Kinondena ni Manila Apostolic Administrator Bishop Broderick Pabillo ang pagpapatigil ng pamahalaan sa siyam na taong moratoryo sa pagmimina.

Ayon kay Bishop Pabillo, hindi naaangkop ang naging desisyon ni Pangulong Rodrigo Duterte dahil lalo lamang itong magpapalala sa iba’t ibang kaganapang nangyayari sa ating kapaligiran.

Dagdag pa ng Obispo na maaaring ito’y ipinatupad ng Administrasyong Duterte upang mapagkunan ng pondo ng mga “corrupt” na opisyal ng pamahalaan para pagkunan ng panggastos sa darating na eleksyon.

“Napapatunayan naman na hindi naman ‘yan nakakatulong sa development natin at ang nakikinabang lamang d’yan ay ang corrupt na mga opisyales. Kaya baka naman ‘yan ay ginawa para makakuha ng pera para sa eleksyon,” bahagi ng pahayag ni Bishop Pabillo sa panayam ng Radio Veritas.

lIpimaliwanag ni Bishop Pabillo na sa halip na makatulong ang pagmimina sa pag-unlad ng bansa ay lalo lamang itong magdudulot ng pagbabago sa klima ng mundo at nakasisira sa likas na yamang tahanan ng iba’t ibang uri ng buhay.

Pinangangambahan rin nito na higit na maaapektuhan ng desisyon ng pamahalaan ang mga katutubong naninirahan sa mga kabundukan at kagubatan na nakakaranas ng pananakot at pinaaalis sa kanilang mga lupaing minana upang maisagawa ang mapaminsalang pagmimina.

Apektado nito ang mga karagatan at lupaing sakahang pangunahing pinagkukunan ng hanapbuhay ng mga mangingisda at magsasaka.

“Nakikita po nating nakakasira lamang ito sa environment at ang mga taong tatamaan n’yan ay ang mga katutubo at mga maliliit na mangingisda at magsasaka,” saad ni Bishop Pabillo.

Hinihiling naman ng Obispo, na siya ring chairman ng Catholic Bishops Conference of the Philippines-Episcopal Commission on the Laity na mas makabubuting baguhin ang Philippine Mining Act of 1995 upang maisagawa sa tamang paraan ang pagmimina na hindi magdudulot ng matinding epekto sa tao at iba’t ibang likas na yaman.

“Dapat irevise ang mining law ng 1995 kasi extractive ang batas na yan. Kinukuha lang ang ating mineral resources na hindi naman bumabalik sa atin,” saad ng Obispo.

Batay sa mga pag-aaral, kakaunti lamang ang naiaambag ng pagmimina sa kabuuang ekonomiya ng bansa at hindi rin ito nakakapaglikha ng pangmatagalang hanapbuhay sa mamamayan sapagkat naitala lamang sa isang porsyento ang mga manggagawa nito sa pangkabuuang workforce ng bansa.

KASALUKUYAN nang sinisimulan ngayon ang pag-aaral ng mga developed country ukol sa natuklasan ng mga eksperto na kondisyon ng mga Covid-19 patients na nakararanas pa rin ng sintomas ng virus ng hanggang anim buwan na tinatawag na long COVID o long haulers.

Sinabi ni Inter-Agency Task Force (IATF) sub- technical working group member on data analytics Dr John Wong na nakita ng mga Foreign health experts na 20 hanggang 30 porsiyento ng mga pasyente ang mayroon pa ring covid19 symptoms makalipas ang anim na buwang gamutan.

Aniya, hindi pa batid ng karamihan ang kondisyon na ito at wala pang nadidiskubreng epektibong gamot laban dito.

Kabilang ang bagay na ito sa mga dapat na matutukan ng pamahalaan lalo pa’t halos nasa isang milyon na ang covid cases sa bansa.

Wala namang ideya si Wong kung may mga ginagawa nang pag-aaral ang Pilipinas ukol sa bagay na ito dahil hindi naman umano siya involved sa anumang clinical study ukol dito. (Bishop Jesus “Jemba” M. Basco)

LUNGSOD NG MALOLOS– Maaari nang magsimula sa proseso ang mga Bulakenyong estudyante na nagnanais na magpatuloy ng libreng pag-aaral sa pagbubukas ng Bulacan Polytechnic College ng aplikasyon para sa pagpasok at pre-enrollment para sa Taong Pampaaralan 2021-2022 noong Abril 22, 2021 at tatagal hanggang Agosto 15, 2021.

Sinabi ni Gobernador Daniel R. Fernando na hindi mapipigil ng pandemya ang pamahalaan sa pagbibigay ng libre at dekalidad na edukasyon para sa mga nasasakupan nito.

“Kahit na tayo po ay nasa gitna ng pandemya, may mga paraan po tayo upang maipagpatuloy ang pag-aaral ng ating mga kabataan. Libre po ito, walang bayad. Ngunit maaari po natin itong maibalik sa ating bansa sa pamamagitan ng pag-aaral ng mabuti, pagtatapos, at paggamit ng ating mga natutunan upang mapaunlad ang ating sarili, ang ating pamilya, at ang ating komunidad,” anang gobernador.

Kailangang magsumite ang mga bagong estudyante at transferees ng kopya o larawan mula sa cellphone camera ng mga requirements kabilang ang isang  2×2 colored picture na may puting background; report card o Transcript of Record o Certificate of Grades; at PSA Certificate of Live Birth. Kailangan ding magpasa ang mga transferee ng Good Moral certificate bilang karagdagan sa mga binanggit na requirements.

Mayroong iba’t ibang degree at mga kurso ang Commission on Higher Education (CHED) na iniaalok sa lokal na kolehiyo ng lalawigan sa pamamagitan ng blended learning kabilang ang Bachelor of Science in Information Systems (BSIS), Bachelor of Science in Office Management, Bachelor of Science in Accounting Information System, Bachelor of Technical Vocational Teacher Education, at dalawang taong Associate in Computer Technology na maaaring i-ladderize sa BSIS.

Nagtuturo rin sila ng mga kursong technical at vocational kabilang ang dalawang taong Computer Secretariat with Competency in Bookkeeping NC III; dalawang taong Hotel and Restaurant Services (HRS) with competency in Food and Beverage Services NC II and Cookery NCII with integration of Bread and Pastry; isang taong Contact Center Services; isang taong Shielded Metal Arc Welding (SMAW) NCII; at isang taong Electrical and Installation Maintenance (EIM) NC II.

Iniaalok din ng BPC ang mga strand ng Senior High School na Accountacy, Business and Management; Humanities and Social Science; Technical-Vocational Livelihood; at General Academic Strand.

Para sa iba pang katanungan, maaaring dumirekta sa BPC Admission Office sa telepono bilang (044) 802-6716, cellphone number 0917-7111-690, Facebook page @bpcMalolosMainCampus, at website https://bulacanpolytechniccollege.com.

Mayroong walong campus ang BPC sa buong lalawigan kabilang ang Malolos Main, at mga campus sa Angat, Bocaue, Pandi, Obando, San Rafael, San Miguel, at Lungsod ng San Jose del Monte. (Bishop Jesus “Jemba” M. Basco)