Aabot sa P3.15 billion tax liabilities ang inaasahang makokolekta ng gobyerno, kapag natapos ang paghahabol sa 84 na sinampahan ng kaso sa first half ng taong 2021.

Iniulat din ng Bureau of Internal Revenue (BIR) na may 274 firms silang naipasara, para mabawi ang P1.014 billion unpaid taxes.

aliban sa mga ito, mayroon ding 17 kaso na ang nai-akyat sa Court of Tax Appeals (CTA), hanggang nitong nagdaang buwan ng Hunyo.

Kung magtatagumpay ang mga kasong ito, makakakolekta ang pamahalaan ng P1.54 billion para sa total tax liabilities ng mga inirereklamo.

Ayon kay BIR Deputy Commissioner Arnel Guballa, ang kampanya ng kanilang kawanihan laban sa mga hindi nagbabayad ng buwis at hindi nagdedeklara ng tamang buwis ay nakapaloob sa programang Run After Tax Evaders (RATE).

Iniulat ng Food and Drugs Administration (FDA) ang mga “breakthrough COVID-19 infections” sa mga indibidwal sa kabila na sila ay mga nabakunahan pero ito ay maliliit lamang na bilang o porsyento.

As of August 1, mayroong 116 kaso ng COVID infection sa mga indibidwal na fully vaccinated kung saan 88% dito ay mild at asymptomatic, 11% ang na-admit sa ospital at mayroong isang nasawi.

binahagi ni FDA director general Eric Domingo, may mga indibidwal na nagpositibo sa COVID-19 matapos na mabakunahan ng unang dose ng vaccines na nasa 546 cases habang nasa 61 naman ang nasawi.

Nasa 51 COVID-19 cases naman ang naitala matapos na maturukan ng ikalawang dose at dalawa ang fatalities.

Samantala nasa 116 indibidwal naman ang na-infect pa rin ng coronavirus matapos ang 14 na araw mula ng mabakunhan ng ikalawang dose o itinuturing na fully vaccinated na kung saan isa ang nasawi.

Paglilinaw ni Domingo, ang ikinamatay ng mga nabakunahang indibidwal ay dahil sa COVID at hindi dahil sa bakuna.

Nakadepende rin kasi aniya sa lebel ng reaksiyon ng katawan ng isang indibidwal sa bakuna at level ng immunogenicity na nage-generate ng katawan kung saan nakita na karamihan aniya sa mga nagpositibong indibidwal na nakakaranas ng mild symptoms ng COVID o kaya naman ay asymptomatic.

Sa kabila nito, nasa maliit lamang aniya na porsyento ang nagpopositibo sa COVID-19 na nasa less than 1% ng kabuuang bilang ng mahigit 9 million na fully vaccinated kontra coronavirus.

Nilinaw din ni Usec. Domingo na nakadepende sa porsyento ng mga nabakunahan ng partikular na brand ng COVID vaccines ang dami ng bilang ng nagpositibo gaya ng Sinovac at Astrazeneca na pinaka-dominant na bakunang ginagamit sa vaccination program ng ating bansa.

Mas matimbang pa rin ang benepisyo ng bakuna para maiwasan ang severe cases at death mula sa respiratory disease kaya mahalaga aniya na makompleto ang bakuna.

Base sa pinakahuling datos hanggang Agosto 1, nasa 11.7 million partially vaccinated o nakatanggap na ng unang dose ng COVID-19 vaccine habang nasa 9.1 million naman ang fully vaccinated sa bansa.

“There is no vaccine with 100% efficacy. It really depends on each and every person. We don’t have the same level of reaction to vaccines and the level of immunogenicity generated by our bodies differs,” ani Domingo. “The chance, probability of getting COVID-19 drastically decreases once you complete your vaccination.”

ITINALAGA ni pangulong Rodrigo Duterte ang 27-anyos na anak ni Malabon City Rep. Jaye Lacson-Noel at An Waray Party-list Rep. Florencio ‘Bem’ Noel bilang miyembro ng Sangguniang Panlunsod at kapalit ng isang konehal na may sakit.

Ayon kay Lacson-Noel, ang pagkakatalaga sa kanyang anak na ngayon ay si Councilor Regino Federico ‘Nino’ Noel, ay nilagdaan ng Presidente noong August 2, 2021 at parehong ipinasa sa opisina ni Secretary Eduardo Año, ng Department of the Interior and Local Government (DILG), para sa pagpapatupad.

Pormal na ipinadala ni Año ang appointment paper na may petsang August 11, 2021 sa bagong miyembro ng konseho at inatasan siyang magsumite ng isang kopya ng kanyang panunumpa sa tanggapan ng Pangulo at DILG.

Inaasahang manunumpa si Konsehal Noel ngayong araw (Biyernes) kay Mayor Antolin ‘Lenlen’ Oreta III at sasaksihan ng presiding officer ng konseho na si Vice Mayor Bernard ‘Ninong’ dela Cruz, mga kasamahan at ng kanyang ipinagmamalaking magulang.

Ang batang Noel ay papalit kay Councilor Edwin Gregorio Dimagiba, isang veteran local legislator at dating Nationalist People’s Coalition (NPC) party-mate, na may problem sa puso.

Si Dimagiba ay malapit na kamag-anak ng mambabatas ng Malabon na nagpahayag ng kanyang pasasalamat sa Pangulo sa pagbibigay ng pagkakataon sa kanyang anak na maglingkod sa mga residente bilang kasapi ng konseho ng lungsod.

“I and Congressman Bem were so thankful to President Duterte for appointing our son as newest member of Malabon Council. He has been active in the city even before his appointment and has been my companion especially during this pandemic in providing all forms of assistance to the city folks,” pahayag ni Lacson-Noel.

Ayon sa kanya, kasama sa mga adbokasiya ni Councilor Noel ang mental health, environmental protection, financial literacy pati na rin ang youth empowerment. (Richard Mesa)

Arestado ang isang lalaki na nagawang pasukin ang isang saradong bangko para magnakaw sa pamamagitan ng pagsira ng glass panel nito sa Caloocan City, kamakalawa ng gabi.

Ayon kay Caloocan police chief P/Col. Samuel Mina, nagawang matunton at maaresto ng mga tauhan ng Grace Park Police Sub-Station 2 sa pangunguna ni P/SSgt. Herbert Martinez at Pat. Mark Bryan Ballicud si Mark Joseph Lomeda, 27 ng 1154 Masagana St. Heroes Del 96 Bryg. 73, habang gumagapang sa kisame ng second floor ng PS Bank branch sa Rizal Avenue Ext. near corner 10^th Avenue, Grace Park dakong alas-11 ng gabi.

Sa imbestigasyon nina P/Cpl. Niño Nazareno Paguirigan at P/SSgt. Arjay Terrado, dakong alas-8:40 ng gabi, nakatanggap ng tawag ang PS Bank Inspector na si Rene Cerbana, 43, mula sa head office ng PS Bank sa Makati City at ipinaalam sa kanya na isang hindi kilalang lalaki ang nakita ng CCTV operator sa loob ng premises ng bank branch sa Caloocan.

Kaagad nagtungo si Cerbana at kanyang kasama na si Elvis Abdon, 29, sa naturang lugar at nang mapansin nila ang basag na glass panel ay sumilip sila sa loob ng bangko kung saan nakita nila ang suspek na gumagala sa loob.

Humingi ng tulong ang dalawa sa pulisya na nagresulta sa pagkakaaresto sa suspek at narekober sa kanya ang isang Bluetooth speaker at bala ng cal. 38.

Iprinisinta ang suspek sa inquest proceeding sa Caloocan City Prosecutor’s Office para sa kasong robbery at paglabag sa R.A. 10591 o Comprehensive Firearms and Ammunition Regulation Act. (Richard Mesa)