’t hindi naman sinabi ni Andanar na gagawin ngayong taon ito ng Pangulo, sinabi ni Andanar na nagpahayag ng pagsuporta si Pangulong Duterte sa mga kandidato na suportado ang kanyang mga programa at polisiya.

“President Rodrigo Roa Duterte would surely give support to candidates he believes will continue his platform and the reforms he initiated,” ani Andanar.

Magugunitang, noong Marso 31 ay sinabi ni Pangulong Duterte na umaasa siya na ang kanyang successor ay masigasig din na haharapin ang problema ng ilegal na droga sa bansa.

Nais din ng Pangulo na talakayin ang kanyang anti-narcotics drive sa susunod na Pangulo ng bansa.

Tumanggi naman ang Pangulo na mag-endorso ng kahit na sinumang presidential candidate sa nalalapit na halalan upang maiwasan ang pagdududa na gagamitin niya ang public funds para pondohan ang campaign activities ng kanyang successor. (BISHOP JESUS “JEMBA” M. BASCO)

PINAG-INGAT ng simbahan ang mga mananampalataya sa mga aktibidad na gagawin kasabay nang pag-aayuno sa nalalapit na Holy Week.

Ayon kay Fr. Jerome Secillano, ang Executive Secretary ng Permanent Committee on Public Affairs ng Catholic Bishops’ Conference of the Philippines, bago pa man nagkaroon ng pandemya ay sinasabi na ng Simbahan sa mga mananampalataya na hindi naman kailangan na magpapako sa krus para lang mapatawad ang kasalanan.

Kung pagpapatawad lang naman ang kailangan, sinabi ni Fr. Jerome na sapat na ang pangungumpisal.

Maaari naman kasi aniyang gawin pa rin ang penitensya pero hindi naman ibig-sabihin nito ay kailangan ding saktan ang sarili.

Iginiit ni Fr. Jerome na sa lahat ng mga posibleng gawin para sa nalalapit na Holy Week, ang pinakamahalaga pa rin ay ang pagdarasal.

Ito ay lalo pa at nahaharap pa rin ang bansa sa banta ng Coronavirus Disease 2019, kahit pa pinayagan na ang 100 percent capacity sa mga simbahan sa ilalim ng Alert Level 1.

Kaya naman kahit ang nakaugalian nang Station of the Cross ay puwede naman gawin kahit nasa loob lang ng bahay.

Sa darating na April 10, ay papasok na ang Palm Sunday o Linggo ng Palaspas na siyang hudyat ng pagsisimula ng Holy Week/Mahal na Araw.