INAPRUBAHAN ni Pangulong Rodrigo Roa Duterte ang rekomendasyon ng Inter-Agency Task Force (IATF) na ilagay ang Cebu Province sa General Community Quarantine (GCQ) “with heightened restrictions” mula sa Modified Enhanced Community Quarantine (MECQ) simula ngayong araw, Agosto 1 hanggang Agosto 15, 2021.

Nire-classify din ang GCQ “with heightened restrictions status” ng Laguna at Aklan, at isinapinal na gawin itong MECQ mula Agosto 1 hanggang 15, 2021.

Ang Apayao ay inilagay din sa ilalim ng MECQ mula GCQ simula Agosto 1 hanggang Agosto 15, 2021.

Samantala, inaaprubahan naman ng IATF ang pagpapaikli sa “detection to isolation/quarantine interval” ng limang araw.

Kabilang na rito ang pagsasagawa ng paghahanap ng mga active case sa lahat ng lugar kung saan prayoridad ang may clustering; ang pag-trace sa mga “close contacts of suspect, probable, and confirmed cases sa loob ng 24 oras ng detection ng kaso; agarang isolation /quarantine and testing ng kaso at close contacts; paggamit ng rapid antigen tests para sa confirmation ng suspect/probable case at close contacts; RT-PCR testing na nag-negatiive ang resulta sa rapid antigen testing.

Bukod dito, kabilang din ang pag-identify sa mga lugar na may matataas na kaso o clustering ng local government units (LGUs) at regional epidemiological surveillance units at ng kanilang agarang pagsusumite ng samples para sa sequencing; tiyakin na ang workplaces at establishments ay nagsasagawa ng daily health at exposure screening, i-report ang identified case at close contacts sa LGU, at makipagtulungan para sa imbestigasyon at pagtugon; ikinunsidera ang insentibo sa mga workplaces upang hikayatin ang mga ito na mag-report at sumunod saa isolation/quarantine.

Inaprubahan din ng IATF ang implementasyon ng pagbibigay prayoridad sa facility-based isolation at quarantine para mapigilan ang household transmission; siguraduhing available at accessible ang health care capacities at sistema sa paghahanda sa pagtaas ng kaso; pataasin ang pagbabakuna sa hanay ng Priority Groups A2 at A3 populations na may “parallel efforts” ng pagbabakuna sa A4 population.

“If resources are adequate,” ayon kay Sec. Roque.

Mahigpit na pagpapatupad ng border control protocols sa lahat ng ports of entry; patuloy na assessment ng COVID-19 situation sa lahat ng antas at pagpapakalat ng impormasyon ukol sa “variants of concern” at inaasahang aksyon na gagawin ng indibiduwal, establisimyento at nagpapatupad. (Daris Jose)

MAAARING payagan pa rin ng pamahalaan ang public transportation sa panahon na ipinatutupad na ang enhanced community quarantine (ECQ) sa Metro Manila dahil sa vaccination program.

Sinabi ni National Task Force against COVID-19 spokesperson Restituto Padilla Jr. na target kasi ng Kalakhang Maynila na makapagbakuna ng 250,000 katao kada araw sa gitna ng pinahigpit na uri ng quarantine simula Agosto 6 hanggang 20.

“Hindi na hihigpitan siguro nang lubos sa transportation sector dahil isang anunsyo na nilabas ni (presidential spokesman) Secretary Roque kamakailan ‘yung pagpapatuloy ng vaccination. Maski tayo naghihigpit sa ECQ, increased ramp up ang pagbabakuna ng kababayan,” ayon kay Padilla.

Tugon ito ni Padilla sa tanong sa kanya kung opsyon ba ng NTF na babawasan ang bilang ng public transportation.

Dahil na rin sa mayroong “race against time” para sa pagbabakuna, sinabi ni Padilla na inaasahan nila na darating na sa bansa ang 16.5 milyong doses ng COVID-19 vaccines ngayong buwan ng Agosto.

“Sinusubukan dagdagan pa ito,” aniya pa rin.

Sa kasalukuyan, wala pa silang naipalalabas na guidelines para sa transportation sector  sa oras na maipatupad na ang ECQ.

Nauna rito, ipinanukala na ng transportation sector sa pamahalaan na panatilihin ang kasalukuyang public transportation supply sa panahon ng two-week ECQ.

Sa patuloy na pagtaas ng bilang ng Delta variant COVID-19 cases, nagdesisyon ang pamahalaan na muling ipatupad ang ECQ, “strictest quarantine status,” na napagkayarian matapos na umapela ang Metro Manila Council para sa “stricter measures’ sa Kalakhang Maynila. (Daris Jose)